Matheyo 20

Yoolikanyiha ya anamiteko a ematta ya iwuuva*

1Vano, omwene wa wiirimu ori ntoko mwaneene aavennye ohinaxe arowaka owaasa anamiteko wa emattaawe ya iwuuva*. 2Owo aahiiwanana waaliva edinaariyu* emoha vanihukuni, ni aahaalamula wa emattaawe ya iwuuva*. 3Siviraka iwoora tthaaru, owo aavenya veeli ni aawoona omerekadu akina yahaavara muteko. 4Aaweerela: ‘Murowetho, mwavare muteko mmattamwaka ya iwuuva*, ni miyo kinimoolivani yeeyo eri yootthuneya.’ 5Ni awo yaarowa. Aavenyatho nsuwa vamuru, nitho oxekuwa apakaka mooteene yoowo. 6Avenyaka iwoora muloko niithannapiili, aahaaphwanya akinatho yahaavanre muteko, ni aahaakoha: ‘Niwoko heeni nyuwo muhimvaraanyu muteko nsuwa nootheene?’ 7Awo yaamwaakhula: ‘Niwoko khaawo onilempe muteko.’ Vano, aaweerela: ‘Muroweke nyuwotho mmattamwaka ya iwuuva*.’ 8Wiilalaaya, mwaneene a ematta ya iwuuva* aamweerela namaawehaweha anamiteko: ‘Ngwiitthane anamiteko, ni mwaalive mwaapaceraka oomalihera olepiwa mpaka ophiyera oopacera.’ 9Yaahoowa anamiteko ale yaalempwe muteko iwoora muloko niithannapiili sooxekuwa, ni aahaakhela mutthu ti mutthu edinaariyu* emoha. 10Yaaphiyalaaya ale yaapacenre olempwa, yuupuwela weera animwaandyeereriwa musurukhu. Mene khula mutthu a yaale aahaakhelatho edinaariyu* emoha. 11Yaakhelakaru, yaapacera omuttaandawula mwaneene a ematta ya iwuuva* 12emweerelaka: ‘Alopwana awo oomalihera olempwa avanre muteko ewoora emoha paahi, ni apwiya munaalikanxa ni hiyo nivilenle olemela wa muteko ni oviha wa nihuku.’ 13Vano owo aamwaakhula mmoha a yaawo eeraka: ‘Nthamwene, miyo nkinoopakela weyo yeeyo eri yoonanara. Weyo khaniiwananne ovara muteko wa edinaariyu* emoha? 14Waakhele yeeyo eri yawawo ni oroweke. Miyo kintthuna waavaha yaawo oomalihera olempwa ntoko yeeyo miyo koovanghaaka. 15Nkiphwanenle soovarela yeeyo kintthunaaka ni musurukhwaaka? Weyo nanrima niwoko nkinlipa mmatatanimwaka ni musurukhwaaka?’ 16Hiiho, oomalihera eniikhale oopacera, ni oopacera eniikhale oomalihera.”

Yeesu onuuluma veeli sa okhwawawe ni ovenyererawawe

17Arowaka oYerusaleemu, Yeesu aawiitthana vakhwipi oohusera muloko neeli ni aaweerela: 18“Ninrowa oYerusaleemu, ni Mwaana a mutthu anaavahereriwe wa ahooleli a asaserdoti* ni anamawera a nlamulo*. Awo eniimuthorihele okhwa 19ni eniimveleele wa amalapo weera emuramuse, engwaxule ni emukhomele vamuttandani. Vanihukuni nanaararu Owo anaavenyererihiwe!”

Nivekelo na maayi mmoha

20Vano yaamwaattamela Yeesu amayaya anamwane a Zebedeyo, ehooliwaka ni anamwanaaya, ni yaahuurama vahoolowawe weera emvekele etthu. 21Yeesu aamukoha: “Muntthuna eheeni nyuwo?” Awo yaamweerela: “Kinoovekelani weera, mwaaphiyaka moomwenenimwanyu, anamwanaaka ala eeli yakilaathi mmoha moonowaanyu mulopwana ni mukina moonowaanyu muthiyana.” 22Yeesu aaweerela: “Nyuwo khamusuwenle etthu mumvekelaanyu. Nyuwo munoowera owura ekoomixi eyo Miyo kineeraaka kiwure?” Awo yaamwaakhula: “Ninoowera.” 23Yeesu aaweerela: “Vekhaikhai nyuwo mmwiwure ekoomixaaka, okilaathitho moonowaaka mulopwana, naari muthiyana khoohiyono otthuniherawaka. Mapuroweene yaawo ari a yaawo Atithaka yaarehererenlaaya.” 24Yiiwalaaya yeeyo muloko akina, yaahaanyoonyeriwa axunna eeli ale. 25Yeesu aawiitthana ni aaweerela: “Moosuwela weera anamalamula a ilapo animwaalamula, ni asitokweenaaya animwaalamula ni ikuru atthu ale a ilapo. 26Ohikhale hiihaawo variyariwanyu. Ohiyanawaya, yoole ontthuna okhala mutokweene variyariwanyu, akhaleke murumeiyaanyu, 27ni yoole ontthuna okhala oopacera, akhaleke epotthaanyu. 28Hiihotho Mwaana a mutthu khaaweenle orumeeliwa, mene weera arumeele, ni aveleele okumaawe ntoko yoowoopola ancipale.

Olamihiwa wa atthu eeli oohoona

29Woovenyani oYeriko, atthu ancipale yaamutthara Yeesu. 30Vano, atthu eeli oohoona yaakilaathi mukerekhere musewe. Yiiwalaaya weera Yeesu eera aviraka, yaapacera okhuwela, yeeraka: “Apwiya, Mwaana a Davide, munimorele ikharari hiyo!” 31Muloko wa atthu waaheerera waahiiha, mene awo yannapwaherera okhuwela: “Apwiya, Mwaana a Davide, munimorele ikharari hiyo!” 32Yeesu, eemelaka, aawiitthana ni aahaakoha: “Eheeni muntthunaanyu woopakani Miyo?” 33Yaamwaakhula: “Apwiya, hiyo nintthuna weera ehuleiye maithwaahu.” 34Yeesu aahaamorela ikharari ni aatava maithwaaya. Woowaakuveya yaawera woona ni yaamutthara.

Currently Selected:

Matheyo 20: VMK2021

Highlight

Copy