Marku 15

Yeesu ohoolo wa Pilatu

1Oyaaka ni oxa ahooleli a asaserdoti*, asitokweene a muloko, anamawera a nlamulo* ni ootheene a eSineedriyu* yaaphiya woovaanelani. Emutthukaka Yeesu, yaamukuxa ni yaamvaherera Pilatu. 2Pilatu aamukoha: “Nyuwo muri mwene a aYuda?” Yeesu aamwaakhula: “Nyuwo muneera yeeyo.” 3Ahooleli a asaserdoti* yaamoothera Yeesu itthu sincipale. 4Vano Pilatu aamukohatho: “Nyuwo khamunaakhula? Moone itthu sincipale awo angwootheraayani?” 5Yeesutho khaakhunle hata nsu nimoha, ni Pilatu aatikhina. 6Vanonto, wa ehuhu ya efesta yaari ekhovelelo yoomutaphula namatthukiwa mmoha, mwa yoowo muloko wa atthu waamvekelaaya. 7Mulopwana mmoha iitthaniwa Baraba aari okaliposo vamoha ni anamatthukiwa akina yaawiivale atthu moowanani ni atthu ancipale. 8Atthu ancipale yaaphiya wa Pilatu ni yaamvekela weera apake yeeyo aakhovelelaawe opaka. 9Pilatu aahaakoha: “Muntthuna weera miyo kimutaphule Mwene a aYuda?” 10Aasuwela weera ahooleli a asaserdoti* yaamvaherera wa yoowo Yeesu niwoko na nrima. 11Mene ahooleli a asaserdoti* yaahaasesera atthu ancipale omvekela Pilatu weera amutaphule Baraba, ahikhanle Yeesu. 12Vano Pilatu aahaakoha: “Nkeereke hai ni Yoole nyuwo mummwiitthanaanyu Mwene a aYuda?” 13Awo yaakhuwela: “Munkhomele!” 14Pilatu aahaakoha: “Niwoko heeni? Mulattu heeni otthenkaawe?” Vano awosa yaatepa okhuwela: “Munkhomele!” 15Atthunaka waasiveliha atthu ancipale, Pilatu aahaataphulela Baraba ni aalamulela weera Yeesu awaxuliwe, ni aamwinnyerera weera akhomeliwe.

Anakhotto animpuhera Yeesu

16Anakhotto yaamurongha Yeesu mpaani mwa Pilatu, eyo tiiyo oPretoriyu, ni yaahaathukumanya anakhotto ootheene. 17Yaangwariha Yeesu mukaandyo wooxeera ni yaapaka ecireemba ya nyiiwa ni yaangwariha Yoowo. 18Yaapacera omuulumiha yeeraka: “Salaama, Mwene a aYuda!” 19Yannammana mmuru ni ekopo ni yannamusenyela. Vano yaamukokhorela ni yaamuttottopela. 20Emalihaka omutheiya, yaamurula mukaandyo wooxeera ni yaangwariha ikuwosawe enamukhumihera vaate weera emukhomele.

Othomeiwa wa Yeesu

21Mulopwana mmoha a oKireene, iitthaniwa Simeyoni, atithawe Alesandere ni Rufo, aavira weiwo akhumaka omatta. Yaamunyeserera weera akuxe muttanda. 22Yaamurongha Yeesu vanipuroni niitthaniwa Golgota, entaphulela nipuro na nikarakasa. 23Yaamvaha eviinyu yootakansiwa ni emira*, vaheera Owo khaawunre. 24Vano yaamukhomela. Yaakawana ikuwosawe, epakaka macitta weera esuwele ni mpatta heeni wa ikuwo khula mutthu eeraawe akhaleno. 25Yaari ewoora yanaararu awo yaamukhomenlaaya. 26Ni yoomootheraaya yaalempwale yaari ela: “Mwene a aYuda.” 27Yaahaakhomela anamwiiya eeli vamoha ni Yoowo – mmoha moonowaawe mulopwana ni mukina muthiyana. 29Yaawo yaavira, yaamuruwana, yiinihaka nyuru, yeeraka: “Khuu! Weyo waarowa ophwata Empa ya Muluku ni waateka wa mahuku mararu, 30wiivuluxeke ni okhuruwe vamuttandani!” 31Mooteene yoowo ahooleli a asaserdoti* ni anamawera a nlamulo* yaamutheiya yaaworu yeeraka: “Aahaavuluxa akina, mene khangwera wiivuluxa! 32Kristu, Mwene a aYixrayeli! Akhuruwe vamuttandani weera noone ni nimuroromele.” Yaale yaathomeiwe vamoha ni Yoowo yaamuruwanatho.

Okhwa wa Yeesu

33Okhuma nsuwa vamuru yaakhala epiphi mweelaponi yootheene wookwana iwoora tthaaru. 34Sikwanakaru iwoora tthaaru, Yeesu aakhuwela vancipale: “Eloyi, Eloyi, lama sabaktani?” entaphulela: “Mulukwaaka, Mulukwaaka, heeni mukihingyaanyu?” 35Akina yaari weiwe, yiiwalaaya yeeyo, yaaheera: “Mmwiiwe! Owo onimwiitthana Eliya.” 36Mmoha a yaale, aatthimaka, anaruweiya nttapwatta mviinyuni yoonyuunya, aniikaathi okhwipi wa ekopo, anamvaha Yeesu weera awure, eeraka: “Noone Eliya awa omvenxa.” 37Vano Yeesu aahookhwa, akhuwelaka ni nsu ntokotoko. 38Ekuwo etokotoko ya Mpaani mwa Muluku yaahaahuwa, enakawanyeiya okhuma vasulu mpaka vathi. 39Iiwaka kenturiyoni* aari ohoolo wa Yeesu okhuwelawawe, ni amoonaka moota Yeesu aakhwaawe, aaheera: “Vekhaikhai, Mulopwana Ola aari Mwaana a Muluku.” 40Asithiyana akina yeera ewehaka ottaiwene. Variyariwaya aari Mariya oMagadalene, Mariya amayawe Yakobe mukhaani ni Yoseete, ni Salome. 41Ereene oGalileiya, awo yaamutthara Yeesu ni yaamurumeela. Asithiyana ancipale akina yaarwiiye ni Yoowo oYerusaleemu, yaaritho weiwo.

Ovithiwa wa Yeesu

42Naari nihuku na oreherera, eyo tiiyo, nihinaaye ophiya nihuku na eSaabadu. Wiilaka, 43Yoseefe a wArimatheiya, mutokweene mmoha oosuwanyeyaxa a eSineedriyu*, mwa yoowo aawehereratho omwene wa Muluku, aalipiha murimaawe ni aarowa wa Pilatu amvekelaka muttembo wa Yeesu. 44Pilatu aatikhina iiwalaawe weera Owo ohookhwa. Amwiitthanaka kenturiyoni*, aamukoha weera Yeesu aahookhwa. 45Aleeliwaka ni kenturiyoni*, aamvaherera Yoseefe muttembo. 46Vano Yoseefe aathuma esaanda, anakuruxa muttembo vamuttandani, anavitikelela muttembo ni esaanda, ni aniikaathi munihiyeni, noothipiwa vamwala. Vahoolowaya aahiikaathi nluku ntokotoko vamulako wa nihiye. 47Mariya oMagadelene ni Mariya amayawe Yoseete yaahoona weiwo Owo aavithiwaawe.

Currently Selected:

Marku 15: VMK2021

Highlight

Copy