Marku 10

Mwaha wa omwalana

1Vano Yeesu aavenya vaavaale ni aarowa wa elapo ya oGalileiya ni okhopela wa oYordanu. Yaahoowatho atthu ancipale wa Yoowo, ni ntoko aakhovelenlaawe, Owo aahaaxuttiha. 2Akina a aFarisi* yaamwaattamela Yoowo weera emweerere, emukohaka: “Enootthuniheriwa wa mulopwana omwalana ni mwaariye?” 3Yeesu aahaakoha: “Eheeni Moisesi oolamulenlaaweni?” 4Awo yaamwaakhula: “Moisesi aatthunihera weera mulopwana amvahe ekaratta ya omwalana ni amoomoleke mwaariye.” 5Yeesu aawaakhula: “Moisesi aalempe nlamulo nne niwoko na murimaanyu woowuuma. 6Ompacereronitho wa ephattuwelo, Muluku aampaka mulopwana ni muthiyana. 7Niwoko na yeeyo mulopwana anaahiye atithawe ni amayawe ni anaathukumane ni mwaariye, 8ni ooweeli awo eniithatuwe mmoha paahi. Hiiho awo khaahiyono eeli, mene mmoha paahi. 9Tivawo yaawo Muluku aathukumannyaawe, ahikhale mukina aneera aamwaramwaxe.” 10Areenetho owaani, oohusera yaamukohakoha Yeesu mwaha wa yeeyo. 11Owo aawaakhula: “Khula mulopwana ommwalana ni mwaariye ni onthelana ni muthiyana mukina, anaamuraruwele muthiyana yoole oopacera, 12ni muthiyana amwalana ni iyawe ni atheliwa ni mulopwana mukina, anaararuwetho.

Yeesu ni anamwane

13Akina yaangwiihera Yeesu anamwane weera aatave, mene oohusera yaahaahiiha. 14Oonaka yeeyo, Yeesu aanyoonyiwa ni aaweerela: “Mwaahiyeke anamwane eweeke wa Miyo, ni muhiwooceelihe, niwoko omwene wa Muluku ori wa yaale anlikana ntoko yaawo. 15Miyo kinooleelani ekhaikhai: Yoowo ohinaakhela omwene wa Muluku ntoko mwaana, khanrowa ovolowa moomweneni.” 16Vahoolowaya, aahaakhubaara anamwane, anawiikaathera matata anaareeliha.

Yeesu ni namapuha

17Yeesu eeraka avenye, mulopwana mmoha aamutthimakela Yoowo, anamukokhorela anamukoha: “Muhusiha ooreera, kipakeke eheeni weera kiphwanye okumi woohimala?” 18Yeesu aamwaakhula: “Heeni nyuwo munkiitthanaanyu ‘ooreera’? Khaawo ooreera mukina, ahikhanle mmoha paahi, ori Muluku. 19Nyuwo moosuwela malamulo: Muhiive, muhiraruwe, muhiiye, muhoothe, muhilokotthe, mwaattittimihe atithinyu ni amayinyu.” 20Vano owo aahima: “Muhusiha, ootheene ala kiniiwelela okhuma enamwanaaka.” 21Yeesu aamuweha, aamusivela ni aamweerela: “Yohoohaleelani etthu emoha paahi. Murowe, mwathumihe sootheene murinaanyu, mwaavahe seiyo oohaawa, ni mmwikhaleno muhakhu wiirimu. Vahoolowaya, ngwe ni mukitthare.” 22Iiwalaawe yeeyo, aathananaxa ni aasusa oohihakalala, niwoko aakhalano mihakhu sincipale. 23Yeesu aaweha mukhwipimwawe ni aaweerela oohuseraawe: “Ti woorikaxa anamapuha ovolowa moomweneni wa Muluku!” 24Oohusera yaatikhina ni masu ala. Yeesutho aaphitela eeraka: “Anamwane, ti woorikaxa ovolowa moomweneni wa Muluku. 25Ti wookhweiya ekamelu* ovira vamwiitheni wa singano, ohikhanle namapuha ovolowa moomweneni wa Muluku.” 26Oohusera yaatepaxa otikhina, ni yaakohana: “Vamwaheene yoola, taani aneera avuluxiwe?” 27Yeesu aahaaweha yaawo ni aahaakhula: “Wa mutthu khoongwereya, mene wa Muluku hoye! Itthu sootheene sinoowereya wa Muluku.” 28Vano Pedru aamweerela: “Hiyo noohiya sootheene ni nohoottharani.” 29Yeesu aamwaakhula: “Miyo kinooleelani ekhaikhai: ootheene ahiyale empaaya, axunnaya, axirokoraya, amayaya, atithaya, anamwanaaya ni imattasaya mwaha wa Miyo ni wa masu ooreeraxa, 30eniyaakhele hata ehuhu ya vaanaano vaava imaara ncira sa impa, axunna, axirokora, amaayi, anamwane ni imatta, ni vamoha ni seiya osoondiwa. Vano mweehuhuni mwa muhoolo eniyaakhele okumi woohimala. 31Wa soothesene: ancipale ari oopacera eniikhale oomalihera, ni oomalihera oopacera.”

Yeesu onuulumatho sa okhwawawe ni ovenyererawawe

32Awo yaarowa oYerusaleemu, ni Yeesu aahoolela. Oohusera yaatikhina, ni yaawo yaamutthara yaahoova. Owo aawiitthanatho muloko neeli vakhwipi, ni aahaaleela yeeyo yeera emukhumelele. 33Owo aaweerela: “Hiyo nneera nirowaka oYerusaleemu, ni Mwaana a mutthu anaavahereriwe wa ahooleli a asaserdoti* ni anamawera a nlamulo*. Awo eniimuthorihele okhwa ni eniimvaherere wa amalapo, 34mwa yaawo eniimveihe, eniimusenyele, eniingwaxule, ni eniimwiive. Yaamalaka mahuku mararu, anaavenyerere.”

Nivekelo na Yakobe ni Yohaane

35Vano Yakobe ni Yohaane, anamwane a Zebedeyo, yaamwaattamela Yoowo, yeeraka: “Muhusiha, nintthuna weera munipakele yeeyo nneeraahu noovekeleni.” 36Yeesu aahaakoha: “Muntthuna eheeni weera Miyo koopakeleni?” 37Awo yaamwaakhula: “Munitthunihere weera moovuwanimwanyu, hiyo nakilaathi mmoha moonowaanyu mulopwana ni mukina muthiyana.” 38Yeesu aaweerela: “Khamusuwenle yeeyo mumvekelaanyu. Munoowera owura ekoomixi kingwuraaka, hoye hoye opatisiwa ni opatiso Miyo kimpatisiwaaka?” 39“Ninoowera,” awo yaamwaakhula. Vano Yeesu aaweerela: “Nyuwo mmwiwure ekoomixi kingwuraaka, ni mmwipatisiwe ni opatiso Miyo kimpatisiwaaka. 40Okilaathitho moonowaaka mulopwana, hoye hoye muthiyana, nkihiyono Miyo kinlamula. Mapuro ala ari awaya yaale areherereliwe.” 41Akina muloko, yiiwalaaya itthu iye, yaamunyoonyeriwa Yakobe ni Yohaane. 42Yeesu aawiitthana ni aaweerela: “Nyuwo moosuwela weera yaale aniitthaniwa anamalamula a ilapo, anaalamula atthu a weiwo, ni asitokweenaaya anaanyeserera ni ikuru. 43Khoontthuneya hiiho ni nyuwo. Ohiyanawaya, yoowo ontthuna okhala mutokweene a variyariwanyu, ontthuneya weera akhale murumeiyaanyu. 44Yoowo ontthuna okhala oopacera, ontthuneya weera akhale epottha ya ootheene. 45Hata Mwaana a mutthu khaaweenle weera arumeeliwe, mene aani arumeele, ni weera avaherere okumaawe ntoko yoowoopola ancipale.”

Bartimeyo oohoona onimoona

46Vano yaaphiya oYeriko. Yeesu ni oohuseraawe nitho atthu ancipale akhumaka musidade, Bartimeyo, mwaana a Timaiyo, aari oohoona, eera akilaantheene mukerekhere wa musewe, avekelaka soovaha. 47Iiwalaawe weera aari Yeesu muNasarete, aapacera okhuwela: “Yeesu, mwaana a Davide, mukimorele ikharari!” 48Ancipale yaamuhiiha weera amaale, mene owo aatepa okhuwela: “Mwaana a Davide, mukimorele ikharari”! 49Yeesu aaheemela ni aaheera: “Mmwiitthane owo.” Ni yaamwiitthana mutthu oohoona emweerelaka: “Mulipihe murima! Muvenyeke, Owo onoowiitthanani.” 50Avonyeraka malayaawe okhwipi, aaheemela atuphaka ni aarowa wa Yeesu. 51Vano Yeesu aamukoha: “Eheeni muntthunaanyu weera Miyo koopakeleni?” Mutthu oohoona aamwaakhula: “Muhusiha, miyo kintthuna woona.” 52“Muroweke,” Yeesu aamweerela, “nroromelonanyu nohoolamihani.” Woowaakuveya aalama oohoona, ni aamutthara Yeesu mphironi.

Currently Selected:

Marku 10: VMK2021

Highlight

Copy