Luka̱ 19

Sakeo̱, xta̱ xi tjínre taon

1Jesuu̱, tsasꞌén na̱xi̱nanda Jeriko̱. 2Kꞌi̱a̱ kui nga̱nde kjitjián Sakeo̱, ngu xta̱ xi tuxi tjínre taon ku kui sián tetjúnre̱ ja xi faꞌachji taon xi machjitjái xá xi ñaꞌán. 3Itju ndiyate Sakeo̱ nga̱tꞌa mejénre nga bé ꞌyá xi ꞌmí Jesuu̱, ta̱nga majín basére, nga̱tꞌa kꞌajíma nga̱tꞌa tuxi xu̱ta̱ kjín xi tjin ngatje̱n ngakjáin xi kjiꞌbechjare. 4Kui nga tsanga nga kijí ngu nga̱nde jma ma basére Jesuu̱, ku nga̱ꞌa ngu ya ingo̱ tsijín.

5Nga jaꞌa Jesuu̱ kꞌi̱a̱kua, ku tsichjaju: «Sakeo̱, titjajéin kꞌi̱a̱kua, kjatꞌe̱i̱ma, nga̱tꞌa mejénna nga niꞌyari tsikjayaꞌa̱n.»

6Tjeꞌñu itjeje̱n Sakeo̱, ku tuxi tsjua kumáre̱ nga nganiꞌyaꞌe̱ kitsjuáre nga̱nde nga jichu Jesuu̱.

7Nga kube xu̱ta̱ najmi xi kuma, chꞌao isenijmiiya Jesuu̱ ku ku̱i̱cha kitsú: «Kúcha tsú nga niꞌyaꞌe̱ kui xta̱ xi tuxi ndáji xu̱ta̱ kijí.»

8Nga je tsakjén, isitjén Sakeo̱ ku ku̱i̱cha kitsúre̱ Jesuu̱:

—Ndi̱a̱ꞌna̱, basen ngieje najmi xi tjínna tsjuána xu̱ta̱ xi ni̱ma̱ tjima. Ku tsa tjin najmi xi je kitsichejeꞌan, ñujún ndiya nga kꞌa nga tsikꞌuꞌbeꞌa̱n kui chji.

9Ku̱i̱cha kitsúre̱ Jesuu̱:

—Janda kjatꞌei, jí ku xu̱ta̱ xi ngu nganiꞌyájnu je tsꞌangíjnu, nga̱tꞌa jí tuxi tjeꞌe̱ Abran nukjuaiji. 10Án sa, Kjindiꞌe xu̱ta̱ nga̱sunde, jiꞌiꞌa̱n nga kjuaꞌikangitsjái ku kjuaꞌikꞌatsjengiꞌa̱n xi kjin tjimare̱ Namiña Diuu̱.

Xi te̱ musu

11Jesuu̱ je tuxi Tiña tsubáre̱ na̱xi̱nanda Jerusalen, ku najmi xi inchatsisꞌejín xu̱ta̱ xi tꞌére nga je tjeꞌñu faꞌi nga Namiña Diuu̱ ndiukatexuma. 12Kui nga ku̱i̱cha yeꞌe chu̱bare Jesuu̱:

«Ngu tiꞌe̱ xta̱xá tetjun, xta̱xá tetjun kikasén ngaya na̱xi̱nandaꞌe, ku tuxi kjin kijí tuxi ma nga xta̱xá xi kꞌa xáꞌe ngisa kitsjuáre ngaꞌñu nga ꞌbejña kui xá. Nga je kuma fatjíni na̱xi̱nandaꞌe. 13Kui kju̱a̱ nga te musuꞌe tsichjare. Taon kitsjuáre nga ngu ngu, ku ku̱i̱cha kitsúre̱: “Ti̱xají kui taon, janda nga fatjiniꞌa̱n.”

14»Ta̱nga xu̱ta̱ xi chja̱ kui na̱xi̱nanda mejínre̱ kui tiꞌe̱ xta̱xá tetjun, kui nga kitsingiya ngu tjiꞌñu xu̱ta̱ xi kijure én xta̱xá tetjun: “Mejínjni nga kui xta̱ ma xta̱xá tetjunjni̱.”

15»Ta̱nga tekui xi xta̱xá tetjun tsꞌuya kui tiꞌe̱ xta̱xá tetjun ku nga jichúni na̱xi̱nandaꞌe, tsichjáre̱ xi te musuꞌe xi inchatsikuendá taon, nga kusún kúcha kumá.

16»Jichú xi tjún kui ja, ku ku̱i̱cha kitsúre̱: “Ndi̱a̱ꞌna̱, kitsixajuꞌa̱n taon, ku te̱ ndiya nga tsꞌe kitsiꞌínꞌan nga taon xi kitsiꞌína.” 17Ku̱i̱cha kitsú xta̱xá tetjun nga skengi: “¡Ndátjin!, kui musuꞌna̱ xi ndá xikꞌui. Nga̱tꞌa tuxi kumári ndá kichínri xi nguxa̱ kitsjuára, kui nga te na̱xi̱nanda batexumáiji kjatꞌei.”

18»Jichú musu xima jó ku ku̱i̱cha kitsú: “Ndi̱a̱ꞌna̱, kitsixajuꞌa̱n taon, ku ón ndiya nga tse tsensún nga xi kitsiꞌína.” 19Ku̱i̱cha kitsúre̱ xta̱xá tetjun kui musu: “Ku jí tekuácha ón na̱xi̱nanda batexumari.”

20-21»Jaskan te jichúni kjaꞌi musu ku ku̱i̱cha kitsú nga tsichjá: “Ndi̱a̱ꞌna̱, beñaꞌan nga tuxi mejénri nga ndá ñaꞌan xári ku chjinengi janda jma nga majínña. Kui kju̱a̱ kitsakjúnꞌan ku payutse kitsikjatjikjaꞌan tao̱nri ku jayaꞌan. Kꞌu̱i̱ tsikjatji̱ ngiejénira.” 22Ku̱i̱cha skengire xta̱xá tetjun kui musu: “Ndájiji nga musu. Tejíni tjibichanéi yajo̱ri nga tjinukjuáiji. Tsa yí nga ꞌñu minengiꞌan janda jma tje̱n majín, 23mí xá banko̱jí kꞌajínji taon. Tsa kuacha kiniꞌin, ku nga fatjiniꞌa̱n, sakúnina tao̱nꞌna̱ kju̱ xku̱n xi kitsiꞌín.”

24»Kui nga kitsiꞌin xta̱xá tetjun kjín musu tsinengíre̱ xi kꞌi̱a̱ incha: “Chjubaꞌájnu taon kui musu ku xi ngi te ndiya tsensúnre̱ nga xi kitsiꞌíre, titjuájnu.” 25Ta̱nga ku̱i̱cha kiskengi kui ja musu: “Ndia̱jni̱, mí xá kui baꞌíre̱, nga je te̱ ndiya tsensún tse̱ꞌe.”

26»Tsichja xta̱xá tetjun ku ku̱i̱cha skengire kui ja musu: “Kju̱a̱xikjain én xi xinjnu, xi tsé tjínre, tu̱sá tsé baꞌíre̱; ta̱nga xi najmíre̱, janda xi nguxátse tjínre ku tjubaꞌáre̱. 27Ta̱nga xi táonre án, ndibajújnu ku tikjesúnjnu kꞌu̱i̱ ngakjáinꞌan, nga̱tꞌa kui xi kumejínre̱ nga án ku̱maꞌa̱n xta̱xá tetjunꞌe̱n.”»

Nga tsasꞌen Jesuu̱ na̱xi̱nanda Jerusalen

(Mt 21.1-11; Mr 11.1-11; Jua 12.12-19)

28Kitsikje enꞌen Jesuu̱ nga tjicha ku kijí ndiya xi kjue na̱xi̱nanda Jerusalen. 29Nga jichú tiña nga̱nde xi ꞌmí Betfage ku Betania̱, kisasen kꞌi̱a̱ jma kjitjián Tje̱ngi̱ Olibo̱. Kꞌi̱a̱kua kitsúre̱ jó ja xi kjibakuyáre̱: 30«Tangíjnu kui nga̱nde xi kjitjián jan. Kꞌi̱a̱ jma fichújnu kjitaꞌñu ngu burru. Kje najmí xi ꞌbeñasúnre̱ kui burru. Chjundujnu ku ndibajojnu. 31Tsa tjin xi minengiyájnu̱ mí xá nga tjichjundújnu, ku̱i̱cha chjungíjnu: “Ndia̱jni̱ kjimachjénre.”»

32Ngiajó ja xi kjibakuyáre̱ Jesuu̱ kijí kui nga̱nde ku kisakúre kui burru, xukúcha nga kitsúre̱ kuí. 33Nga je inchakjendu, tsinengiya xi ndia̱ꞌe̱:

—Mí xá tjichjundújnu burru.

34Ku ku̱i̱cha skengi kui ja:

—Ndi̱a̱jni̱ kjimachjénre.

35Kui nga kiju̱ burru, yasúnre̱ najñu xi fatjikjá, ku kixinchajo Jesuu̱ nga kisꞌejñasunre.

36Ngatje̱n Jerusalen kijí Jesuu̱, ku kjín xu̱ta̱ xi inchaꞌbendu najñu sutjikjaꞌe nga̱ya ndiya jma faꞌa Jesuu̱. 37Nga jichú jma tiñare Tjengi Olibo̱ ku jajénya ngatje̱n na̱xi̱nanda Jerusalen, ngieje xu̱ta̱ xi tjimatjengíre Jesuu̱ tuxi tsjua kumáre̱. Ngieje nga inchakjindia ku inchasére nga inchabetkun Namiña Diuu̱ nga̱tꞌaꞌe nga tuyajíña kúcha nga kitsindaya xu̱ta̱, ku nga̱tꞌa kui ma xi kube. 38Ku̱i̱cha inchatsú:

«¡Ngatuchakunné xta̱xá tetjun

xi ngajoꞌe̱ Namiña Diuu̱ kjitsuꞌba!

¡Ngatꞌe kju̱a̱chꞌán ndiujmí!

¡Ngieje nga ngatsibé yajo̱ꞌe

nga tjínre ngaꞌñu Namiña Diuu̱!»

39Ngajinꞌen xu̱ta̱ kjín tekuácha tjimajín ja fariseo̱, ku tsichja, ku̱i̱cha kitsúre̱ Jesuu̱:

—¡Jí kua Chji̱ne, titiji̱ ja xi tjibakuyéiri!

40Ku̱i̱cha skengi Jesuu̱:

—Kju̱a̱xikjáin én xi xinjnu, tsa kui ja xi sꞌexú, janda ndia̱jo kjindiá kjiaku̱a̱.

41Nga je Tiña kjuichu Jesuu̱ na̱xi̱nanda Jerusalen, ku kiskinda 42ku̱i̱cha kitsú:

«¡Ngieje xu̱ta̱ xi ti̱jñájnu Jerusalen! ¡Kúcha tsjua kumána tsikáin tsanga jún makjínjnu xi mejénre tsú nga chꞌán ꞌbema! Ta̱nga makjinjínjnu, chují kju̱a̱kitakunjnu kui kju̱a̱ nga makjinjínjnu. 43Fichú ngu ni̱tjin nga ndiba xi taonre jún, ku tsindá ngu ngakꞌa ngieje ngandaiꞌe̱ na̱xi̱nanda tuxi ma nga tujma nga mejénre beꞌéjnu. 44Ku tsikixundu ngieje, ku ngite ngují chꞌuaꞌe nga sasenkixi. Ku ngiejéjnu nga fesúnjnu, ku ngieje kui kju̱a̱ꞌon kjueyájnu, nga̱tꞌa mejínjnu kinibéjnu yajo̱jnu nga Namiña Diuu̱ kitsingiyana, nga kjuaꞌikꞌatsjengíjnu.»

Jesuu̱ ku xu̱ta̱ xi sinduju ndetsin ngaya ni̱ngu̱xi̱

(Mt 21.12-17; Mr 11.15-19; Jua 2.13-22)

45Nga tsasꞌén Jesuu̱ na̱xi̱nanda Jerusalen, kijí ni̱ngu̱xi̱ judio̱ ku tsꞌatsje ngieje xu̱ta̱ xi inchabateñá najmi, 46ku ku̱i̱cha kitsúre̱: «Tjitsú Namiña Diuu̱ ngaya Xu̱ju̱n enꞌen: “Niꞌyana̱, niꞌya jma kuinengíre̱ kju̱a̱ndá Namiña Diuu̱ ngieje xu̱ta̱ mejénna nga uya”; ¡ta̱nga jún tixa̱ nga̱jo̱ꞌe̱ cheje je kinikꞌuyájnu!»

47Nchajún nchajún jichú Jesuu̱ nga kjifuékakuyáre̱ xu̱ta̱. Ja chanaꞌmi, chjine Kju̱a̱kixiꞌe̱ Namiña Diuu̱ kju̱ xi inchatetjúnre̱ nga̱nde incha ꞌbenda nga tsikꞌén; 48ta̱nga ngují najmi ma kúcha inchatsꞌijun, nga̱tꞌa mejénre xu̱ta̱ nga tꞌere kju̱a̱kitakun xi kjibakuya.

Currently Selected:

Luka̱ 19: MZI

Highlight

Copy