Marku 11

Ovolowa oYerusaleemu

1Yaakhuveenlaaya oYerusaleemu ni ephiyaka oBetefage ni oBetaniya, wookhuveela omwaako wa Sooliveira, Yeesu aahaarumiha oohusera eeli 2aweerelaka: “Murowe mmuttettheni ori ohoolowanyu. Mwaavolowakaru, munoomphwanya buuru mwaaxaana atthukiweene, mwa yoowo khaawo atonke ongwela. Mwamutaphule ni mukiwiihere. 3Mukina ookohani: ‘Heeni mumpakaanyu yeeyo?’ mwamuleele: ‘Apwiya anoomutthuna ni eniimuhokoloxe woowaakuveya.’” 4Awo yaarowa ni yaamphwanya buuru mwaaxaana mmuseweni, atthukeleliweene vamulako. Emutaphulaka, 5akina yaari vaavaale yaahaakoha: “Mumpaka eheeni nyuwo, muntaphulaka buuru mwaaxaana ola?” 6Oohusera yaahaakhula ntoko Yeesu aaleenlaawe, ni awo yaahaahiya erowaka. 7Yaamuruuhela Yeesu buuru mwaaxaana, yaamvonyera mikaandyosaya, ni Yeesu aangwela. 8Ancipale yaahaatala mikaandyosaya mphironi. Akina yaamwaramwaxa iphandi yaathikinlaaya mmatta. 9Yaawo yaahoolenle ni yaawo yaamutthanre yaakhuwela: “Hosana*! Ooreelihiwa ti Yoowo ongwa mwa Nsina na Apwiya! 10Wooreelihiwa ti omwene wa atithihu Davide onrwa. Hosana* musulusulu!” 11Yeesu aaphiya oYerusaleemu, anavolowa Mpaani mwa Muluku. Aaweha sootheene sa mukhwipimwawe, ni weenre wakhalaka oxekuwa, aavenya arowaka oBetaniya vamoha ni muloko neeli.

Yeesu ontteeliha Empa ya Muluku

12Oxaawaya, evenyaka oBetaniya, Yeesu aavoliwa etala. 13Oonaka ottaiwene mwiri wa efiigu ni makukhu, aarowa weera oone saakhanleene soowiima sa efiigu. Aattamelaka, khaaphwannye etthu, ehikhanle makukhu, niwoko kayaahiyono ehuhu siniimaaya soowiima sa efiigu. 14Vano aaheerela: “Khaawo anaacetho soowiimasanyu.” Oohuseraawe yaamwiiwa uulumaka yeeyo. 15Aphiyaka oYerusaleemu, Yeesu aavolowa Mpaani mwa Muluku, ni mwemmwe aapacera owoomola yaathuma ni yaathumiha. Aapittula meesa a anamaceendya a musurukhu ni ihice sa anamathumiha ikhunda. 16Khaatthunihera weera ahikhale aneera ateexe itthu soothumiha Mpaani mwa Muluku. 17Ni aahaaxuttiha eeraka: “Kheelempwe: ‘Empaaka eniyiitthaniwe Empa ya Mavekelo wa miloko sootheene?’ Vano nyuwo mootatuxa nikhuku na anamwiiya!” 18Ahooleli a asaserdoti* ni anamawera a nlamulo* yaahiiwa masu ala ni yaapacera waasaasa mukhalelo weera emwiive, niwoko yaamoova, yeenre atthu ootheene ale yatikhinaka ni oxuttihawawe. 19Wiilaka, awo yaavenya osidade.

Mwiri wa efiigu woowuuma

20Oxeexelo, yeettaka hiihaale, yaahoona mwiri wa efiigu wuumaleene okhuma mikwankhwaarisaya. 21Uupuwelelaka Pedru, aamweerela Yeesu: “Muhusiha, moone! Mwiri wa efiigu mwalamphaanyu, wohuuma!” 22Yeesu aamwaakhula: “Munroromele Muluku. 23Kinoororomelihani weera mukina eerela mwaako ola: ‘Mvenye ni mwiivonyere mphareiyani,’ ni owo aahihovela mmurimanimwawe, mene aroromela weera sinimweereiya seiyo aahimaawe, hiiho nsimweereele. 24Tivawo, kinooleelani: sootheene mumvekelaanyu munivekeloni, muroromele weera mohaakhela, ni hiiho mmwivahiwe. 25Mwaavekelaka, mwakhalano mulattu ni mukina, munlevelele weeratho Atiithi ari wiirimu yooleveleleni sootthekasanyu.

Yookoha mwaha wa ikuru sa Yeesu

27Yaaphiyatho oYerusaleemu. Aviraka Yeesu Empa ya Muluku, yaamwaattamela Yoowo ahooleli a asaserdoti*, anamawera a nlamulo* ni asitokweene a muloko, ni yaamukoha: 28“Ni ikuru heeni mumpakaanyu itthu iya? Ni taani yoovangheni ikuru weera mpake iya?” 29Yeesu aawaakhula: “Miyotho kinimookohani etthu: Mukaakhule, ni kinimooleelani ni ikuru heeni kimpakelaaka itthu iya. 30Opatiso wa Yohaane waari wa wiirimu, hoye hoye wa atthu? Mukileele!” 31Awo yaavaanyihana yaaworu, yeeraka: “Neera ‘wa wiirimu,’ Owo onoonikoha: ‘Vano, heeni mwahaamuroromenlaanyu yoowo?’ 32Vanonto, neera: ‘wa atthu…’” Awo yoova muloko wa atthu niwoko ootheene yaamweerela vekhaikhai weera Yohaane aari mprofeeti. 33Awo yaamwaakhula Yeesu: “Khanisuwenle.” Vano Yeesu aaweerela: “Hata Miyo nkinooleelani ni ikuru heeni kimpakelaaka itthu iya.”

Currently Selected:

Marku 11: VMK2021

Highlight

Copy