Marku 13
13
Ineneero sa emalihero ya ihuhu
1Akhumaka Mpaani mwa Muluku, mmoha a oohuseraawe aamweerela: “Muhusiha, moone maluku matokotoko ni soopakiwa sooreeraxa!” 2Yeesu aamukoha: “Munimoona sootheene soopakiwa sooreeraxa iya?” Va khanirwa nikhala nluku vasulu vanluku – sootheene nsiphwatiwe.” 3Yeesu akilaathiyeene vamwaakoni wa Sooliveira ohoolo wa Empa ya Muluku, Pedru, Yakobe, Yohaane ni Andreiya yaamukoha vakhwipi: 4“Munileele yaakhani sineeraaya seereiye itthu iya? Ni eniikhale eneneero heeni yoowoonihera weera sootheene iyo sihanle vakhaani okwaniheriwa?” 5Yeesu aaweerela: “Mwiipasoope weera ahikhale aneera oolokottheni. 6Ancipale animoowa mwa Nsinanaka yeeraka: ‘Ti miyo,’ ni eniyaalokotthe ancipale. 7Mwiiwaka sa ikhotto ni suulummwaka sa ikhotto, muhoove. Ontthuneya weera itthu iyo seereiye, mene nlelo khoohiyono ommaleloni. 8Elapo ni elapo eniiwane, aani omwene ni omwene. Onuukhale otetereiya mmapuroni makina, nitho etala. Itthu iyo siri epacerero ya ovoreiya wa oyara. 9Nnene, niwoko munoovahereriwa wa alipa oowuuluma milattu ni munoomaniwa muSinagogani*. Nyuwo munooronghiwa ohoolo wa asitokweene ni mamwene niwoko na Miyo weera mwaakhalele onamoona yaawo. 10Ni ontthuneya toko weera masu ooreeraxa ekhale oolaleiwa wa miloko sootheene. 11Imaara sootheene muneeraanyu muvonyeriwe okaliposo ni muronghiwe woothorihiwani, muheeteteele yeeyo muneeraanyu mwahime. Mwahime paahi yeeyo muneeraanyu mwavahiwe ehuhuweene yeeyo, niwoko khamuhiyono nyuwo muneera muulume, mene Munepa Wootteela. 12Munna mmoha anaamvarihe munneiye, amvahereraka mookhwaani, ni mooteene yoowo anaapake tiithi ni mwanawe. Anamwane eniiwane ni asinaangolo, ni mpaka eniiwiive. 13Mmwithanyiwe ni atthu ootheene niwoko na Nsinanaka, mene yoowo anaavilele mpaka ommaleloni onoovuluxiwa. 14Nyuwo moonaka etthu yoonanaraxa yoowuulihaxa muru yiikaathiweene vanipuroni ehintthunihiwaaya – namasoma, iiwexexe – vano yaawo eneera ekhale oYudeiya, etthawele nnyaakoni. 15Yoowo aneera akhale vanipathoni na empaawe, ahikhuruwe, hata ahivolowe weera akuxe etthwaawe mwemmo. 16Yoowo aneera akhale omatta, ahihokolowe weera akuxe mukaandyowaawe. 17Hapo oowoopihaxa eniikhale mahukweene yaawo wa yaale asimaayi eniirupale ni wa asimaayi eneera yaamwiheke! 18Muvekele weera itthu iyo siheereiye ehuhu ya mulaala, 19niwoko mahukweene yaawo eniikhale mahuku a ohaawaxa ntoko kheeneereiye okhuma ehuhuweene yeele Muluku aapattunxaawe elapo ya vathi mpaka vaanaano vaava, hata kheerwa yeereiyatho. 20Yahaavukunle Apwiya mahuku awo, khaawo eera avuluxiwe. Vano, niwoko na oothanliwa Awo yaathanlalaaya, Apwiya yaavukula ehuhuweene yeeyo. 21Akhala mukina aneera aweereleni: ‘Mmoone, Kristu ori va!,’ hoye hoye ‘mmoone, ori vale!,’ muhimuroromele! 22Vano, eniikhumelele akristu ni maprofeeti oowootha eneera epake ineneero ni sootikhiniha weera, wawereya, yaalokotthe mpaka oothanliwa. 23Tivawo, nnene. Miyo koowoopererani ehinaaye. 24Wa mahukweene yaawo, waamalaka ohaawaxa iwo, ‘nsuwa khanirwa noopa, ni mweeri khoorwa waaratho. 25Ithenyeeri nsimore wiirimu, ni ikuru sa wiirimu nsittikinyeye.’ 26Ehuhuweene yeeyo anooniwe Mwaana a mutthu awaaka mmahutteni ni ikuru sitokotoko ni ovuwaxa, 27ni Owo anaarumihe andyelowaawe ni eniyaathukumanyihe oothanliwaawe wa ilapo sootheene, okhuma ekotenle elapo ya vathi mpaka ekotenle erimu. 28Muxuttere wa mwiri wa efiigu osoma wu: iphandisaya sakhala sikithi ni makukhwaaya yaaphuwaka, munoosuwela weera eyiita yookhuveela. 29Hiihotho, moonaka itthu iyo seereiyaka, musuwele weera Owo ori vakhiviru – vamulako! 30Miyo kinoororomelihani: ekhapira ela kheenrowa ovira mpaka sootheene iyo seereiye. 31Wiirimu ni vathi onuuvire; maswaakatho kheerwa evira.
Nihuku ni ehuhu kheesuweliwe
32Mwaha wa nihuku nno ni ewoora eyo khaawo onsuwela, hata andyelo a wiirimu, hata Mwaana, ehikhanle Atiithi paahi. 33Nnene! Mwiipasoope! Nyuwo khamusuwenle eneeraaya erwe ehuhuweene yeeyo. 34Ori ntoko mulopwana ompwaha ni mukwahaawe. Owo onghiya empaawe, amuhiyeraka murumeiyi ti murumeiyi ni mutekwaawe, ni onimulamula namalipelela milako weera alipelele. 35Tivawo, mulipelele, niwoko khamusuwenle ewoora heeni mwaneene a vaate aneeraawe awe – hata okhalaka wiilaka, naari ohiyu eriyari, naari oyaaka ni oxa, hata oxeexelo. 36Owo awa Wootutuxereya, ahoophwanyeni mukonaka! 37Yeeyo kinooleelaakani, kinaaleelatho ootheene: mwiipasoope!”
Currently Selected:
Marku 13: VMK2021
Highlight
Share
Copy
Want to have your highlights saved across all your devices? Sign up or sign in
Makhua Shirima Bible © Christelike Lektuurmaatskappy NPC, 2021.
