Juan 13

Ko Jesús tyajtekpyujy ja y'ijxpëjkpëtëjk

1Tyimpatnëp ënety ja ëmaayxyëëw ets nyija'ap ja Jesús ko tëë ja xëëw jëmëjt tpatnë ets ja naaxwiinyëtë t'ëxmatsa'any ets wyimpita'any ma ja Dios Teetyën. Xëmë ijty tsoky ja y'ijxpëjkpëtëjk mëti'ipë yaajëtyën naaxwiiny ets jëtu'un tsojky mapaat y'o'kyën.

2-4Ja mëjku'u tëë ënety tuktëkë ja Judas Iscariote, Simón yë myaank ets ja Jesús tkë'ëyaka'any. Nyija'ap ja Jesús ko tsyoony ma Tiosën ets ko jatëkok nyëjkxa'any ma Tiosën ets ko ja Tyeety ënety tu'kë'ëyë kuttujkën ets mëk'ajtën të myooytyä'äyë; paatykyëjxm pyëti'ky, tam ënety y'a'ux'atë, ets ja nyijän ojts tjeny ets nyätyukwë'ënë tu'uk ja wit myoxkëjxy. 5Tääts ja nëë t'atä'ämëy ma ja kë'ëpujtaknën ets ja y'ijxpëjkpëtëjk ja tyeky ojts tpujë ets tmäxtëtsy mëët ja wit mëti'ipë myoxwëën'ajtypyën.

6Ënet ja Simón Pedro y'ënäny ko ja Jesús ja tyeky pyuja'anxëty:

Wintsën, ¿mijtsës yë nteky mpujjäämpyë?

7Ënet ja Jesús y'ëtsoowë:

Ka'ap tyam xyjya'akyukë mëti'ipës ntuunpyën, ok xjä'äkyukëja'any.

8Ënet ja Pedro y'ënäny:

Kajëna'ajës nkakupëkëty ets mijts yë ntekyës xypyujëty.

Ënet ja Jesús y'ëtsooy:

Pën ka'ap yë mteky npujëm, ka'ap myajpaata'any ma ëjtsën.

9Ënet ja Simón Pedro y'ënëmaayë:

Wintsën, pën jëtu'un, pujta'a tu'kë'ëyë ni'kx nkopkës, ka'ap yi'iyëty ntekyës, näjyëtu'un yë nkë'ëës ets nkëpajkës.

10Ënet ja Jesús y'ëtsoowë:

Mëti'ipë ja'ay të tsyi'iyën, oy je'eyë tyeky tpujëty, ka'ap kopkpëky tyimtsi'iwëty, jä'ä ko wa'ats yë'ënë ets wa'ats miitsëty, oy kyani'ëmukëty.

11Paaty näjyëtu'un y'ënäny ko ka'ap ni'ëmukë wya'ats'atë, jä'ä ko ënety nijawë pën kë'ëyakanëpën.

12Ko tyajktekpyujtaay, tääts ja Jesús jatëkok tpëjktäky ja nyijän ets ojts nyaaxweetsy ets t'ënëmaay ja y'ijxpëjkpëtëjk:

¿Mja'akyukëtëp tii ko miits të nyajtekpyujtë? 13Miitsëty jä'äs xytyijtë Yaj'ijxpëjkpë ets Wintsën ets tëy jëtu'un m'ëna'antë, yë'ëjës jëtu'unpë ntuunk'ajtyp. 14Pën ëjts Yaj'ijxpëjkpë ets Wintsën tëë ja mteky mpujëmë, näjyëtu'un miits mpaat'atëtë ets mnäyajtekpyujëtëty nixim niyam. 15Tëës ja ijxpäjtën npëjktä'äky ets miits näjyëtu'un xytyuntëty ijxtëmës të ntunyën. 16Tëy miits nëëmëtë ko ni pën ja wyintsën tkawinaxy ets ni pën kexyye'epyë tkawinaxy mëti'ipë käjxëpën. 17Pën mja'akyujkëtëp ets mpatuuntëp, akujk jotkujk nëjkx mjuuky'atë.

18Ka'ap miits ni'ëmukë ntijtë, ëjts nija'apës mëti'ipës të nwinwitsyën. E kopkpëky ko y'atëwëty wi'ix ja Dios ja y'aaw y'ayuk këxja'aypyë y'ënä'änyën: Mëti'ipës mëët nkay n'ukyën, mëtsip të y'awinpity. 19Jëwyiin jëyëjp yam ntuk'ëwaanëtë naamka'anëm jëtu'un tyunyë jyätyë, ko ënety jëtu'un tyunyë jyätyë, ënät nëjkx xymyëpëktë ko Ëjts jëtu'un. 20Tëy miits nëëmëtë, pën kyupëjkpy mëti'ipës nkejxypyën, nän ëjts ënety xykyupëjkp; ets pën xykyupëjkpës, nän yë'ë ënety kyupëjkpy mëti'ipës xykyäjxpën.

Ko Jesús nimëtyä'äky ko Judas kyë'ëyaka'anyë

21Ko jëtu'un y'ënaantaay ënät ojts jyotmaytyëkë ets ojts tkajpxtë'kxy:

Tëy miits nëëmëtë ko tu'uk jam ma miitsëtyën mëti'ipës xykyë'ëyakaanpën.

22Ënet ja y'ijxpëjkpëtëjk ojts xim yam nyäwyintë'kxëtë, ka'ap nijawëtë pën ja Jesús tyijpy. 23Ënet tu'uk ja ijxpëjkpë mëti'ipë ja Jesús ni'ik tsyojkpyën, yë'ë ënety jam pyë'am mëët y'a'ux'aty, 24ets ja Simón Pedro ame'tsyë y'ënëmaayë ets tyajtëwëty ja Jesús pën jëtu'un tyijpy. 25Ënet ojts tnimëjkoy ja Jesús ets tyajtëëy:

Wintsën, ¿nikajpx pën jëtu'un mtijpy?

26Ënet ja Jesús y'ëtsoowë:

Tyamës tu'ktuky ja tsajpkääky nmuja'any; pën nmoopyënës, yë'ë ënety.

Tääts ja tsajpkääky ojts tmujy ets tmooy ja Judas, Simón Iscariote myaank. 27Je'eyë ja Judas tna'ëxajëy ja tsajpkääky ets ja mëjku'u ojts tyuktëkëty ets ja Jesús y'ënëmaayë:

Pën tii mtunäämpy, tun tyämyë.

28E ni pën ojts tkaja'akyukë mëti'ipë jam u'unyääytyëpën ma ja kaaypyäjnën ko jëtu'un yaj'ënëëmë ja Judas. 29E jä'ä ko ja Judas yë'ë ënety meeny kyoonë'kpy, paaty ojts jënaakën y'ëna'antë ko ja Jesús wä'änxyëp të tkexy ja Judas juupyë këpäjtpë mëti'ipë mëyataanpën ma ja xëëw tyuna'anyën ëkë ets nëjkx tmo'oy ja ëyoopëja'ay ja näypyutëkë.

30Ko ja Judas ojts t'ëxajë ja tsajpkääky ënätyë tsyo'ony. Koots ënätynyë.

Ko ja Jesús nimëtyä'äky ja jempyë ënä'ämën

31Ko ja Judas ënety të tsyo'onë ënät ja Jesús y'ënäny:

Tyam nyikëxë'ëky ja Naaxwiinyëtë ja'ay ja myëj'ajt y'oyajtën, ëts ja Dios ja myëj'ajt y'oyajtën jam nyikëxë'ëky ma ja naaxwiinyëtë ja'ay ja y'U'unkën. 32E ko ja naaxwiinyëtë ja'ay ja y'U'unk tyaj'ixëtëty ja Dios ja myëj'ajt jyääntyajtën, näjyëtu'un ja Dios tyajnikëxë'ëka'any ja myëj'ajt y'oyajtën, ets tsojk tyajnikëxë'ëka'any. 33Miits u'unk ëna'këty, ka'ap miits mëët jeky n'ëk'itanëtë. Xy'ixta'atëpës miitsëty, näjyëtu'un miits nëëmëtë ijxtëmës ja jutiis ja'ayëty n'ënëmaaytyën: Pën maas nnëjkxy, ka'ap tjëkyepy jam mnëjkxtëty. 34Tyam nmo'otë ja ënä'ämën jempyë: Nätsyokëtë nixim niyam. Jëtu'un ijxtëm miits ntsoktën, näjyëtu'un miits mnätsyokëtëty nixim niyam. 35Pën mnätsyojkëtëp miits nixim niyam, y'ixtëp nyijawëtëp ja ja'ay ni'ëmukë ko ënety miits n'ijxpëjkpë'atë.

Ko Jesús nimëtyä'äky ko ja Pedro kyuyu'utsa'anyë

36Ënet ja Simón Pedro tyajtëëy ja Jesús:

Wintsën, ¿ma mnëjkxy?

Tä ja Jesús y'ëtsoowë:

Pën maas nnëjkxy, ka'ap tjëkyepy mijts jam mnëjkxëty, je'eyëp ko okës jam xypyaja'tëty.

37Ënet ja Pedro y'ënëmaayë:

Wintsën, ¿tii ko ka'ap mëpaat tyam mpanëjkxy? Näy'a'ijxëpës mijts nku'ookëty.

38Ënet ja Jesús y'ëtsoowë:

¿Jaanty m'ëna'any, koos xmyë''ëyoowpäta'anyësë? Tëy yam mijts nëëmëty ko naamka'anëm ënety ja këtseynyë'aaw yaaxë'ëkynyëm ko mijts xykyuyu'utsëtyës tëkëëk ok.

Currently Selected:

Juan 13: QUETZMIXE

Highlight

Copy