Matheyo 9

Yeesu onimulamiha mutthu ooheetta

1Avolowaka Yeesu munikulani, aalapuwa ni aarowa osidade ya owannyawe. 2Atthu akina yaamuruuhela mutthu ooheetta aataleliweene munrepani. Oonaka Yeesu nroromelo yaakhalannaaya, aamweerela mutthu ooheetta: “Olipihe murimaawo mwanaka! Sootthekasawo sooleveleliwa.” 3Vahoolowaya, akina a anamawera a nlamulo* yaaheerelana: “Mulopwana ola onimuveiha Muluku!” 4Asuwelaka soowuupuwelasaya, Yeesu aaweerela: “Heeni munuupuwelaanyu soonanara mmirimanimwanyu? 5Eheeni yookhweya weera: ‘Sootthekasawo sooleveleliwa,’ hoye hoye ‘Weemele ni weette’? 6Weeratho musuwele weera Mwaana a mutthu ookhalano vathi ikuru soolevelela soottheka…,” vano aamweerela mutthu ooheetta: “Weemele, okuxe nrepanawo ni orowe owaani.” 7Owo aaheemela ni aarowa owaani. 8Yoonaka yeeyo, atthu ancipale yaahoova, ni yaamvuwiha Muluku aavanghe ikuru iye atthu.

Wiitthaniwa wa Matheyo

9Avenyaka vaavaale, Yeesu aamoona mutthu iitthaniwa Matheyo akilaantheene nipuro nne waaliviwa musoko, anamweerela: “Mukitthare.” Matheyo aaheemela anamutthara. 10Areene Yeesu owaani, yaarowa oca ni Yoowo vamoha ni oohuseraawe, anamaliviha a musoko ni anamattheka ancipale. 11Yoonaka yeeyo, aFarisi* yaahaakoha oohusera a Yeesu: “Heeni Muhusihaanyu oncaawe ni anamaliviha a musoko ni anamattheka?” 12Iiwalaawe yeeyo, Yeesu aaweerela: “Khaahiyono yaale ari ni okumi animuhaawela meediku, mene aani aretta. 13Murowe ni muupuwele etaphulelowaaya ela: ‘Kintthuna ikharari, sihikhanle sooveleela.’ Miyo nkaaweenle owiitthana atthu oororomeleya, mene anamattheka.”

Yeesu onkohakohiwa mwaha wa otthuka

14Vano oohusera a Yohaane yaahoowa omukoha: “Heeni hiyo ni aFarisi* nintthukaahu, mene oohuseraanyu naari?” 15Yeesu aawaakhula: “Khoongwereya weera oolattuliwa wa ootthomera okhala oohihakalala, ootthomera areene nlelo ni yaawo. Eniirwe mahuku ootthomera aneeraawe avenxiwe wa yaawo. Wa ehuhuweene yeeyo anootthuka. 16Khaawo onghela nipareyo nnyowani ekuwo ya khalayi, niwoko nipareyo nnaandyeerere waahula ekuwo ni waahuwa onootepa. 17Kheengheliwatho eviinyu enyowani mmirupani sa exapala ya khalayi. Apaka, mirupa nsithaale ni eviinyu eniiriheye, ni mirupa nsinanare. Ohiyanawaya, engheliwa eviinyu enyowani mmirupani sinyowani, ni hiiho sootheene sinoothokororeya.”

Ikuru sa Yeesu ni iretta ni okhwa

18Aalokololaawe yeeyo, aaphiya muhooleli mmoha. Aamukokhorela ohoolowawe eeraka: “Mwanaka ohookhwa vaanaano va. Ngwe ni muntave ni matataanyu, ni owo anaakhale ni okumi.” 19Yeesu aaheemela ni aarowa ni yoowo, nitho oohuseraawe yaarowa. 20Mwa yeeyo muthiyana mmoha aamanle iyaakha muloko ni piili ahaawaka mweerutthunimwawe ekhumaka ephome, aaphiya ottuli wa Yeesu ni aatava nleembe na ikuwo aawanraawe. 21Vano owo aahiixeerela: “Miyo katava soowarasawe, nkilamihiwe.” 22Arukunuwaka, Yeesu aamoona muthiyana ni aamweerela: “Olipihere murima, mwaana muthiyana, nroromelonawo nohoolamiha.” Wookhuma ehuhuweene yeele, muthiyana aalama. 23Aphiyaka owannyawe muhooleli ni awoonaka alipa aampetta ni atthu ancipale yiinlaka, 24Yeesu aaweerela: “Mpwaheke! Mwaana khakhwiiye, mene onookona.” Vanonto awo yaamutheiya. 25Vano, aasusihalaawe atthu, Yeesu aavolowa ni aamutava mwaana ni matataawe, ni owo aaheemela. 26Masu a sooweereiya yaamwaramwaxeya mweelaponi yootheene ele.

Olama wa atthu eeli oohoona ni mutthu oohuuluma

27Yesu avenyaka vaavaale, atthu eeli oohoona yaamutthara, ekhuwelaka: “Munimorele ikharari hiyo, Mwaana a Davide!” 28Avolowaka Yeesu mpaani, atthu oohoona yaamwaattamela, ni Yeesu aahaakoha: “Nyuwo munoororomela weera Miyo kinoowera opaka yeeyo?” Awo yaamwaakhula: “Aani, Apwiya!” 29Ni Owo atavaka maithwaaya aaweerela: “Okhale ntoko muroromenlaanyu!” 30Ni oohoona ooweeli yaahoona. Yeesu aahaaleela nnenesene: “Mwiipasoope weera ehikhale akina eneera esuwele yeeyo.” 31Wa soothesene, awo yaavenya ni yaamwaramwaxa masu mweelaponi yootheene ele. 32Evenyaka ale, aaronghiwa wa Yeesu mutthu oohuuluma aarino munepa woonanara. 33Munepa woonanara woomoliwaaya, oohuuluma aapacera wuuluma. Atthu ancipale yaatikhina yeeraka: “Kheenooniwe etthu yoolikana ela oYixrayeli.” 34Vaheera aFarisi* yaaheera: “Ti ni ikuru sa mutokweene a minepa soonanara ole onoomolaawe minepa soonanara.”

Anamiteko ari vakhaani

35Yeesu anneetteetta isidade ni mittetthe sootheene, axuttihaka muSinagogani*, alaleiyaka masu ooreeraxa a omwene, ni alamihaka ikwerere ni iretta sootheene. 36Awoonaka atthu ancipale, Yeesu aahaamorela ikharari yaawo, niwoko yaakhala oohooxiwa ni oovololeene ntoko ikhondoolo soohikhalano mukukhuli. 37Vano aaweerela oohuseraawe: “Sookhala soohepha sincipale, mene anamiteko ari vakhaani. 38Mumvekele muneene a soohepha weera aarumihele atthu akina soohephasawe.

Currently Selected:

Matheyo 9: VMK2021

Highlight

Copy