Luka̱ 13

Nga tsubáre̱ basenkajóña kúcha tjimaña

1Kui ni̱tjin tjin xi kitsuyáre̱ Jesuu̱ nga Pilato̱, xta̱xá romano̱, kjín ja xi chja̱ nangi Ngalilea̱ kitsingiya tsikꞌién. Kui najmi kumataꞌin kui ja, nga sindu ngaya ni̱ngu̱xi̱ nga inchaꞌbechjitjái jeꞌe ngakjáin Namiña Diuu̱. 2Ku ku̱i̱cha kitsú Jesuu̱ nga tsichja:

«A sꞌejínjnu nga ꞌñu ndáji xu̱ta̱ kui ja xi kinikjesún, nga ngieje xi tjin Ngalilea̱. 3¡Kuajícha tjin najmi! Kútsa jún basenkajojíjnu kúcha tjimájnu, ku̱tsa nuꞌya énjínjnu Namiña Diuu̱, tekuácha kixi tjin nga fesúnjnu. 4Tikjaitsjénjnu xi tjiaꞌonján xi jesún nga tsenne torre̱ xi ixundu jma ꞌmí Siloe̱. A sꞌejínjnu nga ku̱a̱cha jeyare̱, nga̱tꞌa kui xi ndáji xu̱ta̱ nga ngieje xi tjin Jerusalen 5¡Ku̱a̱jícha tjin najmi! Kútsa jún basenkajojíjnu kúcha tjimájnu kútsa nuꞌya énjínjnu Namiña Diuu̱, tekuácha fesúnjnu.»

Ya xi ꞌmí ingo̱

6Ku te̱kuicha yeꞌe chu̱bare Jesuu̱:

«Ngu xta̱ yeꞌe ngu ya ingo̱ ngajín jnu tutseje̱. Ngu ni̱tjin kijí nga kikasére̱ tsa yajáre ingo̱, ta̱nga najmí tujíre̱. 7Ku ku̱i̱cha kitsúre̱ xi tjitsikuenda jnu̱ tutseje: “Jan nu tjínre nga xkinú ndiukaséna kui ya ingo̱, ta̱nga ngují tu sakúna. Tꞌéiri, nga̱tꞌa tu̱ ngandétse kjiꞌbechꞌo.” 8Xi tjitsikuenda nga̱nde kiskengi: “Ndia̱ꞌna, titjuéri kju̱a̱ ngi ngu nu kui ya ingo̱. An xi beꞌan nga minchaxanna nangi ngandaiꞌe̱, ku minchana abono̱. 9Tsa ngunúre je yajáre ingo̱, tjitjuéri kju̱a̱ nga ngatasén; kútsa jmí, ma niꞌin manda nga bichasún.”»

Nga kitsindaya Jesuu̱ ngu chjun

10Ngu ni̱tjin xubato, ngaya ngu ni̱ngu̱xi̱ kjibakuyáre̱ xu̱ta̱ Jesuu̱. 11Ku kꞌi̱a̱ kjitjián ngu chjun xi tjiaꞌonján nu tjínre nga tjikjien yajo̱ꞌe. Ngu ngayaꞌasen xaba xi ku̱a̱cha kitsꞌiju̱n ku ichijí ma kjexinga yajo̱ꞌe. 12Nga kube Jesuu̱ kui chjun, tsichjáre̱ ku ku̱i̱cha kitsúre̱: «¡Jí chjun, kjatꞌei je kjuatjubaꞌári chiꞌínri!» 13Nga̱tsjá tku̱ kui chjun yatjai tsja Jesuu̱, ku te̱kuíni chu̱ba̱ jixingáre yajoꞌe̱ ku tjeꞌñú tsichja nga kitsitsjua Namiña Diuu̱.

14Tuxi ndá kitsití nga̱tꞌaꞌe Jesuu̱ xta̱ xi tjitsiꞌin manda ngaya ni̱ngu̱xi̱, nga̱tꞌaꞌe najmi xi kitsiꞌin Jesuu̱ ni̱tjin nga tsubáre̱ nikjaya. Kui nga ku̱i̱cha kitsúre̱ xu̱ta̱ xi sindutku kꞌiaku̱a̱: «Jón ni̱tjin tjínre xumana nga nixá, ku ngu nga nikjayá. Ku jún, tsubáre nga ngaya xi jun ni̱tjin ndibajnu nga nindayájnu yajo̱jnu.»

15Ku̱i̱cha skengi Jesuu̱: «ꞌYá xi mejénjnu nga chꞌanachajujnu. Jún mangijújnu yundajnu, xi bakjan nangi, kútsa burrújnu nga fuenikꞌíjnu ndijua nga ni̱tjin xubato, 16ku kui chjun ꞌñu chjiꞌe ngisa nga yunda xi bakjan nangi ku nga burru, ku tje̱ꞌe Abran chja̱. Tsa tjiaꞌonján nu kitsikeꞌe ni̱ma̱ Xindajin changa, mí xá majín nindayá nga xubato̱.»

17Nga ku̱i̱cha kitsú Jesuu̱, kitsisabá xu̱ta̱ xi taonre. Ku ngieje xu̱ta̱ xi ngisa tuxi tsjua kumáre̱ nga kube najmi, xi janda sꞌejínjínña, xi kitsiꞌin Jesuu̱.

Nga kitsuya Jesuu̱ mí xi mejénre tsú tuꞌe tujma

(Mt 13.31-32; Mr 4.30-32)

18Ta̱nga tekuácha skengire Jesuu̱:

«Kúcha nga ndá xiyájnu nga̱nde jmá kjibatexuma Namiña Diuu̱. Mí xi ma baꞌachu̱ba̱juꞌan. 19Ma tuꞌe tujma baꞌachu̱ba̱juꞌan: Nga fue ngu xta̱ ku beꞌe ngasun nangiꞌe̱, sá ku ngu ya xi je uya, jma janda ni̱se ma tsinda nda̱ba̱ nga̱ꞌa tjiaꞌe̱.»

Sku̱a̱n xi tsixungitja̱o̱ na̱ꞌyu̱ꞌe̱ ni̱pan

(Mt 13.31-32; Mr 4.30-32)

20Ku tekuícha kitsú Jesuu̱ nga tsichja:

«Mí najmi ngisa xi ma baꞌachu̱ba̱juꞌan nga̱nde jma kjibatexuma Namiña Diuu̱. 21Ma chꞌachubaju, tsa ngu chjun nguxtinchi sku̱a̱n xi tsixungitja̱o̱ sku̱a̱n ni̱ñu̱ inchare̱ sku̱a̱n niñu̱ xi tuxi tse. ¡Xi nguxtinchi tuxi ndá tsitse ngieje kui na̱ꞌyu̱!»

Kúcha tjin nga̱tꞌaꞌe kjinde̱tju̱a̱ xi nchú

(Mt 7.13-14,21-23)

22Nga je kjifué Jesuu̱ ngatjén Jerusalen, kjín nga̱nde xi jaꞌa ngieje nga ikuyáre xu̱ta̱. 23Ngu ni̱tjin, tjin xi tsinengiyáre̱:

—Ndia̱ꞌna, a tuxi chubátse ku̱ma xi bitjungi.

Ku skengi Jesuu̱:

24«Tinchitsjáijnu tuxi ma bitjasꞌenjnu kjinde̱tju̱a̱ xi nchú. Nga̱tꞌa kjín ku̱ma xi mejénre̱ nga ku̱a̱sꞌén nga̱nde jma kjibatexuma Namiña Diuu̱, ta̱nga ku̱majín xi tsiꞌin. 25Nga ꞌbechja kjinde̱tju̱a̱ Namiña Diuu̱, tsa kjinde̱tsín tinchájnu je ngite kumajín bitjasꞌenjnu. Ku kjia nikjanéjnu kjinde̱tju̱a̱ ku ku̱i̱xújnu: “¡Ndi̱a̱jni̱, chjuxꞌa̱ijni!” Ta̱nga án kuitsecha xinjnu: “Bejíꞌa̱n ꞌyájnu, ku te̱ bejí jmá jindibájnu.” 26Ku ku̱i̱cha kuixújnu: “Jín kua xi ichijíjni ku kiꞌyijíjni; ku ji̱n xi kikakíjni nga̱ya ndiyaté xi chja̱ ngandéjni̱.” 27Ta̱nga án ku̱i̱tsechá kjengíjnu: “¡Je kixínjnu nga bejíꞌa̱n ꞌyájnu! ¡Xu̱ta̱ xaba, tisubaꞌakjájnu jma tejña̱ꞌan!”

28»Ku jún kjindetsín minchájnu, ku janda xi sꞌái sꞌái kuma naꞌñujun nga xinchatkúnjnu, nga̱tꞌa jma kjibatexuma Namiña Diuu̱ kꞌi̱a̱ chájnu xu̱ta̱ changájnu Abran, Isaa ku Jako̱ kju̱ xi chjine Enꞌen Namiña Diuu̱ kumá. 29Ngieje nga̱nde xi tjin nga̱sunde kjuindibá xi kjuindiukjién nga kuején jñu jma nga kjibatexuma Namiña Diuu̱. 30Ku kꞌi̱a̱, xu̱ta̱ xi najmí xi tsichjiꞌe kꞌui, kui xi ꞌñu chjiꞌe ku̱ma. Ku xi ꞌñu chjiꞌe kjatꞌei, kui xi tsamí xi chjiꞌe ku̱ma.»

Jesuu̱ ku Erode̱

(Mt 23.37-39)

31Ku kuima chu̱ba̱ kjín xu̱ta̱ fariseo̱ jichú, ku ku̱i̱cha kitsúre̱ Jesuu̱:

—¡Tiyí, nga̱tꞌa xta̱xá Erode Antipa̱, mejénre tsikꞌénri!

32Ku̱i̱cha skengire Jesuu̱:

—Tangíjnu, ku ku̱i̱cha tixújnu kui naña xayu chjun nga kjatꞌei ku nchajún ꞌbatsjeꞌan xindajin ku tsindayaꞌa̱n xu̱ta̱ xi ndáji sindure, ku nga fichú xima ján ni̱tjin je jetꞌana xá. 33Nga̱tꞌa nga xikju̱a̱xikjáin, kjatꞌei, nchajún ku ngíre̱, tjitsubáre̱ nga fichuꞌan janda Jerusalen. Nga̱tꞌa kꞌi̱a̱ nga, tuxá ngáre̱ tsikjesún chjine Enꞌen Namiña Diuu̱.

Nga skindá Jesuu̱ nga̱tꞌaꞌe xu̱ta̱ xi chja̱ Jerusalen

34»¡Xu̱ta̱ xi nukjuájnu Jerusalen! ¡Jún xi nikjesúnjnu chjine én kju̱ xi tsingiyaju̱jnu én Namiña Diuu̱! Kjín ndiya nga mejénna kiskúnjnu, xuku xandaná xi kúnre̱ kjindiꞌe nginde tji̱u̱nga̱ꞌe̱, ta̱nga kuyujíjnu. 35Kui kju̱a̱ nga sasen suba ni̱ngu̱xijnú. Ku kju̱a̱xikjain nga ngite chajíjnu án, janda nga ku̱i̱cha bixujnu: “¡Ngatuchakunné xi Jajin Namiña Diuu̱ ku kui xi kjitsuꞌbajo ngaꞌñuꞌen!”»

Currently Selected:

Luka̱ 13: MZI

Highlight

Copy