Matheyo 16

aFarisi* ni aSaduki* amvekela eneneero

1Afarasi* ni aSaduki* yaamwaattamela Yeesu ni yaapacera omweerera, emvekelaka weera awoonihere eneneero ya wiirimu. 2Vano Yeesu aawaakhula: “Oxekuwa waawaaka, nyuwo muneera: ‘Enookhala ehuhu yooreera, niwoko erimu eri yooxeera’ 3ni ohinaxe muneera: ‘Olelo eniikhale epheyo etokotoko niwoko erimu eri yooxeera ni yoosareya mahutte.’ Nyuwo moosuwela otaphulela ineneero sa wiirimu, mene khamusuwenle otaphulela ineneero sa ihuhu! 4Ekhapira yoonanara ni yooraruwa emvekela eneneero yootikhiniheiya, mene kheemvahiwa naari eneneero emoha, ehikhanle eneneero ya Yoonasi!” Vano Yeesu aavenya, aahiyaka ale vaavaale.

Eferementu ya aFarisi* ni aSaduki*

5Oohusera erowaka okhopela wa ephareiya, yaattiwala okuxa ipaawu. 6Yeesu aaweerela: “Mukhale oowehaweha ni mwiipasoope ni eferementu ya afarasi* ni aSaduki*.” 7Ni awo yaaheerelana yaaworu yeeraka: “Niwoko khaniruuhale ipaawu.” 8Iiwaka wuulumawaya, Yeesu aahaakoha: “Asilopwana a nroromelo vakhaani! Niwoko heeni nyuwo munuulumaanyu mwaha muhikhalannaanyu ipaawu? 9Nlelo khamuniiwexexa? Khamunuupuwelela ipaawu ithanu wa atthu macira miloko mithanu ni mipapara mihayi mwaattottannyaanyu? 10Hata ipaawu ithannapiili wa atthu macira miloko mixexe ni mipapara mihayi mwaattottannyaanyu? 11Niwoko heeni nyuwo muhiiwexenxaanyu weera khayaahiyono ya epaawu Miyo kihimmaaka! Mwiipasoopetho ni eferementu ya aFarisi* ni aSaduki*.” 12Vano yaahiiwexexa weera Owo khaahima wiipasoopa ni eferementu ya ipaawu, mene ni nihusiho na afarasi* ni aSaduki*.

Olapa wa Pedru

13Yeesu aphiyaka elapo ya oSesareya wa oFilipi, aahaakoha oohuseraawe: “Atthu aneera, Mwaana a mutthu ori taani?” 14Awo yaamwaakhula: “Akina aneera Yohaane mpatisa, akina Eliya, ni akinatho Yeremiya, hoye hoye mprofeeti mmoha.” 15Yeesu aahaakoha: “Ankha nyuwo – munkeera Miyo taani?” 16Simeyoni Pedru aamwaakhula: “Nyuwo ti Kristu, Mwaana a Muluku Mukumi.” 17Yeesu aamwaakhula: “Ooreelihiwa ti nyuwo Simeyoni, mwaana a Yoonasi, niwoko yeeyo khamuleeliwe ni mutthu, mene ni Atithaka ari wiirimu. 18Ni Miyo kinooleelani weera nyuwo ti Pedru, ni vanlukuni nna kinooteka ekerexaaka, ni milako sa oHadesi* khasirwa siwera owina ekerexa ela. 19Miyo nkoovaheeni ixaavi sa omwene wa wiirimu. Yeeyo muneeraanyu mutthuke vathi, eniitthukiwetho wiirimu, ni yeeyo muneeraanyu mutaphule vathi, eniitaphuliwetho wiirimu.” 20Vano aawooperera oohuseraawe weera ehimuleele naari mutthu mmoha weera Owo ti Kristu.

Yeesu onuuluma sa okhwawawe ni ovenyererawawe

21Okhuma ehuhuweene yeele Yeesu aapacera waathalihera oohuseraawe weera waatthuneya orowa oYerusaleemu ni ohaawa itthu sincipale niwoko na asitokweene, ahooleli a asaserdoti*, ni anamawera a nlamulo*, nitho okhwa ni ovenyerera nihuku nanaararu. 22Pedru amwiitthanaka Yeesu okhwipi, aapacera omooperera: “Hoye Apwiya! Iyo khasiweereelani!” 23Yeesu aarukunuwa ni aamweerela Pedru: “Osuseke wa miyo, Satana! Weyo ti nluku ninkikwattula, ni khoonuupuwela itthu sa Muluku, mene sa atthu.” 24Vano Yeesu aaweerela oohuseraawe: “Akhala mukina ontthuna okitthara Miyo, iikhootte muneenaawe, akuxe muttandaawe ni akitthare. 25Yoowo ontthuna ovuluxa okumaawe, anaayeleele, mene yoowo ongyeleela okumaawe niwoko na Miyo, anaaphwanye. 26Yooreera heeni mutthu ophwanya elapo yootheene ya vathi, ayeleelakatho okumaawe? Hoye hoye anaavahe eheeni mutthu yoowaakakhanyiha ni okumaawe? 27Mwaana a mutthu anaawe moovuwani wa Atithawe ni andyelowaaya, ni anaamutthuvele khula mutthu wa yeeyo owo opankaawe. 28Miyo kinoororomelihani weera akina ari va, khaanrowa okhwa ehinaaye omoona Mwaana a mutthu awaaka moomwenenimwawe.”

Currently Selected:

Matheyo 16: VMK2021

Highlight

Copy