Marku 12

Yoolikanyiha ya anamalima

1Owo aapacera waaleela ni soolikanyiha: “Mutthu mmoha aaphatteiya ematta ya iwuuva*. Aapaka mukuso orukureenreene. Aapakatho nipuro noovotta iwuuva*. Vahoolowaya aapaka nipuro na anamalipelela. Vano aawooliha ematta ya iwuuva* anamalima akina, anarowa ni mukwahaawe. 2Yaaphiyalaaya ehuhu ya ohepha, aamurumiha murumeiyi mmoha wa anamalima weera aakhele mpatta mmoha wa iwuuva*. 3Vano awo yaamvara, enammana, enamoomola woohikuxa etthu. 4Vano aahaarumihela murumeiyi mukina, ni yaammana mmurumwawe ni yaamuhasula. 5Nlelo aahaarumihela mukina, vaheera yaamwiiva. Annaarumiha akina ancipale – akina anamalima yaahaamana, akina yaawiiva. 6Muneene aahalanotho mmoha weera amurumihe: mwanawe oosiveleya. Woomaliha aamurumiha mwanawe, uupuwelaka: ‘Eniimuttittimihe mwanaka.’ 7Anamalimatho yaaheerelana yaaworu: ‘Ola ti namarandela a mwaneene. Ngwe, nrowe nimwiive, ni emattaawe eniikhale yawihu.’ 8Hiiho awo yaamvara, enamwiiva, enamvonyera okerekhere wa ematta ya iwuuva*. 9Vano, anaapake eheeni mwaneene a ematta ya iwuuva*? Anaawe ni anaawiive anamalima ale, ni anaavahe akina ematta ya iwuuva*. 10Khamunasome mBibiliyani: ‘Nluku anamateka yaakhoonttaaya naathatuwa nluku noottittimiheyaxa. 11Apwiya yaapanke yeeyo ni ti yootikhiniha vamaithoniwahu.’” 12Vano yaapacera waasaasa mukhalelo weera yaamvare, niwoko yaasuwela weera aahima yaale athalihaka yoolikanyiha ele. Yaahoovatho muloko wa atthu, tivawo yaamuhiyalaaya ni yaattimula.

Oliva musoko wa Seesari

13Vahoolowaya yaamurumihela Yeesu akina a aFarisi* ni a Herodi weera emvare Yeesu ni maswaawe. 14Awo yaamwaattamela Yoowo ni yaamweerela: “Muhusiha, noosuwela weera muri Oororomeleya ni khamumviriyeliwa ni akina niwoko khamunthalu, mene munxuttiha ephiro ya Muluku mweekhaikhaiyini. Ontthuneya oliva musoko wa Seesari, naari hoye? Niliveke, hoye hoye naari?” 15Yeesutho, asuwelaka wiixeerawaya, aahaakoha: “Heeni muneereraanyu okiphariha mutaphani? Mukiwiihere edinaariyu* emoha weera Miyo koone.” 16Awo yaangwiihera nikhoobiri, ni Owo aahaakoha: “Ecaambulo ela ni yoolempwa ela yawani?” Awo yaamwaakhula: “Ya Seesari.” 17Vano Yeesu aaweerela: “Ya Seesari, mumvahe Seesari, ni ya Muluku, mumvahe Muluku.” Ni yaatikhina mwaha wa Yoowo.

Ekhaikhai ya ovenyerera

18Vano aSaduki*, aneera weera khoowowo ovenyerera, yaamwaattamela Yoowo ni yookoha ela: 19“Muhusiha, Moisesi aalepa weera, munna a mulopwana akhwa ni aahiya amwaariye oohikhalano mwaana mulopwana, munneiye owo athelane ni naamukhweli owo weera amuyarele munneiye anamwane asilopwana. 20Yaakhala axunna athanneeli. Oopacera aathela ni aahookhwa woohimuhiya mwaana mulopwana. 21Anaaveeli aathelanatho ni naamukhweli, menetho aahookhwa woohimuhiya mwaana mulopwana. Mooteene yoowo yaamukhumelelatho anaararu. 22Wa athanneeli khaawo aamuhingye mwaana mulopwana. Woomalihera, aahookhwatho naamukhweli. 23Moovenyererani, muthiyana owo anaakhale mwaara a taani a asilopwana athanneeli, awo yeenre athanneeli ootheene yamuthelaka yoowo?” 24Yeesu aawaakhula: “Nyuwo mootapanya, niwoko khamusuwenle Yoolempwa*, hata ikuru sa Muluku. 25Moovenyererani, atthu khaanthela, hata khaanthelana, mene ari ntoko andyelo a wiirimu. 26Mwaha wa ovenyerera akhwiiye, nyuwo khamusomme elivuru ya Moisesi, mwaandiisini a niphuwa, moota Muluku aamweerenlaawe Moisesi: ‘Miyo ti Muluku a Abrahaamu, Isaaki ni Yakobe’? 27Owo khahiyono Muluku a akhwiiye, mene a akumi. Nyuwo mootapanya vancipale!”

Nlamulo noottittimiheyaxa

28Mmoha a anamawera a nlamulo* aamwaattamela ni aawiiwa evaanyihanaka. Uupuwelaka weera Yeesu aawaakhula nnene, aamukoha: “Nlamulo heeni noottittimiheyaxa noopwaha ootheene?” 29Yeesu aamwaakhula: “Noopwaha ootheene ti nna: ‘Mwiiwe aYixrayeli, Apwiya Mulukwaahu ti Apwiya amoharu. 30Mwaasivele Apwiya Mulukwaanyu ni murimaanyu wootheene, okumaanyu wootheene, wuupuwelawanyu wootheene ni ikurusanyu sootheene.’ 31Nanaaveeli ti nna: ‘Munsivele mukhwiinyu ntoko muniisivelaanyu.’ Khaawowo malamulo makina oopwaha yaala.” 32Mulopwana aamweerela: “Ti wooreera, Muhusiha! Ti ekhaikhai mweenraanyu weera Muluku ti mmoharu, ni khawowo mukina, ahikhanle Yoowo. 33Omusivela Muluku ni murimaanyu wootheene, wuupuwelawanyu wootheene ni ikurusanyu sootheene, ni omusivela mukhwiinyu ntoko muniisivelaanyu, ti wootthuneyaxa oopwaha sooveleela soohisiwa ni soovaha sootheene.” 34Uupuwelaka weera owo aahaakhula ni miruku, Yeesu aamweerela: “Khamukhanle ottai wa omwene wa wiirimu.” Evenyero vaavaale mpaka muhoolo, khaawo yeerenre omukohatho.

Kristu ti Apwiya a Davide

35Axuttihaka Mpaani mwa Muluku, Yeesu aahaakoha: “Niwoko heeni anamawera a nlamulo* aneeraaya weera Kristu ti mwaana a Davide? 36Davide muneenaawe, eettihiwaka ni Munepa Wootteela, aaheera: ‘Apwiya yaaweerela Apwiyaaka: ‘Mukilaathi moonowaaka mulopwana mpaka Miyo kineeraaka kiwiikaathi amwiittanaanyu vathi wa inaawosanyu.’ 37Davide muneenaawe ommwiitthana ‘Apwiya.’ Moota heeni aneeraawe akhale Kristu mwanawe?” Ni atthu ancipalexa yaamwiiwa ni ohakalala. 38Axuttihaka, Yeesu aaheera: “Mwiipasoope ni anamawera a nlamulo*. Awo antthuna weetta ni soowara sooreeraxa ni wuulumihiwa mwaatthuni. 39Antthunatho waakamela mapuro ootthuneyaxa muSinagogani* ni mapuro oottittimiheya a ifesta. 40Awo anca impa sa asinaamukhweli, ni amvekelaxa moota woowiixeera. Awo eniyaakhele nthorihelo noonanaraxa.”

Yoovaha ya naamukhweli

41Yeesu aakilaathi ohoolo wa maala mwemmwe saaheliwaaya soovaha. Aahaaweha atthu ancipale ehelaka musurukhu mmaalani mwa soovaha. Anamapuha ancipale yaavonyeramo musurukhu mwincipale. 42Vano naamukhweli mmoha oohaawa aaphiya, anahela makhoobiri meeli ooyevaxa, eyo tiiyo, waari musurukhu vakhaani woohitthuneyaxa. 43Awiitthanaka wa Yoowo oohuseraawe, Yeesu aaweerela: “Kinooleelani weera naamukhweli ola oohaawa oohela mmaalani a soovaha vancipale woowaapwaha akina. 44Ootheene aavonyera mwemmo paahi mpatta wa musurukhwaaya mwincipale, vaheera ola oovonyeramo moohaawanimwawe sootheene aarinaawe weera akhale.”

Currently Selected:

Marku 12: VMK2021

Highlight

Copy