Luka̱ 24

¡Tjikun Jesuu̱!

(Mt 28.1-10; Mr 16.1-8; Jua 20.1-10)

1Ndumingu nga kjamaꞌasen, kijí yachjin ngasun tsjuꞌe Jesuu̱ nga inchafaiju̱ ndifasinje̱n xi je sindundáre̱. 2Nga jichú, kube nga ndi̱a̱jo̱ xi tjichjáre̱ tsjuꞌe Jesuu̱ je ngite̱ ngandeꞌejí kjitjián. 3Kui nga tsasꞌen ngaya ti̱xa̱, tanga sakujíre̱ yajoꞌe̱ Jesuu̱. 4Ku bejí mí najmi xi kitsiꞌin ku mí xi kitsikja̱o.

Tra̱tse jó já xiꞌin je inchatꞌáre̱ nga kube. Najñu xi ꞌñu tiaba ku xi inchafatꞌai xi inchayajá. 5Tuxi ꞌñu kitsakjún yachjin ku yénniña yajoꞌe̱ janda nga kitsikꞌajore tjen nangi. Kui ja ku̱i̱cha kitsúre̱:

«Mí kjua nga ngajinꞌen xi je jesún tjiminchitsjáijnu xi tjikún. 6-7Tikjaitsjénjnu najmi xi kitsújnu Jesuu̱, Kjindiꞌe xu̱ta̱ nga̱sunde, nga tuku kjitjián nangi Ngalilea̱. Kitsuyájnu nga tjin xi tsikasꞌen ngaya tsja xu̱ta̱ xi xaba ku nga kru nikꞌentꞌa, ta̱nga nga xi ma ján ni̱tjin fixꞌajin ngajónire̱.»

8Ku kui yachjin jitsjénre kui én, 9-11ku kijí kui nga̱nde. Nga jichú jma sindu xi tengu já xi faijusún Enꞌen Namiña Diuu̱ ku kju̱ ja xi ikuyáre̱, ku kitsuyáre̱ najmi xi kumataꞌin. Tanga kisꞌejinjínre̱ kui ja én xi inchatsú yachjin, nga̱tꞌa xuku kju̱a̱ndséntse incha uyare̱.

Tjiujun Maria̱ Lena, kju̱ Na̱juana̱, kju̱ Maria̱, naꞌe̱n xta̱ xi ikuyáre̱ Jesuu̱ xi ꞌmí Santia,

12Ta̱nga, Pe, tsanga nga kijí ngasun tsjuꞌe Jesuu̱. Tu̱ jichútse, tjeꞌñu tsase ngaya ti̱xa̱, ta̱nga tu̱ najñu xi kinikjatjikjátse yajoꞌe̱ Jesuu̱ kube. Ku kjia te̱ jatjíni nganiꞌya, ku tuxi se̱n kjimáre̱ najmi xi kumá.

¡Tijniji̱njni kꞌui, nga tu̱ ꞌmaijín!

(Mr 16.12-13)

13Tuku kui ni̱tjin, jó xu̱ta̱ xi sꞌejínre nga̱tꞌaꞌe Jesuu̱, Emau̱ inchafué, ngu nga̱nde xi tengu ꞌmí metro̱ nga kjínre Jerusalen kjitjián.

14Nga inchabasenijmi ngieje najmi xi kumá, 15Jichú Jesuu̱, kitsitiña yajoꞌe̱ ku tekuácha kisꞌebixi xukúcha tjima kui ja, 16ta̱nga kubejí tsa kui. 17Tsinengiyáre̱ Jesuu̱:

—Mí xi tjibasenijmi̱jnu nga tjimajnu ndiya.

Ngiajó ja xi ikuyáre̱ Jesuu̱ kixincha; chji kun ngakjain nga ngi sindúre, 18ku xta̱ xi ꞌmí Kleofa̱, tsichjajo̱ Jesuu̱:

—A tu̱jítse xi nukjuai Jerusalen xi yijí najmi xi kumá ni̱tjin xi sꞌe̱i̱ itjaña.

19Tsinengiya Jesuu̱:

—Mí xi kumá.

Ngiajo kui já skengire:

—¡Najmi xi kiꞌñajun Jesuu̱, xi tsuya Enꞌen Namiña Diuu̱ xi chja̱ Nasare! Nga̱kjáin Namiña Diuu̱ ku nga̱kjáin na̱xi̱nanda, Jesuu̱ tuxi tjínre ngaꞌñu ngieje xá xi tjitsiꞌin. 20Ta̱nga ja chanaꞌmi xi inchatetjún kju̱ xi inchatetjúnre̱ na̱xi̱nandaña kumá xi kitsiꞌin nga xu̱ta̱ romano̱ kitsikꞌien Jesuu̱ tꞌa kru. 21Ji̱n tjichuyájni tsikain nga kui tsixán Israe. Ta̱nga je jan ni̱tjin tjínre nga kꞌien.

22»Kui tꞌajñu, tjin yachjin xi chja̱ xu̱ta̱jni xi tuxi ndá inchatkunjni. Ta̱jñu kijí kui yachjin nga̱sún tsjuꞌe Jesuu̱, 23ku kitsújni̱ nga sakujíre̱ yajoꞌe̱ Jesuu̱. Ku tekuácha kitsújni̱ nga xi tsixatꞌare Namiña Diuu̱ ikúre̱ yajoꞌe̱, ku kui xu xi kitsuyáre̱ nga tjikún Jesuu̱. 24Ku tjin ja xiꞌin xi chja̱ xu̱ta̱jni xi kijí ngasun tsjuꞌe Jesuu̱ ku te̱ kuáxucha tjin najmi xi kube xukúcha tsú én xi kitsuyájni̱ yachjin. Ta̱nga tekuácha kubejí Jesuu̱.

25Ku̱i̱cha skengi Jesuu̱:

—A ku tuxi ndsénjnu jún nga makjinjínjnu. Mí xá kuꞌñu fí sꞌejínjnu ngieje én xi ikuyájnu chjine xi tsuya Enꞌen Namiña Diuu̱. 26A yajíjnu jún nga xi jajin Namiña Diuu̱ nga ndiukꞌatsjengijnu, tu̱xá tjin nga tse kju̱a̱ꞌáon kju̱a̱ꞌamá ku kjiátse mijin ndiu̱jmí nga batexuma.

27Ku kjia kitsuyáre̱ Jesuu̱ ngieje én xi tjichja Xu̱ju̱n Enꞌen Namiña Diuu̱ ngatꞌaꞌe. Xu̱ju̱n kju̱a̱kixiꞌe Moise tsaꞌangíre̱, ku kjia skabére̱ xi tsuya xu̱ju̱n enꞌen Namiña Diuu̱.

28Nga je makjichú nga̱nde xi ꞌmí Emau̱, je kjueꞌan kitsú Jesuu̱. 29Tanga ngiajó kui já xi ikuyare̱ Jesuu̱ jejíre̱ kju̱a̱:

—¡Tijniji̱njni kꞌui! Je ngixún, ku xati je majñu ngaya ndiyá.

Kui nga Jesuu̱ jña kiju nganiꞌyaꞌe̱ kui ja. 30Nga kisꞌendu nga tsakjien, Jesuu̱ skabe ni̱pan, kitsjuáre nikꞌuechji Namiña Diuu̱, xki kiti itsje ku kitsjuáre kui ja. 31Ku ngiajó ja xi ikuyáre̱ Jesuu̱ kube ꞌyá xi inchachjajo, ta̱nga tra̱tse kitsichaja yajoꞌe̱ Jesuu̱. 32Ngiajó ku̱i̱cha kitsúre̱ xikjin: «A mítsa kjáin, nga tjichjajo̱ña ngaya ndiya ku tjitsuyáña nga̱tꞌaꞌe Xu̱ju̱n Enꞌen Namiña Diuu̱, xuku xi ngu ndiꞌi tjutse ngaya anima̱ña.»

33Tekuíni ura jatjíni Jerusalen. Kꞌi̱a̱ sindúni xi tengu ja xi batetsajosún Enꞌen Namiña Diuu̱, kju̱ ja xi chja̱ tku̱ xu̱ta̱ xi jña tjima. 34Ja xi kꞌi̱a̱ sindu ku̱i̱cha kitsúre̱: «¡Jiyánire̱ Jesuu̱! ¡Pe ikúre̱ yajoꞌe̱!»

35Ngiajó ja xi ikuyáre̱ Jesuu̱, kitsuyáre̱ xi ngisa najmi xi kumá ndiya xi fue Emau, ku kúcha nga kube nga Jesuu̱ xi tsenkja, nga xki kiti tsꞌatsje ni̱pan.

Jesuu̱ ikúre̱ yajoꞌe̱ ja xi ikuyáre̱

(Mt 28.16-20; Mr 16.14-18; Jua 20.19-23)

36Tuku inchatsuya najmi xi kumataꞌin ngiajó kui ja, nga jichú Jesuu̱ ngabasenꞌe̱n jma sindu ngieje ku kitsikunda: «¡Chjabéjnu kju̱a̱chꞌa̱nꞌen Namiña Diuu̱!»

37Ngieje nga tuxi ndá kitsakjún, nga̱tꞌa kitsikjao nga se̱n xi jichutꞌáre. 38Tanga ku̱i̱cha kitsúre̱ Jesuu̱: «Mí xá kuꞌñu tjitkunjnu. Mí xá nga tuxi niꞌin sꞌejínjnu. 39¡Chaséjnu ndsaꞌan kju̱ saꞌan! ¡Án kua! ¡Chjingajúnjnu! ¡Chaséjnu! ¡Án kua! Xi ꞌmí se̱n najmíre̱ yajo kju̱ ninda, ta̱nga án tjínna.»

40Kꞌiamáre̱ nga kua tjitsúre̱, ikúre̱ Jesuu̱ tsja kju̱ tsjai. 41Ta̱nga kui ja, inchatsakjun ku te̱ tsjua inchamáre̱, janda inchasꞌejinjínre̱ tsanga kjáin najmi xi inchabasére̱. Ku kjia tsinengiyáre̱ Jesuu̱: «A tjínjnu nguxa xi chine.»

42Nguxa tjia̱o̱ tsjú kitsjuáre, 43ku skine Jesuu̱ ngixku̱n ngieje kui ja. 44Ku kjia te̱ ku̱i̱cha kitsúnire̱: «Tikjaitsjénjnu én xi kixínjnu nga tuku kju̱ an jña kisꞌemaña: “Janda nga bitjusún ngieje najmi xi tjichja Xu̱ju̱n Enꞌen Namiña Diuu̱ nga̱tꞌaꞌna.”»

45Kjia kitsuya én xi niꞌinjín makjínña kju̱a̱kitakun xi kjitꞌa Xu̱ju̱n Enꞌen Namiña Diuu̱, tuxi cha̱n ngatukjínre:

46«Tjitsú Xu̱ju̱n Enꞌen Namiña Diuu̱, nga ꞌme xi jajín Namiña Diuu̱ nga ꞌBatsjengiña ku fueyánire̱ xi ma ján ni̱tjin. 47Tekuácha tjitsuya nga ngieje na̱xi̱nanda kuichjayana, tuxi ngieje nga tꞌeꞌénre Namiña Diuu̱ ku ngatsichatꞌáre.

»Ngiejejnu tsubáre̱ nga fainukjuájnu Jerusalen 48ngieje kui najmi xi kuya̱jnu. 49Kjatꞌe̱i̱ tijñájnu na̱xi̱nanda, nga̱tꞌa je xati tsingiyájnu xi kitsjuá én Namiꞌna nga tsingiyájnu. Ngatu̱ ngují kjaꞌi nga̱nde mangijnu, janda nga sakujnu ngaꞌñu xi tsingiyájnu Namiña Diuu̱.»

Kúcha kumá nga tsijin ndi̱u̱jmí Jesuu̱

(Mr 16.19-20)

50Jesuu̱ jña kiju̱ janda Betania̱ ja xi ikuyáre̱. Kꞌi̱a̱, yenkꞌa ngiajó tsja ku kitsichakunné. 51Ku tekuíni chu̱ba̱ tsangiju̱ ndiu̱jmi, 52ku kui ja inchasére ku inchachja̱tꞌáre nga inchabetkun.

Nga jaꞌa ngieje najmi, ja xi ikuyáre̱ Jesuu̱ tuxi tsjua sindúre nga jatjíni Jerusalen, 53ku ngieje ni̱tjin fue ni̱ngu̱xi̱ judio̱ nga fuekakú yajoꞌe̱ nga betkun Namiña Diuu̱.

Currently Selected:

Luka̱ 24: MZI

Highlight

Copy