Luuka 3

Yohaane mpatisa onreherera ephiro

1Vano, vayaakhani yanaamuloko niithanu ya omwene wa Tiberiyu Seesari, Ponsiyo Pilaatu aari guvernadori a oYudeiya; Herodi aari tetrarkha* a oGalileiya; munneiye Filipe tetrarkha a wItureya ni oTarakonite, ni Lisaniya tetrarkha* a wAbilene. 2Yaari ehuhuweene yeeyo Ana ni Kayafasi yaaraaya asitokweenexa a asaserdoti*. Ehuhuweene yeele masu a Muluku yaangweela Yohaane, mwaana a Zakariya, munikareni. 3Anneetteetta elapo yootheene ya oYordanu, alaleiyaka opatiso wa orukunxa murima weera yaakhele elevelelo ya soottheka, 4ntoko elempwaaya mulivuruni ya masu a mprofeeti Yesaya: “Nsu ninlaleiya munikareni: ‘Mwaarehererele ephiro Apwiya. Ngwookolele ephiro Yaawo. 5Maxepa ootheene eniyuuheleliwe, ni nyaako ni mattumuxa ootheene eniikhale oothatawalihiwa. Misewe sookhoromana nsikhale sowookoleliwa, ni iphiro soothipeiya nsikhale soowaataleiya. 6Atthu ootheene eniyoone ovuluxa wa Muluku.” 7Yohaane aaweerela atthu ancipale yaavenya weera yapatisiwe ni yoowo: “Ekhapira ya inowa! Aweerenleni taani weera mutthawe isara sa Muluku sinkhuveela? 8Moonihere soowiima sa orukunxa murima. Muhiixeereleke: ‘Nookhalano Abrahaamu ntoko atithi.’ Vano miyo kinooleelaani weera Muluku onoowera otatuxa maluku ala anamwane a Abrahaamu. 9Epaso eri yoolikaneene weera ethikile mikwankhwaari sa nyiri. Nyiri sootheene sihiniima soowiima sooreera, sinoothikiliwa ni sinoovonyeriwa mmooroni.” 10“Vano, nneereke hai?” yaamukoha atthu ancipale. 11Yohaane aawaakhula: “Yoowo orino mikaandyo miili, akawane ni yoowo ohikhalanne, ni yoowo orino yooca, apake hiihotho.” 12Anamaliviha a musoko akina yaahoowatho weera epatisiwe. Awo yaamukoha: “Muhusiha, nneereke hai?” 13Owo aaweerela: “Muhilivihetho musoko, ehikhanle ntoko yeeyo entthuneya.” 14Vano anakhotto akina yaamukoha: “Ni hiyo, nneereke hai?” Owo aawaakhula: “Muhipake etthu ni makhwaankwa, hata muhimoothere mukina moota woowootha, ni muhakalalele nlivonanyu.” 15Muloko wa atthu waaweherera ni ovilela otokotoko, wiikohaka muneenaaya weeraka Yohaane apaale Kristu. 16Yohaane aawaakhula ootheene: “Miyo kinoopatisani ni maahi, onimoowatho Mukina ooweraxa okipwaha miyo. Nkiphwanenle otaphula miramba sa ikwawaattasawe. Yoowo anoopatiseni ni Munepa Wootteela ni mooro. 17Owo onoomukuxa poxoro mmatatanimwawe weera areherere nipuronawe nimveeriwa* etrigu ni athokorore etrigu vatathani, mene anaahise makacapha mmooroni woohimala.” 18Vano, ni masu mancipale makina Yohaane aalipihera murima muloko wa atthu ni annalaleiya masu ooreeraxa. 19Wa soothesene, amuhiihaka Yohaane Herodi, tetrarkha* niwoko na Herodiyasi, amwaarawe munneiye Herodi, nitho na itthu soonanara sootheene sikina owo aapankaawe, 20Herodi aamwaandyeereratho etthu yoonanara ela: Aamvonyera Yohaane okaliposo.

Obatiso ni masina a ekhapira ya Yeesu

21Muloko wa atthu weera opatisiwaka, Yeesutho aapatisiwa. Avekelaka, waahuleiya wiirimu, 22ni Munepa Wootteela waamukhuruwela ni mukhalelo ntoko ekhunda. Vano naahoowa wa wiirimu nsu nimoha neeraka: “Weyo ori Mwanaka oosiveleya. Weyo onkisiveliha Miyo.” 23Yeesu aarino wookwanaka iyaakha miloko miraru aapacenraawe mitekosawe. Atthu yuupuwela weera Owo aari mwaana a Yoseefe. Yoseefe aari mwaana a Heeli, 24mwaana a Matati, mwaana a Leevi, mwaana a Melikhi, mwaana a Yanai, mwaana a Yoseefe, 25mwaana a Matathiya, mwaana a Amosi, mwaana a Nawume, mwaana a Esili, mwaana a Nagai, 26mwaana a Maathi, mwaana a Matathiya, mwaana a Semeyi, mwaana a Yoseekhi, mwaana a Yooda, 27mwaana a Yohanani, mwaana a Reesa, mwaana a Zorobabeli, mwaana a Salathiyeli, mwaana a Neeri, 28mwaana a Melikhi, mwaana a Adi, mwaana a Koosame, mwaana a Elimadame, mwaana a Eeri, 29mwaana a Yoxuwa, mwaana a Eleyezeri, mwaana a Yoorimi, mwaana a Matati, mwaana a Leevi, 30mwaana a Simeyoni, mwaana a Yuda, mwaana a Yoseefe, mwaana a Yooname, mwaana a Eliyakime, 31mwaana a Meleya, mwaana a Mena, mwaana a Matatha, mwaana a Nathami, mwaana a Davide, 32mwaana a Yixai, mwaana a Obeedi, mwaana a Bowasi, mwaana a Salimoni, mwaana a Naasoni, 33mwaana a Aminadabi, mwaana a Adimini, mwaana a Arini, mwaana a Hesirooni, mwaana a Perexi, mwaana a Yuda 34mwaana a Yakobe, mwaana a Isaaki, mwaana a Abrahaamu, mwaana a Thara, mwaana a Nakhoore, 35mwaana a Serukhi, mwaana a Ragawu, mwaana a Faleke, mwaana a Eberi, mwaana a Sala, 36mwaana a Kayiname, mwaana a Arifaxade, mwaana a Seemi, mwaana a Nowe, mwaana a Lamekhi, 37mwaana a Mathusala, mwaana a Henookhi, mwaana a Yarete, mwaana a Maleleyeli, mwaana a Kayiname, 38mwaana a Enoosi, mwaana a Seethi, mwaana a Adamu, mwaana a Muluku.

Currently Selected:

Luuka 3: VMK2021

Highlight

Copy