Luka̱ 3
3
Jua xi Batenda
(Mt 3.1-12; Mr 1.1-8; Jua 1.19-28)
1-2Jua xi Batenda, tiꞌe̱ Sakaria̱, nangi kixí kisꞌejña, kꞌi̱a̱ kisꞌebixí. Namiña Diuu̱ tsichjaju̱ kꞌi̱a̱ kua nangi kixí, nga tjiaꞌón nu tjínre nga kjibatexuma Roma̱ xta̱xá tetjun xi ꞌmí Tiberi̱o̱ ku Ponsio̱ Pilato̱ kjibatexuma nangi xi chja̱ Judea̱. Kui ni̱tjin Erode̱ Antipa̱ kjibatexuma nangi xi chja̱ Ngalilea̱; ku xi ꞌmí Filipo̱, xi tsꞌe ma Erode̱ kui kjibatexuma nangi jma ꞌmí Iturea̱ ku Trakonítide̱; Lisani̱a̱ kjibatexuma nangi xi chja̱ Abilene. Aná ku Kaifa kui inchatetjúnre̱ ja chanaꞌmi xi chja̱ ngandeꞌe̱ xu̱ta̱ judio̱.
3Kjiaku̱a̱ kijí Jua jma tiñare Ndana xi ꞌmí Jordan. Kꞌi̱a̱ ku̱i̱cha tsúre̱ xu̱ta̱: «¡Tatendájnu yajo̱jnu ku tisꞌejínjnu Namiña Diuu̱! Kjiátse nga tsichatꞌájnu Namiña Diuu̱.»
4Je tsé tjínre nga chjine Enꞌen Namiña Diuu̱ xi ꞌmí Isaia̱, ku̱i̱cha kiski nga̱tꞌaꞌe Jua:
«Tjín xi tjikjindiá nangi kixí:
“Tꞌendájnu ndiya Namiña Diuu̱.
¡Chjuxꞌajnu ndiya!
¡Ngují najmi xi stengi ngasakúre!
5”Tinchandéjnu nangi sun,
ku nangi sún tikꞌuyájnu
nangi jma na̱xi̱.
Ti̱na̱xu̱jnu ndiya xi ꞌba̱.
6¡Ngieje nga̱sunde nga sku̱e̱
xi ꞌBatsjengiña xi kitsingiya Namiña Diuu̱!”»
7Tuxi kjín xu̱ta̱ fichutꞌare Jua xi mejénre nga batenda yajo̱ꞌe, ku ku̱i̱cha tsúre:
—¡Jún, ye̱jnu nga tjimájnu! Chꞌanachajujnu yajojnu tsa bitjungijnu jee xi tsingiyájnu Namiña Diuu̱. 8Takújnu yajojnu nga kju̱a̱xikjain nga ngite najmí jee tjiñaꞌanjínjnu. Ngabixujíjnu tsa bitjungijnu nga̱tꞌa tje̱ꞌe Abran jíndibájnu. Tsa Namiña Diuu̱ xi mejénre janda kui ndia̱jo xu̱ta̱ xi xikjin Abran tsikꞌuya. 9Nga ngu ya ndáji tú xi bajare̱, janda ja̱ma̱tsꞌenꞌen bate xi ndia̱ꞌe ku ꞌbetí. ¡Ku je tjindáre̱ yajo̱ꞌe Namiña Diuu̱ nga tsichaja ngieje xi ngují najmi xi ndá inchatsiꞌin!
10Ku minengiyáre̱ xu̱ta̱:
—Ku mí xi má ñaꞌánjni.
11Ku ku̱i̱cha kjengire Jua:
—Xi jó tia̱ngá tjínre, ngatsjuáre ngu xi najmíre xi fatjikja. Xi tjínre xi chine ngatsjuáre xi najmikjínre xi kjine.
12Tekuácha jichú xu̱ta̱ xi faꞌachji taon xi machjitjái xá xi tjiñaꞌán, ku tsinengiyáre̱ Jua:
—Jí kua Chji̱ne, mí xi má ñaꞌánjni tuxi ma nga bitjungijni̱.
13Ku̱i̱chá skengire Jua:
—Ngatu ningisunjínjnu taon xi chjaꞌachjíjnu xu̱ta̱, tuxi tsubátsere̱ nga ꞌbechji.
14Kjín ma jun xi tekuácha tsinengiya.
—Jua ku ji̱n, mí xi ma ñaꞌánjni.
Ku̱i̱cha skengire:
—Jún minchatkúnjnu xu̱ta̱ ku kju̱a̱ꞌñu ñaꞌánjnu tuxi tsjuájnu taon. Kjiátse baꞌíjnu én nga chꞌan nikꞌendujnu. ¡Tu ngite kuajícha ñaꞌánjnu, ku tsjua tꞌejñájnu anima̱jnu nga tu̱ taon xi mejéntsejnu chjabejnu!
15Ngieje xu̱ta̱ se̱n mare̱ ku mejénre nga bé tsanga Jua xi jajin Namiña Diuu̱ nga ꞌBatsjengiña, xi inchakuyare̱. 16Ta̱nga ku̱i̱cha skengire Jua:
—Ndijua batendajújnu xuku nga án. Ta̱nga tjin ngingu xi ndiba ngatunꞌan xi tse ngaꞌñu tjínre ngisa nga án. Ngayaꞌa̱sen xi Tsjé ku ndiꞌi batendajújnu kui. ¡Án janda najmína kju̱a̱kixi tsa musuꞌe kumaꞌa̱n! 17Xi ndiba ngatunꞌan bakjanya xu̱ta̱, xín mincha xi ndá ku xín mincha xi ndáji. Xi ndá xu̱ta̱ ku fayá, tsamí xi kumáre̱, ku xi ndáji xu̱ta̱ ndiꞌi xi najmí ni̱tjin nga tsꞌao, tsikjaꞌajín.
18Ku̱i̱cha tsuyare̱ Jua xu̱ta̱ kju̱ kjín tkuya ngisa, én tjatse xi tjínre Namiña Diuu̱. 19Ku tuku nga tsinchatiju Erode̱ Antipa̱ nga̱tꞌa Erodia̱ kjitjianju̱n, xi chjunꞌen kumá tsꞌe xi ꞌmí Filipo̱, ku nga̱tꞌa je tse kju̱a̱xaba xi tjitsiꞌin. 20Ta̱nga ngieje kju̱a̱xaba xi je kitsiꞌin Erode̱ tuku nga kitsingisúnre̱ ngisa: nduya isén Jua xi Batenda.
Nga itenda Jua Jesuu̱
(Mt 3.13-17; Mr 1.9-11)
21Nga je itenda ngieje xu̱ta̱ Jua, jichú Jesuu̱ ku tekuácha itenda yajo̱ꞌe. Nga kjiminengire kju̱a̱ndá Namiña Diuu̱ Jesuu̱ jixꞌajín ndiu̱jmi 22ku xuku tu̱ni̱ña̱ jajen Ngayaꞌa̱sen xi Tsjé jma kjisián Jesuu̱. Kjia kinuꞌyáre ngu nda̱ xi ku̱i̱cha kitsú: «Jí xi kjindiꞌna ji, xi tuxi ꞌñu mejénna. Tuxi tsjuá tjínna nga̱tꞌari.»
Xu̱ta̱ xi tje̱ꞌe̱ kuma Jesuu̱
(Mt 1.1-17)
23Tu mején kate nu tjínre Jesuu̱ nga tsaꞌangire̱ nga kitsuya Enꞌen Namiña Diuu̱ ku xukúcha chja̱ xu̱ta̱, kjindiꞌe xu Kuse kumá. Kꞌui sindutꞌa kui xu̱ju̱n ꞌyá tje̱ꞌe̱ xi jindibá:
Kuse,
Elí,
24Mata,
Lebi,
Melki,
Janai̱,
Kuse,
25Matati̱a̱
Amo,
Naun,
Esli,
Nagai̱,
26Maa̱t,
Matati̱a̱,
Semei,
Josec,
Joiada,
27Joanan,
Resa,
Sorobabe,
Salatie,
,
28Melki,
Adi,
Kosan,
Emadan,
Ee,
29Jesuu̱,
Eliese,
Jorin,
Mata,
30Lebi,
Simeo̱n,
Juda,
Kuse,
Jona̱,
Eliakin,
31Melea,
Mena,
Matata,
Natan,
32Ndabi̱,
Jese,
Obe,
Bo,
Sela̱,
Nason,
33Aminada,
Admin,
Aní,
Eson,
Fáre̱,
Juda,
34Jako,
Isaa̱,
Abran,
Téra̱,
Nao,
35Seru,
Ragau̱,
Péle̱,
Ebe̱,
Sela̱
36Kainan,
Afaxa̱,
Se̱n,
Noe,
Lame,
37Matusalen,
Eno,
Jére,
Malale,
Kainan,
38Eno,
Se,
Adan,
Kjindiꞌe Namiña Diuu̱.
Currently Selected:
Luka̱ 3: MZI
Highlight
Share
Copy
Want to have your highlights saved across all your devices? Sign up or sign in
México © Sociedad Bíblica de México, A.C. AÑO
