Matheyo 17
17
Otatuxiwa vamwaakoni
1Amalihaka mahuku mathannamosa, Yeesu aamukuxa Pedru, Yakobe, ni Yohaane, munneiye Yakobe ni aahaarongha meekhaaya vamwaako woorakama. 2Vale Owo aatatuxiwa ohoolowaya. Ekhovaawe yaahaara ntoko nsuwa ni ikuwosawe saathatuwa sootteela ntoko waara. 3Wa ehuhuweene yeele yahiixoonihera ohoolowaya Moisesi ni Eliya, emutthekulakano Yeesu. 4Vano Pedru aamweerela Yeesu: “Apwiya, ti wooreera hiyo okhala vaava. Mwatthuna, kipake mikottha miraru: mmoha wawinyu, mukina wa Moisesi, ni mukinatho wa Eliya.” 5Alokololaka, nihutte nootteelaxa nahaakhuneela, ni mwa nenno naakhuma nsu nimoha neeraka: “Ola ti Mwanaka oosiveleyaxa. Owo onkisiveliha vancipale. Mmwiiwe Yoowo.” 6Yiiwaka yeeyo, oohusera yaahuuramela vathi ni yaahoova vancipale. 7Yeesutho aawaattamela ni aahaatava yaawo aawerelaka: “Muvenye, muhoove.” 8Awo ewehaka osulu, khayaawoonne akina, ahikhanle Yeesu paahi. 9Ekhuruwaka vamwaako, Yeesu aahaalamulela eeraka: “Muhaaleele akina yeeyo moonnaanyu mpaka Mwaana a mutthu aneeraawe avenyererihiwe mookhwaani.” 10Oohusera yaamukoha: “Niwoko heeni anamawera a nlamulo* aneeraaya weera ontthuneya aweeke toko Eliya?” 11Yeesu aawaakhula: “Ettiitthu, Eliya onimoowa ni anaareherere itthu sootheene. 12Mene Miyo kinooleelani weera Eliya aahoowa, ni yaawo khaamusuwenle yoowo, mene yaampakela sootheene yaatthunaaya. Mooteene yoowo Mwaana a mutthu anaahaawe mmatatanimwaya.” 13Vano oohusera yaahiiwexexa weera Owo uulumale sa Yohaane mpatisa.
Olamihiwa wa mmiravo aarino munepa woonanara
14Ephiyakaru yaaraaya atthu ancipale, mulopwana mmoha aamwaattamela Yeesu, anakokhora vahoolowawe, anamweerela: 15“Apwiya, mummorele ikharari mwanaka. Owo onnakomokasa ni onnahaawa vancipale. Imaara sincipale onnimorela mmooroni, hoye hoye mmaahini. 16Miyo kaangwiiha wa oohuseraanyu, mene awo khaawenre omulamiha.” 17Yeesu aahaakhula: “Ekhapira yoohiroromela ni yoonanara! Mpaka yaakhani kineeraaka kikhale ni nyuwo? Mpaka yaakhani kineeraaka koovileleni? Mukiruuhele mmiravo.” 18Yeesu aahiiha munepa woonanara. Owo waavenya wa mmiravo, ni okhuma ehuhuweene yeele mmiravo ole aalamihiwa. 19Vano oohusera yaamwaattamela Yeesu vakhwipi ni yaamukoha: “Nihiwerenle heeni woomola?” 20Owo aawaakhula: “Niwoko na nroromelo vakhaani nyuwo murinaanyu. Miyo kinooleelani vekhaikhai weera, mwakhalano nroromelo ntoko enuku ekhaani, munoowera weerela mwaako ola: ‘Muvenye vaava mpaka vale,’ ni ole onoorowa. Kheewo eneera ekhale yoohiwereya wa nyuwo! 22Awo ethukumanaka oGalileiya, Yeesu aaweerela: “Mwaana a mutthu anaavahereriwe mmatatani mwa atthu. 23Awo eniimwiive, ni nihuku nanaararu anaavenyerere.” Ni oohusera yaathanana vancipale.
Oliva musoko
24Yeesu ni oohuseraawe yaaphiyalaaya oKafarnawu, yaamwaattamela Pedru anamaliviha a musoko wa Empa ya Muluku, ni yaamukoha: “Muhusihaanyu khanliva musoko wa Empa ya Muluku?” 25Pedru aahaakhula: “Onooliva.” Avolowakaru Pedru mpaani, Yeesu aari oopacera omuulumano, amukohaka: “Munuupuwela hai Simeyoni? Wa taani mamwene a vathi anaakhelelaaya soovahiwa ni misoko: wa anamwanaaya, hoye hoye wa akina?” 26“Wa akina,” aamwaakhula Pedru. Yeesu aamweerela: “Vano, anamwane ari maneethi. 27Weeratho nihaakwattulihe yaawo, murowe ophareiya, mwavonyere nimeso, mwavenxe ehopa muneeraanyu mwapacere owarula, mwahule eyanowaaya ni mmwaphwanyemo nikhoobiri na indarama* ixexe. Mwakuxe nno ni mwakilivele Miyo ni mwiiliveletho nyuwo.”
Currently Selected:
Matheyo 17: VMK2021
Highlight
Share
Copy
Want to have your highlights saved across all your devices? Sign up or sign in
Makhua Shirima Bible © Christelike Lektuurmaatskappy NPC, 2021.
