Luka̱ 12

Kju̱a̱texuma

(Mt 10.26-27)

1Tuxi kjínma xu̱ta̱ xi jatjiandáire̱ Jesuu̱ xi janda xi inchabixukajojo xikjin, ku̱i̱cha kitsúre̱ nga tsichjajo̱ ja xi kjibakuyáre̱:

«Chúnjnu yajo̱jnu nga̱tꞌaꞌe ngieje kju̱a̱ndesu xi bakuya ja fariseo̱. Xu̱ta̱ inchaꞌbanachajo nga xukumá én xi kju̱a̱xikjáin inchachja̱ ngamaña. 2Nga̱tꞌa ngieje najmi xi ꞌma sindu tekui xi cha̱, ku ngieje najmi xi najmí xi tsuya tekui xi janda nga ya. 3Najmi xi nukjuájnu nga jñu tekui xi cha̱ nga je tsejen nga ni̱tjin; ku najmi xi ꞌma nukjuájnu, tekui xi sku̱e̱ ngieje xu̱ta̱.

ꞌYá xi tsubáre̱ nga tkúnña

(Mt 10.28-31)

4»Jún ku̱a̱ xi ndá kichꞌaña xingiña, nga tu̱ tkunjínjnu xi máre tsikjesúnjnu. Mí najmi xi ma tsꞌijúnjnu ngisa. 5Namiña Diuu̱ xi yatkúnjnu, nga̱tꞌa mítsa tu kju̱a̱mijñachúnjnu̱tse mare̱ kjebaꞌájnu, tekuácha mare̱ tsingiyájnu ngakꞌien. Kuí xi tsubáre nga tkúnjnu.

6»Ón nise, sꞌeitse tutjín tuma kichasén xi chjiꞌe. Ta̱nga, Namiña Diuu̱ tekui xi tsindusínre̱ yajo̱ꞌe nga̱tꞌaꞌe nga ngu ngu. 7Tekuácha mare̱ Namiña Diuu̱ ngatꞌajnu: Bé kao tsja̱ tjínre tkujun. Kui kju̱a̱, ¡nga tu̱ tkunjínjnu! Tse chjiꞌéjnu ngisa nga kjín nise xi̱xi̱.

Nga nukjuayáña Jesuu̱

(Mt 10.32-33; 12.31-32; 10.19-20)

8»Tsa jún bixuyájnu kjaꞌi xu̱ta̱ nga án tjimatje̱ngijnu, án, Kjindiꞌe Xu̱ta̱ Nga̱sunde, tekuácha xiyána Namiña Diuu̱ nga kjáin én xi tjibixújnu. 9Ta̱nga tsa bixujnu xu̱ta̱ nga anjín tjimatje̱ngijnu, tekuácha xínna kjinditsjeꞌe Namiña Diuu̱ nga anjín tjimatje̱ngijnu.

10»Tsanga jún chꞌao nukjuájnu nga̱tꞌaꞌna, xi Kjindiꞌe Xu̱ta̱ Nga̱sundeꞌan, tuku tsichatꞌájnu Namiña Diuu̱. Ta̱nga tsa chꞌao nukjuájnu nga̱tꞌaꞌe Ngaya asen xi Tsje, kjia kjiaku̱a̱ nga tsichatꞌajíjnu Namiña Diuu̱.

11»Nga faiju̱jnu xu̱ta̱ ngaya ni̱ngu̱xi̱ kútsa ngakjáin xi tsitsje kju̱a̱ kutsa ngakjáin jaxá nga tsitsje kju̱a̱jnu, nga tu̱ nindusinjínjnu yajo̱jnu mí én xi chjungíjnu kútsa kúcha ñaꞌan ꞌnatsjengíjnu yajo̱jnu. 12Nga̱tꞌa nga machjén, Ngaya asen xi Tsje tsuyájnu én xi tsubáre nga bixujnu.»

Xta̱ ndsen xi tjínre taon

13Ngu xta̱ xi kꞌi̱a̱ tsuꞌba, ku̱i̱cha kitsúre̱ Jesuu̱:

—Jí kua Chji̱ne, tiꞌínri manda tsꞌeꞌan nga ngatsjuána kúcha tjin mejénna kju̱a̱tjáocha xi yeꞌéjni̱ nde na̱mi̱jni.

14Kiskengi Jesuu̱:

—An jín tjitsubána ꞌbenda kju̱a̱si xi tjínjnu tsꞌéji ku jí.

15Ku tsasére̱ Jesuu̱ xu̱ta̱ xi sindu kꞌiaku̱a̱, ku kitsúre̱: «¡Nga tu̱ kuajícha ꞌbemájnu nga tu̱tsjái nga tse najmi mejénjnu nga ꞌbéjnu! Mítsa nga̱tꞌa tsa tse najmi tjinña ku tsjua ꞌbendúña ku tse ni̱tjin ꞌbemaña.»

16Ku ku̱i̱cha yeꞌe chu̱bare Jesuu̱:

«Nangiꞌe̱ ngu xta̱ xi tjínre taon tuxi ndá kumá kju̱a̱ni̱ma̱ꞌe̱n. 17Tuxi tse kju̱a̱ndá xi kitsikisitjen, ku tu̱ bejí jmá faya nijin xi kuchare. 18Ku nga je ndá kitsikjao, kitsú: “Je beꞌan mí xi tsiꞌinꞌan. Tsikixunduꞌan niꞌya ni̱ji̱nꞌna̱ xi changa, ku kjaꞌi xi teya tsindaꞌan. Ku kꞌi̱a̱ fayaꞌan kju̱a̱ni̱ma̱ꞌna̱ kju̱ ngieje najmi xi tjínna. 19Jaskan ku̱i̱cha xínna yajo̱ꞌna: ¡Je tse tjínri xi machjénri nga kjín nu tjabixi! ¡Tichí, tꞌi, tisꞌúi ku titsjuai kju̱a̱ꞌbema janda jma ma xi niꞌin!”

20»Ta̱nga ku̱i̱cha kiskengíre Namiña Diuu̱: “¡Mí xá ku̱a̱cha ndá ndséin! Tekuíni ni̱tje̱n beyeji, ku kjaꞌi xi tsitsjua ngieje najmi xi kichjayéi.”

21»Tuxá kuacha mataꞌin xi tuya nga ꞌbetku najmi xi chji. Tuxi tjín tao̱n bé yajoꞌe̱, ta̱nga nga kju̱a̱xikjáin, ni̱ma̱ ngixku̱n Namiña Diuu̱.»

Nga majín tu̱chu̱ba̱ nindusínre̱ yajoña

(Mt 6.25-34)

22Ta̱nga ku̱i̱cha kitsúre̱ Jesuu̱ ja xi kjibakuyáre̱:

«Nga tjimájnu nga tuyají nga nindusínjnu yajo̱jnu nga̱tꞌaꞌe mí xi chinejnu kútsa mí xi ꞌyújnu, kútsa nga̱tꞌaꞌe najñu xi chajájnu. 23Nga tjimaña nga̱sunde mitsa tu̱ tjibichítse, ku yajo̱ña mítsa tu̱ najñútse tjinikajá.

24»Chaséjnu nise jma̱: beꞌejí tje̱ ku fangají jnu̱ꞌe̱n, ku te̱ najmíre̱ niꞌya jmá faya ni̱ji̱nꞌe̱n. Ta̱nga tekui xi tsjuáre xi chine Namiña Diuu̱. ¡Tikjaitsjénjnu nga jún ꞌñu chjeꞌéjnu ngisa tukꞌuajire̱ nise!

25»A sꞌejínjnu tsa ꞌñu nindusínjnu yajo̱jnu ku matséjnu ngisa ndatsa ngi ngu ni̱tjin. 26Janda kui najmi majín xi ñaꞌánjnu, mí xá nindusínjnu yajo̱jnu nga̱tꞌaꞌe kjaꞌi najmi.

27»Takuyájnu nga chaséjnu naxu xi tjin ngijña: tsixají ku tsindáre̱ najñu xi baja yajo̱ꞌe ku kju̱a̱kixi nga janda xta̱xá Salomo̱, ndatsa tuxi tse taon kisꞌere ku tekui xi ku̱a̱jícha chan tsaja najñu xuku nga kui.

28»Tsa kuacha tsjuakún tsiꞌin naxu Namiña Diuu̱, xi tu̱ ngutjútse mare̱, a tsejí najmi tsiꞌin ngatꞌajnu tsani. ¡Beꞌan nga kje kjimakjinjínjnu kúcha nisꞌejín Namiña Diuu̱!

29»Nga tu̱ niskajinjínjnu yajo̱jnu tsa chjinengiyájnu mí xi chine kútsa mí xi ꞌyújnu. 30Tujma xu̱ta̱ xi bejí Namiña Diuu̱ xi tsindusínre̱ yajo̱ꞌe nga̱tꞌaꞌe kui najmi. Namiña Diuu̱, xi Namijnu, bé nga ngieje kui najmi machjénjnu.

31»Najmi xi ꞌñu chjiꞌe nga nibéjnu yajo̱jnu nga Namiña Diuu̱ tujmá kuítse xi xta̱xá. Najmi xi ngisa, kuí xi bé mí ni̱tjin nga tsjuájnu.

Tjinña kju̱a̱ndá ndiu̱jmi nga nisꞌejin Jesuu̱

(Mt 6.19-21)

32»¡Nga tu̱ tkunjínjnu, xu̱ta̱ꞌna xi tebakuyajnu! Namiña Diuu̱ xi Nami májnu, mejénre nga tjitsjuájnu ngande jma kjibatexuma. 33Tateñajnu najmi xi tjínjnu, ku taon xi mejénjnu takjanyájnu xu̱ta̱ xi ni̱ma̱. Tindájnu yajo̱jnu tsá xi majínre̱ tjiya, ku ndiu̱jmí chjayájnu najmi xi ꞌñu chjiꞌére̱ kju̱a̱mijñachúnjnu. Kꞌi̱a̱ kꞌiaku̱a̱, cheje majín kjebaꞌájnu najmi xi tjínjnu, te̱ majín kjine xabí. 34Tikjaitsjénjnu nga kju̱a̱ndá xi ꞌñu chjiꞌe, kjia nga án nuꞌyaꞌénjnu, ngieje anima̱jnu.

Kúcha tjin tseꞌe musu

(Mt 24.45-51)

35-36»Jún tutsjai nga tsubáre nga mijñandájnu. Tsubáre nga xuku musuꞌe xi fue ngu kju̱a̱xke ñaꞌánjnu. ꞌBendufejí, ꞌbendutí ndiꞌi kandi, nga̱tꞌa inchakuya tsa ndia̱ꞌe tra̱tse tsikjané kjinde̱tju̱a̱ꞌe̱, tuxi ma nga tjeꞌñu kjexꞌáre̱. 37-38¡Tuxi tsjua sꞌendúre anima̱ꞌen nga fichú ndiaꞌe̱ niꞌya, nga jñu kútsa nga ndiuma asen! Ku kju̱a̱xikjáinni nga xi ndia̱ꞌe tuxi chan tsiꞌin xki̱ musuꞌe, janda kui kꞌueyáre̱ xi chine ku tsi̱ke̱ꞌetꞌa yamexa.

39»Tsa xi ndia̱ꞌe ngu niꞌya bé mí chuba̱ basꞌen ngu cheje, ja kꞌi̱a̱ kuyáre̱ ku tsikasꞌenjín. 40Jún, tsubáre̱ nga mijñandájnu, nga̱tꞌa án, Kjindiꞌe Xu̱ta̱ Nga̱sunde, ura xi tjichuyajíjnu faꞌiꞌa̱n.»

41Tsichja Pe ku tsinengiyáre̱:

—Ndi̱a̱ꞌna̱, kui én xi tjibakuyéijni, a tu̱jmá tsajíntse, a xu̱ tse̱ꞌe ngieje xu̱ta̱ xi sindu kꞌui.

42Ku Ndi̱a̱ña Jesuu̱ ku̱i̱cha skengire:

—Musu xi ndá tsikitjusún xáꞌe ku kijna tsiꞌin nga machjénre xi ndi̱a̱ꞌe̱ niꞌya, kui xi tsjuáre nga̱nde nga tsikuenda xu̱ta̱ꞌe, tuxi chu̱ba̱ꞌe̱ nga ꞌbeyáre̱ xi chine. 43¡Tuxi tjínre kju̱a̱tsjua anima̱ꞌen musu nga base ndia̱ꞌe ku tjitsikitjusún manda xi kitsjuáre! 44Kju̱a̱kixi nga kui musu tsjuáre̱ xi ndia̱ꞌe̱ nga kui tsiꞌin xki̱ ngieje najmi xi tjínre. 45Kꞌuejñáña tsa ku̱i̱cha tsikjao musu: “Tjín jma nga kijí ndi̱a̱ꞌna̱ ku matsére̱ nga fatjíni”, ku kjia kuaꞌangíre̱ nga basénre musu xi ngisa, xi yachjin xi xi̱ꞌin, ku kjia kjién ku ꞌbi janda nga machꞌi̱. 46Ku nga faꞌíni ndia̱ꞌe, ngu chuba̱ nga janda tjikuyajíre̱, ku kjia tsijére, xukúcha tsubáre ꞌñaju̱n musu xi tꞌeji én.

47»Musu xi bé manda xi yeꞌére̱ ndia̱ꞌe ku tsikitjusunjín, ꞌñu majére ngisa. 48Ta̱nga musu, xi Bejí, nga najmi xi tjínre jee ñaꞌan, chubatse majére. Ndá xu̱ta̱ tsꞌijúnjnu yajo̱ꞌe Namiña Diuu̱, ku mejénre nga ndá xu̱ta̱ ꞌnatsjéjnu yajo̱jnu nga̱tꞌaꞌe. Ku xukúcha nga tsjuájnu kju̱a̱ndá tekuácha mejénre nga ndá natsjéjnu yajo̱jnu nga ñaꞌánjnu xki̱.

Nga kitsuyáre̱ Jesuu̱ ja xi kjibakuyáre̱ kúcha kuma nga bakjanya xu̱ta̱

(Mt 10.34-36)

49»Jiꞌiꞌan nga ndiꞌi xi tsiꞌasen kjuaꞌikꞌetíꞌan kui nga̱sunde. ¡Ku tuxi tsjuána tsa je tjitjutse tsikain! 50Ta̱nga tjún faꞌamá ngu kju̱a̱nima xi ꞌñu niꞌin tjin, ku on mana janda nga fichu kui chu̱ba̱. 51Nga tu̱ nikjaojíjnu tsa kju̱a̱chꞌán kjuaꞌiju̱na kui nga̱sunde. ¡Junjín! Kuijí xá kiningiyána. Xu̱ta̱ kjuaꞌikakjanyáꞌan. 52Xu̱ta̱ xi ngu nganiꞌya, xi ón ma, ján xi táon kumáre xi ngi jó. 53Kjaju̱n xikjin xi nami ku kjindiꞌe, xi na kjaju̱n tsa̱kji̱nꞌen, ku xi nacha ku kjandaꞌe̱ táon kumare̱ xikjin.»

Nga kitsuya Jesuu̱ chu̱ba̱ xi tsingiya Namiña Diuu̱

(Mt 16.1-4; Mr 8.11-13)

54Jesuu̱ ku̱i̱cha kitsúre̱ xu̱ta̱:

«Nga chaséjnu ngatje̱n ngafue tsuꞌbi, ku yájnu nga ngu yufi kjitje̱n ndi̱u̱jmí ku bixujnu: “¡Tsi baꞌa!”; ku kjuaxikjáinni nga tsi baꞌa. 55Kútsa yájnu nga tjao̱ ndiba ngatje̱n nginde, ku bixujnu: “¡Sué ku̱ma!”; ku ku̱a̱cha ma. 56ꞌYá xi mejénjnu nga chꞌanachajujnu. Jún, tu̱ chasetsejnu kúcha chun ndiu̱jmi ku nangi ku je yánijnu tsa ndá ndiba ku̱tsa ndáji ndiba ni̱tjin. ¡Ta̱nga chaséjnu najmi xi tsiꞌinꞌan, ku chují tkujun tsa makjínjnu, nga Namiña Diuu̱ xi tjitsingiyájnu chu̱ba̱!

Tsubáre nga ꞌbeña kju̱a̱chꞌán ngatꞌaꞌe xi táonre ñá

(Mt 5.25-26)

57»Najmi xi ndá tiꞌi̱n. 58Tsa tjin xi batejenéri nga ndáji tjiꞌniji̱n, tꞌendaji̱ kju̱a̱ti xi tjínre nga̱tꞌa̱ri kui xu̱ta̱, tekjié nga fuéjo̱ri jmá tjián xi xáꞌe nai tjínre. Nga̱tꞌa tsa kuajícha niꞌin ku nai tsiꞌinre̱ manda polisiya̱ nga nduya basénri. 59Ku kju̱a̱xikjáin xi xínra nga bitjují nduya janda nga ꞌbechjiji ngieje kichasén xi kjitje̱nri.»

Currently Selected:

Luka̱ 12: MZI

Highlight

Copy