Luka̱ 9

Jesuu̱ kitsingiya ja xi tejó ikuyare̱

(Mt 10.5-15; Mr 6.7-13)

1Yetku Jesuu̱ xi tejó ja xi ikuyare̱, ku kitsjuáre ngaꞌñu nga tsindaya ngieje tkuya chiꞌin ku nga tsiꞌinre manda ngieje xindajin. 2Kui nga kitsingiya nga ngatjái katetsajo én ndá xi chja̱ jma kjibatexuma Namiña Diuu̱ ku ngatsindaya xu̱ta̱ xi ndáji sindúnre. 3Ku̱i̱cha kitsúre Jesuu̱:

«Tu̱ ngují najmi chꞌájnu nga mangíjnu. Nga tu̱ chꞌajíjnu yanise kju̱ tsa, tu chajíjnu tón kju̱ xi chine. Te̱ tuchubají nga kjín najñu chꞌájnu. 4Nga fichújnu ngu niꞌya, kꞌi̱a̱ tijñájnu janda nga kjaꞌi nga̱nde mangínijnu. 5Tsa tjin nga̱nde jma mejínre tsiꞌínjnu xki̱ xu̱ta̱, nga bitjujnu kui nga̱nde, tꞌetsunéjnu sajún ngieje chajo tuxi ngatubé nga chꞌao kitsꞌiju̱njnu.»

6Kui nga itju ja xi kjibakuyáre̱ Jesuu̱ ku kijí ngieje nga̱nde xi chja̱ kui nangi, nga kitsuya én tjatse xi tjínre kju̱a̱ndá ku kitsindaya xu̱ta̱ xi ndáji sindure.

Xta̱xá Erode̱ Bejí ꞌyá xi ꞌmí Jesuu̱

(Mt 14.1-12; Mr 6.14-29)

7Xta̱xá Erode̱ Antipa̱ tsitꞌe ngieje najmi xi kjima, ku tuxi ndá kundusínre̱ nga̱tꞌa tjin xu̱ta̱ xi tsu nga te̱ jiyánire̱ Jua xi Batenda. 8Kjaꞌi xi tsú nga te̱ kuyáni Elia̱ chjineꞌenꞌen Namiña Diuu̱, ku jiyaxunire̱ xu̱ta̱ changa xi tekuácha chjineꞌenꞌen Namiña Diuu̱ kumá. 9Ta̱nga ku̱i̱cha kitsú Erode̱: «ꞌYá kui xta̱, xi tuxi ndá inchatsikjaꞌakja xu̱ta̱. Sꞌejinjínna tsanga Jua xi Batenda, nga̱tꞌa án kitsiꞌinꞌan manda nga kinikꞌen.»

Kui kju̱a̱ nga Erode̱, tuxi mejénre nga kubejín Jesuu̱.

Kúcha kumá nga kjín xu̱ta̱ kitsikjién Jesuu̱

(Mt 14.13-21; Mr 6.30-44; Jua 6.1-14)

10Nga jiꞌíni xi tejó ja apostol xi kitsingiya Jesuu̱, kitsuya ngiejere̱ xá xi kitsiꞌín. Ku jaskan kitsiꞌín Jesuu̱ nga nga̱nde xi ꞌmí Betsaida̱ kiju̱, nga̱tꞌa mejénre nga ꞌbendu subá. 11Ta̱nga nga kube xu̱ta̱ nga Betsaida̱ kijí Jesuu̱, te̱ kijitjengínire̱.

Kui nga Jesuu̱ tuxi chan kitsiꞌín xki̱ ngieje xu̱ta̱, ku kitsuyáre̱ kúcha tjin ngatꞌaꞌe̱ jma kjibatexuma Namiña Diuu̱. Tekuácha kitsindaya xu̱ta̱ xi ndáji sindúre.

12Nga je kjamaꞌña̱, xi tejó ja apostol, kikasére̱ Jesuu̱ ku kuichá kitsúre:

—Tingiyéi ngieje kui xu̱ta̱ nga̱nde xi tiña sindu, tujma nga tjin niꞌya, ngatjaikangitsjái jma ꞌbatse xi chine kju̱ jma faꞌare̱ ni̱tje̱n. ¡Ngatꞌa̱ kꞌu̱i̱ ngují najmi tjin!

13Jesuu̱ kuichá kitsúre:

—Titjuájnu xi chine, jún.

Tanga ku̱i̱cha skengi kui ja:

—Ón tsema ni̱pan ku jótsema tjia̱o̱. Tsa mejénña nga nikjien ngiejeña kui xu̱ta̱, kjuaꞌñu tjínre nga faikindáña xi chine, 14nga̱tꞌa tsꞌatiu ón mi xu̱ta̱.

—Ku̱i̱cha kitsúre Jesuu̱:

—Xki̱ tjiꞌñu xi ichate tikꞌendújnu xu̱ta̱.

15Ku ku̱a̱cha kitsiꞌín kui ja xukúcha kitsú Jesuu̱.

16Ku skabe Jesuu̱ xi ón ni̱pan kju̱ xi jó tjia̱o̱, tsase ndiu̱jmií ku kitsichakunné. Kjín kiti itsjé ni̱pan ku tjia̱o̱, ku kitsjuáre ja xi kjibakuyáre̱ ku kitsiꞌinre̱ manda nga tsikabíre̱ xu̱ta̱.

17Ngieje nga tsakjién ku cha̱n kitsere. Ku ngieje kiti xi tsꞌangi, tejó ni̱si̱n kumá.

ꞌYá xi ꞌmí Jesuu̱

(Mt 16.13-20; Mr 8.27-30)

18Ngu ndiyá Jesuu̱ nga kjiminengire̱ kju̱a̱ndá Namiña Diuu̱ jma tꞌaxín, ku kꞌi̱a̱ jichutꞌare ja xi kjibakuyáre̱. Ku tsinengiyáre̱ Jesuu̱:

—Kúcha chja̱ xu̱ta̱ nga̱tꞌaꞌna.

19Ku̱i̱cha skengire ja xi kjibakuyare̱:

—Tjín xi tsú nga Jua xi Batenda xuji; kjaꞌi xi tsú nga Elia̱ xuji; ku kjaꞌi xi tsú nga chjineꞌen changaꞌe̱ Namiña Diuu̱ xi te̱ jiyánire̱.

20Jaskan nga tsinengiyare̱ Jesuu̱:

—Ku jún, ꞌyáña an. Kúcha bixujnu.

Skengi Pe:

—Jí xi jajinri Namiña Diuu̱ nga Kjuaꞌiꞌnatsjengijni̱ xi Namiña Diuu̱ kitsingiyari.

21Ta̱nga Jesuu̱ tuxi ꞌñu tsinengíre̱ nga ngují xi tsuyáre̱ nga kui xi ꞌBatsjengiña.

Nga kitsuya Jesuu̱ nga nikꞌen

(Mt 16.21-28; Mr 8.31—9.1)

22Te ku̱i̱cha kitsure̱ Jesuu̱ ja xi kjibakuyáre̱: «Án, Kjindiꞌe Xu̱ta̱ ngasunde, tuxi tse kju̱a̱ꞌon xi kjueyána. Ja xi inchatetjúnre̱ na̱xi̱nanda, kju̱ ja chanaꞌmi xi incha ngitku kju̱ chjine Kju̱a̱kixii̱ꞌe Namiña Diuu̱, kumejínre̱ an ku tsikꞌiénna; ta̱nga xi ma ján ni̱tjin fixꞌajin ngajónina.»

23Ku ku̱i̱cha kitsúre̱ ngieje xu̱ta̱ xi kꞌi̱a̱ sindutkiu:

«Tsa tjin xi mejénre nga án bakuyana, tsubáre̱ nga tsichaya tsa tu najmi xi mejénre̱ tsiꞌin. Tsubáre̱ nga ꞌbengure yajo̱ꞌe tsa nikꞌen ku tsikitjusún mandaꞌna̱. 24Tsa tjin xi tsikjao nga kju̱a̱mijñachunꞌen xi ꞌñu chjiꞌe ngisa nga án faitjengina, tusa kju̱a̱chajá nguxikaꞌa kju̱a̱mijñachunꞌen. Ta̱nga xi mejénre nga án faitjengina ku ndusinjínre̱ nga ꞌme nga̱tꞌaꞌna, kui xi bitjungi. 25Tsamí xi chjiꞌe tsa ngu xu̱ta̱ tse̱ꞌe ngieje ku̱ma ngasunde ku nga kjuetꞌa tsikjetsún suba yajo̱ꞌe ku kjuachajá nguxikaꞌa.

26»Tsa tjin xi masabáre̱ nga̱tꞌaꞌna kju̱ ngatꞌaꞌe̱ kju̱a̱kitakun xi tebakuyaꞌan, án Kjindiꞌe xu̱ta̱ ngasunde, tekuácha masabána ngatꞌaꞌe̱, nga ndibajuꞌa̱n ngieje ngaꞌñu xi tjínna kju̱ ngieje ngaꞌñuꞌen Namiꞌna, kju̱ ngieje ngaꞌñu xi tjínre kjinditsje. 27Xi kju̱a̱xikjain, tjin xi kꞌu̱i̱ tinchajnu, xi tuku kje fesunjínjnu nga ndiukatexuma Namiña Diuu̱.»

Nga kisasenkajó asenꞌen Jesuu̱

(Mt 17.1-8; Mr 9.2-8)

28Ku nga je jaꞌa jin ni̱tjin nga ku̱a̱cha tsichja Jesuu̱, tsichjare Pe, Jua ku Santia ku tsijín na̱xi̱ nga kikinengíre̱ kju̱a̱ndá Namiña Diuu̱. 29Ku nga tjichja Jesuu̱, nga kjiminengíre̱ kju̱a̱ndá Namiña Diuu̱, kisasenkajó asenꞌen, ku tiaba xuxu̱ tsꞌuya najñuꞌe̱n ku janda xi jatꞌai. 30Ku kꞌi̱a̱ kuya asenꞌen Moise kju̱ Elia̱, 31xi ngu ndiꞌi asen tsjuatjín jatjiandáire̱. Ngiajó nga Jesuu̱ inchachja̱ju nga nikꞌen Jerusalen, ku nga fixꞌajin ngajónire̱ ku fuéni ndiu̱jmí.

32Pe kju̱ ja xi ngi jó kjibakuyáre̱ ngimajínre̱ nga jenda, ta̱nga kumajín xi kitsiꞌínre̱ najña ku kube Jesuu̱ nga jatjiandáire̱ ngieje ngaꞌñuꞌen, ku Moise ku Elia̱ kꞌi̱a̱ jña incha. 33Nga je makjái Moise ku Elia̱, tsichja Pe ku ku̱i̱cha kitsúre Jesuu̱: «Chji̱ne, ¡ku janda nga tinchaña kꞌui! Tsa mejénri, tsindaꞌa̱n ján nga̱nde jma metenꞌan xkajén, ngu tsi̱, ngu tseꞌe̱ Moise, ku ngu tseꞌe̱ Elia̱.»

Tu̱chu̱ba̱ nga tjichja Pe, janda bejí najmi xi tjitsú. 34Tekjie nga fére̱ enꞌen Pe nga jindibá ngu yufi xi kitsjén ngasun jma incha. Ngiaján ja xi kjibakuyáre̱ Jesuu̱ kitsakjún. 35Ku kinuꞌyáre ngu nda̱ xi jindibá nga̱ji̱n yufi, xi ku̱i̱cha kitsú: «¡Kui kjindiꞌna xikꞌui xi tuxi tjáona, xi ꞌBatsjengiña, xi án jajinꞌan!. Tsubáre̱ nga nuꞌyaꞌénjnu.»

36Ku nga kisꞌexú nda̱ xi inchatꞌemare̱ kube ja xi kjibakuyáre̱ Jesuu̱ nga je kisasensubáni. Ku tse jaꞌa nga ngují xu̱ta̱ kitsuyáre̱ najmi xi kube.

Nga kitsindaya Jesuu̱ ngu xta̱ nisti xi xindajin tsuꞌbajín yajoꞌe̱

(Mt 17.14-21; Mr 9.14-29)

37Xi ma ngachajún nga jajénni tje̱ngi̱, tuxi xu̱ta̱ kjín xi jichukjaꞌandiya̱. 38Ku ngu xta̱ xi tsuꞌbajínre̱ xu̱ta̱ kjín tsichja:

—Jí kua Chji̱ne, minengira kju̱a̱ndá nga tisinjín kjindi xiꞌínꞌna xi ngututútsema. 39Trátse ngu ngayaꞌasen xi xaba ꞌbetꞌare, ku tuxi tsikjindia. Ku tuxi chꞌao tsikjatse ku janda xi ꞌbatsjé xu tsꞌua. Ku nga tsjuentꞌa nga kjiꞌbetꞌáre, tuxi nima̱ ꞌbé. 40Tsinengina kju̱a̱ndá ja xi tjibakuyéiri nga ngatꞌatsje kui ngayaꞌasen xaba, ta̱nga kumajínre̱.

41Tsasere̱ Jesuu̱ xu̱ta̱ xi tjimatjengíre ku ku̱i̱cha kitsúre̱:

—A ngují najmi májnu ñaꞌan tsa kjují an. Kjiá janda tsichukjuájnu nga kuacha tjiñaꞌánjnu. Tjingujíjnu ku sꞌejinjínjnu Namiña Diuu̱.

Ku̱i̱cha kitsúre̱ Jesuu̱ namiꞌen xta̱chi:

—Ndibiji kjindiri.

42Nga je tjitsitiñatꞌáre Jesuu̱ yajoꞌe̱ kui xta̱chi, xindajin janda nangi kitsikjaꞌa ku ngieje ngaꞌñu nga kitsikjaniya. Ku Jesuu̱ kitsitiju̱ xindajin, kitsindaya kui xta̱chi, ku kitsikasꞌénnire̱ namiꞌen.

43Ku ngieje nga se̱n kumáre̱ ngaꞌñuꞌen Namiña Diuu̱.

Te̱ kitsuyáni Jesuu̱ nga nikꞌien

(Mt 17.22-23; Mr 9.30-32)

Inchamase̱nre̱ xu̱ta̱ ngieje najmi xi tjitsiꞌin Jesuu̱, tsichaju̱ ja xi kjibakuyáre̱: 44«Ndá nuꞌya̱jnu najmi xi xinjnu. Án Kjindiꞌe Xu̱ta̱ Nga̱sunde tjin xi tsikasꞌénna ngaya tsja xi taonreꞌan.»

45Kukjinjínre̱ ja xi kjibakuyáre̱ Jesuu̱ én xi kitsúre̱, nga̱tꞌa kje fichují chu̱ba̱ nga makjínre̱. Ku kjaꞌi nga kitsakjún nga minengiyáre̱ mí xi mejénre kitsú nga ku̱a̱cha tsichja.

ꞌYá xi ꞌñu chjiꞌe ngisa

(Mt 18.1-5; Mr 9.33-37)

46Ngu ndiya, ja xi kjibakuyáre̱ Jesuu̱, inchachjasí, ꞌyá xi nga ngieje kuí, xi ꞌñu chjiꞌe ngisa.

47Kubéni Jesuu̱ najmi xi inchatsikjao ngaya anima̱ꞌen, tsichjáre̱ ngu tichi, ku kꞌi̱a̱ jma nga sián isentꞌáre yajoꞌe̱, 48ku kitsúre̱: «Tsa tjin xi tsijaꞌo ngu tichi̱ xuku xikꞌu̱i̱, án inchatsijaꞌóna. Ku tsa tjin xi tsijaꞌo̱na an, Namiña Diuu̱ inchatsijaꞌo, xi kitsingiyana. Xi ꞌñu nima̱kju̱a̱ nga ngiejejnu kui xi ꞌñu chjiꞌe ngisa.»

Xi inchafué kju̱a̱ndáꞌe̱ Jesuu̱

(Mr 9.38-40)

49Jua, ngu kui ja xi kjbakuyáre̱ Jesuu̱, ku̱i̱cha kitsú:

—Jí kua Chji̱ne, kuyájni ngu xi kjiꞌbatsje xindajin ngajori. Ta̱nga kua kibixújni nga kuajícha ngatsiꞌín, nga̱tꞌa xu̱ta̱ñajín chja̱.

50Ta̱nga kitsúre̱ Jesuu̱:

—Ngatu ꞌbechjajíjnu, nga̱tꞌa xi táonjínre̱ jún, nga kju̱a̱xikjáin kju̱a̱ndájnu tjima.

Jesuu̱ kitsitiju̱ Santia ku Jua

51Nga jichú ni̱tjin nga je tsubáre nga mijin ndiu̱jmí Jesuu̱, kijí Jerusalen. 52Ku kitsingiya xu̱ta̱ xi kiju̱ én, ngu nga̱nde xi chja̱ Samari̱a̱, nga kikangitsjáire̱ jmá ma faꞌare̱ ni̱tje̱n. 53Ta̱nga xu̱ta̱ xi chja̱ kui nangi, kuyujíre̱ nga kitsiꞌin xki̱, nga̱tꞌa je bé nga Jerusalen kjifué.

54Nga kube ja xi kjibakuyáre̱ xi ꞌmí Santia ku Jua, ku̱i̱cha kitsúre̱: «Ndi̱a̱jni̱, titjuéjni kju̱a̱ nga chjinengíni kju̱a̱ndá Namiña Diuu̱ tuxi ma nga ngatixú ndiꞌi ku ngatsikje ngieje xu̱ta̱ xi sindu kꞌui.» 55Jatjiya Jesuu̱ ku tsasére̱, sꞌei kitsitiju̱. 56Nga je tꞌají kjaꞌi nga̱nde kijíni.

Xi mejénre nga kisꞌematje̱ngire̱ Jesuu̱

(Mt 8.18-22)

57Nga je tjima ndiya, itjujín ngu xi tsichajo̱ Jesuu̱:

—Faitjengira tujma nga kꞌuainji.

58Ku ku̱i̱cha kitsúre̱ Jesuu̱:

—Naña xayu tjínre ti̱xa̱ jma ꞌbendu, ku tjínre nda̱ba̱ nise; ta̱nga án Kjindiꞌe Xu̱ta̱ Ngasunde, najmína ngu nga̱nde jma tsikjayaꞌa̱n.

59Ku kjaꞌi ngi ngu, ku̱i̱cha kitsúre̱ Jesuu̱:

—¡Ndibitjengina!

Ku̱i̱cha skengi kui xu̱ta̱:

—Ndia̱ꞌna, titjuemána nga̱nde nga fuekañajínꞌa̱n nde namiꞌna.

60Ku ku̱i̱cha skengire Jesuu̱:

—Najmi xi ꞌñu chjiꞌe kjatꞌei xi tsubáre̱ nga niꞌin nga faikixuyáre xu̱ta̱ én tjatse̱ kucha tjin kju̱a̱texumaꞌe̱n Namiña Diuu̱. ¡Titjuéri kju̱a̱ xi sꞌejinjínre nga ngatañajín mikꞌenꞌe̱n!

61Ku kjia te̱ tsichajni kjaꞌi:

—Faitjengira Ndia̱ꞌna, ta̱nga titjuemána nga̱nde nga fuéxiyana xu̱ta̱ xi chja̱ nganiꞌyaꞌna nga je kjuaiꞌa̱n.

62Ku̱i̱cha skengínre Jesuu̱:

—Majín ngaya jma batexuma Namiña Diuu̱ mincha ku xukúcha tsiꞌin ngu xu̱ta̱ nga̱jnu xi chjiꞌejí ñaꞌan. Xi tjitsixajó ki̱cha̱ xi bakjan nangi, tsa ngatu̱n base, na̱xu̱jí bitjure ndiyaꞌe jnu̱.

Currently Selected:

Luka̱ 9: MZI

Highlight

Copy