Luka̱ 21
21
Chje̱ xi kitsjuá chjun xi ni̱ma̱ xi je kꞌien xꞌinꞌe̱n
(Mr 12.41-44)
1Ngaya ni̱ngu̱xi̱ judio̱ kjitjián Jesuu̱ ku kube nga tjin xu̱ta̱ xi tjínre taon inchamincha taon kaxaꞌe̱ chje̱. 2Tekuácha kube nga ngu chjun xi je kꞌien xꞌinꞌe̱n nga jó taon xixi xi tsejí chjiꞌe, tsꞌunya ngaya kaxa. 3Kui nga Jesuu̱ ku̱i̱cha kitsúre̱ ja xi kjibakuyáre̱:
—Kju̱a̱xikjain nga kui chjun xi je kꞌien xꞌinꞌe̱n tse kitsjuá ngisa tukꞌuajíre̱ ja xi tjínre taon. 4Nga̱tꞌa ja xi tjínre taon xi inchaꞌbangitsére̱ kitsjua; ta̱nga kui chjun, xi tuxi ni̱ma̱, kitsjua ngieje xi tjínre nga fabixi nga̱sunde.
Nga kitsuya Jesuu̱ nga bixundu ni̱ngu̱xi̱ judio̱
(Mt 24.1-2; Mr 13.1-2)
5Tjín xu̱ta̱ xi inchabasennijmí nga tuxi tsjuakun ndia̱jo xi kundaju̱ ni̱ngu̱xi̱, ku nga tekuácha tsjuakun asen xi kundatꞌa tayachꞌua. Kui kitsú Jesuu̱: 6«Fichú ngu ni̱tjin nga ngieje kui najmi nga bixundu. ¡Janda ngují kui chꞌua nga sasen kixí!»
Tijñandájnu nga̱tꞌa je makjichu nga fe
(Mt 24.3-28; Mr 13.3-23)
7Ja xi inchabakuyáre̱ Jesuu̱ tsinengiyáre̱:
—Kjiá nga bixundu ni̱ngu̱xi̱. Mí chuba̱ xi kuitsuyáña nga je ndiuma ngieje kui najmi.
8Kiskengi Jesuu̱:
—¡Ndá chaséjnu! Nga tu̱ chꞌanachajujíjnu yajo̱jnu. Kjínma xi kjuaꞌí nga án ku̱i̱tsu̱, ku ku̱i̱cha kuitsúre xu̱ta̱: “Án kua xi jajin Namiña Diuu̱ nga ꞌbatsjengijnu”, ku̱tsa kuicha kuitsu̱ “Je jichú kui ura”. Ta̱nga tu̱ ñaꞌanjínjnu xki̱. 9Jún ndatsa nuꞌyájnu nga tjin kju̱a̱bixkán kjaꞌi na̱xi̱nanda, ta̱nga tu̱ minchatkiunjínjnu yajo̱jnu. Kju̱a̱ꞌa kui najmi, ta̱nga tuku kje fejí nga̱sunde. 10Ndsijín xikjin kjajun na̱xi̱nanda ꞌñu, 11ku kjín nga̱nde nga chaon ꞌñu kju̱a̱ꞌa. Xín nga̱nde nga kꞌuejire̱ xi chine xu̱ta̱, ku chiꞌin xi ꞌñu kumáre̱. Ndi̱u̱jmí kutsejen najmi xi kjema yáña, xi tsikjatse tkiúnña.
12»Nga kje majín ngieje kui najmi, tjin xu̱ta̱ xi kuangatjengíjnu ku kjabeꞌñújnu. Ngaya tsja xu̱ta̱ xá ni̱ngu̱xi̱ judio̱ tsikasꞌénjnu ku nduya kuinchajnu. Nga̱tꞌa jún, an tebakuyájnu, ngaya tsja jaxá tetjún tsikasꞌénjnu tuxi manga tsijéjnu.
13»Ta̱nga kjia sakujnu nga̱nde nga nukjuájnu ngatꞌaꞌna. 14Nga tu̱ nikjaojíjnu mí én xi bixujnu nga ꞌnatsjengíjnu yajo̱jnu. 15Án basejúnjnu tuxi kju̱a̱kitakún chjungíjnu, ku ngují xi táonre jún xi kuma nga kuichjaꞌájnu ku ku̱i̱tsu nga ndáji tjin én xi tjibixújnu.
16»Tekuíni najmijnu, tsꞌejún, ndichjajún, xi xingijún kju̱ xi ndá yaꞌájnu xi tsikasꞌénjnu ngaya tsja xu̱ta̱ xá. Yajínjnu xi tsikꞌénjnu xu̱ta̱. 17Ngieje xu̱ta̱ xi tsichꞌaojnu nga̱tꞌa án tebakuyájnu. 18¡Ta̱nga nindusinjínjnu yajo̱jnu! 19Tsanga ꞌñu minchájnu janda nga fetꞌa, ꞌbangijnu.
20»Nga yájnu nga jajún je jatjiyandáire̱ na̱xi̱nanda Jerusalen, ngatuyájnu nga xatí ku̱i̱xundú. 21Xi na̱xi̱nanda sindu titjújnu; xi sindu nga̱nde xi chja̱ nangi Judea̱, tiyújnu ngatje̱n na̱xi̱; ku xi ngijña tjima ngatu̱ uꞌbejíjnu na̱xi̱nanda. 22Kui ni̱tjin, Namiña Diuu̱ tsijére xi tꞌeji én, xukúcha je tsé tjínre nga tjichja Xu̱ju̱n Enꞌen Namiña Diuu̱. 23Yachjin xi kjindi inchayaꞌa kui ni̱tjin tuxi tse nga on kjueyáre̱. ¡Xꞌan xu xi kjindindá tjínre! Nga̱tꞌa ngieje xi chja̱ kui na̱xi̱nanda xi tuxi on kjueyáre̱ ku majére. 24Tjín xi spada nikꞌenjnu̱, ku kjaꞌi xi mangijuꞌñu janda kjaꞌi na̱xi̱nanda. Nikixundú ku kjaꞌi xi kjabeꞌñu na̱xi̱nanda Jerusalen, janda nga kjuichu chu̱ba̱ꞌe̱ nga kui xu̱ta̱ te̱ nichajáni.
Nga faꞌíni Kjindiꞌe xu̱ta̱ nga̱sunde
(Mt 24.29-31,42-44; Mr 13.24-27)
25»Tjín najmi xi kjema yáña xi kumáre̱ tsuꞌbi, sá kju̱ niñú. Nga ngieje na̱xi̱nanda xi tjin kukjinjínre̱ xu̱ta̱ nga tsikjao ku tsakjún nga̱tꞌa tuxi chꞌao kjuane tjiaonꞌen nda̱chakún. 26Ngu kju̱a̱tkiún xi kju̱a̱xikjain kꞌuema xu̱ta̱ nga janda xi kjuesunyá nga tsikjao kúcha kuma nga kju̱e̱ nga̱sunde. ¡Ngieje ngaꞌñu xi tjínre ndi̱u̱jmí nga ku̱i̱xuya! 27Kui najmi xi tsjuá chu̱ba̱ nga je te̱ makjaꞌíñaꞌa̱n nga̱sunde. Nga̱tꞌa kjia nga chájnuꞌan, Kjindiꞌe xu̱ta̱ nga̱sunde, nga ngajin yufi ndibaꞌan nga ngieje ngaꞌñu ku nga án xi kjuatsiꞌínꞌan. 28Nga ku̱ma ngieje kui najmi, ndá tiaꞌánjnu xki̱, nga̱tꞌa Namiña Diuu̱ xi je xati faꞌi nga ndiukꞌatsjengijnu.
Kju̱a̱kitakún nga̱tꞌaꞌe ya ingera̱
(Mt 24.32-35; Mr 13.28-31)
29Tekuácha yeꞌé chu̱bare Jesuu̱ kui kju̱a̱kitakún:
«Takuyájnu kju̱a̱kitakún xi tsjuájnu ya ingera̱, kútsa tumíni ya. 30Nga ngu ya tjure̱ xka̱ tjatse, yájnu jún nga je ndiba chatsí. 31Ku tekuácha, nga yájnu nga ku̱ma ngieje najmi xi texiyájnu, ngatuyájnu nga je ndiba nga ndiukatexuma Namiña Diuu̱. 32Kju̱a̱xikjáin nga kuacha kuma, tekjie nga fesún ngieje xi tjima kjatꞌei. 33Ndi̱u̱jmí ku nangi chajá ngieje, ta̱nga énꞌna najmí ni̱tjin nga chaja.
Jesuu̱ kitsuyáre̱ ja xi kjibakuyáre̱
34»¡Chúnjnu yajo̱jnu! Ngatu̱ najmi xi chinejín ku xánjín ꞌbejíntakúnjnu, kju̱ ngieje najmi xi tsu ja kui nga̱sunde. Nga̱tꞌa tsa ku̱a̱cha ñaꞌánjnu janda chajíjnu mí chuba̱ nga kju̱e̱ nga̱sunde, 35ku xuku chu̱ kjueyájnu, nga tra̱tsé, tubejí nga menya che̱n. 36Kui kju̱a̱ nga tu̱tsjai nga kijnakju̱a̱ tijñájnu. Chjinengijnu kju̱a̱ndá Namiña Diuu̱ ngatutsjái tuxi ma nga bitjuꞌájnu yajo̱jnu nga ngieje najmi xaba xi ku̱ma. Kuacha kumá nga án mijñatꞌájnu, nga Kjindiꞌe xu̱ta̱ nga̱sunde kiꞌmína.»
37Ngieje ni̱tjin nga ngaya ni̱ngu̱xi̱ ikuya Jesuu̱, ku nga ni̱tje̱n Tjengi Olibo̱ fue. 38Xki̱ tꞌajñú, fue ni̱ngu̱xi̱ xu̱ta̱ nga fuetꞌére Jesuu̱.
Currently Selected:
Luka̱ 21: MZI
Highlight
Share
Copy
Want to have your highlights saved across all your devices? Sign up or sign in
México © Sociedad Bíblica de México, A.C. AÑO
