Marku 14

Yeesu onttikittheliwa oBetaniya

1Yaahala mahuku meeli paahi mpaka nihuku na mPaska* ni efesta ya ipaawu soohikhalano eferementu. Ahooleli a asaserdoti* ni anamawera a nlamulo* yeera yaasaasaka mukhalelo mmoha weera emvare Yeesu ni maswaawe, ni emwiive. 2Yaaheeratho: “Mmahukuni a efesta – hoye! Weera ohikhumelele onyakuleleiya wa muloko.” 3Areene Yeesu oBetaniya akilaantheene vameesa owannyawe mulopwana oosuweliwa ntoko Simeyoni, namakokho, aamwaattamela Yeesu muthiyana mmoha ni mukoomba woopakiwa ni alabastre, ereenemo makhura oowunkhelaxa ni oorikaxa a nardu* ootteela. Owo aapwexa mukoomba ni aamuyehera Yeesu mmuru. 4Akina yaari vaavaale yaapacera ottaandawulelana yeerelanaka: “Heeni onanariheya wu wa makhura? 5Makhura ala yaaheereke othumihiwa ni idinaariyu* macira mararu, ni musurukhu owo yaaheereke ovahiwa atthu oohaawa.” Ni awo yaamoopopiha vancipale. 6Yeesutho aaweerela: “Munghiye mmuretteleni! Heeni munimuxupaanyu ola? Owo ookipakela etthu yooreera. 7Vano, atthu oohaawa eniikhale ni nyuwo mahuku ootheene ni ehuhu yootheene mwaatthunaka munoowera waakhavihera, mene Miyo nkinkhala ni nyuwo mahuku ootheene. 8Owo oopaka yeeyo owenraawe. Oorihela makhura mweerutthunimwaka ehinaaye weera areherere ovithiwawaka. 9Miyo kinoororomelihani weera, mapuro ootheene yaawo weiwo masu ooreeraxa eneeraaya elaleiwe, mweelaponi yootheene, yeeyotho owo opankaawe eniithalihiwe mpaka wuupuweleliwawawe.” 10Vano Yudasi Iskariyoti, mmoha a muloko neeli, aarowa wa ahooleli a asaserdoti* weera amvarihe Yeesu. 11Awo yaahakalala yiiwalaaya yeeyo, ni yaamuroromeliha musurukhu. Hiiho owo aasaasa ehuhu yootthuneya weera amvaherere.

Yooca yoomalihera ya Apwiya

12Vanihukuni noopacera na efesta ya ipaawu soohikhalano eferementu, ehuhu yookhoveleliwa wiiva eputtiputthi ya mPaska*, oohusera a Yeesu yaamukoha: “Muntthuna woowi Nyuwo weera hiyo nooreherereleni yooca ya mPaska*?” 13Vano Owo aahaarumiha eeli a oohuseraawe aweerelaka: “Mwavolowe musidadeni, ni munoomphwanya mulopwana akunxeene mwaapu wa maahi. Mwamutthareke 14ni mwamuleele mwaneene empa owo aneeraawe avolowe: ‘Muhusiha onookoha: Nri woowi nipuronaka mwa nenno Miyo kineeraaka kimuce mPaska* ni oohuseraaka?’ 15Owo onoowooniherani nipuro ntokotoko na vasulu ni meesa ni ihice, sootheene soolikana. Mwanirehererele weiwo.” 16Oohusera yaavenya, yaavolowa musidadeni, enaphwanya sootheene ntoko Yeesu aaleenlaawe. Ni yaamureherera mPaska*. 17Wiilaka, Yeesu aaphiya vamoha ni muloko neeli. 18Yaacaaya ekilaantheene vameesa, Yeesu aaweerela: “Kinooleelani vekhaikhai weera mmoha a nyuwo onookivariha, mukina onca ni Miyo.” 19Awo yaathanana ni mmoha-mmoha aamweerela: “Vekhaikhai nkihiyono miyo!?” 20Yeesu aawaakhula: “Ti mmoha a muloko neeli, yoole onruweya epaawu vamoha ni Miyo esasaani emoharu yeela. 21Mwaana a mutthu anaavarihiwe ntoko elempwalaaya mwaha wa Yoowo, mene Ii! Onoohaawa yoole anaamvarihe Mwaana a mutthu! Fataari mulopwana owo ahaayariwe!” 22Ecaaka, Yeesu aakuxa epaawu, anatthapela, anameiyanya, anaavaha oohusera eeraka: “Mukuxeke, ela ti erutthwaaka.” 23Vahoolowaya aakuxa ekoomixi, anatthapela, anaavaha oohusera ni ootheene yaawura. 24Ni aaweerela: “Ela ti ephomaaka ya wiiraana eyeeheriwe, mwaha wa ancipale. 25Miyo kinooleelani weera nkingwuratho wa yoowiima ya ematta ya iwuuva* mpaka nihuku nenno kineeraaka kiwure moomweneni wa Muluku.” 26Emalihaka wiipa ecipo emoha, yaakhuma erowaka omwaako wa Sooliveira.

Yeesu onghima weera Pedru anaamurune

27Yeesu aaweerela: “Ootheene nyuwo munookihiya, niwoko elempwe: ‘Kinoomuvulaliha mukukhuli, ni ikhondoolo nsimwareye.’ 28Kaavenyereraka, kinoorowa ohoolowanyu oGalileiya.” 29Pedru aaheera: “Hata ootheene yoohiyeeni, miyo nkinoohiyani!” 30Yeesu aamwaakhula: “Kinoororomelihani weera olelo va, ohiyuweene yoola, ohinaaye wiipa nthupi imaara piili, munookiruna imaara tthaaru.” 31Pedrutho aanyeserera, eeraka: “Hata otthuneyaka okhwa ni Nyuwo, miyo nkinoorunani.” Ni ootheene akina yaahima yeeyo.

Yeesu oGesemani

32Vano yaarowa wa nipuro niitthaniwa Gesemani, ni Yeesu aaweerela oohuseraawe: “Mukilaathiki va, Miyo kirowaka ovekela.” 33Yeesu aamurowano Pedru, Yakobe ni Yohaane, ni aapacera othanana ni oripiwa murima. 34Aaweerela: “Munepaaka woosareya othananaxa omalela okhwa. Mukhaleke va ni mulipelele.” 35Arowaka vahoolo vakhaani, aahuuramela vathi ni aavekela weera wawereya, asusihiwe wa Yoowo ewooreene yeele, 36eeraka: “Aba, Tiithi, wa Nyuwo sootheene sinoowereya. Mususihe wa Miyo ekoomixi ela, wa soothesene, ohikwaniheriwe otthunawaka, mene otthunawanyu.” 37Vano aahokoleela wa oohuseraawe ni aahaaphwanya ekonaka. Owo aamweerela Pedru: “Simeyoni, nyuwo munookona? Khamungwera olipelela hata ewoora emoha? 38Mulipelele ni muvekele, weera muhivolowe ngweereriwani. Munepa ori woolikaneene, mene erutthu yoohilipa.” 39Aasusatho ni aavekela moota mmoharu. 40Aahokolongwaawe, aahaaphwanyatho ekonaka, niwoko yaamooseela. Awo khayaasuwenle etthu yeeraaya ehime. 41Ahokolowaka emaara yanaararu, Owo aaweerela: “Nyuwo nlelo munookona ni munimwiitthuuwa? Wookwana! Yoophiya ehuhu. Moone, Mwaana a mutthu onoovahereriwa mmatatani mwa anamattheka. 42Muvenye ni nrowe. Iwe onimoowa namavarihaaka.”

Otthukiwa wa Yeesu

43Yeesu nlelo uulumaka, aaphiya Yudasi, mmoha a muloko neeli. Vamoha ni yoowo yaari atthu ancipale ekunxeene mavaka ni ikopo, yaarumihiwe ni ahooleli a asaserdoti*, anamawera a nlamulo* ni asitokweene a muloko. 44Namavariha aavaanenle eneneero ni yaawo: “Yoole miyo kineeraaka kamuulumihe ni ebeecu, ti Yoowo. Mumvare ni munlipihe.” 45Arowaka woowaakuveya wa Yeesu, Yudasi aamweerela: “Muhusiha!” ni aambeeca. 46Atthu yaamvara Yeesu ni yaamulipiha. 47Vano mmoha a yaale aari vakhiviru aatholola ekatana ni aamvulaliha murumeiyi a mutokweenexa a asaserdoti*, amukwasaka naarunawe. 48Yeesu aaweerela: “Niwoko na heeni nyuwo mungwaanyu okivara mukuxaleene ikatana ni ikopo? Apaale Miyo kinaalamula atthu weera ewane ni ebooma? 49Mahuku ootheene Miyo kaari ni nyuwo kixuttihaka Mpaani mwa Muluku, ni nyuwo khamwaakitthunke. Ontthuneyatho weera Yoolempwa* ekwaniheriwe.” 50Vano ootheene yaamuhiya ni yaatthawa. 51Mmiravo mmoha, awanreene ekuwo mweerutthuni paahi, eera amuttharaka Yeesu. Yeereraka omvara, 52aatthawa pwitipwiti, ahiyaka ekuwo ottuli.

Yeesu ohoolo wa eSineedriyu*

53Yaamurongha Yeesu wa mutokweenexa a asaserdoti*, ni yaathukumanatho ahooleli a asaserdoti*, asitokweene a muloko ni anamawera a nlamulo*. 54Pedru aamutthara ottaiwene mpaka vaate wa mutokweenexa a asaserdoti*. Akilaantheene weiwe ni anamalipelela, eera ooraka vamooroni. 55Ahooleli a asaserdoti* ni ootheene a eSineedriyu* yaahaasaasa mathowa a Yeesu weera emuthorihele okhwa, mene khayaaphwannye hata nthowa nimoha. 56Ancipale yaakhalela onamoona mwaha wa Yoowo moota woolokottha, mene maswaaya khayeererana. 57Vano akina yaaheemela ni yaamoothera moota woolokottha: 58“Hiyo naamwiiwa eeraka: ‘Miyo kinoophwata Empa ya Muluku epakiwe ni atthu, ni wa mahuku mararu kinooteka ekina yoohipakiwa ni atthu.’” 59Hata hiihotho, maswaaya khayeererana. 60Vano aaheemela mutokweenexa a asaserdoti* ohoolowaya, ni aamukoha Yeesu: “Nyuwo khamunaakhula seiyo awo angwootheraayani nyuwo?” 61Yeesutho aamaala ni khaamwaakhunle etthu. Mutokweenexa a asaserdoti* aamukohatho: “Nyuwo ti Kristu, Mwaana a Muluku ooreelihiwa?” 62Yeesu aamwaakhula; “Ti Yoomi. Nyuwo mmwimoone Mwaana a mutthu akilaantheene moono mulopwana wa Muluku a ikuru sootheene awaaka mmahutteni a wiirimu.” 63Mutokweenexa a asaserdoti*, aahulaka ikuwosawe, aakoha: “Khaninaatthuna anamoona akina! 64Nyuwo mohiiwa oveiha! Munuupuwela hai?” Ootheene yaathoriha weera Yeesu omphwanela okhwa. 65Vano akina yaapacera omusenyela, yaamutthuka maitho ni emmanaka Yoowo, yaamweerela: “Otthome!” Ni anamalipelela yaamwaakhela Yoowo, emmanaka.

Pedru onimuruna Yeesu

66Pedru areene vathi, vaate, murumeiyi muthiyana mmoha a mutokweenexa a asaserdoti* aavira vaavaale. 67Amoonaka Pedru ooraka, aangwehexexa ni aamweerela: “Nyuwotho mwaari ni Yeesu yoole muNasarete.” 68Wa soothesene, owo aamuruna Yeesu eeraka: “Nkimusuwenle, hata nkisuwenle yeeyo munuulumaanyu.” Ni aavenya arowaka mmutthekoni. 69Amoonakatho iwe murumeiyi muthiyana ole, aaweerela yaale yaari vakhiviru: “Ola ori mmoha a yaale.” 70Vano aarunatho. Vahoolo vakhaani, yaale yaari vakhiviru yaamweerela: “Vekhaikhai nyuwo muri mmoha a yaale. Nyuwo muri muGalileiya.” 71Vano aapacera onyohola ni olipela: “Nkimusuwenle Mulopwana Owo nyuwo munimuhimaanyu.” 72Woowaakuveya nthupi aahiipa emaara yanaaveeli. Vano Pedru aahuupuwelela masu Yeesu aamuleenlaawe: “Ohinaaye wiipa nthupi imaara piili, nyuwo munookiruna imaara tthaaru.” Ni aahiinla vancipale.

Currently Selected:

Marku 14: VMK2021

Highlight

Copy