Luka̱ 23

Jesuu̱ ku Pilato̱

(Mt 27.1-2,11-14; Mr 15.1-5; Jua 18.28-38)

1Ku kjia ja xi chja̱ Junta̱ xi kꞌa xáꞌe kixincha kixi ku kiju̱ Jesuu̱ ngakjáin Pilato̱ xi kjisián xta̱xá Jerusalen ngajoꞌe Xitetjún Roma̱. 2Nga jichú, tsaꞌangíre̱ nga itejené Jesuu̱, ku kuichá kitsú:

—Xta̱xá Jerusalen, kui xta̱ kuya̱jni̱ nga na̱xi̱nanda tjitsisuére tuxi ma nga ꞌbetꞌare Roma̱. Tjitsu nga najmí mí kju̱a̱ nga ꞌbechjitjaijni Xitetjún Roma̱ xá xi tjiñaꞌánjni, ku nga kui xu xi jajin Namiña Diuu̱ nga kjuaꞌikꞌatsjengi xu̱ta̱. Xitetjún kjibe yajoꞌe̱ kui xta̱.

3Pilato̱ tsinengiyáre̱ Jesuu̱:

—A kjáin nga ji xi Xitetjunꞌen xu̱ta̱ judio̱ji tjibixi.

Skengi Jesuu̱:

—Ji xi ku̱a̱ tjibixi.

4Kui nga tsichja Pilato̱, kitsúre ja chanaꞌmi xi inchatetjún ku ngieje xu̱ta̱ xi kutkiu:

—Najmí mí kju̱a̱ nga nijeña kui xta̱.

5Ta̱nga tu̱sa ꞌñu tsicha xu̱ta̱ xi inchabateje:

—Kju̱a̱kitakún xi kjibakú tjitsikjayare̱ na̱xi̱nanda. Je ku̱a̱cha kitsiꞌín ngieje nangi Judea̱. Nangi xi chja̱ Ngalilea̱ tsaꞌangíre̱ ku kjatꞌei janda kꞌu̱i̱ je jiꞌi.

6Nga tsitꞌe Pilato̱ kui én, tsinengiyáre̱ xu̱ta̱ tsa Ngalilea̱ chja̱ Jesuu̱. 7Ku jún kitsú xu̱ta̱, ku kꞌi̱a̱ kube Pilato̱ nga Erode̱ Antipa̱ xi tjínre xá ngaya kui nangi kui xi tsubare̱ nga tsindaji̱n kju̱a̱ꞌe̱. Ku Erode̱ kitsingiyáre̱ Jesuu̱, xi kui ni̱tjin Jerusalen kjitsuꞌba.

Jesuu̱ ku Erode̱

8Xta̱xá Erode̱ nga kube Jesuu̱ tuxi tsjua kumáre̱, nga̱tꞌa je tsé tjínre nga mejénre̱ bejin. Jé tse najmi tsitꞌe ngatꞌaꞌe ku mejénre̱ nga tsiꞌin ngu najmi tki̱u̱n xi sꞌejinjínña. 9Kjín tku̱ya najmi tsinengiyáre̱, ta̱nga ichijí skengi Jesuu̱.

10Ja chanaꞌmi xi tetjún kju̱ chjine Kju̱a̱kixiꞌe̱ Namiña Diuu̱ xi kꞌi̱a̱ tjima, tuxi ndá inchabatejené.

11Erode̱ kju̱ ja jun chꞌao kitsúre ku tsijnuke Jesuu̱ nga kitsikajá najñu xi xuku tse̱ꞌe xitetjún tjin. Ku kjia kitsingiyáre̱ Pilato̱.

12Erode̱ ku Pilato̱, xi ndáji yaꞌa xikjin, kui ni̱tjin tuxi ndá tsaꞌa xikjín.

¡Kalabo ngatatꞌaju kru xu̱ta̱!

(Mt 27.15-26; Mr 15.6-15; Jua 18.39—19.16)

13Kui nga sketkiu Pilato̱ ja chanaꞌmi xi inchatetjún, na̱xi̱nanda kju̱ xi inchatetjúnre̱, 14ku ku̱i̱chá kitsúre̱:

—Jún jiꞌiju̱jnu kui xta̱, ku tjibatejenéjnu nga xu̱ta̱ tjitsikjayare̱ tuxi kontra̱ fáire̱ Roma̱. Ta̱nga je kjín najmi teminnengiyana kꞌu̱i̱ ngakjainjún ku tebaseꞌan nga najmíre̱ je. 15Ku tekuácha Erode̱, sꞌejinjínre tsanga tjínre jee, kui kju̱a̱ nga te̱ kitsingiyáni. Kui xta̱ ngují najmi xi ndáji tjin kitsiꞌin, ku najmí mí kju̱a̱ nga nikꞌien. 16-17Tsiꞌinꞌan manda nga fáre̱ xuku ngu kju̱a̱nijé, ku kjia tsikjaixa̱nñaꞌa̱n.

18Ta̱nga ngieje xu̱ta̱ xi kꞌi̱a̱ tjima kiskindia:

—¡Tiꞌin manda nga nikꞌien Jesuu̱! ¡Tixain Barraba!

19Nduya kjiya xi ꞌmí Barraba nga̱tꞌa Roma̱ ꞌyetꞌare kꞌi̱a̱ na̱xi̱nanda Jerusalen, ku ngu xu̱ta̱ kitsikꞌien.

20Mejénre̱ Pilato̱ nga kitsixa̱n Jesuu̱. Kui kju̱a̱ nga te̱ tsichjajo̱ni ngieje xi kꞌi̱a̱ incha. 21Tanga te̱ skindiáni kjínni xu̱ta̱:

—¡Ngaxinchanére̱ kalabo nga̱tꞌa kru! ¡Ngaxinchanére̱ kalabo nga̱tꞌa kru!

22Xi ma ján ndiya te̱ tsichjajo̱ni Pilato̱ ngieje xu̱ta̱:

—Mí xá mejénjnu nga ꞌme̱. Mí najmi xi ndáji tjin xi kitsiꞌín. Najmi xi béꞌa̱n, kui xta̱ ngují najmi xi ndáji tjin kitsiꞌín xi tsubáre̱ nga nikꞌien. Tsiꞌinꞌan manda nga fáre̱, ku tsikjaixa̱nñaꞌa̱n.

23Ta̱nga ngieje kui xu̱ta̱ tusátse ꞌñu kiskindia, nga tsinengi nga nikꞌen Jesuu̱. Janda nga kitsiꞌínre̱ xki Pilato̱. 24-25Kui nga kitsiꞌín manda nga nikꞌien Jesuu̱ xukúcha inchaminengi xu̱ta̱ kjín, ku kitsixa̱n Barraba, xi kju̱a̱bixkán tsꞌatsje ku xu̱ta̱ kitsikꞌien.

Kalabo yatꞌaju kru xu̱ta̱ Jesuu̱

(Mt 27.32-44; Mr 15.21-32; Jua 19.17-27)

26Kiju̱ ja jun Jesuu̱ nga kikjatꞌa kru. Ngaya ndiyá kitsikasén ngu xta̱ xi ꞌmí Ximo, ku kitsiꞌínre̱ kju̱a̱ꞌñu nga tsaꞌa kru ku kijitjengíre̱ Jesuu̱. Nga̱nde xi ꞌmí Sirene̱ chja̱ Ximo, ku kui chu̱ba̱ nga̱jnu kju̱a̱ndibá.

27Kjín xu̱ta̱ tjimatjengíre Jesuu̱. Kjín yachjin tjimajín, xi inchakjindia ku inchakjindá nga̱tꞌa ngí inchamáre̱ ngatꞌaꞌe. 28Tsase nga̱tu̱n Jesuu̱ ku kuichá kitsúre̱:

«¡Yachjin xi chja̱ Jerusalen! Nga tu̱ chikjindajíjnu nga̱tꞌaꞌna. Jún chikjindatjáijnu yajojnu kju̱ kjindijnu. 29Nga̱tꞌa fichú ngu ni̱tjin nga ku̱i̱tsu̱ xu̱ta̱: “¡Ndáre̱ yachjin xi kumajín kisꞌere̱ kjindi! ¡Ndáre̱ xi ngují ni̱tjin na kumá ku kisꞌejíre kjindi xi kitsikjién!” 30Kui xu̱ta̱ kumejénre̱ nga ngu naxi̱ mené ku ngatsikjesún. 31Ngatꞌa̱ tsa an, xi ngují najmi xi xaba kitsiꞌinꞌan, ku̱i̱cha tsiꞌin tjinikꞌienna, mí najmi xi kjueyajíre̱ xi inchatsiꞌin najmi xi ndáji.»

32Tekuácha tsangiju̱ jó ja xi xaba, tuxi kꞌi̱a̱ jña nikjesúntꞌare Jesuu̱. 33Nga jichú nga̱nde xi ꞌmí Ninda Tkutiya, ja jun kalabo inchanére̱ Jesuu̱ tꞌa Kru. Te̱ kꞌi̱a̱ kikinchanére̱ kalabo ngiajó já xi ndáji, ngu ngatje̱n ngandá ku xingu ngatje̱n ngaskúnre Jesuu̱.

34Ngutjútse jaꞌa ku kuichá kitsú Jesuu̱: «¡Nami, tichatꞌáiri ngieje kui xu̱ta̱! ¡Bejí najmi xi inchatsiꞌin!»

Ku ja jun inchatsitontse ꞌyá xi mejénre̱ najñuꞌe̱n Jesuu̱, 35Ku xu̱ta̱ inchabase ngieje najmi xi kjima. Ja xi inchatetjúnre̱ na̱xi̱nanda, inchamijnuke Jesuu̱ ku ku̱i̱cha inchatsú: «Kui xi kjín xu̱ta̱ kitsindaya, ku tsanga kjain nga kui xi jajin Namiña Diuu̱ nga ꞌBatsjengiña, ngatꞌatsjengi suba yajoꞌe̱ kjatꞌei.»

36Ja jun tekuácha inchamijnuke. Bino san kitsjuáre tuxi ꞌbi, 37ku ku̱i̱cha kitsúre̱: «¡Tsa kjáin nga ji xi Reiꞌe̱ xu̱ta̱ judio̱ji, ꞌnatsjengi subai yajo̱ri!»

38Nga̱sún ngatsja tku̱ Jesuu̱ tjitꞌare ngu letra xi tjitsú: «Kui xi Xta̱xá Tetjunꞌen Judio̱ Xikꞌui».

39Ngu kui ja xaba xi kꞌi̱a̱ sindutꞌa kru ngatꞌaꞌe̱ Jesuu̱ tekuácha chꞌao tjitsúre̱:

—Amítsa jíra xi jajinri Namiña Diuu̱ nga Kjuaꞌiꞌnatsjengíjni. ꞌNatsjengi yajo̱ri, ku ꞌnatsjengijni̱ ndatsa ji̱n.

40Ta̱nga xta̱ xingu kitsitiju̱:

—A najmíri kjuanichatꞌa ngatꞌaꞌe Namiña Diuu̱. A te̱ kuajícha on kjifeyari. 41Ña, tsubáre nga inchamajeña, nga̱tꞌa tuxi xaba kumáña; tanga kui xta̱ ngují najmi xi xaba kitsiꞌín xi tsubáre̱ nga majére̱.

42Ku kjia, ku̱i̱cha kitsúre Jesuu̱:

—Jesuu̱, nga tu̱ nichayeijína nga chꞌangiri nga batexumai.

43Ku̱i̱cha skengire Jesuu̱:

—Tsjuára énꞌna nga te̱ kjatꞌe̱i̱ni nga jña mijñaña ngasunde tsjuatjínꞌen Namiña Diuu̱.

Kúcha kumá nga kꞌien Jesuu̱

(Mt 27.45-56; Mr 15.33-41; Jua 19.28-30)

44-45Tsa tu̱ kjuane tejó ngite̱ jatꞌaijí tsuꞌbi, ku ngieje na̱xi̱nanda teya kisꞌejñú janda kjuane ján ngixún. Najñu xi tje̱ntiu ni̱ngu̱xi̱ judio̱ jó itju nga kijiya janda ngakꞌa ku janda nginde. 46Jesuu̱ ngieje ngaꞌñuꞌen kiskindia: «¡Nami, ngaya ndsa̱jí kjitjián ni̱tjinꞌna̱!»

Tu̱ ku̱a̱tse kitsú ngisa ku kꞌien.

47Xi ngitku ja jun xi chja̱ Roma̱ kube ngieje najmi xi kumá, kubetkun Namiña Diuu̱ ku kitsú: «Kju̱a̱xikjáin nga ndá xu̱ta̱ kumá kui xta̱.»

48Nga kube ngieje kui najmi, xu̱ta̱ xi kꞌi̱a̱ tjima tuxi ngí sindúre nga kiji niꞌyaꞌe̱, nga̱tꞌa inchatsibe yajo̱ꞌe nga tjínre jee.

49Ngieje xi ndá yaꞌa Jesuu̱, kju̱ yachjin xi tjimatjengire̱ skanda Ngalilea̱, tu̱ inchabase kjíntse najmi xi kjima.

Kúcha kumá nga kikjañajin Jesuu̱

(Mt 27.57-61; Mr 15.42-47; Jua 19.38-42)

50-51Tsuꞌba ngu xta̱ xi ꞌmí Kuse, xi chja̱ ngu nga̱nde xi ꞌmí Arimatea̱, nangi xi chja̱ Judea̱. Ndá xu̱ta̱ ku na̱xu̱ tsuꞌba kui xta̱, ku mejénre nga je baꞌangire̱ nga ndiukatexuma Namiña Diuu̱ kui nga̱sunde. Kꞌi̱a̱ kjiyaxki̱ ngaya Junta̱ xi kꞌa xáꞌe, ku nga kitsú kui Junta̱ nga nikꞌien Jesuu̱, jaꞌojí kumáre̱.

52Kuse kikasére̱ Pilato̱ ku tsinengíre̱ yajoꞌe̱ Jesuu̱ tuxi ma nga faikañajín. 53Kui nga kijí ku tsꞌajengi yajoꞌe̱ Jesuu̱ xi kjitꞌa kru, ku najñu xi ndá kitsikjatjikja, ku ngaya ngu ti̱xa̱ xi sꞌe̱i̱ma kitsindáre̱ ngu ndi̱a̱jo̱ tse kꞌi̱a̱ yaya. Kui tixa̱ kje nguji xi tsichjen. 54Biajne kui ni̱tjin, ku xu̱ta̱ judio̱ je inchaꞌbendá yajo̱ꞌe nga tsikjaya xubato̱, xi je makaꞌangire̱.

55Yachjin xi tjimatjengire̱ Jesuu̱ skanda nga itju Ngalilea̱ jña kijí Kuse jma je tjindáre ngu ti̱xa̱, ku kube kúcha kikjaña yajo kꞌienꞌe̱n Jesuu̱ ngaya ti̱xa̱. 56Ku kjia kijí niꞌyaꞌe̱ ku ꞌyendá ndifasinje̱n xi tsiꞌinre yajoꞌe̱ Jesuu̱.

Ta̱nga kitsikjaya ni̱tjin xubato̱, xukúcha kjibatexuma kju̱a̱kixi xi yeꞌe Moise.

Currently Selected:

Luka̱ 23: MZI

Highlight

Copy