Luka̱ 20

Ngaꞌñu xi tjínre Jesuu̱

(Mt 21.23-27; Mr 11.27-33)

1Ni̱ngu̱xi̱ judio̱ kitjian Jesuu̱ nga kjibakuyáre̱ xu̱ta̱ én tjatse̱ xi tjínre kju̱a̱ndá. Ja chanaꞌmi tetjun, chjine Kju̱a̱kixiꞌe̱ Namiña Diuu̱ kju̱ xi inchatetjúnre̱ na̱xi̱nanda jichutꞌa tiñare 2ku tsinengiyáre̱:

—ꞌYá kitsjuári ngaꞌñu nga niꞌin ngieje kui najmi.

3Ku̱i̱cha skengi Jesuu̱:

—Tekuácha án, minengiyájnu ngu najmi: 4ꞌYá xi kitsjuáre ngaꞌñu Jua xi Batenda nga xu̱ta̱ itenda. A Namiña Diuu̱, axu̱ kjaꞌi xu̱ta̱.

5Ku kui ja tsichjasi, ku̱i̱cha kitsure̱ xikjin: «Tsa bixuña nga Namiña Diuu̱ kitsjuáre ngaꞌñu Jua, kuinengiyáña Jesuu̱ mí xá kinisꞌejinjínña én xi kitsú. 6Kútsa bixuña nga xu̱ta̱ nga̱sunde kuma, ndiajo tsikꞌenjúnña xu̱ta̱, nga̱tꞌa sꞌejínre nga Jua kui xi tsuya enꞌen Namiña Diuu̱ kumá.» 7Jaskan ku̱i̱cha skengi kui ja:

—Yajíjni ꞌyá xi kitsjuáre ngaꞌñu Jua.

8Ku̱i̱cha kitsúre̱ Jesuu̱:

—Tekuácha xiyajíjnu án ꞌyá xi kitsjuána ngaꞌñu nga̱tꞌaꞌe najmi xi tsiꞌinꞌan.

Jnu̱ tutseje xi kichjaꞌachji xkisa nga kinixájo

(Mt 21.33-46; Mr 12.1-12)

9Jesuu̱ ꞌyenijmi̱re xu̱ta̱ kui chu̱ba̱:

«Jnu̱ tutseje̱ yeꞌé ndia̱ꞌe̱ ngu nangi, jaskan jaꞌachji xkisáre kjín ja ku tse kijí kjaꞌi nga̱nde. 10Nga jichu nitjinꞌe̱n nga bicha tutseje̱, kitsingiya ngu musuꞌe̱ nga ndiukinengi xukúcha tjín xi tsubáre̱ nga sakure. Ta̱nga ja xi inchaꞌbechji xkisa jnu̱ tutseje nga inchatsixájo isénre xta̱ xi jichutꞌare ku tje̱n tiya tsja nga jichutꞌánire̱ ndi̱a̱ꞌe̱.

11»Te̱ kitsingiyáni ngingu musu ndia̱ꞌe̱, ta̱nga tekuácha kikasénre xikꞌui, chꞌao kiꞌmíre ku ngují najmi yaꞌa nga tsꞌutji. 12Jaskan te̱ kitsingiyáni kjaꞌi, tekuácha kiniꞌonre̱ kui xta̱ ku kiꞌnatsje kju̱a̱ꞌñu jma kjiꞌitje tutseje̱.

13»Ku nga je kumá, kitsikjao xi ndia̱ꞌe̱: “Mí xi ndá tsiꞌinꞌan.” Ku ku̱i̱cha kitsú: “Je beꞌan; kjindiꞌna xi ꞌñú mejénna tsingiyaꞌa̱n. Sꞌejínna nga kui xi tsichatꞌare.”

14»Nga kube kui ja nga tiꞌe̱ xi ndia̱ꞌe̱ nangi kju̱a̱ꞌi subá, ku̱i̱cha kitsúre̱ xikjin: “Kui ti xi sakú ngiejere̱ kui nangi nga ꞌmé namiꞌen. Sikꞌienña; ku ku̱a̱cha tsaña kuma nangi.”

15»Ku skabe kui ti, tsꞌatsje jma tjian nangi ku kitsikꞌien.»

Jaskan tsinengiya Jesuu̱:

—Mí xi nikjaojnu jún nga tsiꞌín xi ndia̱ꞌe̱ nangi nga̱tꞌaꞌe kui ja. 16Sꞌejínna, nga ꞌbutjíni, tsikꞌien kui ja ku kjaꞌi xu̱ta̱ tsjuáre nangi jma kjiꞌitjere tutseje̱.

Nga tsitꞌe xu̱ta̱ kui én, ku̱i̱cha kitsú:

—¡Ngují ni̱tjin ku̱a̱cha kuma!

17Jesuu̱ tsase ngiejere xu̱ta̱ ku ku̱i̱cha kitsúre̱:

—Kjáinni, nga tsú Xu̱ju̱n kju̱a̱kixiꞌe̱ Namiña Diuu̱:

“Ndia̱jo̱ xi kumejínre̱

chjine xá chjinde xi kitsinda ni̱ngu̱xi̱ judio̱

kjatꞌei kui ndia̱jo xi ꞌñu chjiꞌe”,

»mí xi mejénre kitsú nga ku̱a̱ kitsú. 18Nga̱tꞌa ngieje xi bixuné kui ndia̱jo̱ tu̱ kao nga bitju. Kutsa tjin xi kui ndi̱a̱jo̱ mentjáire̱ tu̱ skuántse kꞌu̱ya.»

19Ja chanaꞌmi tetjun kju̱ chjine Kju̱a̱kixiꞌe Namiña Diuu̱ kukjínre̱ nga Jesuu̱ kjiminchandsijinjnu xu̱ta̱ xaba xi ꞌyechji xkisa nangi jnu̱ tutseje̱. Jaskan nga mejénre nga tekuíni chuba nga skabeꞌñu Jesuu̱, ta̱nga kumajín kakun nga̱tꞌa inchatsakjúnre xu̱ta̱.

Mejénre̱ nga inchakjabendsen Jesuu̱

(Mt 22.15-22; Mr 12.13-17)

20Xu̱ta̱ xi táonre Jesuu̱ mejénre nga kjabeꞌñu ku tsikasꞌenre̱ xitetjún romano̱. Ta̱nga, nga najmíre̱ mí jee xi batere, kitsingiya ja xi baseꞌmare̱ xi ndá xu̱ta̱ inchaꞌbatsje yajo̱ꞌe ku inchakunda míra ura Jesuu̱ tjuꞌa ngu én xi ndáji tjin.

21Já xi kikunda ꞌmá Jesuu̱ ku̱i̱cha kitsúre̱:

—Ji ku̱a̱ Chjine, yájni nga tutsjai nga én xi kju̱a̱xikjáin nukjuaiji. Tjibakuyeiji nga ngieje xu̱ta̱ nga tsubáre̱ nga tsiꞌinre xki̱ Namiña Diuu̱, ku ngieje xu̱ta̱ nga ngundsiji̱n nga niꞌin xki̱. 22Kui kju̱a̱ nga tjichjinengiyári: A ndátjin nga ꞌbechjitjaijni xta̱xá xi kꞌa xáꞌe xi chja̱ Roma̱ xá xi tjiñaꞌánjni, axu̱ junjín.

23Ta̱nga bé Jesuu̱ nga che̱n inchamejénre kui ja, ku̱i̱cha kitsúre̱:

24—Takína ngu taon. ꞌYá asenꞌen xi kjitꞌa kui taon. ꞌYá jínꞌen xi kjitꞌa kui taon.

Ku̱i̱cha skengi kui ja:

—Tseꞌe xta̱xá xi kꞌa xáꞌe xi chja̱ Roma̱.

25Ku̱i̱cha kitsúre̱ Jesuu̱:

—Titjuájnu xta̱xá xi kꞌa xáꞌe xi tse̱ꞌe̱ xta̱xá xi kꞌa xáꞌe, ku Namiña Diuu̱ xi tse̱ꞌe̱ Namiña Diuu̱.

26Ja xi inchabaseꞌma kumajín nga kitsiꞌín ndsen Jesuu̱. Tukua kumáre̱ kúcha skengire ku ngite kubeji mí xi kitsú ngisa.

Xu̱ta̱ saduseo̱ tsichjajo̱ Jesuu̱

(Mt 22.23-33; Mr 12.18-27)

27Jaskan, yakaꞌa xu̱ta̱ saduseo̱ kikasére̱ Jesuu̱. Nga̱tꞌa sꞌejinjínre̱ kui ja tsa te̱ fueyánire xi fesún, 28kichjinengiyare̱ Jesuu̱:

—Jí ku̱a̱ Chjine, Moise ku̱a̱cha kiski nga, tsa ngu xu̱ta̱ ꞌme ku najmí kjindi kisꞌejíre chjunꞌen, tsꞌe̱ kui nde̱ xta̱ bixantsjaju̱ni kui chjun ku nga̱tꞌere kjindi. Xukúcha tsú kui kju̱a̱kixi, kui tseꞌe kjindi kuma xta̱ xi kꞌien ku tukú jínꞌen manga ngisa.

29»Ndátjin, kꞌui kisꞌendu yatu ja xi tsꞌe̱ kuma xikjin. Tsꞌe̱ xi changa ixantsja ku, nga jaꞌa ni̱tjin, najmi kjindi kisꞌejíre nga kꞌien. 30Xi ma jó tsꞌe̱ ixantsjajuni kui chjun, ta̱nga jaꞌa ni̱tjin tekuácha te̱ kꞌienni ku najmí kjindi kisꞌejíre. 31Tekuácha kumataꞌínni xta̱ xi ma ján kju̱ ngieje xi ngisa janda xi ma yatu. 32Jaꞌa ni̱tjin ku tekuácha kꞌen chjun.

33»Ndátjin, nga ngieje xi je jesún tsiꞌín Namiña Diuu̱ nga faiyanire̱, ꞌyá xi chjunꞌen ku̱ma kui chjun, nga ixantsjaju̱ ngieje xi yatu.

34Skengi Jesuu̱:

—Kjatꞌei ja xiꞌin ku yachjin bixantsjaju xikjin. 35Ta̱nga Namiña Diuu̱ xi ku̱i̱tsu ꞌyá xi mejénre nga te̱ ꞌbemani. Nga ku̱a̱cha kuma, najmí xi te̱ kuixantsjá 36ku najmí xi te̱ kjuesún. Ngieje xi xuku xi inchatsixatꞌare Namiña Diuu̱ kꞌuya, ku nga te̱ sakúnire̱ nga̱nde nga ꞌbema, kjindiꞌe Namiña Diuu̱ kꞌuya. 37Janda Moise kjibakúña nga te̱ ꞌbemani xi je jesún. Xuku én xi tjitsuyáña najmi xi kuma nga kití tjutsꞌín ya, kitsú Moise nga Namiña Diuu̱ kui Namiña Diuu̱ꞌe̱ xu̱ta̱ changaꞌe̱ Abran, Isaa ku Jako. 38Kui nga kuacha ikú Moise nga Namiña Diuu̱ mítsa Namiña Diuu̱ꞌe̱ xi je jesún, Namiña Diuu̱ꞌeni xu̱ta̱ xi sindukún, nga̱tꞌa xi mare̱ Namiña Diuu̱ ngieje nga sindukún.

39Yajin chjine Kju̱a̱kixiꞌe̱ Namiña Diuu̱ xi kꞌi̱a̱ tjima, ku̱i̱cha kitsú:

—¡Jí ku̱a̱ Chjine, tuxi ndá kichjungiji!

40Nga je kuma, ngi ngují xi mejénre̱ minengiyáre̱ ngisa.

Kúcha kichjinengiya ngataꞌe xi jajin Namiña Diuu̱ nga ꞌBatsjengiña

(Mt 22.41-46; Mr 12.35-37)

41Tsichja Jesuu̱ ku tsinengiyáre̱ xu̱ta̱ xi sindu kꞌiaku̱a̱:

—Mí xá ku̱a̱cha tsú xu̱ta̱ nga xi jajin Namiña Diuu̱ nga ꞌBatsjengiña, tsubáre̱ nga tje̱ꞌe̱ Ndabi ku̱ma. 42Ngaya xu̱ju̱nꞌe̱n Salmo̱ tuku kui Ndabi̱ xi ku̱i̱chá kitsú:

“Ku̱i̱chá kitsúre̱ Namiña Diuu̱ Ndi̱a̱ꞌna̱ xi jajin Namiña Diuu̱ nga ꞌBatsjengiña:

‘Tijni ngatje̱n ngandá jma sián yaxile chakunꞌna,

43janda nga tsichajaꞌa̱n xi táonre jí.’”

44»Ndi̱a̱ꞌna̱ tsú Ndabi nga tsikjaꞌakja xi jajin Namiña Diuu̱ nga ꞌBatsjengiña, xi tje̱ꞌe̱ Ndabi jindibá.

Nga ꞌyejintakún Jesuu̱ kúcha ngáre̱ ja chjine Kju̱a̱kixiꞌe̱ Namiña Diuu̱

(Mt 23.1-36; Mr 12.38-40; Lk 11.37-54)

45Ngakjáin ngieje xu̱ta̱, kitsúre̱ Jesuu̱ ja xi kjibakuyáre̱:

46—¡Chúnjnu yajojnu ngatꞌaꞌe ja chjine Kju̱a̱kixiꞌe̱ Namiña Diuu̱! Kui ja, tuxi tsjuáre̱ baja najñu xuku xu̱ta̱ xi ꞌñu xáꞌe, ku nga tuxi yatkun nga nikundá ngaya niꞌya ndetsin. Nga fue ngu sꞌui ku̱tsa nga fue ni̱ngu̱xi̱ judio̱, tuxi tsjuáre nga kui xi sakúre nga̱nde xi ndá. 47Kui ja ndusinjínre̱ nga kjebaꞌáre̱ niꞌyaꞌe̱ yachjin xi je jesún xꞌinꞌe̱n, ku kjia tuxi tsé kju̱a̱ndá minengitꞌáre Namiña Diuu̱ tuxi ngieje nga tsikjínre̱ yajo̱ꞌe nga tuxi ndá xu̱ta̱. Tanga tusamá ꞌñu tse nga tsijére Namiña Diuu̱ nga ngieje xi ngisa.

Currently Selected:

Luka̱ 20: MZI

Highlight

Copy