Luka̱ 14

Jesuu̱ kitsindaya ngu xta̱ xi ndáji tjínre

1Ngu ni̱tjin xubato̱, niꞌyaꞌe ngu xta̱ fariseo̱ tjikjén Jesuu̱ nga ni̱tje̱n . Ngieje xu̱ta̱ xi tjima tuxi ndá inchabaseꞌmáre̱. 2A tu̱ kjia jichú ngu xta̱ xi incha xkei ndsaku kju ngasuꞌe kú ngakjáin Jesuu̱ kikasén. 3Kui nga Jesuu̱ tsasére ja chjine Kju̱a̱kixiꞌe Namiña Diuu̱ kju ja fariseo̱, kú tsinengiyá: «A ma a xu̱ majín nindaya xu̱ta̱ xi ndáji sindure nga ni̱tjin nikjaya.» 4Ku ngují xi tsichja.

Kui nga Jesuu̱ skabére̱ tsja xi chiꞌínre̱, kitsindaya kú kitsingiya. 5Ku kjia tsinengiyáre̱ xu̱ta̱ xi kꞌi̱a̱ tjima: «Tsa ngu kjindijnu, kú tsa ngu buéjnu, menya ngaya pusu, a mítsa tjeꞌñu ꞌnatsjéjnu, ndatsa xubato̱.» 6Ku kui ja ngují én kiskengi.

Xi kinikitꞌe kju̱a̱bichi xi chja̱ nga je tsején ni̱tje̱n

7Kubé Jesuu̱ nga xu̱ta̱ xi kinikitꞌe kju̱a̱bichi xi chja̱ nga je tsején ni̱tje̱n, nga inchafichu tuxi nga̱nde xi ndá inchaꞌbendu. Ku kui kju̱a̱kitakun kitsjuáre:

8«Nga tjin xi tsikitꞌéri sꞌuiꞌe ngu kju̱a̱xke, nga tu̱ nga̱nde xi ndáji mijni. Nga̱tꞌa tsa fichú ngu xi ꞌñu ndá ngisa nga jí, 9ku̱i̱cha kuitsu̱ xi kitsikitꞌéri: “Titjuéri kui nga̱nde kui xu̱ta̱ xi tekuácha kitsikitꞌeꞌan sꞌui.” Ku kui najmi tuxi tsé kju̱a̱saba ku̱a̱ngíri, kú janda jma kꞌuetꞌa fuekijni.

10»Kui kju̱a̱, nga tjin xi tsikitꞌéri, nga̱nde xi kjuetꞌa tinchitsjái. Ku nga fichú xi kitsikitꞌéri ku̱i̱cha kuitsu̱ri: “Ji amingo̱, jabí kꞌui, kꞌui tijni; ndá ngisa kui nga̱nde.” Ku ndá kuasére̱ xu̱ta̱ xi tekuácha kinikitꞌe sꞌui. 11Xi tjitsú nga kui xi kꞌa nga ngieje tusa kui xi nga̱nde xi ꞌñu nginde sakúre. Xi ni̱ma̱kju̱a̱ bé yajoꞌe̱ kui xi sakúre nga̱nde xi ꞌñu chjiꞌe.»

12Ku jaskan ku̱i̱cha kitsúre̱ Jesuu̱ xta̱ kitsikitꞌe sꞌui:

«Nga niꞌínji ngu sꞌui ngatu̱ xu̱ta̱ xi ndáji kichꞌei nikitꞌéi, kju̱jí xi tsꞌéji xi ndichjaji, ku̱tsa xi xingijí ma, kútsa xi ngandai niꞌya xi tjínre tao̱n. Tsa kuachá niꞌín tekuácha te̱ tsikitꞌéniri kui xu̱ta̱ kú xi mejénre tsú nga te̱ tsjua ngajóniri najmi xi kitsiꞌiri. 13Ni̱tjin xi ndibá nga niꞌín sꞌui, xu̱ta̱ xi ni̱ma̱ tikitꞌéi, xi ndujují yajo̱ꞌe, xi tiakué, xi tki̱a̱. 14Kui xu̱ta̱ najmíre̱ kúcha tsingajuri najmi xi kitsiꞌíri ta̱nga Namiña Diuu̱ xi tsichakunnéri. Kui xi tsjuári ngu kju̱a̱ndá nga fixꞌajíngajóre̱ ngieje xi ngaya kju̱a̱kixi tjima.»

Kúcha tjin tseꞌe kju̱a̱bichi nga je tsejen ni̱tje̱n

(Mt 22.1-10)

15Nga tsitꞌe kui én, ngu xta̱ xi kinikitꞌe sꞌui, ku̱i̱cha kitsúre̱ Jesuu̱:

—¡Ngu kju̱a̱nichakunné xi ndá nga ngieje tsa kju an ma fuetsitsjuaꞌan sꞌui xi chja̱ jma kjibatexuma Namiña Diuu̱!

16Ku̱i̱cha skengi Jesuu̱:

—Ngu ndiya, ngu xta̱ ꞌyendá ngu kju̱a̱bichi xi chja̱ nga jñu kú tuxi kjín xu̱ta̱ kitsikitꞌe. 17Nga je jichú chu̱ba̱ꞌe̱, kitsingiya musuꞌe nga tsichjare ngieje xi kinikitꞌe sꞌui, nga fuetsúre: “Titjájnu, je sindu tiba̱, ngieje nga je tjinda.”

18»Ta̱nga nga ngu ngu xu̱ta̱ xi kinikitꞌe sꞌui, tumítse xi itére̱, kú kitsiꞌinjin xki̱ ndatsa kinikitꞌe. Ngu xi tjitsú: “Kuatꞌínri xi tjinixaji̱ nga ngatsichatꞌána, ta̱nga nangi sꞌe̱i̱ma tsꞌatseꞌan kú kui kjuaꞌikasemána.”

19»Kjaꞌi xi tjitsú: “Tuxi minengina nga ngatsichatꞌána, ta̱nga kuima ni̱tjin tsꞌatseꞌan ón yunda kú kui fuekutꞌamaꞌa̱n.”

20»Ku ngingu xi tjitsú: “Sꞌe̱i̱ma ixantsjaꞌa̱n; kua tixíri nga majín xi tsiꞌinꞌan.”

21»Nga jatjíni musu kitsuyáre̱ xta̱ xi tjitsixaju. Tuxi ndá kitsití kú kitsúre̱: “Kijna tꞌáin ndiyate xi tjin na̱xi̱nanda, kú ndibijí nga ngandiukjén xu̱ta̱ xi ni̱ma̱, xi ndujují yajo̱ꞌe, xi tki̱a̱ kú xi tiakué.”

22»Nga jiꞌíni musu, kitsuyáre̱ xi tjitsixatꞌáre: “Ndi̱a̱ꞌna̱, je kitsiꞌinꞌan najmi xi kiniꞌínna manda, ta̱nga tuku tjin nga̱nde ngisa nganiꞌya.”

23»Te kitsiꞌínnire̱ manda xta̱ xi tjitsixatꞌáre: “Te tꞌáinni ndiyate kú tiꞌínri kjuaꞌñu xu̱ta̱ nga ngatasꞌe̱n. Mejénna nga tsé niꞌyaꞌna. 24Ta̱nga ngují xi tjún kitsikitꞌeꞌan kutꞌa ngundsuba najmi xi tjichine kui ni̱tje̱n.”»

Najmi xi tsubáre nikitjusun nga xi kjibakuyáre̱ Jesuu̱ uyáña

(Mt 10.37-39)

25Tuxi kjínma xu̱ta̱ xi jña tjimajún Jesuu̱. Ku trátse tsasére̱ kú tsichaju̱:

26«Tsa tjin xi mejénre nga án bakuyana, tsubáre nga nitjáojnu tukꞌuajíre̱ tsa najnu kú namijnu, ꞌñu ngisa tukꞌuajíre̱ nga yachjínjnu ku̱tsa kjindijnu, kú ꞌñu ngisa tukꞌuajíre̱ nga tsꞌejún ku̱tsa ndichjajún. Majín an ꞌbematjengina, tusá tsa ántse xi ꞌñu mejénjnu án tukꞌuajíre̱ nga yajo̱jnu. 27Tsanga jún mejínjnu nga kru fesuntꞌájnu nga̱tꞌaꞌna, ku̱tsa mejínjnu nga ñaꞌánjnu én xi xinjnu, majín nga xu̱ta̱ xi tebakuyána uyájnu.

28»Tsa tjin xi tjinuꞌyájnu kꞌui, xi mejénre nga ngu torree̱ tsindá, mí najmi xi tjún tsiꞌin. Tjún ꞌbejñama ku sikjao kao tao̱n sꞌengíre̱, tuxi bé tsa tjiánre̱ kúcha tjin machjénre. 29Nga̱tꞌa tsa baꞌangire̱ nga tsindá torree̱ kú jaskan nga najmíre̱ tao̱n xi tsinduju, kuijnuke xu̱ta̱. 30Ngieje xu̱ta̱ xi kuitsúre: “¡Tuxi ndséinji! Kichꞌangíri torre, kú kjatꞌei kjimandu̱jujíri.”

31»Mí xi tsiꞌin ngu xta̱xá tetjun xi tétse mi jun tjínre, nga ꞌbatsengi yajo̱ꞌe tsa kánmi ma tse̱ꞌe xingu. Tjúntjún tsubáre nga kusúnre̱ tsanga má xi tsiꞌin nga tukuítse xi te mi jun bitjungire na̱xi̱nandaꞌe. 32Kutsa be nga majín xi tsiꞌin, tuku nga kjin ndiba xta̱xá tetjun xingu kú tsingiyaju̱ én xu̱ta̱ꞌe nga mejínre̱ kju̱a̱si.

33»Kui kju̱a̱ nga ndá tikjaojnu, tsanga mejénjnu nga án bakuyajnu, tsubáre nga ꞌbendújnu ngieje najmi xi tjínjnu.

Nga̱tꞌaꞌe na̱xa̱ xi tjin nga̱sunde

(Mt 5.13; Mr 9.50)

34-35Ndá na̱xa̱, ta̱nga nga je tjubaꞌáre̱ xi ndia ngajintjé nikjaꞌa, nga̱tꞌa ngite machjenjínre̱ ujnu ninde kú te̱ machjenjín nga ꞌyeꞌe̱ chu nikjatjijin nga ꞌbetí. ¡Tsanga kjáin nga incha ñajunjún, tuxi ndá nuꞌyájnu!»

Currently Selected:

Luka̱ 14: MZI

Highlight

Copy