Matheyo 19

Sa omwalana

1Amalihaka ohima itthu seiye, Yeesu aavenya oGalileiya ni aarowa elapo ya oYudeiya, okhopela wa oYordanu. 2Atthu ancipale yaamutthara, ni Owo aahaalamiha weiwe. 3aFarisi* akina yaamwaattamela Yoowo weera emweerere. Yaamukoha: “Enootthunihereiya wa mutthu omuhiya mwaarawe mwaha wa wakhalaru mulattu?” 4Owo aawaakhula: “Nyuwo khamusomme weera ompacereroni, Mpattuxa aampaka mulopwana ni muthiyana? 5Owo eenre: ‘Tivawo, mulopwana anaahiye atithawe ni amayawe, ni anaakhale vamoha ni mwaarawe, ni ooweeli eniikhale erutthu emoha.’ 6Hiiho, khaakhanle eeli, mene vekhaikhai erutthu emoha paahi. Tivawo, yaawo Muluku aakhalinghaawe vamoha, mutthu ahaamwalanyihe!” 7Awo yaamukoha: “Vano, niwoko heeni Moisesi aalamunlaawe weera mulopwana amvaheke ekaratta ya omwalana wa muthiyana ni amoomoleke?” 8Yeesu aawaakhula: “Moisesi aahootthuniherani omwalana ni axaarinyu niwoko na mirimasanyu soowuuma. Khawaakhanletho hiiho okhuma ompacereroni. 9Miyo kinooleelani weera khula mulopwana ommwalana ni mwaariye, ohikhanle mwaha wa oraruwa, anamuthela muthiyana mukina, onooraruwano.” 10Oohusera yaamweerela: “Waari hiiho nyaha sa mulopwana ni mwaariye, fataari ohithela.” 11Yeesu aawaakhula: “Khaahiyono ootheene angwera waakhela masu ala, mene yaawo paahi avahiwe yeeyo. 12Akina ari inoko* niwoko ayariwe hiiho. Akina apakiwe hiiho ni atthu, akinatho yiipakiye yeeyo niwoko na omwene wa wiirimu. Yoowo ongwera waakhela yeeyo, aakhele.”

Yeesu ni anamwane

13Vahoolowaya yaangwiihera anamwane Yeesu weera awiiyaathere matataawe ni aavekelele yaawo. Oohuseratho yahaahiiha ni masu. 14Yeesu aaweerela: “Mwaahiye anamwane awo erwe wa Miyo ni muhiwooceelihe, niwoko omwene wa wiirimu ti wawaya yaawo anlikana ntoko ala.” 15Aatavakaru, aavenya vaavaale.

Yeesu ni namapuha

16Vano mukina aamwaattamela Yeesu ni aamukoha: “Muhusiha, kipake eheeni yooreera weera kiphwanye okumi woohimala?” 17Yeesu aamwaakhula: “Heeni munkikohaanyu ya yooreera? Ori mmoha paahi ooreera. Mwatthuna ovolowa mookumini woohimala, mwiiwelele malamulo.” 18“Taavi?” aamukoha. Yeesu aamwaakhula: “Muhiive, muhiraruwe, muhiiye, muhoothe, 19mwaattittimihe atithinyu ni amayinyu,” ni “munsivele mukhwiinyu ntoko muniisivelaanyu.” 20Mmiravo aamweerela: “Ootheene awo miyo kinniiwelela. Enkihaleelatho eheeni?” 21Yeesu aamwaakhula: “Mwatthuna okhala ookwanela, murowe, mwathumihe sooreelasanyu ni mwaavahe oohaawa, ni mmwikhaleno etthu yooreeraxa wiirimu. Vahoolowaya, ngwe ni mukitthare.” 22Iiwalaawe yeeyo, mmiravo ole aasusa ahihakalalaka, niwoko aakhalano itthu sincipale sooreeraxa. 23Vano Yeesu aaweerela oohusera: “Miyo kinooleelani ekhaikhai: ti woorika namapuha ovolowa moomweneni wa wiirimu. 24Ni kinooleelanitho: ti wookhweiya ekamelu* ovolowa vamwiitheni wa singano, ohikhanle namapuha ovolowa moomweneni wa wiirimu.” 25Woowiiwa yeeyo, oohusera yaatikhinaxa ni yaamukoha: “Wa mwaheene yoola, taani aneera awere ovuluxiwa?” 26Yeesu aahaaweha yaawo ni aawaakhula: “Wa mutthu khoongwereya, mene wa Muluku itthu sootheene sinoowereya.” 27Pedru aamwaakhula: “Hiyo noohiya sootheene weera nootthareeni. Nnaakhele eheeni?” 28Yeesu aaweerela: "Miyo kinooleelani ekhaikhai: mweehuhuni enyowani engwa, Mwaana a mutthu akilaathiyeene vahiceni ya ovuwa, nyuwo mukitthanre mmwikilaathi vahiceni muloko ni piili weera muthorihe ipuumba* muloko ni piili sa oYixrayeli. 29Ni ootheene ahiyale impasaya, axunnaya, axirokoraya, asitithaya, asimayaya, anamwanaaya, hoye hoye imattasaya niwoko na Nsinanaka, eniyaakhele seiyo imaara ncira, ni eniiphwanyetho okumi woohimala. 30Wa soothesene, ancipale oopacera eniikhale oomalihera ni ancipale oomalihera, eniikhale oopacera.”

Currently Selected:

Matheyo 19: VMK2021

Highlight

Copy