Matheyo 10

Yeesu onaarumiha oohuseraawe

1Awiitthanaka oohuseraawe muloko neeli, aahaavaha ikuru soowoomola minepa soonanara ni soolamiha iretta ni ikwerere. 2Ala ari masina a arummwa muloko neeli: Simeyoni (iitthaniwa Pedru) ni munneiye Andreiya; Yakobe, mwaana a Zebedeyo, ni munneiye Yohaane; 3Filipe ni Bartolomeyo; Tomaxi ni Matheyo, namaliviha a musoko; Yakobe, mwaana a Alfeyu, ni Tadaiyo; 4Simeyoni nanthiti, ni Yudasi Iskariyoti, yoowo aamvarihale Yeesu. 5Yeesu aahaarumiha muloko neeli ni malamulo ala: “Muhirowe wa amalapo, naari muhivolowe esidade emoha ya aSamariya. 6Murowe toko wa ikhondoolo siriheiye sa oYixrayeli. 7Munrowaanyuwo, mwalaleiye mutthenga ola: ‘omwene wa wiirimu wookhuveela.’ 8Mwaalamihe aretta, mwaavenyererihe akhwiiye, mwaalamihe anamakokho, moomole minepa soonanara. Nyuwo mohaakhela ya mahala, vano muvahetho ya mahala. 9Muhikuxe itthu sooreeraxa mulaambanimwanyu; 10muhikuxe mirupa sa ekwaha, hata mikaandyo miili, naari ikwakwaatta, naari ttootto, niwoko namuteko omphwanela yoocaawe. 11Mwaaphiyaka musidade, hoye hoye mmuttettheni, mwamwaasaase mutthu oophwanela, ni mwakhale owannyawe mpaka opwaha. 12Mwaavolowaka mpaani, mwawuulumihe atthu ari mwemmo. 13Atthu a vaate yakhala oophwanela, murettelaanyu wakhale ni yaawo; yaahikhalatho, murettelaanyu woohokoleeleni nyuwo. 14Mukina aahiwaakhelelani, hata aahiiwa maswaanyu, mwatathe ntthupi na inaawosanyu mwaakhumaka vaatewawe, hoye hoye esidade eyo. 15Miyo kinooleelani ekhaikhai: vanihukuni na othorihiwa onuukhale ohaawa wootepaxa wa esidade eyo opwaha wa oSodoma ni oGomora. 16Miyo kinoorumihani ntoko ikhondoolo variyari wa miici. Tivawo, mukhale ni miruku ntoko inowa, ni oohikhalano milattu ntoko ikhunda. 17Mwiipasoope ni alopwana. Awo eniyooveleeleni wa alipa oowuuluma milattu ni eniyoowaxuleni muSinagoganimwaya*. 18Niwoko na Miyo, nyuwo mmwikuxiwe muronghiwaka vamaithoni wa maguvernadori ni mamwene, weera mwakhaleliwe onamoona wa yaawo ni wa amalapo. 19Yootthukani, muheeteteele moota, naari seiyo muneeraanyu muulume. Emaareene yeeyo mmwivahiwe nyuwo itthu soowuuluma, 20niwoko khamuhiyono nyuwo muneera muulume, mene Munepa wa Atithinyu oneera wuulume mwa nyuwo. 21Mutthu anaamvaherere munneiye weera iiviwe, ni atiithi mwanaya. Anamwane eniyaapittikuwele asinaangolo ni eniiwiive. 22Atthu ootheene eniyoothanyeeni niwoko na Miyo, mene yoowo anaavilele mpaka ommaleloni, anaavuluxiwe. 23Nyuwo yoosoondakani musidadeni emoha, mutthaweleke ekina. Miyo kinoororomelihani weera Mwaana a mutthu anaawe nyuwo muhinaaye ovira isidade sootheene sa oYixrayeli. 24Khaawo oohusera onimpwaha muhusihaawe, hata murumeiyi khanimpwaha yoowo onimurumeelaawe. 25Oohusera ori ntoko muhusihaawe paahi, ni murumeiyi ntoko yoowo onimurumeelaawe. Mwaneene vaate iitthaniwa Beelzebuli, wootepaxa atthu a emusaawe! 26Tivawo, muhiwoove yaawo. Itthu sootheene soowiipithiheiya nsooneiye, ni itthu sootheene sookhuneeliwa, nsisuwelihiwe. 27Yeeyo kinooleelaakani mpiphini, muulume ni waara wa othana, ni masu anaapiwa mmaaruni, mulaleiye mmapathoni. 28Muhiwoove yaawo aniiva erutthu, mene ehiweraka wiiva munepa. Mmoove toko Yoowo ongwera ophwata erutthu ni munepa mmooroni. 29Khaanthumihiwa masiri meeli ni nikhoobiri nimoha? Wa soothesene, khaawo mmoha a yaawo ommorela vathi ehisuwelaka Atithinyu. 30Mpaka mayihi a mmurumwanyu wootheene ari oowaalikeliwa. 31Vano, muhiwoove; nyuwo muri ootthuneyaxa opwaha masiri mancipale! 32Yoowo onkilapa Miyo variyari wa atthu, Miyo nkimuromoletho yoowo ohoolo wa Atithaka ari wiirimu. 33Vaheera yoowo onkikhootta Miyo variyari wa atthu, Miyo nkimukhoottetho ohoolo wa Atithaka ari wiirimu. 34Muhuupuwele weera kirweenle oruuha murettele vathi. Nkirweenle oruuha murettele, mene ekatana. 35Vano, kirweenle ohimwiiwananiha mwaana ni atithawe, mwaana ni amayawe, ootheliwa ni pwiyamwaanaawe, 36amwiittanaawe mutthu eniikhale yaawo a vaatevawe. 37Yoowo onaasivelaxa atithawe, hoye hoye amayawe wookipwaha Miyo, khakiphwanenle Miyo. Yoowo onaasivelaxa anamwanaawe wookipwaha Miyo, khakiphwanenle Miyo. 38Yoowo ohinkuxa muttandaawe ni ohinkitthara Miyo, khakiphwanenle Miyo. 39Yoowo onthokorora okumaawe, anaarihe yoowo, mene yoowo onriha okumaawe niwoko na Miyo, anaaphwanye yoowo. 40Yoowo ongwaakhelelani nyuwo, onkaakhelela Miyo, ni yoowo onkaakhelela, ongwaakhelela Yaawo akirumihale. 41Yoowo ommwaakhelela mprofeeti niwoko ori mprofeeti, anaakhele ntthuvelo na mprofeeti, ni yoowo ommwaakhelela mutthu oororomeleya niwoko ori oororomeleya, anaakhele ntthuvelo na mutthu oororomeleya. 42Yoowo anaavahe, hata ekhalaka ekoomixi ya maahi ooriira wa mmoha a asikhaani ala niwoko owo ori oohuseraaka, Miyo kinoororomelihani vekhaikhai weera owo anaakhele ntthuvelonawe.”

Currently Selected:

Matheyo 10: VMK2021

Highlight

Copy