Luka̱ 10
10
Ichate kanjo xu̱ta̱ xi kjibakuyáre̱ Jesuu̱ kitsingiya
1Nga je kuma kui kju̱a̱, ichate kanjo xu̱ta̱ ja̱jin Jesuu̱, xki̱jó xki̱jó kitsingiyá na̱xi̱nanda kju̱ nga̱nde jma nga sꞌe̱i̱ fue kui. 2Ku̱i̱cha kitsúre̱ Jesuu̱:
«Kjínma xi machjénre nga basꞌen jma kjibatexuma Namiña Diuu̱, ta̱nga kjinjinma xu̱ta̱ xi faitsuyáre̱ én xi ndá. Kui kju̱a̱, chjinengíjnu Namiña Diuu̱ nga kjín xu̱ta̱ xi sꞌejinreꞌan ngatsingiya, xi faitsuyasúnre̱ kui én ngieje kui xu̱ta̱. 3Ku kjatꞌei tangíjnu; ta̱nga chúnjnu yajo̱jnu, nga̱tꞌa tetsingiyájnu xuku chu̱tsa̱nga̱ jma nga sindu ngandeꞌe naña xayu.
4»Nga tu̱ chꞌajíjnu taon, tu̱ chꞌajíjnu tsa, tu̱ fayajíjnu nde, ku tu̱ ngují xi tikundájnu ndiya. 5Nga fichújnu ngu niꞌya, tikundájnu ngieje xi chja̱ kui niꞌya, ku tixújnu nga ngasakúre kju̱a̱ndá. 6Tsa tjin xu̱ta̱ xi tsubáre̱ nga sakúre kju̱a̱ndá, bitjusún tsa tsubáre nga sakúre̱; ta̱nga tsa tjitsubajíre̱ nga sakúre, bitjusunjín ndatsa mejénjnu nga sakúre̱. 7Nga tu̱ kitiu niꞌyají ꞌbemájnu. Ngútse niꞌyaꞌe̱ xu̱ta̱ tijñájnu, ku ti̱chíjnu ku tꞌi̱u̱jnu najmi xi baꞌíjnu, nga̱tꞌa xi tsixá tjínre kju̱a̱kixi nga ꞌbére ngu chjí.
8»Nga fichújnu ngu na̱xi̱nanda kútsa ndá tsiꞌínjnu xki̱, chinejnu tu̱ najmi xi baꞌíjnu, 9tindayájnu xi ndáji sindúre, ku tixuyájnu nga je ndibatiña nga Namiña Diuu̱ ndiukatexuma. 10Ta̱nga tsa ngu na̱xi̱nanda fichújnu ku cha̱njín tsiꞌínjnu xki̱, titjújnu ngaya ndiya ku chikjindiaju̱jnu: 11“Ngují najmi tjínjni nga̱tꞌajnu. Kui kju̱a̱, nga janda chajo xi tjin na̱xi̱nandajnu ꞌbetsunéjni saji̱n. Ta̱nga ngatuyájnu: je ndiba tiña nga ndiukatexuma Namiña Diuu̱”. 12Kju̱a̱xikjain najmi xi xinjnu, ni̱tjin nga matsje kju̱a̱, tuxi ꞌñu tsijére Namiña Diuu̱ xu̱ta̱ xi chja̱ kui nga̱nde tukꞌuajíre̱ nga Sodoma̱.»
Xu̱ta̱ xi sꞌejinjínre
(Mt 11.20-24)
13Tekuacha kitsú Jesuu̱:
«Xu̱ta̱ xi chja̱ Korasin, ¡tjeꞌñu tse kju̱a̱ꞌón xi sakujnu! ¡Ku tekuácha tuxi ndáji najmi xi kjueyájnu, jún xi nukjuájnu nga̱nde xi chja̱ Betsaida̱! Tsa kui najmi xi majínña ñaꞌan xi kitsiꞌinꞌan ngixkunjún, ku tsanga ngixku̱n xu̱ta̱ xi chja̱ na̱xi̱nanda Tiro̱ kútsa Sido̱n jma ku̱a̱cha kitsiꞌinꞌan, jére tse nga isenkajó yajoꞌe̱ kui xu̱ta̱ kúcha ñaꞌan ꞌbema ngasunde. Jére najñu xi tkue ku jére ndesu ta̱nga̱ꞌí inchare̱ tsja̱tku̱ nga̱tꞌa je ku̱a̱ kumáre̱ anima̱ꞌe̱n. 14Xi kju̱a̱xikjain najmi xi xinjnu, nga fichú ni̱tjin nga matsje kjuetꞌa kui ngasunde, jún, ꞌñu tse nga kujéjnu ngisa tukꞌuajíre̱ nga kui.
15»Xu̱ta̱ xi nukjuájnu Kafarnau̱m, a ku̱a̱cha sꞌejínjnu nga ndá bitjasꞌenjnu ndiu̱jmi. Junjín, kuajícha kuma, tusáni jma ꞌñu ngandiuꞌe nga̱kꞌi̱e̱n ningiyájnu.»
16Nga je tꞌajichi ku̱i̱cha kitsúre̱ Jesuu̱ ja xi kjibakuyáre̱: «Ngieje xu̱ta̱ xi tꞌéjnu, án inchatꞌéna. Ngieje xi mejínre jún, án xi ku̱a̱cha inchatsꞌijúnna; ku xu̱ta̱ xi mejínre̱ꞌan, tekuácha mejínre Namiña Diuu̱, nga̱tꞌa kui kitsingiyana.»
Nga jiꞌíni xi ichate kanjo xu̱ta̱ xi kjibakuyáre̱ Jesuu̱
17Xi ichate kanjo xu̱ta̱ xi kjibakuyáre̱ Jesuu̱ tuxi tsjuá sindúre nga jiꞌíjni, ku ku̱i̱cha kitsúre̱:
—¡Ndi̱a̱jni̱, janda xindajin tꞌeꞌénjni nga jínri nikjaꞌakjájni nga nchutiju̱jni̱!
18Tsichja Jesuu̱ ku ku̱i̱cha kitsúre̱:
—Kubeꞌan nga xuku nga fatꞌai tsengi xindajin skanda ndiu̱jmí. 19Án kitsjuájnu ngaꞌñu, tuxi ngují ye̱ ku ngují nayá xi ndáji tsꞌijúnjnu, ku tuxi ñaꞌánjnu xindajin, xi táonre jún. 20Ta̱nga tu̱ nitsjuajíjnu nga tꞌeꞌénjnu ngayaꞌasen xi ndáji. Titsjuájnu tsanga je yájnu nga kjitꞌa jínjnu ngaya xu̱ju̱n xi chja̱ ndiu̱jmí.
Nga kubetkun Namiña Diuu̱ Jesuu̱
(Mt 11.25-27; 13.16-17)
21Ku kui chu̱ba̱, Ngaya asenꞌen Namiña Diuu̱ xi Tsjé, kitsiꞌin nga tuxi tsjuá kisꞌere Jesuu̱. Ku ku̱i̱cha kitsúre̱ Namiña Diuu̱ nga tsichja:
«Jí namiꞌna, xi tjiniꞌínri manda nangi ku ndiu̱jmí, betkunraꞌan nga tjibakiri ngieje kui najmi niskindi kju̱ xi xuku kui kun. Ta̱nga kikakijíri xu̱ta̱ xi ꞌñu mare̱ ku chjine, nga̱tꞌa jí xi ku̱a̱cha kumejénri, Na̱mi̱ꞌna.»
22Kui nga ku̱i̱cha kitsúre̱ Jesuu̱ xu̱ta̱ xi jña sinduju kui chu̱ba̱: «Ngieje nga tjitsjuána Namiꞌna, ku najmí kjaꞌi xi ndá béna nga kui. Ku án xi kjindiꞌe mare̱ án, án xi ndá beꞌan Namiña Diuu̱, xi Namiꞌna, tukꞌuajíre̱ nga kjaꞌi, kui nga án xi tefajinꞌan xu̱ta̱ xi tekuácha ndá sku̱e̱jín xukúcha béna kuí.»
23Nga je kisꞌejñajún subáni Jesuu̱ ja xi kjibakuyáre̱, ku̱i̱cha kitsúre̱: «Ku tu̱ ndájnu jún, nga tjichase ngiejéjnu najmi xi kjima. 24Ngieje xi chjine Enꞌen Namiña Diuu̱ kumá kju̱ xi xu̱ta̱ xá tetjun kumá, tsjuára kumáre̱ tsikain tsanga kube ku tsitꞌe najmi xi tjinuꞌyájnu ku tjichasejnu kjatꞌei, ta̱nga kumajín xi kitsiꞌin.»
Xta̱ xi kjaꞌi nangi chja̱ ku on skutꞌa xi kiniꞌonre̱
25Ngu chjine kju̱a̱kixiꞌe Namiña Diuu̱ kitsitiñare Jesuu̱ yajoꞌe̱, nga̱tꞌa mejénre nga skutꞌakakún tsanga kumáre̱ kjengi nga chjinengiyáre̱ ngu najmi xi niꞌin tjin, ku ku̱i̱cha kitsú:
—Jí kua Chji̱ne, mí xi tsubáre tsiꞌinꞌan tuxi ma nga ngují ni̱tjin beyaꞌan.
26Ku̱i̱cha skengi Jesuu̱:
—Ayíji kúcha tsú xu̱ju̱n xi chja̱ Kju̱a̱kixi.
27Jí kua Chji̱ne kju̱a̱kixiꞌe Namiña Diuu̱ ku̱i̱cha skengi:
—“Titjoi Namiña Diuu̱ri nga ngieje kju̱a̱kitakúnri, nga ngieje najmi xi chjiꞌeji ku ngieje xukúcha tjínji, ku nga ngiejeña nga tsubáre nitjáoña xingiña xukúcha tjáoña yajo̱ña.”
28—¡Tuxi ndátjín! —kitsú Jesuu̱—. Tiꞌin ngieje kui najmi ku sakúri kju̱a̱mijñachún nguxikaꞌa.
29Ta̱nga chjine Kju̱a̱kixiꞌe̱ Namiña Diuu̱, tsenkakunjín xukúcha skengíre Jesuu̱, kui nga te̱ tsinengiyánire̱:
—Ku ꞌyá xi xingiꞌan ma.
30Kui nga ku̱i̱cha yeꞌe chu̱bare Jesuu̱:
«Ngu ni̱tjin, ngu xta̱, xi itju Jerusalen ku Jeriko kjifué. Nga je kjitsuꞌba ndiya itjune cheje ku nga je tuxi ndá yeꞌére̱, kiskabére̱ ngieje najmi xi kjitsuꞌbaju̱, ku kꞌi̱a̱ yaja nga je tumején kjuatsikén.
31»Ku kꞌi̱a̱, tu̱ kjiama jaꞌa, tuku kui ngaya ndiya, ngu chanaꞌmi judio̱. Nga kube xta̱ xi onre̱, xíntse jaꞌa chanaꞌmi ku kijí. 32Sꞌe̱i̱ma ngisa jaꞌa ngingu judio̱, xi baseju̱n xu̱ta̱ ngaya ni̱ngu̱xi̱; ta̱nga nga kube kui xta̱, tekuácha jaꞌatꞌaxínre̱, ku kijí.
33»Ta̱nga tekuácha jaꞌa ngu xta̱ xi kjaꞌi nga̱nde jindibá, nangi xi chja̱ Samari̱a̱, ku nga kube kui xta̱ xi tsatje̱n nangi, on kiskutꞌa. 34Kitsitiña yajo̱ꞌe, iseti ku bino inchare̱ nga kitsitkire̱, ku kitsikjatjikjare najñu jma onre̱. Kitsikijín ngasún burruꞌe, kiju̱ ngu niꞌya sufe chubachi ku kꞌi̱a̱ isenñajúnre̱.
35»Xima nganchajún, xta̱ xi kjaꞌi nangi chja̱ kitsjuáre taon xi tjiánda niꞌya sufe ku kitsúre̱: “Ndá chaseiri kui xta̱. Tsa chumajínre̱ taon xi tebeꞌéra, ngieje xi féri, nga faꞌañaꞌa̱n ꞌbechjíra xi chajatꞌare.”»
36Nga Jére Jesuu̱ nga yeꞌe kui én ku ku̱i̱cha kitsúre̱ chjine Kju̱a̱kixiꞌe̱ Namiña Diuu̱:
—Chusúnña, tixuyéina. Ngiaján xu̱ta̱ xi jaꞌa kui ndiya, ꞌyá xi xikjin ma xi kitsiꞌonre̱ ja cheje̱.
37—Xi kundusínre̱ nga̱tꞌaꞌe ku isenñajúnre̱ —kitsú chjine Kju̱a̱kixiꞌe̱ Namiña Diuu̱.
Kui nga kitsúre̱ Jesuu̱:
—Tꞌáin, ku tekuácha tiꞌín.
Yachjin xi ꞌmí Maria̱ ku Marta̱
38Nga inchafué Jesuu̱ kju̱ ja xi kjibakuyáre̱ na̱xi̱nanda Jerusalen jaꞌa ngu nga̱nde. Ku kui nga̱nde chjun xi ꞌmí Marta̱ skexꞌá niꞌyaꞌe̱ nga jichutꞌáre Jesuu̱. 39Ku ngaya kui niꞌya tekꞌia kjitjián ngu chjun xi ꞌmí Maria̱ xi ndichja ma Marta̱. Ku Maria̱ kisꞌejñatꞌáre Jesuu̱ ku tuxi ndá iseñajúnre ngieje én xi kjibeꞌe. 40Ta̱nga Marta̱, tu̱ xá xi chja̱tse ta̱nga̱ꞌí kjibaseñajúnre nga kjiꞌbendá xi chine kju̱ ngieje xá xi tjin nganiꞌya. Ku kui kju̱a̱ nga kitsitiñáre yajoꞌe̱ Jesuu̱ ku ku̱i̱cha kitsúre̱:
—Ndia̱ꞌna, a ndusinjínri nga kjibasenjunjínna ndichjaꞌan, ku bé nga án tetsiꞌinꞌan ngieje xá nganiꞌya. Kua tixíri nga ngatasenjúnna.
41-42Ku̱i̱cha skengi Jesuu̱:
—Marta̱, Marta̱, mí xá jí nindusínri yajo̱ri ngieje najmi. Tjín najmi xi ꞌñu chjiꞌe ngisa. Maria̱ xi kiskabé kui ndiya, ku najmí xi ma ꞌbechjare̱.
Currently Selected:
Luka̱ 10: MZI
Highlight
Share
Copy
Want to have your highlights saved across all your devices? Sign up or sign in
México © Sociedad Bíblica de México, A.C. AÑO
