Luka̱ 4

Jesuu̱ kitsiꞌinre xindajin

(Mt 4.1-11; Mr 1.12-13)

1Ngaya asenꞌen Namiña Diuu̱ kitsjuáre ngaꞌñu Jesuu̱. Ku nga kitsikjínnire̱ yajoꞌe̱ Jesuu̱ jma tje̱n Ndana xi ꞌmí Jordan, tuku kui ngayaꞌa̱sen ikúre̱ ndiyá nga kijí nangi kixí.

2Ku kui nga̱nde, ngu xi yachán ni̱tjin, xindajin tsangitsjai nga mejénre̱ kitsiꞌín ndsen Jesuu̱ ku ngieje kui ni̱tjin ngují ni̱ñu̱ skine Jesuu̱. Nga jaꞌa xi yachán ni̱tjin, kjiátse janda kubajóre̱ Jesuu̱.

3Ku ku̱i̱cha kitsúre̱ xindajin:

—Tsa kjáin nga kjindiꞌe Namiña Diuu̱ji, tiꞌín manda nga ni̱pan ngatꞌuya kui ndi̱a̱jo̱.

4Ku Jesuu̱ ku̱i̱cha kiskengire̱:

—Ku̱i̱chá tsú Xu̱ju̱n Enꞌen Namiña Diuu̱: “Mítsa tu ngaꞌñuꞌéntse ni̱pan xi tjima xu̱ta̱”.

5Jaskan te̱ kitsiꞌínni xindajin, nga kiju ngu nga̱nde xi kꞌa kjitjián, kꞌi̱a̱ te̱ kijúni Jesuu̱. Nga je jichú kꞌiakua, ngutjútse ikúre ngieje na̱xi̱nanda xi ꞌñu tse tón ku ꞌñu tse ngaꞌñu tjínre, 6ku ku̱i̱cha kitsúre̱:

— Ngieje kui na̱xi̱nanda án kitsiꞌína, ku ma nga tsjuána tuꞌya xi mejénna̱. 7Tsa minchatꞌáina tki̱u̱ri ku án yatkꞌínna tsjuá ngiejera̱ kui na̱xi̱nanda.

8Ku Jesuu̱ ku̱i̱cha skengire:

—Ku̱i̱cha tsu Xu̱ju̱n Enꞌen Namiña Diuu̱: “Chatkunjnu Namiña Diuu̱ ku nuꞌyaꞌénjnu.”

9Nga kjuetꞌa, xindajin te̱ kijúni Jesuu̱ jan na̱xi̱nanda Jerusalen, janda jmá ꞌñu kꞌa ni̱ngu̱xi̱, ku kꞌi̱a̱ tekua kitsúnire̱:

—Tsa kjain nga kjindiꞌe Namiña Diuu̱ji tikjaꞌi yajori janda nangi, 10nga̱tꞌa ku̱i̱cha tsu Xu̱ju̱n Enꞌen Namiña Diuu̱:

“Namiña Diuu̱ tsingiya xi inchatsixatꞌáre

tuxi baseri.

11Kuí bakꞌangiri,

tuxi kuꞌaonjínre̱ saji

tsa ndi̱a̱jo̱ satere.”

12Skengi Jesuu̱:

—Te̱ ku̱i̱cha tjitsu Xu̱ju̱n Enꞌen Namiña Diuu̱: “Ngují ni̱tjin tsa ndsen mejénri nga niꞌín ku nikejei̱n Namiña Diuu̱.”

13Xindajin tuxi kjín tkuya mejénre nga tsꞌanachaju Jesuu̱, ku nga je ngite bejí kúcha tsiꞌin, chu̱ba̱ ni̱tjin kitsikjin yajoꞌe̱.

Jichu ni̱tjin nga tsaꞌangire̱ xáꞌe Jesuu̱

(Mt 4.12-17; 13.53-58; 1.14-15; 6.1-6)

14-15Kijíni Jesuu̱ nangi Ngalilea̱ ku tuxi ndá yaꞌa ngaꞌñuꞌen Ngayaꞌa̱senꞌen Namiña Diuu̱. Nga ngu ngu ni̱ngu̱xi̱ xi tjin jmá matku xu̱ta̱ judio̱, nga ngu ngu nga̱nde xi kisꞌebixi, ku̱a̱cha ikú kju̱a̱kitakunꞌe̱n, ku ngieje xu̱ta̱ nga ndá tsichja nga̱tꞌaꞌe. Ku̱a̱cha kumá nga ngieje kui nangi tuxi ndá kuyajín Jesuu̱. 16Jaskan te̱ kijíni Nasare, nga̱nde jma nga kúcha.

Ngu ni̱tjin xubato, xukúcha ngare̱ Jesuu̱, kijí ni̱ngu̱xi̱ jmá matku xu̱ta̱ judio̱. Nga isitjén nga kui tsubáre ꞌbexkiya, 17xu̱ju̱n xi kiski Isaia̱, xta̱ xi chjine Enꞌen Namiña Diuu̱ ku ꞌyexkiya:

18«Ngayaꞌa̱senꞌen Namiña Diuu̱ kjitsuꞌbaju̱na,

nga̱tꞌa kuí jajínna ku kitsingiyana

nga xiyáꞌna én tjatse xu̱ta̱ xi ni̱ma̱ tjima,

nga ꞌmiyáre̱ nga je maxa̱n xi nduya incha,

nga ngatutsejénre xu̱ta̱ xi tki̱a̱,

nga ndiuꞌnatsjengi xu̱ta̱ xi on inchafeyáre̱

19ku nga ꞌmiyáre̱ ngieje xu̱ta̱ nga:

“¡Kui ni̱tjin jajín Namiña Diuu̱

nga tjitsuya nga kui ꞌbatsjengiña!”»

20ꞌYechja xu̱ju̱n xi kjingatsja Jesuu̱, ku kitsjuáre xi sián tetjun ku kisꞌejña. Ngieje xu̱ta̱ xi sindu ngaya ni̱ngu̱xi̱ tsase ndandáre. 21Ku ku̱i̱cha kitsú Jesuu̱ nga tsichaju̱ xu̱ta̱: «Kjatꞌei itjusun én xi ꞌyexkiyaꞌa̱n ngakjainjún.»

22Ngieje xu̱ta̱ nga ndá chja̱ nga̱tꞌaꞌe Jesuu̱, se̱n mare̱ nga̱tꞌa tuxi tsjuamaña kúcha baku. Kui nga minengiya xu̱ta̱:

—A mítsa tiꞌe̱ Kuse xikꞌui.

23Kui nga ku̱i̱cha skengire Jesuu̱:

—Jére kui én xi tsú xu̱ta̱ nikjaꞌakjájnu: “¡Chji̱ne̱tki, tjún ji tindayeiꞌsubái yajo̱ri!”

»Kún je yájnu ngieje najmi xi kitsiꞌinꞌan Kafarnau̱m, kui kju̱a̱ mejénjnu nga ngieje kui najmi tsiꞌinꞌan kꞌui. 24Ta̱nga kju̱a̱xikjáin nga najmí chjine Enꞌen Namiña Diuu̱ xi ndá chjabe nga fichu nangi jma ngandeꞌe̱. 25Janda ni̱tjin changa, nga kjitsuꞌba ngisa nga̱sunde xta̱ chjine Enꞌen Namiña Diuu̱ xi kiꞌmi Elia̱, ján nu basen tsaꞌají tsi, ku xu̱ta̱ je inchafesún kjindia. 26Ku ndatsa kjínma yachjin xi je jesún xiꞌinꞌen kꞌi̱a̱ na̱xi̱nanda Israe, kitsingiyají Namiña Diuu̱ Elia̱ nga ꞌbatsjengi ngieje, tujma ngútse chjun xi je kꞌien xiꞌinꞌen xi chja̱ nga̱nde jmá ꞌmí Sareta̱, tiñare na̱xi̱nanda Sidon. 27Tuku kui ni̱tjin changa, tekuácha tjin Israe kjín xu̱ta̱ xi chiꞌin findujun tjiuxínña tjínre, ta̱nga Liseo̱, tu̱ Namántse xi kitsindaya, ngu xta̱ xi chja̱ na̱xi̱nanda Siria̱.

28Nga tsitꞌe kui én xi sindu ni̱ngu̱xi̱, tuxi ndá kitsiti. 29Kui nga xu̱ta̱ itsjé Jesuu̱ kiakua, ku janda ngu tjengi kꞌa kiju, jma kjitjián na̱xi̱nanda, nga̱tꞌa mejénre nga tsikjaꞌangi jma kꞌa tjengi. 30Ta̱nga jaꞌajinbasén Jesuu̱ jma sindu ngieje kui xu̱ta̱, ku xín kiji, ku itju Nasare.

Xta̱ xi tsuꞌbajín yajoꞌe̱ ngayaꞌasén xindajin

(Mr 1.21-28)

31Kui nga Jesuu̱ nga̱nde xi ꞌmí Kafarnau̱m kijí, nangi xi chja̱ Ngalilea̱. Ku kꞌi̱a̱ ikú ngu ni̱tjin xubato. 32Ngieje nga tuxi tsjua sindure kúcha baku, nga̱tꞌa tuxi tjínre ngaꞌñu én xi tsú.

33Ngaya ni̱ngu̱xi̱ jmá matku xu̱ta̱ judio̱ kjitjián ngu xta̱ xi ngayaꞌasén xi ndáji tsuꞌbajín yajoꞌe̱. Kui ngayaꞌasén xaba tuxi ꞌñu skindiare̱ Jesuu̱:

34—¡Jesuu̱ xi nukju̱a̱ji Nasare! Mí xi mejénri ꞌnijínjni. A mejénri nga nikjéjni̱. Beñaꞌan ꞌyáni ji. ¡Jí xi Kjindiꞌe Diuu̱ji!

35Tsinchatiju Jesuu̱ kui ngayaꞌasen xaba, ku̱i̱cha kitsúre̱:

—¡Tꞌechjei tsꞌuaji, ku titjui ngajín yajoꞌe̱ kui xta̱!

Ngixku̱n ngieje xu̱ta̱, ngayaꞌasén xaba kitsikjaꞌa tꞌanangi xta̱ xi kjiꞌñure, ku itjujín yajoꞌe̱, ta̱nga kitsiꞌaonjínre̱.

36Tuxi se̱n kumáre̱ xu̱ta̱, ku ku̱i̱cha kitsú: «Mí tkuya ngaꞌñu xi tjínre kui xta̱. Nga tsiꞌinre manda ngayaꞌasén xaba ku bitju, ¡ku tuxi tꞌeꞌénre!»

37Ngieje kui nangi ngu nga Jesuu̱ inchachjaya xu̱ta̱, ngieje najmi xi tjitsiꞌin.

Tuxi kjín xu̱ta̱ kitsindaya Jesuu̱

(Mt 8.14-17; Mr 1.29-34)

38Itju Jesuu̱ ngaya ni̱ngu̱xi̱ ku niꞌyaꞌe̱ Ximo̱ kijí.

Nga tsasꞌen nganiꞌya, kiꞌmiyáre̱ nga ndáji tjínre nachꞌaꞌe Ximo̱, nga tꞌaiꞌñu incháre̱. 39Kikasére̱ Jesuu̱, ku kitsiꞌínre manda nga ngatisubaꞌa tꞌaiꞌñu. Isubaꞌa tꞌai ku isitjen nachꞌaꞌe̱ Ximo̱, ku te̱kuíni kitsikjénni ngieje xu̱ta̱ xi sindu nganiꞌya.

40Nga tsején jñu kitsiꞌin xu̱ta̱ nga tuxi kjín xi ndáji sindure jichuju̱re̱ Jesuu̱, xi kuskan tkuya chiꞌin tjínre. Jesuu̱, tutsja tutsja yane xu̱ta̱ xi ndáji sindure, ku kitsindaya. 41Xindajin xi inchabitju ngajin yajoꞌe̱ xu̱ta̱, tuxi ndá inchakjindia:

—¡Jí xi kjindiꞌe Namiña Diuu̱ji!

Ta̱nga Jesuu̱ tusa ndá tsinchatiju̱ xindajin ku kitsjuajíre̱ kju̱a̱ nga tsichja, nga̱tꞌa xindajin je be nga kuí xi jajín Namiña Diuu̱ xi ꞌBatsjengiña.

Jesuu̱ kitsuya én tjatse xi tjínre kju̱a̱ndá

(Mr 1.35-39)

42Nga kuꞌasen, itju Jesuu̱ ngaya na̱xi̱nanda ku jma ngu nga̱nde subá kijí. Ta̱nga xu̱ta̱ tekuirani xi tsangitsjai ku tsinengire̱ nga mejínre nga xin fue. 43Ta̱nga ku̱i̱cha kitsúre̱ Jesuu̱: «Kitsingiyana Namiña Diuu̱ nga fuéxiyasúnꞌan én tjatse̱ꞌe̱ ngieje jma nga batexuma. Kui kju̱a̱ nga tsubáre nga fueꞌan kjaꞌi nga̱nde.»

44Kui nga kijí Jesuu̱ ngieje ni̱ngu̱xi̱ xi tjin nga ngieje na̱xi̱nanda, ku kꞌi̱a̱ kitsuya én tjatse xi tjínre kju̱a̱ndá xi kitsingiya Namiña Diuu̱.

Currently Selected:

Luka̱ 4: MZI

Highlight

Copy