Juan 14
14
Jesús mëët npatmëty ja Tios Teety
1Këtii mjotmay'ooktëty, mëpëktë ja Dios Teety ets mëpëjktëk ëjts näjyëtu'un. 2Maas ja nteetyën, may ja tsënaaytyakn jap. Ko jeexyë kyajëtu'unëty, ka'ap jeexyë nëkoo yam jëtu'un nëëmëtë koos nëjkx nipëjktaakëja'any ja tsënaaytyakn ma m'itëtyën. 3Ets koos nnëjkxëty ets nipëjktaakëja'anyës miits ja m'ijtaknëty, minaanpës jatëkok ets nyajtsoona'antë, jëtu'un miits nän jap myajpaatëty ma ëjtsën. 4Mnija'awëtëp miits ja tu'u mëti'ipë ja'ajtpën maas nnëjkxyën.
5Ënet ja Tomás t'ënëmaay ja Jesús:
Wintsën, ka'apës nijawëtë maa mijts mnëjkxy, ¿Wi'ixës nnijawëty ja tu'u?
6Ënet ja Jesús y'ëtsoowë:
Ëjts jëtu'un tu'u'ajtp, ja tëyajtën ets ja juukyajtën. Ëjtskyëjxm je'eyë tjëkyepy pën jya'tëty ma ja Dios Teetyën. 7Pën miitsëty xy'ixy'ajtëpës, m'ixy'atantëp näjyëtu'un ja nTeetyës; m'ixy'ajnëtëp tyamnë ets tääjën ja xy'ijxtë.
8Ënet ja Felipe t'ënëmaay ja Jesús:
Wintsën, tuk'ijxtëkës ja Dios Teety, ets jotkujk nwë'ëmtëtyës.
9Ënet ja Jesús y'ëtsoowë:
Felipe, tëë miits yaa jeky nmëët'atë, ¿ets ka'anëm xy'ixy'ätyësë? Pën të xy'ijxyës, tëëjën ja t'ixy ja Dios Teety. ¿E tii ko m'ëna'any ko ntuk'ixëty ja Dios Teety? 10¿Këtii xymyëpëky koos nyajpaaty mëët tu'ukyë ja Dios Teetyë ets ja Dios Teety mëët ëjtsë? ja mëti'ipë të ntukmëmëtya'aktën ka'ap kyë'ëm winma'anyëty të nnikäjpxyës. Ja Dios Teety mëti'ipë juukyajtpën ma ëjtsën, yë'ë kë'ëm winë të tuny. 11Mëpëjktëkës koos n'ëna'any koos n'ity tu'ukyë mëët ja Dios Teety ets ja Dios Teety y'ity tu'ukyë mëët ëjts; pën ka'ap, oy yi'iyë xymyëpëktëty mëti'ipës ntuunpyën. 12Tëy miits nëëmëtë, pën xymyëpëjkpës, tyunëp näjyëtu'un ja tuunk mëti'ipës ntuunpyën; ets tyunëp ja tuunk jaakmëjpë, yë'ë koos jap nnëjkxy ma ja Dios Teetyën. 13Ets tu'kë'ëyë mëti'ipë miits m'amëtoowtëpën ëjts nxëëwkyëjxmës, ntunäämpyës, ets mëët ja Dios U'unk yaj'ixëty ja Dios Teety ja myëj'ajt jyääntyajtën. 14Ntunëpës mëti'ipë m'amëtoowtëpën ëjtskyëjxm.
Ko ja Jesús nimëtyä'äky ko ja Kënu'kxymyëkajtën tkäxa'any
15Pën xytsyojktëpës miits, mpatuntëp ja n'ënä'ämënës. 16Ets n'amëtowëpës ja Dios Teety ets tkäxëty ma miitsëtyën ja wiinkpë ja nikajpxtutpë; jä'ä jëtu'un ja Kënu'kxymyëkajtën tëyajtënpë, xëmëpë yajpaata'anyën mëët miitsëty. 17Mëti'ipë yi'iyë myëmaay myëtajtëpën ja naaxwiinypë ka'ap t'ëxajëja'antë, jä'ä ko ka'ap t'ixtë ets ka'ap t'ixy'atë; e miitsëty m'ixy'ajtëp, jä'ä ko yë'ë yajpaaty mëët miitsëty ets xëmë yajpaata'any ma miitsëtyën.
18Ka'ap miits ku'ooky u'unkën nyajwë'ëma'antë; winpitaanpës jatëkok ets miits mëët nyajpaata'anyës. 19Tim jawäänë jëtu'un, ets ka'ap nëjkx xy'ëk'ijxnëtës mëti'ipë yi'iyë naaxwiinypë myëmaay myëtajtëpën; e miitsëty nëjkxëpës xy'ixtë ets mjuuky'attëty jä'ä koos juuky'ajtpës. 20Jä'ä xëëw miits xynyijawëtëty koos n'ity tu'ukyë mëët ja nTeetyës, ets miits tu'ukyë m'itë mëët ëjts, ets ëjts tu'ukyës n'ity mëët miitsëty. 21Pën kyupëjkpy ja n'ënä'ämënës ets pyatuumpy, yë'ë yajnikëxë'kpy koos xytsyoky, ets pën xytsyojkpës, tsokanëp ja nTeetyës ets ntsokäämpyës näjyëtu'un ets nnänyikëxë'ëkanëp ëjts ma yë'ëjën.
22Ënet ja Judas, ka'ap jyä'äjëty ja Iscariote, tyajtëëy:
Wintsën, ¿tii ko mnanyikëxë'ëka'anyë ma ëëtsëtyën ets ka'ap ma ja ja'ayëtyën ka'apë myëpëktën?
23Tä ja Jesús y'ëtsoowë:
Pën xytsyojkpës, myëjpëjktäkpy ja n'aaw n'ayukës; ets tsokanëp ja nTeetyës, ets nTeetyës mëët nmina'anyës etsës nyajpaata'antë mëët yë'ë. 24Pën xykyatsojkpës, ka'ap tmëjpëjktä'äky ja n'aaw n'ayukës. Ja aaw ayuk mëti'ipë miits tyam mmëtoowtëpën, ka'ap y'ëjtsëty nkë'ëm'aaw nkë'ëm'ayuk, Dios Teety yë jyä'ä, mëti'ipës të xykyexyën.
25Tyam miits winë ntuk'ëwa'anëtya'atë naam tyaanëm nyajpaatyës mëët miitsëty; 26e ja nikajpxtutpë, ja Kënu'kxymyëkajtën mëti'ipë ja Dios Teety kyäxäämpyën ëjts nxëëwkyëjxmës, yë'ë mtuk'ëwaanëjanëtëp tu'kë'ëyë winë ets xyjyä'ämyätstëty wi'ixjaty miits të nëëmëtën.
27Tyam ntukmëwë'ëmtë ja jotkujk'ajtën. Nmooytyëp miits ja jotkujk'ajtën, je'eyëp ko ka'ap yë'ëjëty jëtu'unpë mëti'ipë yajktëpën yë naaxwiinyëtë ja'ay. Këtii mmaytyëty mtajtëty ets këtii mtsë'ëkëtëty. 28Tëë xymyëtowtë koos n'ëna'any koos nnëjkxy ets ko jatëkok nmina'anyës ets nyajpaata'anyës mëët miitsëty. Ko jeexyë miits xytsyoktës, mxoontaktëp jeexyë ko xynyijawëtë koos nnëjkxy ma ja Dios Teetyën, jä'ä ko Dios Teety wäänë mëj yë'ë këtiinëm ëjts. 29Paaty ya'atë ntuk'ëwaanëtë jëwyiin jëyëjp, jä'ä ko ënety jëtu'un jyäty kyëpety, tääts nëjkx xymyëpëktë.
30Ka'apës nëkooyë n'ëkmëtya'akanë mëët miitsëty, jä'ä ko tää wyinkony mëti'ipë ënä'ämpën yaa naaxwiiny; oy tkamëët'aty nitii mëk'ajtën ma ëjtsën, 31kopkpëky ko jëtu'un tyunëtëty jyatëtëty, ets tëkokyë ja'ay nija'awëtya'atëty koos yë'ëjës ntsojkpy yë Dios Teety ets koos yë'ë ntuny mëti'ipës të xytyuk'ëne'emyën.
Pëtë'ëktë ets ja'amtë.
Currently Selected:
Juan 14: QUETZMIXE
Highlight
Share
Copy
Want to have your highlights saved across all your devices? Sign up or sign in
Biblia Dc en Mixe de Quetzaltepec, Oaxaca México © Sociedad Bíblica de México, A.C.
