Luka̱ 22
22
Kúcha ꞌyendá xu̱ta̱ nga kijíre̱ kontra̱ Jesuu̱
(Mt 26.1-5,14-16; Mr 14.1-2,10-11; Jua 11.45-53)
1Ngi chubatse ni̱tjin chaja nga ꞌbatsjé xu̱ta̱ judio̱ sꞌuiꞌe ni̱pan xi nisajin. Kui sꞌui tekuácha Paskua̱ ꞌmí. 2Ngieje kui ni̱tjin, ja chanaꞌmi kju̱ chjine Kju̱a̱kixiꞌe̱ Namiña Diuu̱ inchamangitsjai kúcha sakure̱ nga̱nde nga tsikꞌén ꞌma Jesuu̱, nga̱tꞌa inchatsakjúnre xu̱ta̱.
3Ku kjia tsasꞌen xindajin ngaya anima̱ꞌen Juda̱ Iskariote̱, ngu kui ja xi tejó xi kjibakuyáre̱ Jesuu̱, ku kitsjuáre kui kju̱a̱kitakún nga tsikꞌien Jesuu̱. 4Kijí Juda̱ nga kichja̱jo ja chanaꞌmi tetjun kju̱ xi ngitku jun xi inchakundá ni̱ngu̱xi̱ judio̱, ku kitsindsiji̱n yajoꞌe̱ nga tsikasꞌenre̱ Jesuu̱. 5Tsjua kumáre̱ kui ja ku kisꞌendáre̱ nga taon tsjuáre. 6Kitsiꞌjaꞌo Juda̱, ku tsangitsjai mí chuba̱ nga ndá tsikasꞌen Jesuu̱, nga tu̱ kui subátse sindu.
Ngu kjua bichi nga jñu xi chayajíña
(Mt 26.17-29; Mr 14.12-25; Jua 13.21-30; 1Co 11.23-26)
7Nga jichú ni̱tjin nga ma sꞌuiꞌe ni̱pan xi nisanjín, kjia nga tsubáre̱ nga nikꞌien ngu chu̱tsa̱nga̱ xi chine nga jñu sꞌuiꞌe Pasku̱a̱, 8Tsichjare̱ Jesuu̱ Pe kju̱ Jua, ku kitsúre̱:
—Tangíjnu ku tjaikꞌendájnu kju̱a̱bichi xi chja̱ Pasku̱a̱.
9Ku tsinengiyáre̱ kui ja:
—Jmá mejénri nga faikꞌendájni.
10Skengíre Jesuu̱:
—Jerusalen tangíjnu, kꞌi̱a̱ jma bitjasꞌenña na̱xi̱nanda kꞌi̱a̱ yájnu ngu xta̱ xi tsuꞌbaju̱ ngu tiji ndijua. Tangitjengíjnu janda niꞌya jma basen, 11ku tixújnu xi ndia̱ꞌe niꞌya: “Mejénre̱ Chji̱ne̱ jmá nga̱nde ma kjejun ja xi kjibakuyáre̱, ni̱tje̱nꞌe̱n Pasku̱a̱.” 12Kui xi ndi̱a̱ꞌe̱ bakujnu ngu nga̱nde teya xi je tjindá piso xi ngakꞌa. Tꞌendájnu kꞌiaku̱a̱ ngieje najmi xi machjen.
13Kijí Pe ku Jua ku xukúcha kitsúre̱ Jesuu̱ ku̱a̱cha chun jma jichú. Tjeꞌñu kitsindá najmi xi chine sꞌuiꞌe Paskua̱.
14Nga jichú uraꞌe̱ Jesuu̱ ku ja xi kjibakuyáre̱ kisꞌendutꞌa yamexa. 15Ku̱i̱cha kitsúre̱ Jesuu̱:
«Tuxi ꞌñu mejénna nga jña kjienjúnjnu kui Pasku̱a̱, nga tjen ni̱tjin nga tse kju̱a̱ni̱ma̱ faꞌaꞌa̱n ku nga beyaꞌan. 16Nga̱tꞌa kju̱a̱xikjáin nga ngite ngi ngují ni̱tjin nga jña bichíña nga jñu, janda nga fichú ni̱tjin nga jña bichi ngiejeña jma kjibatexuma Namiña Diuu̱.»
17Sꞌei skabe ngu kopa̱ xi i̱ncha bino, kitsjuáre ni̱kꞌuechji Namiña Diuu̱, ku ku̱i̱cha kitsú:
«Tꞌi̱u̱jnu kui bino ku titjuájnu xingijún. 18Kju̱a̱xikjáin najmi xi xínjnu, janda kjatꞌei ngite ꞌbijíꞌa̱n bino, jandatse nga ndiukatexuma Namiña Diuu̱.»
19Skabe ni̱pan ku kitsjuáre nikꞌuechji Namiña Diuu̱, ikjanya ku kitsjuáre ja xi kjibakuyáre̱ ku ku̱i̱cha kitsúre̱:
«Kui xi yajoꞌna̱, xi kju̱a̱ndájnu nga tetsjuájnu. Kjatꞌei, ku ngieje ni̱tjin xi fue, tikjaitsjénjnu xuku ngu najmi chakun nga tjibichíña kui ni̱tje̱n ku tikjaitsjénjnuꞌan nga xki̱ kiti bichayájnu ni̱pan.»
20Nga kumáre̱ nga tsakjien kui jñu, ngi ngu baso bino kitsꞌi Jesuu̱ ku kitsú:
«Jínꞌna kui bino, xi kju̱a̱ndájnu kitjun. Kui jín tjitsichjén Namiña Diuu̱ nga kjiꞌbendaju̱jnu ngu kju̱a̱kitakún tja̱tse̱. 21»Xi tjikjabe ngatúnna ku tsikasꞌenna kꞌui kjitjián, jña tjiantꞌajúna yamexa. 22Án, Kjindiꞌe xu̱ta̱ nga̱sunde, beyaꞌan xukúcha kitsiꞌín manda Namiña Diuu̱. Ta̱nga xi kjabengatu̱nna ku tsikasꞌenna, ngu najmi xi tuxi chꞌao tjin xi ku̱mataꞌin.»
23Ja xi kjibakuyáre̱ Jesuu̱ inchaminengiyáre xikjin ꞌyá xi tjínre jín nga tsikasꞌen Jesuu̱.
ꞌYá xi ꞌñu chjiꞌe ngisa nga ngieje
24Ku kjia inchajusi ja xi kjibakuyáre̱ Jesuu̱ ꞌyá xi ꞌñu chjiꞌe ku̱ma ngisa nga ngieje kui. 25Ku ku̱i̱cha kitsúre̱ Jesuu̱:
«Kui nga̱sunde, jaxá tetjun xi inchabatexuma na̱xi̱nandaꞌe ku ngují najmi ma tsiꞌin tsa kuijí tsjuáre kju̱a̱. Ku kui jaxá xi inchabatexuma na̱xi̱nanda ku̱i̱cha tsúre̱ xu̱ta̱: “Ji̱nxi amingo̱jni jún, ku tjiñaꞌánjnu kju̱a̱ndá.”
26»Ta̱nga jún xukují kui xu̱ta̱ tsubáre̱ natsjéjnu yajo̱jnu. Xi ꞌñu chjiꞌe ngajínjnu kui xi tsamí xi chjiꞌe nga ngiejejnu; ku xi basen tetjúnjnu kui xi tsubáre̱ nga tsiꞌin xki̱ ngieje xi ngisa.
27»Ku̱i̱cha tikjaojnu: ꞌYá xi ꞌñu chjiꞌe ngisa: a xi tjitꞌa yamexa a xu xi kjimincha xi chine. A mítsa kjáin nga xi tjitꞌa yamexa xi tjiꞌmíre̱ nga ꞌñu chjiꞌe. Ta̱nga, chaséjnu an, Chji̱ne, inchajnu xi chine nga ngiejejnu.
28»Jún, an kisꞌemaju̱njnu ni̱tjin nga itjaña ngieje kju̱a̱niꞌin. 29Kui kju̱a̱, nga án, jaxá tetjun tsikꞌuyájnu, xukúcha xta̱xá tetjun kitsikꞌuyána Namiꞌna. 30Jma batexumaꞌan, yamexaꞌna mijñatꞌájnu nga bichijnu ku ꞌyújnu, yaxile chakun mijñayájnu ku chusunjnu xi tejó tje̱ xu̱ta̱ xi chja̱ Israe.»
¡ꞌÑu tinchajnu ngandejnu!
(Mt 26.31-35; Mr 14.27-31; Jua 13.36-38)
31Tsichja Jesuu̱, ku̱i̱cha kitsúre̱ Pe:
—Pe, ndá nuꞌye̱i. Xindajin Satana tsinengíre̱ kju̱a̱ Namiña Diuu̱ nga kutꞌakakúnjnu ngiejejnu, ku kitsjuáre kju̱a̱ Namiña Diuu̱. 32Ta̱nga án tsinengina Namiña Diuu̱ nga basenju̱nri nga ꞌñu bisin. Ngu ni̱tjin kju̱a̱ꞌa nga basen subaini, ta̱nga jaskan nga basenkajoni yajo̱ri. Nga ku̱a̱cha kuma titjuéri ngaꞌñu ja tsꞌeji tuxi tutsjái nga ꞌñu kuincha nga sꞌejínre nga̱tꞌaꞌna.
33Tjeꞌñu ku̱i̱cha kitsú Pe:
—Ndi̱a̱ꞌna̱, tsa nduya jña mangiña, faiꞌa̱n; ku tsa tjin nga jña fesúnña, tekuácha beyaꞌan nga̱tꞌari.
34Ku̱i̱cha skengi Jesuu̱:
—Ji kua Pe, kui ni̱tjin, te̱ kjé nga kjinda xa̱nda̱ xicha, ku je bixini jan ndiya nga yijína.
Ja xi kjibakuyáre̱ inchamakjinjínre̱ najmi xi tjitsúre̱ Jesuu̱
35Ku kjia tsinengiyáre̱ Jesuu̱ ja xi kjibakuyáre̱:
—A faitsjénjnu nga kitsingiyájnu nga faikixuyájnu én tjatse̱ xi tjinre kju̱a̱ndá ku kixínjnu nga tu̱ ngachꞌajíjnu taon, te̱ ngachꞌajíjnu tsa, te̱ ngafayajíjnu ndefatꞌa. Tixuyájnu, a tjín najmi xi kichajayájnu.
Tujña skengi ngiejere kui ja:
—Junjín Ndi̱a̱jni̱, ngují najmi kichajayájni.
36Ku kjia, ku̱i̱cha kitsúre̱ Jesuu̱:
—Ndátjin, kjatꞌei xin májnu: Xi tjínre taon ngataꞌa tao̱nꞌe̱n; kutsa tjínre tsa, ngatjabixiju. Tsa tjin xi najmire̱ spada̱, ngatateña najñu xi fatjikja ku ngatꞌatse ngu.
37»Ku̱i̱cha tsú nga̱tꞌaꞌna Xu̱ju̱n Enꞌen Namiña Diuu̱: “Ku kiꞌmíre̱ nga xu̱ta̱ mare̱ tsikꞌien”. Ngi chubátse chajá nga ku̱a̱cha kjueyána.
38Ku̱i̱cha kitsú ja xi kjibakuyáre̱:
—Ndi̱a̱jni̱, kꞌui sindújni jó spada̱.
Ku ku̱i̱cha skengi Jesuu̱:
—¡Jún ichijí inchamakjínjnu! Ta̱nga ngite kuijí najmi sinukju̱a̱ña.
Jesuu̱ tuxi ngí kjiminengíre̱ kju̱a̱ndá Namiña Diuu̱
(Mt 26.36-46; Mr 14.32-42)
39Itju Jesuu̱ ngaya na̱xi̱nanda ku tjengi jma tjin ya olibo̱ kijí, xukúcha ngare̱. Jña kiju̱ ja xi kjibakuyáre̱.
40Nga jichú kui nga̱nde, ku̱i̱cha kitsúre̱ Jesuu̱: «Chinengijnu kju̱a̱ndá Namiña Diuu̱, tuxi chukjuajnu ngieje kju̱a̱niꞌin xi sꞌe̱i̱ ku̱mataꞌinjnu.»
41Kitsikjin yajo̱ꞌe Jesuu̱ jma sindu ja xi kjibakuyáre̱, isén tkiuꞌe ku tsinengíre̱ kju̱a̱ndá Namiña Diuu̱: 42-44«Nami, ¡tuxi mejénna nga chjubaꞌína ngieje kju̱a̱niꞌin xi ndibanéna! Ta̱nga jí xi kuixiji najmi xi ku̱ma mítsa an.»
45Nga kumá nga tsinengíre̱ kju̱a̱ndá Namiña Diuu̱ Jesuu̱, jichúni jma sindu ja xi kjibakuyáre̱, ku sindufé kui ja nga jichutꞌare, nga̱tꞌa tuxi ngí sindúre ku kisꞌendufé. 46Ku ku̱i̱cha kitsúre̱: «Mí xá tisuféjnu. ¡Tisitjénjnu ku chjinengíjnu kju̱a̱ndá Namiña Diuu̱, tuxi chukju̱a̱jnu ngieje kjuaniꞌin xi kjueyájnu!»
Xu̱ta̱ xi kontra̱re̱ skabeꞌñu Jesuu̱
(Mt 26.47-56; Mr 14.43-50; Jua 18.2-11)
47Tuku tjichja Jesuu̱ ngisa nga jichú Juda̱, ngu kui ja xi tejó ma xi kjibakuyáre̱ Jesuu̱. Kjín ma xu̱ta̱ xi jña jichuju̱. Juda̱ kitsitiña yajoꞌe̱ nga tsindsuꞌa ndatsaꞌe̱ Jesuu̱. 48Ta̱nga ku̱i̱cha kitsúre̱ Jesuu̱: «¡Juda̱! A tu̱ ngútse nga tjimindsuꞌáina ku tjichjabi ngatu̱i̱nna, an Kjindiꞌe xu̱ta̱ nga̱sunde.»
49Nga kube ja xi kjibakuyáre̱ najmi xi kjuamá, ku̱i̱cha kitsúre̱ Jesuu̱:
—Ndi̱a̱jni̱, a ꞌnatsjejni̱ spada̱jni ku bixkanju̱njni.
50Ku ngu ja xi kjibakuyáre̱ Jesuu̱ itsjé spada̱ꞌe ku tsatetꞌa ngu ñajun musuꞌe xi siántetjúnre̱ ja chanaꞌmi. 51Ta̱nga ku̱i̱cha kitsú Jesuu̱:
—¡Xu tinchajnu! ¡Tu̱ bixkanjínjnu!
Skingajun ñajun musu ku kundayáni.
52Xi jichú nga kikjaꞌaꞌñu Jesuu̱, kui ja chanaꞌmi xi inchatetjún, ja ngitku̱ xi inchakunda ni̱ngu̱xi̱ kju̱ xi inchatetjúnre̱ na̱xi̱nanda. Ku̱i̱cha kitsúre̱ Jesuu̱: «Mí xá michilu ku ya kichꞌájnu xuku xi chejeꞌan. 53Ngieje ni̱tjin ikuyána xu̱ta̱ ngaya ni̱ngu̱xi̱ ku ngixkunjún, ku najmí xi kiskabeꞌñúna. Ta̱nga, ndátjin, xindajin xi tjitsiꞌíjnu manda, ku kui xi kua kitsújnu nga kui chu̱ba̱ kua tjiñaꞌánjnu, nga̱tꞌa nga ni̱tje̱n nga nixajnu.»
Nga kitsibejí yajoꞌe̱ Pe nga bejin Jesuu̱
(Mt 26.57-58,67-75; Mr 14.53-54,65-72; Jua 18.12-18,25-27)
54Xi skabeꞌñu Jesuu̱ ndabaxá tsjuatjínꞌen xi sián tetjúnre̱ ja chanaꞌmi. Pe kijitjengi kjinre.
55Ku kꞌi̱a̱, ngabasen kjindetsinꞌen nda̱ba̱xá tsjuatjin, ꞌyekajo ndiꞌi, ku ngandaiꞌe̱ kisꞌendu. Te̱ kꞌi̱a̱ kisꞌejñajín Pe. 56Ku nga kjima ngieje kui najmi, ngu chjun chjineꞌo kube Pe nga tjitꞌa ndiꞌi, ku kjibase ndandáre̱, ku ku̱i̱cha kitsúre̱:
—Xikꞌu̱i̱ tekuácha Jesuu̱ tsuꞌbajo.
57Kitsibejí yajo̱ꞌe Pe:
—¡Chjun, janda bejinjínra ꞌyáini ji!
58Ngutjútse jaꞌa, ku ngu xta̱ te̱ kubéni, ku kitsúre̱:
—¡Jí tekuácha tsutjai tjengiri Jesuu̱!
Ku̱i̱cha skengi Pe:
—¡Junjín, xiꞌin! ¡An jín kua!
59Jaꞌára tsatu̱ ngu ura, kjaꞌi xta̱ te̱ kitsúnire̱:
—Ta̱nga kju̱a̱xikjáin nga kui xikꞌui, tekuácha kui tsuꞌbatje̱ngire̱, nga̱tꞌa tekuácha Ngalilea̱ chja̱.
60Ku̱i̱cha skengi Pe:
—¡Jí kua, xta̱, janda bejíꞌa̱n mí én xi tjibixíni!
Te kjé nga fe nga tjichja Pe nga skindá ngu xa̱nda̱ xicha. 61Kui ma chu̱ba̱, jatji Jesuu̱ ku tsasére̱ Pe. Ku kjia jitsjénre Pe én xi kitsúre̱ Jesuu̱: «Kjatꞌei, te kjé nga kjinda xa̱nda̱ xicha, ján ndiya bixini nga yijína.» 62Itju Pe kui nga̱nde ku tuxi ngí kiskinda.
63Ja xi inchakunda Jesuu̱ tuxi tsjua inchamáre̱ nga inchamijnuké; 64inchaꞌbechjáre̱ xku̱n, inchabeꞌére ku ku̱i̱cha inchatsúre̱: «¡Chji̱ne, ji xi Bixuye én xi tsjuári Namiña Diuu̱, tikjoi ku tixuyéi ꞌyá xi isénri!»
65Ku kjia, tse kju̱a̱ inchatsúre̱ ngisa, ngieje tku̱ya én.
Kúcha kisꞌendá nga kinikꞌien Jesuu̱
(Mt 26.59-66; Mr 14.55-64; Jua 18.19-24)
66Nga kuꞌasén, ja xi inchatetjúnre̱ na̱xi̱nanda, xi ngitku ja chanaꞌmi, kju̱ chjine Kju̱a̱kixiꞌe̱ Namiña Diuu̱ kiju̱ Jesuu̱ ngakjáin Junta̱ xi Kꞌa xáꞌe. Kꞌi̱a̱ kichjinengiyáre̱:
67—Tixuyéijni, a jí xi jajinri Namiña Diuu̱ nga Kjuaꞌiꞌnatsjengi xu̱ta̱.
Ku̱i̱cha skengi kui:
—Tsanga xínjnu nga án, jún sꞌejinjínjnu. 68Tsa minengiyájnu ngu najmi, jún bixuyajíjnu. 69Ta̱nga kjatꞌei ku ni̱tjin xi fue, án, Kjindiꞌe xu̱ta̱ nga̱sunde, tjínna ngaꞌñu kju̱ xá xi tjitsjuána Namiña Diuu̱, xi tjisunkꞌare̱ nga ngieje.
70Ku kjia nga ngieje jaxá tsinengiyáre̱:
A kjáin nga kjindiꞌe Namiña Diuu̱ji.
Ku ku̱i̱cha kitsú Jesuu̱:
—Te̱ júnni xi kua tjibixújnu.
71Ku̱i̱cha kitsú jaxá:
—Je ngite̱ machjenjínña testingo̱. Ñá xi je kinuꞌya subaña nga kui xi kua tjitsú.
Currently Selected:
Luka̱ 22: MZI
Highlight
Share
Copy
Want to have your highlights saved across all your devices? Sign up or sign in
México © Sociedad Bíblica de México, A.C. AÑO
