Luka̱ 11

Nga ikú Jesuu̱ kúcha chjinengire̱ kju̱a̱ndá Namiña Diuu̱

(Mt 6.9-15; 7.7-11)

1Ngu ni̱tjin, kijí Jesuu̱ ngu ngande nga kikinengire̱ kju̱a̱ndá Namiña Diuu̱. Nga je kumá nga tjichjatꞌáre Namiña Diuu̱, ngu xta̱ xi kjibakuyare̱, kitsitiñá yajo̱ꞌe ku tsinengire̱:

—Ndi̱a̱jni̱, takuyéijni kúcha ñaꞌan chjinengire̱ kju̱a̱ndá Namiña Diuu̱, xukúcha ikuyare̱ Jua xi Batenda, xu̱ta̱ xi kisꞌematje̱ngire.

2Ku̱i̱cha kitsúre̱ Jesuu̱:

—Nga chjinengíjnu kju̱a̱ndá Namiña Diuu̱, ku̱i̱cha tixújnu:

“Nami, ngieje nga ngatsibé yajo̱ꞌe

nga jí xi Namiña Diuu̱ xi kju̱a̱xikjáinji.

”Jabí ku tu̱jítse tijníjni̱ xitetjún.

3”Titjuéjni xi chine

xi kjimachjénjni kjatꞌei.

4”Tichatꞌái jee xi tjínjni,

xukúcha nichatꞌajni

ngieje xi tsꞌijúnni̱ najmi xi ndáji tjin.

”Ku nga ndiuchutꞌa kakúnjni,

tu̱ yujíri nga kui kju̱a̱chutꞌakakún

tsikjinjni jí.”

5Te̱ ku̱i̱cha kitsúre̱:

«Kꞌuejñaña, tsa basen ni̱tje̱n, ngu xi jña tjimajnu, fue niꞌyaꞌe̱ ngu xu̱ta̱ xi ndá yaꞌa ku ku̱i̱cha tsúre: “Xu̱ta̱ ngandai niꞌya, tikenyéina ján ni̱pan ngu kju̱a̱ndá . 6Ngu xta̱ xi ndá beꞌan, xi tjin jmá kju̱e̱, jiꞌi niꞌyáꞌna̱ ku kꞌi̱a̱ fafé; ¡ngujína̱ najmi xi tsikjineꞌa̱n!” 7Te̱ tu kꞌuejñániña, ya tsanga xu̱ta̱ ngandai nganiꞌya ku̱i̱cha kjengire: “¡Ngatu anjín nitína! Je yabi̱ tjichja kjinde̱tju̱a̱, ku xu̱ta̱ xi ngu niꞌyajni̱ ku a̱n je tisuñájni̱. Majín te̱ bisitjenꞌan nga tsjuára ni̱pan.” 8Tsa kui xta̱ fejíre̱ kju̱a̱ nga kjiminengi, kixi tjin nga janda nga tsjuáre kui xu̱ta̱ ngandai niꞌya najmi xi kjimachjénre, mítsa tukju̱a̱ tsa ndá yaꞌa, tu̱ ngatꞌaꞌétse nga mejínre nga kju̱a̱saba faꞌa ngakjáin na̱xi̱nanda.

9»Kui kju̱a̱ nga ku̱i̱cha xinjnu: chjinengíjnu Namiña Diuu̱ ku tsjuajnu, nukju̱a̱jújnu Namiña Diuu̱ ku sakujnu najmi xi tjiminchitsjaijnu, nukjuájnu Namiña Diuu̱ ku tsiꞌinjnu xki̱. 10Nga̱tꞌa xi sꞌejínre nga̱tꞌaꞌe Namiña Diuu̱ sakúre najmi xi minengi, sakúre xi mangitsjái kútsa chja̱, ñaꞌán xki̱.

11»A tjin xi tinchjájnu kꞌui, tsa ti minengire̱ kjindiꞌe ku ye̱ tsjuáre. 12A xu̱ nayá tsjuáre tsa chjo kjiminengíre̱. 13Jun, xi xabajnu, a tu̱ májnu baꞌíjnu najmi xi ndá kjindijnu, a tu̱ kjaꞌmira Namiña Diuu̱, Namijnu xi kjitjián ndiu̱jmi, Ngayaꞌa̱sen xi tsje, tsjuáre̱ xi minengitꞌáre.»

Jesuu̱ ku xi sián ngitku̱ xindajin

(Mt 12.22-30; Mr 3.20-27)

14Jesuu̱ itsjé ngu xindajin xi kitsinima̱ én ngu xta̱. Nga itju xindajin kumánire̱ én kui xta̱.

Tuxi ndá kuse̱nre̱ xu̱ta̱ najmi xi kitsiꞌin Jesuu̱, 15ta̱nga yajín xu̱ta̱ xi ku̱i̱cha kitsú: «Jesuu̱ mare̱ ꞌnatsje xindajin xi tjimajín yajo̱ꞌe xu̱ta̱, nga̱tꞌa Belsebu̱, xi ngitku̱ xindajin, tjitsjuáre ngaꞌñu nga kuachá tsiꞌin.»

16Kjaꞌi xi inchatsikjao nga che̱n mejénre Jesuu̱. Kui kju̱a̱ nga tsinengíre̱ nga ngatsiꞌin ngu najmi kju̱a̱tkun xi makjinjínña, ku ngatakú yajo̱ꞌe nga kjáin nga Namiña Diuu̱ kitsingiyá. 17Ta̱nga tjeꞌñu kubéni Jesuu̱ najmi xi inchatsikjao ku ku̱i̱cha kitsúre̱:

«Tsa tekuíni xikjin kjajún xu̱ta̱ xi chja̱ ngu na̱xi̱nanda, kju̱a̱chajá kui na̱xi̱nanda. Tsa kjajun xikjin xu̱ta̱ xi chja̱ nguniꞌya, tekuácha kjuachajá kui xu̱ta̱. 18Kútsa tekuíni yajo̱ꞌe kjajún Xindajin, tekuácha tsichajá subá jma batexuma. Tjibixújnu nga mána ꞌnatsje xindajin nga̱tꞌa Xindajin tjitsjuána ngaꞌñu. 19Tsa kjáin kui najmi, ku ꞌyá xi tsjuáre ngaꞌñu ja xi tjibakuyajnu nga mare̱ ꞌnatsje xindajin. Tsa bixujnu nga Namiña Diuu̱ xi tjitsjuájnu ngaꞌñu, xi mejénre tsú nga kꞌiajíre̱ najmi xi tjibixújnu. 20Ku án nga ngaꞌñuꞌen Namiña Diuu̱ tsichjenꞌan nga ꞌbatsjé xindajin, xi mejénre tsú nga je jiꞌi kꞌui kju̱a̱texumaꞌe̱n Namiña Diuu̱.

21»Niꞌin, sakujíña nga̱nde nga ñaꞌan cheje niꞌyaꞌe̱ ngu xta̱ xi tjínre ngaꞌñu ku tjínre tju̱. 22Ta̱nga tsa ngu xta̱ xi tse ngaꞌñu tjínre ngisa tsiꞌinre, faꞌare̱ tju̱ꞌe̱, ku kjabére ngieje najmi xi tjínre ku tsikabíre̱ ja xi ndá yaꞌa.

23»Tsanga jun jaꞌojíjnu najmi xi tetsiꞌinꞌan, mejénre tsú nga táonjnuꞌan. Tsa minchajujíjnu nga tsisꞌejin nga̱tꞌaꞌna ku ndibakunjínna xu̱ta̱, xukútse xi tjibiyutjengijnu nga kuachá.

Ngayaꞌasen xaba xi uꞌbéni

(Mt 12.43-45)

24»Nga ngu ngayaꞌasen xaba bitju ngajín yajo̱ꞌe ngu xu̱ta̱, ján nangi kixi fué jma fuekangitsjai nga mejénre tsikjaya. Ku nga sakujíre̱ ngande, ku̱i̱cha tsú: “Tusá niꞌya changaꞌna te̱ fuéñaꞌan, ku kꞌi̱a̱ te̱ basꞌenñaꞌan.” 25Nga uꞌbéni, tsje ku sindundá najmi xi tjin. 26Ku kjia fué ku fuekangitsjai ngi yatu ngayaꞌa̱sen xi ꞌñu xaba ngisa nga kui, ku kꞌi̱a̱ ꞌbendujín ngajín yajo̱ꞌe kui xu̱ta̱. ¡Ku ni̱ma̱ xu kui xu̱ta̱ nga tusá tse kju̱a̱ xi feyare̱ tukꞌuajíre̱ nga ngútse ngayaꞌasen xaba tsuꞌbajín yajo̱ꞌe.!»

ꞌYá xi tsichakunné Namiña Diuu̱

27Nga tjichja Jesuu̱ jichú ngu chjun ku skindiáre̱:

—¡Ndáre̱ chjun xi kitsjuáre asen ku kitsikakíri!

28Ta̱nga Jesuu̱ ku̱i̱cha kiskengire:

—¡Ndáre̱ xu̱ta̱ xi tꞌe enꞌen Namiña Diuu̱, ku tsikitjusún!

Ngu chuba̱ xi kjibakú ngu kju̱a̱tkún xi makjinjínña

(Mt 12.38-42; Mr 8.12)

29Kjín xu̱ta̱ kitsitiña yajo̱ꞌe nga mejénre̱ tꞌere Jesuu̱. Ku kui ku̱i̱cha kitsúre̱:

«Jún mejénjnu nga chutꞌakakúnjnu ku ngu chuba̱ tjichjinengíjnu, ta̱nga ndajíjnu xu̱ta̱ ku sꞌejinjínjnu nga̱tꞌaꞌe Namiña Diuu̱. Tu̱jmá ngu chuba̱ xi tsjuájnu, najmi xi kumataꞌin Jona̱. 30Xukúcha kuixi yeꞌére̱ chu̱ba̱ xu̱ta̱ na̱xi̱nanda xi chja̱ Nini̱be̱, tekuácha án, Kjindiꞌe Xu̱ta̱ Nga̱sunde, án kua kui chu̱ba̱ xi machjénre xu̱ta̱ xi chja̱ kui ni̱tjin.

31»Chjun xi batexuma Nangi xi chja̱ Nginde, tsikisitjén yajo̱ꞌe ni̱tjin nga matsje kjuetꞌa kui nga̱sunde, ku jún kuajíjnu kontra̱ tuxi manga tsijéjnu Namiña Diuu̱. Kjín jindibá kui chjun nga jiꞌitꞌére kju̱a̱kitakunꞌen xta̱xá Salomon, ¡ku jún mejínjnu nga nuꞌyꞌajnu kju̱a̱kitakunꞌna̱, ndatsa ꞌñu chjiꞌeꞌan ngisa nga Salamon!

32»Nga matsje kjuetꞌa nga̱nsunde, xu̱ta̱ xi chja̱ Nini̱be̱ tekuácha bisitjen, ku kontra̱jnu kuichja̱. Nga̱tꞌa kui xu̱ta̱ isenkajó yajo̱ꞌe nga tsitꞌe én xi kitsuyáre̱ Jona. ¡Ta̱nga jún nuꞌyájnu énꞌna ku basenkajojíjnu yajo̱jnu, ndatsa yájnu nga ꞌñu chjiꞌeꞌan ngisa nga kui!

»Ndiꞌi asen xi tjínre yajo̱ña

(Mt 5.15; 6.22-23)

Tekuácha kitsúre̱ Jesuu̱:

33«Najmí xi ꞌbetí ngu kandi ku basenꞌma, kútsa nginde ngu kajo̱ basen. Tusáni: ngu nga̱nde xi kꞌa basen, tuxi tsitsejénre ngieje xi basꞌen nga̱ya nganiꞌya. 34Xku̱n xu̱ta̱ xukútse kandi xi tsitsejénre yajo̱ꞌe. Kui kju̱a̱, tsa tjingure xku̱n nga base ku tjínre kju̱a̱nitjáo, ꞌbére ndiꞌí ni̱tjin xi kjitsuꞌba. Ta̱nga tsa kju̱a̱ꞌontakún tjínre ku kꞌakakun, jñu ni̱tje̱n kuma nitjinꞌen nga fabixi. 35Kui kju̱a̱, chúnjnu yajo̱jnu, nga tu̱ yujíjnu nga tsꞌao ndiꞌi xi tjitsiꞌasénre kju̱a̱mijñachúnjnu. 36Tsanga ngieje yajo̱jnu nga tjínre ndiꞌi xi tjitsiꞌasénre, ku ngují nga̱nde nga jñutꞌáre, nga kuachá tujmáni nga tsitsején kju̱a̱mijñachúnjnu, xuku nga tsitsejénña ndiꞌiꞌe ngu kandi.»

Tuxi ndáji kjueyáre̱

(Mt 23.1-36; Mr 12.38-40; Lk 20.45-47)

37Nga je kumá nga tsichja Jesuu̱, ngu fariseo̱ kitsuyáre̱ nga ngatjaikjén nganiꞌyaꞌe̱. Kijí Jesuu̱ ku kisꞌejñatꞌa yamexaꞌe̱. 38Tu̱ ku̱a̱ kumáre̱ fariseo̱ nga tjunjín iné tsja Jesuu̱ nga tsakjién. 39Ta̱nga ku̱i̱cha kitsúre̱ Jesuu̱:

—Jún, nga xu̱ta̱ feriseo̱jnu manejúnjnu yajo̱jnu, ta̱nga ngaya anima̱jnu ndajíjnu xu̱ta̱, ngují xi minchaju̱jnu ku cheje tjiñaꞌánjnu xu̱ta̱. 40¡Xu̱ta̱ ndsén! Namiña Diuu̱ kitsindá najmi xi tjin kjinde̱tsín kju̱ xi tjin ngaya. 41Ndiya xi ndá nga matsjéña, kjia nga baꞌíña najmi xi tjinña, xi ni̱ma̱ tjima.

42»¡Achichí nga ón kjueyájnu! Jún nindusínjnu yajo̱jnu nga te̱ xi uchan xka̱ chine xkuen, xka̱ menta ku kju̱ xka̱ ruda̱ xi inchamachájnu nangijnu. Ta̱nga tjáojíjnu kute̱ na̱xu̱jí tjiꞌñaju̱njnu xu̱ta̱ xi ngisa. Tsubáre̱ nga te̱ xi uchan baꞌíjnu Namiña Diuu̱ nga ngieje najmi xi machájnu, ta̱nga tekua̱cha tsubáre nga nitjáojnu ku ndá nikjeyajnu xu̱ta̱.

43»¡Tuxi ón kjueyájnu jún, xu̱ta̱ fariseo̱jnu! Nga mangíjnu ni̱ngu̱xi̱ tuxi tsjuájnu nga xuku xu̱ta̱ xi ꞌñu tkun ꞌñaju̱njnu. Tsjuájnu nga ngajín ndetsin tsikundajnu xu̱ta̱ ku betkunjnu.

44»¡Tuxi ón kjueyájnu! Nga̱tꞌa jún xuku tixa̱ꞌe̱ mikꞌen xi sinduꞌma kúnjnu, jmá tsjunne xu̱ta̱ nga̱tꞌa bejí.

45Ku kjia ngu ja chjine Kju̱a̱kixiꞌe̱ Namiña Diuu̱ ku̱i̱cha kitsú:

—Jí kua Chji̱ne, ngieje najmi xi bixi kontra̱ꞌe̱ xu̱ta̱ fariseo̱, tekuácha kju jín chꞌo tsújni énri.

46Ku̱i̱cha skengi Jesuu̱:

—¡Jún tuxi ndáji kjueyájnu! Nga̱tꞌa tuyánga ꞌbejñajnu kju̱a̱kixi xi bitjusunjínña xu̱ta̱, ta̱nga jún ngují ngaꞌñu ñaꞌánjnu nga nikitjusúnjnu.

47»¡Jún, tuxi ndáji kjueyájnu, xi nindajnu asenꞌen nga nikjaitsjénjnu ja xi tsuña enꞌen Namiña Diuu̱, xi tekuíni xu̱ta̱ changajnu kitsikjesún! 48Ku jún, tjibixújnu nga ndátjin najmi xi kitsiꞌin xu̱ta̱ changájnu: kui kitsikjesún ja xi tsuya enꞌen Namiña Diuu̱, ku jún tjinindájnu asenꞌen yajo̱ꞌe.

49»Kui kju̱a̱ nga ku̱i̱cha kitsú Namiña Diuu̱ nga̱tꞌájnu: “Án tsingiyájnu chjine énꞌna kju̱ xi kitsuyasúnre̱ xu̱ta̱ na̱xi̱nanda, ta̱nga jún nikjesúnjnu basen, ku kjaꞌi xi biyutjengíjnu kungatse na̱xi̱nanda.” 50Kui nga jún xi je kisakungijejnu nga ngieje ja xi tsuya enꞌen Namiña Diuu̱ xi je kinikjesún kui nga̱sunde, 51janda xi kuaꞌangire̱ Abe ku janda nga kinikꞌen chjine enꞌen Namiña Diuu̱, Sakaria̱, xi kikꞌiénjnu ngabasenyaꞌe̱ ni̱ngu̱xi̱ judio̱ ku na̱chán tkꞌiunꞌen Namiña Diuu̱. Xiyájnu, kju̱a̱xikjáin nga majéjnu nga̱tꞌaꞌe ngieje kui mikꞌien.

52»¡Tuxi ndáji kjueyájnu xuku nga jun, ngieje chjine Kju̱a̱kixiꞌe̱ Namiña Diuu̱! Nga̱tꞌa júnxi ndá yájnu mí xi mejénre tsú nga yáña Namiña Diuu̱, ta̱nga ngují najmi tjiñaꞌánjnu tsa mejénjnu nga yájnu Namiña Diuu̱, kúte̱ baꞌijíjnu kju̱a̱ nga kjaꞌi xi bé.»

53Nga itju Jesuu̱ kui niꞌya, kijitjengíre̱ ja chji̱ne Kju̱a̱kixiꞌe̱ Namiña Diuu̱ kju ja fariseo̱, ku kjín tku̱ya najmi inchaminengiyare̱, 54ta̱nga tuxi inchatsꞌijún tsatuꞌa nga tjin najmi xi tsú xi mangitaꞌin, tuxi manga kjabeꞌñu.

Currently Selected:

Luka̱ 11: MZI

Highlight

Copy