Luuka 4

Weereriwa wa Yeesu

1Yeesu, aasareya ni Munepa Wootteela, aahokolowa oYordanu ni aakuxiwa ni Munepa Wootteela aronghiwaka onikareni, 2weiwo eereriwaawe ni Diyabu* wa mahuku miloko mixexe. Wa ehuhuweene yeele khaaciiye naari etthu, ni amalihaka mahukweene yaale, aavoliwa etala. 3Vano Diyabu* aamweerela: “Weyo waari Mwaana a Muluku, olamule nluku nna weera nithatuwe yooca.” 4Yeesu aamwaakhula: “Yoolempwa: ‘Mutthu khankhala ni okumi niwoko na yooca paahi.” 5Diyabu* aamukuxa Yeesu amuronghaka vanipuroni noorakama vancipale na osulu, ni aamoonihera khuluwi omwene wootheene wa elapo ya vathi 6amweerelaka: “Kinimoovaha ovuwa wootheene ni ikuru sootheene sa omwene ole wootheene, niwoko wootheene akivanghaaya miyo, ni miyo kinoomvaha wa yoole kineeraaka kimutthune. 7Vano, Weyo wakilapa, wootheene onuukhale wawawo.” 8Yeesu aamwaakhula: “Yoolempwa: ‘Mwaalape Apwiya Mulukwaanyu ni mwaarumeele Yaawo paahi.’” 9Diyabu* aamukuxa Yoowo amuroghaka oYerusaleemu ni aamwiikaathi vanankatthani a Empa ya Muluku, anamweerela: “Waari Mwaana a Muluku, wiivonyere vathi va, 10niwoko yoolempwa: ‘Owo anaalamule andyelowaawe mwaha wa Weyo weera yoothokorore. 11Awo eniyoovarele mmatatanimwaya weera ohikwattuliwe ni maluku.’” 12Yeesu aamwaakhula: “Yoolempwatho: ‘Muhiweerere Apwiya Mulukwaanyu.’” 13Amalihaka sooweerera sootheene seiye, Diyabu* aamuhiya mpaka ehuhu yootthuneya.

Yeesu onkhoottiwa oNasarete

14Yeesu aahokoleela oGalileiya mukuruni sa Munepa, ni epilaawe yaamwaramwaxeiya mweelaponi yootheene ele. 15Annaxuttiha muSinagogani*, attottopeliwaka ni ootheene. 16Owo aarowa oNasarete weiwo unnuwenlaawe. Wa eSaabadu aavolowa muSinagogani* ntoko aakhovelelaawe. Vano aaheemela weera asome. 17Aavahereriwa elivuru ya mprofeeti Yesaya. Aakhunula ni aaphwanya nipuro naalempwalaaya ha: 18“Munepa wa Apwiya ori ni Miyo, niwoko Owo wookittikitthela weera kaalaleere masu ooreeraxa atthu oohaawa. Owo wookirumiha weera kaalaleere otaphuliwa yaale ootthukiwa ni olama atthu oohoona, ni weera kaataphule atthu oopuheriwa. 19Wookirumihatho olaleiya eyaakha ya mahala a Apwiya.” 20Aakhuneela elivuru, anamuhokoloxera murumeiyi anakilaathi. muSinagogani* ootheene yaangwehexexa Yeesu. 21Vano Owo aapacera waaleela: “Olelo yookwaniheriwa Yoolempwa* ela mwiiwalaanyu vaanaano vaava.” 22Ootheene yuuluma nnene wa Yoowo ni yaatikhina ni masu a mahala yaakhumme mmwaanomwawe. Awo yaakohana: “Ola khahiyono mwaana a Yoseefe?” 23Yeesu aaweerela: “Vekhaikhai munookuupuxera miruku iya: ‘Meediku, mwiilamiheke muneenaanyu! Mpake va mweelaponimwanyu yeeyo niiwalaahu weera mwaampaka oKafaranawu!’” 24Owo aapwaherera: “Miyo kinooleelani ekhaikhai: khaawo mprofeeti onaakheliwa mweelaponimwawe. 25Kinoororomelihani weera mweehuhuni ya Eliya yaakhala asinaankhweli ancipale oYixrayeli. Ehuhuweene yeele wiirimu waawaleiya iyaakha tthaaru ni nyeeri mithannamosa, ni yaakhala etala etokotoko mweelaponi yootheene. 26Wa soothesene, Eliya khaarumiheliwe hata mmoha a yaawo, ohikhanle wa naamukhweli mmoha a oZarepeta, elapo ya oSidoni. 27Vanonto, mweehuhuni ya Eliya, mprofeeti, yaakhala anamakokho ancipale oYixrayeli. Wa soothesene, khaawo a yaawo aarapihiwe, ahikhanle Nahamani, muSiriya.” 28Wiiwalaaya yeeyo, muloko wa atthu ootheene waanyoonyiwaxa. 29Yaavenya, enamoomola Yeesu osidade enamukuxa emuronghaka mpaka vasulu wa nttumuxa, mwa nenno yaapakiwaaya esidade weera emvonyere Yeesu vathi. 30Mene Owo aavira variyariwaya ni aapwaha.

Yeesu onoomola munepa woonanara

31Vano Yeesu aarowa oKafarnawu, esidade ya oGalileiya, ni eSaabadu aamweera oxuttiha muloko wa atthu. 32Ootheene yaatikhina ni nihusihonawe, niwoko maswaawe yaari ni ikuru. 33muSinagogani* aakhala mutthu aarino munepa woonanara. Owo waakhuwela vancipale: 34“Khuu! Ontthuna eheeni ni hiyo, Yeesu a oNasarete?! Waaweenle weera oninanarihe? Kohoosuwela – ori Ootteela a Muluku.” 35Yeesu aahiiha eeraka: “Omaale weyo, ni okhume mwa yoowo.” Munepa waamvonyera mutthu vathi vamaithoni wa ootheene ni waakhuma wa yoowo woohimuvulaliha. 36Ootheene yaatikhina ni yaaheerelana akina ni akhwaaya: “Masu heeni ala? Owo onoolamulela ni ikuru, ni owera mpaka minepa soonanara, ni iyo sinookhuma!” 37Ni epilaawe yaamwarawareiya mweelaponi yootheene yoowaattamano.

Yeesu onaalamiha ancipale

38Yeesu aakhuma muSinagogani* ni aarowa owannyawe Simeyoni. Apwiyamwaanaawe Simeyoni yaavihaxa erutthu, ni oohusera yaamvekela Yeesu weera aakhavihere. 39Aawuuramela Yeesu apwiyamwaana ale anahiiha eretta ele, enaahiya. Awo yaavenya woowaakuveya ni yaahaarumeela yaawo. 40Wiilaka, muloko wa atthu waahaakuxa ootheene yaarino iretta soohiyanahiyana emuruuhelaka Yeesu, ni Owo aahaalamiha amwiiyaatheraka matata khula mutthu a yaawo. 41Ohiya toko yeeyo, saakhuma wa atthu ancipale minepa soonanara sikhuwelaka: “Weyo Mwaana a Muluku!” Wa soothesene, Owo annahiiha ni annakhoottiha wuuluma, niwoko saasuwela weera Owo ti Kristu. 42Oyaaka ni oxa, Yeesu aarowa wa nipuro na meekhaawe. Atthu ancipale yaamwaasaasa, ni ephiyaka weiwo aaraawewo, yaamunyesereriha weera ahaahiye. 43Vano Owo aaheera: “Ontthuneya weera Miyo kilaleiyetho masu ooreeraxa a omwene wa Muluku isidade sikina, niwoko kirumiheliwe niwoko na yeeyo.” 44Vano, annapwaherera alaleiyaka muSinagogani* sa oYudeiya.

Currently Selected:

Luuka 4: VMK2021

Highlight

Copy