Luka̱ 6

Ja xi kjibakuyáre̱ Jesuu̱ tuꞌe trigo̱ inchabate

(Mt 12.1-8; Mr 2.23-28)

1Ngu ni̱tjin xubato, Jesuu̱ kju̱ ja xi kjibakuyáre̱ tjima ndiya jma kjiꞌi ngu jnu̱ꞌe̱n trigo̱. Kui nga tsja tsateju̱ enꞌen trigo̱ ku tsja kitsungaya nga kitsitsje tuꞌe ku inchakjine.

2Kubé xu̱ta̱ fariseo̱ nga ku̱a̱cha inchatsiꞌin ja xi kjibakuyare Jesuu̱, ku ku̱i̱cha kitsú nga tsichja

—Mí xá tsikitjusunjín kju̱a̱kixi. ¡Majín ku̱a̱cha ñaꞌan nga ni̱tjin nikjaya!

3Skengi Jesuu̱, ku̱i̱cha kitsúre̱:

—A kje ꞌbexkiyajíjnu Xu̱ju̱n Enꞌen Namiña Diuu̱ kúcha kitsiꞌin Xta̱xá Ndabi̱, nga kubajóre, kuí kju̱ ja xi jña tjima. 4Tsasꞌen Ndabi̱ niꞌyaꞌe̱ Namiña Diuu̱, skabe ni̱pan xi je kuchakún, xi tujma ja chanaꞌmitsje xi ma kjine, ku kiskiné kuí kju̱ ja xi jña tjima. 5Án, Kjindiꞌe xu̱ta̱ nga̱sunde, án xi xínꞌa̱n najmi xi ma ñaꞌan ku xi majín ñaꞌan nga ni̱tjin nikjaya.

Nga kitsindaya Jesuu̱ ngu xta̱ nga ni̱tjin xubato̱

(Mt 12.9-14; Mr 3.1-6)

6Kjaꞌi ni̱tjin xubato̱ni, ni̱ngu̱xi̱ kijí Jesuu̱ nga̱tꞌa mejénre bakuyare xu̱ta̱. Ku kꞌi̱a̱ kjitjián ngu xta̱ xi kixí tsja ngandá.

7Ja fariseo̱ kju̱ chjine Kju̱a̱kixiꞌe̱ Namiña Diuu̱, inchabaseꞌmáre̱ Jesuu̱, tsatuꞌa nga tsindaya tsja kui xta̱. Tsa ku̱a̱cha tsiꞌin, ma batejené nga̱tꞌa ni̱tjin nikjaya tjitsixá.

8Kubéni Jesuu̱ najmi xi inchatsikjo, kui nga tsichjáre̱ kui xta̱ xi majín tsikjaniya tsja ku ku̱i̱cha kitsúre̱: «Tisitjéin, ku ngabasénꞌe̱n ngieje xu̱ta̱ tisín.»

Isitjén xta̱ ku kisasen ngabasen ngajinꞌen xu̱ta̱.

9Jaskan Jesuu̱ ku̱i̱cha kitsúre̱ ngieje xu̱ta̱ xi kꞌi̱a̱ incha: «Minengiyamájnu ngu najmi: “Mí xi ndá ñaꞌan nga ni̱tjin nikjaya. A nga ñaꞌan ngu najmi xi ndá, axu̱ nga ñaꞌan ngu najmi xi ndáji. A nga nindaya ngu xu̱ta̱ a xu̱ nga nichaja.”»

10Ku tsasére̱ ngieje xi kꞌi̱a̱ tjima, sꞌei ku̱i̱cha kitsúre̱ kui xta̱: «Tjentéi ndsaji».

Yente tsja xta̱, ku kundayáni.

11Ta̱nga kui ja xi inchabase tuxi ndá kitsiti ku kꞌi̱a̱ tsaꞌangíre̱ nga ꞌyenda kúcha tsindáre̱ jee Jesuu̱.

Nga jajín Jesuu̱ xi tejó xu̱ta̱ xi batetsajosún enꞌen

(Mt 10.1-4; Mr 3.13-19)

12Kui ni̱tjin, ngu naxi tsijín Jesuu̱ jma kikinengíre̱ kju̱a̱ndá Namiña Diuu̱. Kꞌi̱a̱ kumáre̱ ngu ni̱tje̱n nga tsichajo̱ Namiña Diuu̱. 13Xi ma nganchajun tsichjáre̱ ngieje xu̱ta̱ xi tjimatje̱ngíre̱ ku tejó xiꞌin jajín xi fueju̱sún enꞌen, ku xi fueju̱ enꞌen kitsúre̱. 14Kui ja, xi ꞌmí Ximo̱ Pe kitsikꞌín, kju̱ tsꞌe̱ xi ꞌmí Jandre; Santia, Jua, Lipe, Bartolome̱, 15xi ꞌmí Mateo̱ kju̱ Toma; Santia tiꞌe̱ Alfeo̱, ku Ximo̱ xi chja̱ ja patriota̱; 16Juda̱ tiꞌe̱ Santia, ku Juda̱ Iskariote̱, xi jaskan skabe nga̱tun Jesuu̱.

Nga ikuya ku kitsindaya xu̱ta̱ Jesuu̱

(Mt 4.23-25)

17Jesuu̱ ku xi tejó xiꞌin xi kitsingiya nga batetsajosún Enꞌen Namiña Diuu̱ ku jajen na̱xi̱ ku kijí ngatje̱n nangi sun. Kꞌi̱a̱ tuxi kjínma xu̱ta̱ xi sꞌejínre nga̱tꞌaꞌe xi je sindutku . Tekuácha kꞌi̱a̱ tuxi kjínma xu̱ta̱ xi chja̱ nangi Judea̱ xi inchakuya, kju̱ xi chja̱ Jerusalen, kju̱ xi chja̱ na̱xi̱nanda Tiro̱ ku Sido̱n. 18Kꞌi̱a̱ jichú ngieje kui xu̱ta̱ nga̱tꞌa mejénre nga tꞌere Jesuu̱ ku ngatsindaya chiꞌin xi tjínre. Xi ngayaꞌa̱sen xaba sindujín yajoꞌe̱ tekuácha kundaya. 19Ngieje nga mejénre nga kjingajun Jesuu̱, nga̱tꞌa bé nga tsindaya xu̱ta̱ ngaꞌñu xi bitjujín yajoꞌe̱ .

Kúcha tsichakunné xu̱ta̱ Namiña Diuu̱

(Mt 5.1-12)

20Jesuu̱ tuxi tsasére̱ ja xi kjibakuyáre̱ ku ku̱i̱cha kitsúre̱:

»Namiña Diuu̱ xi tsichakunnéjnu,

xi ni̱ma̱ tjimajnu,

nga̱tꞌa tsajun

jma batexuma Namiña Diuu̱.

21»Namiña Diuu̱ xi tsichakunnéjnu,

xi kjindiá tjibitjájnu kjatꞌei,

nga̱tꞌa chajayajíjnu xi chine.

»Namiña xi tsichakunnéjnu,

xi ngí sindujnu kjatꞌei,

nga̱tꞌa jaskan nga tsjua sꞌendújnu.

22»Namiña Diuu̱ xi tsichakunnéjnu ni̱tjin nga on tsikjeyájnu xu̱ta̱ ku én tsaꞌa ku̱i̱tsujnu, kútsa nga kumejínre jún xu̱ta̱ ku ngují xi mejénre nga kuichjaju̱jnu. Ku̱a̱cha tsꞌijúnjnu xu̱ta̱ nga̱tꞌa án nuꞌyaꞌénjnu, án nga Kjindiꞌe xu̱ta̱ nga̱sundeꞌa̱n. 23Tsjua tꞌendu̱jnu anima̱jnu, chikjikꞌájnu kju̱a̱tsuajnu, nga̱tꞌa je tjindáre̱ Namiña Diuu̱ nga tsjuájnu ngu kju̱a̱ndá xi tse. Janda ni̱tjin changa tekuácha kumá nga tekuíni xu̱ta̱ꞌe xi tuxi chꞌao kitsꞌiju̱n ja chjine Enꞌen Namiña Diuu̱.»

Kúcha tjin tseꞌe̱ nga nukjuataꞌin xu̱ta̱

24Jesuu̱ tsasére̱ xu̱ta̱ xi ngisa ku ku̱i̱cha kitsúre̱:

«¡Áchichi nga ndáji kjueyájnu jún,

xi tjínjnu tón,

nga̱tꞌa kjatꞌe tuxi chan ku chꞌan sindújnu!

25»¡Áchichi nga ndáji kjueyájnu jún,

xi inchaꞌbangijnu najmi xi tjichinejnu,

nga̱tꞌa kjindiá kuitja̱jnu!

»¡Áchichi nga ndáji kjueyájnu jún,

xi tjimijnújnu kjatꞌe,

nga̱tꞌa sꞌei chájnu xi ꞌmí kju̱a̱chikjindá

ku nga ngí ꞌbeña!

26»¡Áchichi nga ndáji kjueyájnu, xi tutsjai nga ndá chja̱ xu̱ta̱ ngatꞌajnu! Ni̱tjin changa, tekuíni xu̱ta̱ꞌe ndá tsichja nga̱tꞌaꞌe ja ndesu xi chjine Enꞌen Namiña Diuu̱ kitsúre̱ yajo̱ꞌe.

Nga nitjáo xu̱ta̱ xi taonre ñá

(Mt 5.38-48; 7.12)

27»Ndá nuꞌyájnu najmi xi mejénna nga xinjnu: Titjáojnu xu̱ta̱ xi táonre jún, ku ndá tikjeyájnu xi chꞌao tsikjeyájnu. 28Xi én tsaꞌá tsújnu, én ndá chjungii̱jnu. Tsa tjin xi tuxi kjin inchatsikjaꞌajnu, chjinengíjnu kju̱a̱ndá Namiña Diuu̱ nga̱tꞌaꞌe kui xu̱ta̱. 29Tsa tjin xi ꞌmujin nguá ndatsajnu, chinengiri nga ngatꞌujínnijnu xingua. Tsa tjin xi mejénre kjebaꞌájnu singa asújnu, titjuájnu kju̱a̱ nga fueju̱ tjiujún singajnu. 30Tsa tjin xi minengijnu ngu najmi, titjuájnu. Tsa tjin xi kjebaꞌájnu ngu najmi, ngatu̱ chjinengijíjnu nga tsikꞌuꞌbéjnu. 31Ku̱a̱cha tꞌiajúnjnu xu̱ta̱ xukúcha mejénjnu nga ꞌñaju̱njnu.

32»Tsatu̱ xu̱ta̱ xi tsitjótsejnu xi nitjojnu, ngují najmi tjiñaꞌánjnu xi tsikejénjnu ngu kju̱a̱ndá. ¡Janda xi yajáre̱ jee mare̱ ku̱a̱cha ñaꞌan! 33Kútsa ndá ñaꞌánjnu xki xi ndá tsiꞌínjnu xki̱ tekuácha ngují najmi tjiñaꞌánjnu xi tsikejénjnu kju̱a̱ndá. ¡Janda xi yajáre jee xi ku̱a̱cha tsiꞌin! 34Ku jún tsatu̱ xu̱ta̱ xi yátsejnu nga tjin najmi xi tsjuajnu xi nikenyájnu, ngují najmi tjiñaꞌánjnu xi tsubáre nga sakujnu ngu kju̱a̱ndá. Xu̱ta̱ xi tjínre jee tekuácha ndsiji̱n xikjíntse tsikenyáre̱ najmi, ku inchakuyare̱ nga tse tsiꞌin.

35»Titjojnu xu̱ta̱ xi tonre jún, tiaꞌánjnu najmi xi ndátjin ku tikenyájnu ngu najmi ta̱nga ngují kju̱a̱ndá chuyájnu. Tsanga kuácha ñaꞌánjnu Namiña Diuu̱, xi ꞌñu kꞌa nga ngieje, tsjuájnu najmi xi ndá, ku kjindiꞌe tsikꞌuyájnu. Janda xu̱ta̱ xi xaba kju̱ xi bejí xi ꞌmíre nikꞌuechji tekuixi ndá yaꞌa Namiña Diuu̱. 36Jún chjénre nga minchaju̱jnu ngieje xu̱ta̱, xuku Namiña Diuu̱, xi Namiña, baseju̱n ngieje xu̱ta̱.»

Nga majín tu̱chu̱ba̱ nikaꞌa jee xu̱ta̱

(Mt 7.1-5)

37Tekuachá kitsúre̱ Jesuu̱:

«Ngatu̱ naijín ꞌnatsjéjnu yajo̱jnu tsanga jún mejénjnu nitsjejnu najmi xi inchatsiꞌin kjaꞌi xu̱ta̱, ku tekuácha júnjín kuaseyájnu Namiña Diuu̱. Ngatu tajaji ñaꞌánjnu anima̱jnu nga̱tꞌaꞌe xu̱ta̱, ku tekuácha tajaji kꞌu̱a̱tsje yajoꞌe̱ Namiña Diuu̱ ngatꞌajnu. Tichatꞌajnu xu̱ta̱ ku tekuácha tsichatꞌájnu Namiña Diuu̱. 38Titjuájnu najmi xi machjénre kjaꞌi xu̱ta̱, ku tekuácha tsjuájnu Namiña Diuu̱ najmi xi inchamachjénjnu. Nga kju̱a̱xikjain, xukúcha nikjeyajnu ngu xu̱ta̱ tekuácha tsikjeyájnu Namiña Diuu̱. Tsa trigo̱ baꞌíjnu, kuácha janda xi tjitjuntjái tsaꞌe̱ trigo̱ xi sakujnu, ku kjuaꞌñujín tjínre nga jún faichjaꞌájnu.»

39Tekuácha inchandsijin én Jesuu̱ nga kitsuya:

«Ngu xu̱ta̱ xi tka̱ majín kui kjengi kjaꞌi xi tka̱, nga̱tꞌa ngiajo nga kumá bixú ngu ngaya ti̱xa̱. 40Xi sꞌei kjibakuya kuijí xi ꞌñu mare̱ nga xi kjibakú, ta̱nga nga je jetꞌare nga kjibakuya, tekuácha sku̱e̱ najmi xi bé xi kjibakúre.

41»Mí kju̱a̱ chaseri najmi xi ndáji tjin xi inchatsiꞌin kjaꞌi xu̱ta̱, ku chaseji najmi xi ndáji tjin xi tjiniꞌín. Janda xukutsa ngu xu̱ta̱ chaséri xi kjingi tje chubachi xku̱n, ku yijí tsa ngu tjiaꞌe̱ ya kjingi xkunji. 42Kúcha mári nga bixiri kjaꞌi xu̱ta̱: “Titjuéjna kju̱a̱ nga ꞌbatsjengiꞌan tjechi xi tjingi xkunji”, ku yiji nga ngu nduju̱ tjiaꞌe̱ ya kjingi tsi̱. ¡Xu̱ta̱ jó ngakjáin jí kua! Tjún natsjengima tjiaꞌe̱ ya xi kjingi xkunji, ku kjiatsa yi tjechi xi tjingi xkun xi kjaꞌi xu̱ta̱.»

Kúcha kitsuya Jesuu̱ tseꞌe ya kju̱ tu xi bajare̱

(Mt 7.17-20; 12.33-35)

43Tekuácha kitsúre̱ Jesuu̱:

«Ngují ya xi ndá ku tú xi ndáji bajare̱, ku ngují ya xi xaba ku tu xi ndá bajare̱. 44Tú xi bajare̱ nga ngu ngu ya kui xi tsuyáña tsanga ndá kutsa ndáji. Ngu yanaꞌya tsjuajíña ingo̱ ku̱tsa tutseje. 45Xu̱ta̱ xi ndá tutsjai nga najmi xi ndá tsiꞌin, najmi xi ndá tjínre anima̱ꞌen. Xu̱ta̱ xi xaba tutsjai nga najmi xi xaba tsiꞌin nga̱tꞌa najmi xi xaba tjínre anima̱ꞌen. Én xi bitju tsꞌuaji tsuya mí xi tjínre anima̱ri.»

Nga kitsuya Jesuu̱ nga jó tkuya xu̱ta̱ tjin

(Mt 7.24-27)

46Tuku tsichja Jesuu̱ ngisa, ku ku̱i̱cha kitsú:

«Bixujnu nga nukjuájnu nga Ndia̱jnu án, ta̱nga ñaꞌanjínjnu najmi xi xínjnu. 47Tsa tjin xi tsitiñána yajo̱ꞌe, ku tꞌe kju̱a̱kitakunꞌna̱ ku tꞌeꞌen najmi xi tebakuꞌan, 48xuku xu̱ta̱ xi ngasún ndia̱jo kitsindá niꞌyaꞌe̱. Ngu ti̱xa̱ xi tuxi nanga kitsindá, janda nga jichú jmá tjián ndia̱jo tse, ku kꞌi̱a̱ isensún niꞌyaꞌe̱. Nga kunanga̱ ndijua, tuxi ꞌñu tsentꞌare niꞌya ngaꞌñuꞌen ndijua. Ta̱nga janda janiyají kui niꞌya nga̱tꞌa ndá kundá.

49»Ta̱nga tsa tjin xu̱ta̱ xi tꞌena ku tsiꞌinjín xki̱ én xi techjaꞌa̱n, xukútse xi nangi inda kitsindasún niꞌyaꞌe̱. Jindibá ndijua xi sijen ku ꞌñu tsentꞌare niꞌya; tsenya kui niꞌya ku sku̱a̱n xu̱ba̱ꞌe̱ kuma nga ixundu.»

Currently Selected:

Luka̱ 6: MZI

Highlight

Copy