Luuka 1

Ovolowa

1Ancipale yaaheerera olepa nyaha sa sookhumelela sookwaniheriwa variyariwahu, 2ntoko nileeliwaahu ni yaale yaari anamoona ni arumeiyi a masu okhuma ompacereroni. 3Miyotho muneenaaka koowehaweha nnenesene sootheene okhuma ompacereroni, ni kohuupuwela, Teyofilu oottittimiheyaxa, weera koolepeleni sootheene sookawanyeiya nnene, 4weera nyuwo musuwele nnenesene ekhaikhai ya itthu mwaaxuttihiwaanyu.

Othalihiwa wa oyariwa wa Yohaane mpatisa

5Mweehuhuni ya Herodi, mwene a oYudeiya, aakhala musaserdoti* iitthaniwa Zakariya, aari mmoha a mpatta wa asaserdoti* a Abiya. Amwaariyetho, Elisabeti, yaari a ekhapira ya Aharoni. 6Ooweeli yaari oororomeleya vamaithoni wa Muluku, yiiwelelaka nnenesene malamulo ootheene ni soolamulela sootheene sa Apwiya. 7Awo khayaarino anamwane, niwoko Elisabeti khaayara, nitho ooweeli yaahuuluvala. 8Nihuku nimoha, ereene emaara ya mpatta wa Zakariya, owo eera arumeelaka ntoko musaserdoti* vamaithoni wa Muluku. 9Aapakiwa mwaathanle, ntoko ekhovelelo ya asaserdoti* weera avolowe Mpaani mwa Apwiya ni ahisere mwiixi woowunkhelaxa. 10Ephiyaka ehuhu yoohisera mwiixi woowunkhelaxa, atthu a muloko wootheene yeera evekelaka vaate. 11Vano aahiixoonihera wa yoowo ndyelo a Apwiya, eemenleene moono mulopwana wa altaari* a erubani*. 12Zakariya amoonakaru, aatuthuwa ni aahoova. 13Ndyelotho aamweerela: “Muhoove Zakariya, nivekelonanyu nohiiwiwa. Amwaarinyu Elisabeti animooyarelani mwaana mulopwana, ni muntthuneya omutteha nsinanawe Yohaane. 14Owo anaakhale otteeliwa murimaanyu ni ohakalalawanyu, ni ancipale eniitteeliwe niwoko na oyariwawawe. 15Vano, anaakhale mutokweene vamaithoni wa Apwiya. Owo kharwa awura eviinyu, hoye hoye yoowura ekina. Anaakhale oosareya ni Munepa Wootteela okhuma ohinaaye oyariwawawe. 16Niwoko na yoowo, atthu ancipale a muloko wa aYixrayeli eniihokoleele wa Apwiya Mulukwaaya. 17Anaahoole Apwiya mmunepani ni mukuruni sa Eliya. Anaahokoloxe mirima sa asitiithi wa asinamwanaaya, ni mirima sa oohiiwelela wa miruku sa atthu a ekhaikhai. Owo anaahiyere Apwiya muloko wooreherereiya.” 18Zakariya aamukoha ndyelo: “Nkisuwele hai yeeyo? Miyo ni amwaaraka nohuuluvala.” 19Ndyelo aamwaakhula: “Miyo Gabriyeli, kinkhala ohoolo wa Muluku mahuku ootheene. Koorumihiwa weera kooleeleni ni koovaheeni masu ooreera ala. 20Vano, nyuwo mmwikhale oohuuluma. Khamunrowa owera wuuluma mpaka nihuku nenenenno eneeraaya ekhumelele yeeyo, niwoko khamwaakhulenle maswaaka, eneera ekwaniheriwe ehuhu yeeyo entthuneya.” 21Yeereiyaka yeeyo, muloko wa atthu waangweherera Zakariya, otikhinaka mwaha wa opisawawe Mpaani mwa Muluku. 22Akhumaka, khaawera wuuluma. Awo yaasuwela weera owo aakhenle eyoonihero Mpaani mwa Muluku. Owo aawoonihera ni ineneero, mene aari oohuuluma. 23Amalihaka ehuhuwaawe ya muteko, aahokoleela owaani. 24Vahoolowaya amwaariye, Elisabeti, yaarupala, ni sikwanaka nyeeri mithanu, yaahiipitha. 25Owo aaheera: “Apwiya aakipakela yeeyo. Wa mahuku ala Awo aakiweha miyo ni aamaliha wuulihiwawaka muru vamaithoni wa atthu.”

Othalihiwa wa oyariwa wa Yeesu

26Wa mweeri wanaathannamosa Muluku aamurumiha ndyelo Gabriyeli oNasarete, esidada ya oGalileiya. 27Aarowa wa mwaamwali oowiikosoopa aatthomeriwe ni mulopwana iitthaniwa Yoseefe, aari a ekhapira ya Davide. Nsina na mwaamwali oowiikosoopa naari Mariya. 28Ndyelo, amukhuveelaka yoowo, aamweerela: “Muhakalale nyuwo mwaakhenle mahala matokotoko! Apwiya ari ni nyuwo!” 29Mariya aatuthuwa niwoko na masu ale, uupuwelaka weera entaphulela eheeni esalaama ela. 30Vano ndyelo aamweerela: “Muhoove Mariya, niwoko Muluku oowooniherani mahala matokotoko. 31Nyuwo munoorupala ni munoomuyara Mwaana Mulopwana, ni munoomutteha Nsinanawe Yeesu. 32Owo anaakhale Mutokweene, ni aniitthaniwe Mwaana a Musulusulu. Apwiya Muluku eniimvahe ehice ya atithawe Davide. 33Owo anaalamule empa ya Yakobe mahuku ootheene. Olamulawawe onuukhale woohimala.” 34Mariya aamukoha ndyelo: “Eniikhumelele hai yeeyo, woonaka weera miyo nkinatoko okonano mulopwana?” 35Ndyelo aamwaakhula: “Munepa Wootteela onimoorweelani ni ikuru sa Musulusulu nsookhuneeleni ni erungwaawe. Hiiho, Yoole Ootteela anaayariwe, aniitthaniwe Mwaana a Muluku. 36Mmusaanyu Elisabeti anaamuyaretho mwaana mulopwana ngwuuluvalani. Yoole akina ammweerelaaya weera ole khangyara, ori ni mweeri wanaathannamosa. 37Kheewowo eri yoohiwereya wa Muluku.” 38Mariya aamwaakhula: “Miyo murumeiyi a Apwiya. Ekikhumelele miyo ntoko wuulumawanyu.” Vano ndyelo aamuhiya.

Mariya onimuxekura Elisabeti

39Mahukweene yaale, Mariya aahiireherera ni aarowa woowaakuveya wa esidade emoha yaari mweelaponi ya nyaako sa oYudeiya, 40weiwo aavolongwaawe mpaani mwa Zakariya ni aamuulumiha Elisabeti. 41Iiwaka Elisabeti esalaama ya Mariya, mwaana aattikinyeiya mmirimani mwa yoowo, ni Elisabeti aasareya ni Munepa Wootteela. 42Vano owo aakhuwela ni nsu ntokotoko: “Ooreelihiwa ti nyuwo variyari wa athiyana, ni ooreelihiwa ti Mwaana nyuwo muneeraanyu mungyare. 43Heeni miyo kooniheriwaaka mahala matokotoko ala weera mpaka amayaya Apwiyaaka aakixekura? 44Kiiwakaru esalaamaanyu, mwaana ori mmirimanimwaka oottikinyeiya ni ohakalala. 45Ooreelihiwa ti yoole ororomenle weera eniikwaniheriwe yeeyo Apwiya yaamuleenlaaya.”

Ecipo ya Mariya

46Vano Mariya aaheera: “Okumaaka ongwunnuwiha Apwiya. 47Munepaaka onghakalala mwa Muluku, Mvuluxaaka. 48Owo ohoona wiiyeviha wa murumeiyaawe. Okhuma vaanaano vaava mpaka ohoolo ikhapira sootheene nsikiitthane ooreelihiwa, 49niwoko Muluku a ikuru sootheene ookipakela miyo itthu sitokotoko. Nsinanawe ti nootteela. 50Ikhararisawe simphiyera ikhapira sootheene sa yaawo ammoova. 51Owo aapaka itthu sa ikuruxa ni moonowaawe. Aahaamwaramwaxa yaawo ari oowiixoona mmirimanimwaya. 52Aahaakuruxa mamwene muhicenimwaya, mene aahaaweliha oowiiyeviha. 53Aahaavoniha ni itthu sooreera yaawo yaavoliwe etala, aawoomolatho anamapuha ni matata oohikhalano etthu. 54Owo aamukhavihera murumeiyaawe Yixrayeli, uupuwelelaka ommorela ikharari 55Abrahaamu ni ikhapirasawe mahuku ootheene ntoko aaweerenlaawe makholowaahu.” 56Mariya aakhala ni Elisabeti saattamelaka nyeeri miraru, ni vahoolowaya aahokoleela owaani.

Oyariwa wa Yohaane mpatisa

57Ephiyaka ehuhu ya oyara wa Elisabeti, aamuyara mwaana mulopwana. 58Atthu aattamannaaweno ni amusaawe yaahiiwa suulummwaka sa ikharari sitokotoko Apwiya yaamoonihenraaya, ni yaamuhakalalela yoowo. 59Wa nihuku nanaathannaararu yaarowa weera yamwiinele mwaana, ni yaatthuna omutteha nsina na atithawe, Zakariya. 60Amayawetho yaahaakhula: “Hoye! Owo aniitthaniwe Yohaane.” 61Awo yaamweerela: “Khawowo naari mmusaanyu mmoha orino nsina nna.” 62Vano yaawoonihera ni ineneero atithawe mwaana weera esuwele nsina heeni yaatthunaaya weera attehiwe. 63Owo aavekela etthaabwa ekhaaneene, ni aatikhinihaka ootheene, aalepa: “Nsinanawe Yohaane.” 64Woowaakuveya eyanowaawe yaahuleiya, ni nlumi naataphuwa, anapacera wuuluma, amuttottopelaka Muluku. 65Aattamannaaweno ootheene yaasareya ni woova, ni mweelaponi yootheene ya nyaako sa oYudeiya suulummwa sa seiyo. 66Ootheene yiiwa yeeyo yannakoha: “Anaakhale taani mwaana ola?” Vano Apwiya yaari ni yoowo.

Ecipo ya Zakariya

67Atithawe, Zakariya, yaasareya ni Munepa Wootteela ni yaathaliha otthuna wa Muluku yeeraka: 68“Oottottopeliwa ekhale Apwiya, Muluku a aYixrayeli, niwoko yaaxekura ni yaavuluxa muloko wa atthwaaya. 69Awo aaniwerela hiyo ovuluxiwa otokotoko mwa muloko wa murimeiyaaya Davide, 70ntoko yuulumaaya ni maprofeeti ootteela a khalayi: 71ovuluxiwa wa amwiittanaahu ni mmatatani a ootheene yaawo annithanya, 72weera ewoonihere ikhararisawe makholowaahu ni yuupuwelele wiiraanawaya wootteela, 73eyo tiiyo olipela yaalipenlaaya atithihu Abrahaamu: 74Aanivuluxa mmatatani a amwiittanaahu weera hiyo naarumeele Apwiya nihoovaka, 75neettaka mootteelani ni mweekhaikhaiyini vamaithoniwaya mahukwaahu ootheene. 76Ni weyo, mmiravo, ngwiitthaniwe mprofeeti a Musulusulu niwoko onuurowe ohoolo wa Apwiya weera waarehererele Yaawo ephiro, 77nitho weera evahe muloko wa atthwaaya esuwelo ya ovuluxiwa ongwa niwoko na elevelelo ya sootthekasaya. 78Elevelelo ele ti niwoko na omoreliwa ikharari sa Mulukwaahu. Owo anaanixekure wa osulu ntoko nsuwa nikhumaka 79weera aamwaleele yaale ari mpiphini ni mmunttuusini wa okhwa, ni weera aneettihe mphironi ya murettele.” 80Vano, mmiravo annunnuwa ni annalipa mmunepani. Aakhala munikareni mpaka ehuhu eeraawe iixoonihere wa aYixrayeli.

Currently Selected:

Luuka 1: VMK2021

Highlight

Copy