Matheyo 15

Yeesu ni ekhovelelo ya aYuda

1Vano afarasi* akina ni anamawera a nlamulo* akina erweelaka oYerusaleemu yaarowa wa Yeesu ni yaamukoha: 2“Heeni oohuseraanyu ahiniiwelelaaya ekhovelelo ya asitokweene? Vano, khaannyawa matata ehinaaye oca.” 3Yeesu aahaakhula: “Ni heeni nyuwo muhiniiwelelaanyu nlamulo na Muluku niwoko na ekhovelelowaanyu? 4Vano Muluku eenre: ‘Mwaattittimihe atithinyu ni amayinyu,’ ni ‘yaawo anaalapha atithaya, hoye hoye amayaya, eniithorihiheliwe okhwa.’ 5Mukinatho aweerela atithawe, hoye hoye amayawe: ‘Sakhalaru sookhavihera nyuwo muneeraanyu mwaakhele wa miyo, ti yamahala yoovahiwa wa Muluku.’ 6Apaka yeeyo, nyuwo munnaakhulela weera owo khanyesererihiwa waattittimiha atithawe mooteene yoola. Hiiho nyuwo munkhootta masu a Muluku niwoko na ekhovelelowaanyu. 7Anamwiixeera! Yesaya aahuuluma nnenesene sa nyuwo eeraka: 8‘Muloko ola onkittittimiha ni eyano paahi, mene mirimasaya siri ottaiwene wa Miyo. 9Ankittottopela siiyoweene. Oxuttihawaaya ti ikano sooxuttihiwa ni atthu.’” 10Yeesu aawiitthana atthu ancipale vamoha ni Yoowo ni aaweerela: “Mwiiwe ni mwiiwexexe! 11Kheehiyono yeeyo emvolowa mmwaano enimunanariha mutthu, mene yeeyo enkhuma mmwaano.” 12Vano oohuseraawe yaamwaattamela ni yaamukoha: “Moosuwela weera afarasi* yaari oonyoonyiweene yiiwalaaya yeeyo?” 13Yeesu aawaakhula: “Mwiri wootheene Atithaka a wiirimu ahiphatteiyaaya, onuupheliwe ni mikwankhwaarisaya. 14Mwaahiye, awo ari ahooleli oohoona. Oohoona mmoha amweettiha oohoona mukina, ooweeli anoomorela mulittini.” 15Vano Pedru aamvekela: “Munithalihere yoolikanyiha ela.” 16Yeesu aawaakhula: “Weeraka nlelo nyuwo khamuniiwexexa?” 17Khamuniiwexexa weera yeeyo emvolowa mmwaano enrowa munipwiipwini ni vahoolowaya enooriheliwa mucumbusini? 18Itthutho sinkhuma mmwaano sinrweela mmurimani, ni ti seiyo sinimunanariha mutthu. 19Vano, wa mmurimani sinkhumelelaaya soowuupuwela soonanara, wiiva, oraruwa, olavilavi, wiiya, wootha ni waapa. 20Itthusene seiya sinimunanariha mutthu, mene oca woohinyawa khoonimunanariha mutthu.”

Nroromelo na muthiyana muKanaani

21Avenyaka nipuro nne, Yeesu aarowa elapo ya oTiro ni oSidoni. 22Muthiyana mmoha a oKanaani, owannyawe elapweene yeeyo, aahoorwa wa Yoowo akhuwelaka: “Apwiya, Mwaana a Davide, mukimorele ikharari! Mwanaka onnahaawa vancipale niwoko ookhalano munepa woonanara.” 23Yeesutho khaamwaakhunle. Vano oohuseraawe yaamwaattamela ni yaamudyoonttelela: “Mmoomole weera aroweke, niwoko ongwa akhuwelaka ottuliwahu!” 24Owo aawaakhula: “Miyo kirumiheliwe paahi ikhondoolo siriheiye sa oYixrayeli.” 25Muthiyana aahoorwa, aamukokhorela ni aamweerela: “Apwiya, mukikhavihere!” 26Owo aamwaakhula eeraka: “Khoonreera ovenxa yooca ya anamwane ni waavonyera alapwa.” 27Ole aamweerela: “Aani, Apwiya, mene mpaka alapwa animooca inyenyeeri simmora vameesa wa asineene a alapwa.” 28Yeesu aamwaakhula: “Muthiyana, ntokotoko nri nroromelonanyu. Okhale ntoko munghaawelaanyu.” Ni ehuhuweene yeele mwanawe aalamihiwa.

Yootikhiniha yanaaveeli ya ipaawu

29Yeesu aavenya vaavaale ni aarowa mukerekhere wa ephareiya ya oGalileiya. Aawela vamwaako mmoha ni aakilaathi. 30Atthu ancipale yaamwaattamela Yoowo, yaakuxaka atthu oorakala, oovulala, oohoona, oohuuluma ni ancipale akina, ni yaahaakilaathiha wa nyettoniwawe. Vano Owo aahaalamiha. 31Muloko wa atthu waatikhina waawoonnaaya oohuuluma yuulumaka, oovulala elammeene, oorakala yeettaka, ni oohoona yoonaka. Yaamuttottopela Muluku a oYixrayeli. 32Yeesu aawiitthana oohuseraawe eeraka: “Kinimwaamorela ikharari atthu ancipale ala, niwoko aakhala mahuku mararu vamoha ni Miyo ehicaaka. Nkintthuna owoomola ereene ni etala, niwoko eniikomoke mphironi.” 33Yaamwaakhula oohuseraawe: “Woowi nneeraahu niphwanye munikareni nna yooca yookwana waavaha atthu ancipale ala?” 34Yeesu aahaakoha: “Murino ipaawu ihayi?” Awo yaamwaakhula: “Ithannapiili, ni ihopa vakhaani” 35Yeesu aahaalamulela atthu ancipale weera ekilaathi vathi. 36Akuxaka ipaawu ithannapiili ni ihopa, aareeliha, anameiyanyiha ipaawu, anaavaha oohusera. Vano oohusera yaahaakawela atthu ancipale. 37Ootheene yaahooca ni yaavona, enattottanyiha oohusera mivithesene, soosareya mipapara mithannamiili. 38Yaale yaaciiye yaari asilopwana macira miloko mixexe, ehaalikeleliwaka athiyana, hoye hoye anamwane. 39Aalaxeraka atthu ancipale, Yeesu aavolowa munikulani ni aarowa elapo ya oMagada.

Currently Selected:

Matheyo 15: VMK2021

Highlight

Copy