Luuka 2

Oyariwa wa Yeesu

1Mahukweene yaale Seesari Agustu aahima ekano emoha, alamulaka weera apakiwe namalepela a atthu a ilapo sootheene sa oRooma. 2Owo aari namalepela oopacera aapakiwe Kiriniyu areene guvernadori a oSiriya. 3Ootheene yaarowa wa muttetthe weiwo yaayariwaayawo weera yalepeliwe. 4Hiiho, Yoseefe aarowatho, akhumaka esidade ya oNasarete ya oGalileiya mpaka oBetelehemu, esidade ya Davide, elapo ya oYudeiya, niwoko aari a emusi ni ekhapira ya Davide. 5Aarowa ni Mariya, yoowo aamutthomenraawe ni aarupanle, weera yalepeliwe. 6Ereene nlelo weiwe, yaaphiya ehuhu ya omuyara Mwaana, 7ni Mariya aamuyara Mwaana Mulopwana a ntthaaranawe. Aamvitikelela ikuwo ni aamwiikaathi munikhoolani, niwoko khanaariwo nipuro wa yaawo mpaani mwa aletto.

Akukhuli ni andyelo

8Yaari akukhuli yaakhala mmatta mookhuveela. Moohiyuni yaalipelela muhuwaaya. 9Ndyelo mmoha a Apwiya aahiixoonihera wa yaawo, ni ovuwa wa Apwiya waahaara waarukureenreene yaawo, vano yaahoova. 10Ndyelotho aaweerela: “Muhoove, miyo kinooruuhelani masu ooreeraxa a ohakalalaxa ari wa muloko wootheene. 11Olelo, musidadeni ya Davide, mooyareliwa nyuwo Mvuluxa ori Kristu, Apwiya. 12Eyo eniikhale eneneerowaanyu: nyuwo mmwimphwanye Mwaana avitikelelingweene ikuwo ni iikaathiweene munikhoolani.” 13Woowaakuveya mikhalelo sincipale sa anakhotto a wiirimu saahiixoonihera ni ndyelo ole simuttottopelaka Muluku seeraka: 14“Ovuwa okhale wa Muluku Musulusulu, ni vathi vaava murettele wa yaale animusiveliha Muluku.” 15Yaahiyakaru andyelo yaawo, erowaka wiirimu, akukhuli ale yaaheerelana mukina ni mukwaawe: “Nrowe oBetelehemu ni noone yeeyo yeereiye Apwiya anileenlaaya.” 16Vano yaatthimaka ni yaamuphwanya Mariya, Yoseefe ni Mwaana aatalelingweene munikhoolani. 17Emoonaka, awo yaamwaramwaxa yeeyo yaaleeliwaaya mwaha wa Mwaana ole. 18Ootheene yiiwale yaatikhina ni masu a akukhuli. 19Wa soothesene, Mariya aathokorora itthu sootheene seiye ni annatthokelela mmurimanimwawe mwaha wa seiyo. 20Akukhuli yaahokolowa, emvuwihaka ni emuttottopelaka Muluku wa sootheene yoonalaaya ni yiiwalaaya ntoko yaaleeliwaaya.

Yeesu onooniheriwa Mpaani mwa Muluku

21Wa nihuku nanaathannaararu, ephiyaka ehuhu ya omwiinela Mwaana, aattehiwa Nsina na Yeesu, Nsina nne ndyelo aamuttenghaawe ahinaaye oyariwa. 22Emalihiwaka ehuhu ya otteelihiwawaya ntoko malamulo a Moisesi annyesererihaaya, Yoseefe ni Mariya yaamurongha oYerusaleemu weera yamoonihere wa Apwiya. 23Ntoko elempwalaaya munlamuloni na Apwiya: “Asilopwana ootheene a matthaara ekhaleke oovahereriwa wa Apwiya.” 24Yaamuronghatho weera evahe yooveleela ntoko ninghimaaya nlamulo na Apwiya: “Masiya meeli, hoye hoye ikhunda piili.” 25Aakhala oYerusaleemu mulopwana mmoha iitthaniwa Simeyoni aari oororomeleya ni a murima wa omuluku. Owo aaweherera opepesiwa wa oYixrayeli, ni Munepa Wootteela waari ni yoowo. 26Aathupululeliwa yoowo ni Munepa Wootteela weera owo khaarwa okhwa ahinaaye omoona Kristu a Apwiya. 27Eettihiwaka ni Munepa Wootteela, aarowa Mpaani mwa Muluku. Engwiihaka asinaangolo Mwaana Yeesu weera ekwanihere yeeyo yaatthuneya ni ekhovelelo ya malamulo, 28Simeyoni aamukuxa Yeesu mmatatanimwawe, anamuttottopela Muluku eeraka: 29“Muluku onlamula sootheene, ntoko mwaakiroromelinghaanyu, vano munoowera okilaxera mmuretteleni, 30niwoko kohoona ni maithwaaka ovuluxawanyu 31Nyuwo mureherenraanyu vamaithoni wa atthu ootheene: 32waara weera waamwaleele amalapo ni wa ovuwa wa atthwaanyu aYixrayeli.” 33Atithawe ni amayawe Mwaana yaatikhina ni yeeyo yaaleeliwaaya mwaha wa Mwaana ole. 34Vano Simeyoni aahaareeliha ni aaweerela amayawe Yeesu: “Mwaana Ola oothanliwa okhala wuuwa ni ovenya wa atthu ancipale a oYixrayeli, ni anaakhaletho eneneero ya ohiiwanana. 35Hiiho soowuupuwela sa mirima sincipale nsikhale soothupululiwa. Vano, wa nyuwo, ekatana eniihome munepaanyu.” 36Aakhalawo mprofeeti muthiyana, iitthaniwa Ana, mwaana a Fanuweli a nihimo na Axeri. Aari oowuuluvalaxa, ni okhuma otheliwawawe aakhala ni aiyawe iyaakha ithannapiili, 37ni vahoolowaya aakhala naamukhweli mpaka iyaakha miloko mithannamiraru niixexe. Khanatoko ohiya Empa ya Muluku. Annamulapa Muluku, atthukaka ni avekelaka ohiyu ni othana. 38Aphiyaka iwe ehuhu emoharu yeeyo, aamutthapela Muluku ni anuuluma mwaha wa Mwaana wa ootheene yaaweherera ovuluxiwa wa Yerusaleemu. 39Emalihaka sootheene saatthuneya ni malamulo a Apwiya, Yoseefe ni Mariya yaahokoleela esidadaaya, Nasarete, elapo ya oGalileiya. 40Mmiravo annunnuwa ni annalipa, asareyaka ni miruku, ni mahala a Muluku yaari ni Yoowo.

Mmiravo Yeesu Mpaani mwa Muluku

41Iyaakha sootheene asinaangolo yannarowa oYerusaleemu ofestani ya mPaska*. 42Yeesu aaraawe ni iyaakha muloko ni piili, awo yaarowa ofestani ntoko yaakhovelelaaya. 43Emalaka efesta ni ehokoleelaka asinaangolo owaani, mmiravo Yeesu aahala oYerusaleemu, mene awo khaayaasuwela yeeyo. 44Yuupuwelaka weera Owo aari ni asikhwaawe a mmukwahani, yaaheetta nihuku nootheene. Vano yaapacera omwaasaasa variyari wa amusi ni atthu yasuwelannaaya. 45Ehimphwanyaka, yaahokoleela oYerusaleemu weera yamwaasaase. 46Eviraka mahuku mararu, yaamphwanya Yeesu Mpaani mwa Muluku, akilaantheene variyari wa ahusiha, awiiwaka ni aakohaka. 47Ootheene yaamwiiwale Yeesu yaatikhinaxa ni wiiwexexawawe ni moota aawaakhunlaawe. 48Emoonaka asinaangolo Yeesu, yaatikhina. Amayawe yaamweerela: “Mwanaka, heeni onipakenlaawo yeeyo? Atithawo ni miyo naaheeteteiya niwaasaka.” 49Owo aahaakoha: “Heeni nyuwo mwaakaasasaanyu: Khamusuwenle weera ontthuneya Miyo okhala Mpaani mwa Atithaka?” 50Vano awo khayiiwexenxe yeeyo aaleenlaawe. 51Vano, aarowa ni aahaahoola oNasarete, ni annawiiwelela asinaangolo. Wa soothesene, amayawe yaathokorora itthu sootheene iye mmurimanimwaya. 52Yeesu annunnuwa ni miruku, mweerutthuni ni mmahalani vamaithoni wa Muluku ni wa atthu.

Currently Selected:

Luuka 2: VMK2021

Highlight

Copy