Epacerero 27

Yakobe onaakhela nreeliho na soophwanela sa ontthaara

1Isaki uuluvanleene ni akhaliweene evaasi, aamwiitthana Esawu, ntthaaranawe, anamweerela: “Mwanaka.” Owo aamwaakhula: “Miyo kiri va.” 2Owo aamweerela: “Miyo kohuuluvala ni nkisuwenle nihuku heeni miyo kineeraaka kikhwe. 3Vanonto okuxe ikapwitthisawo, nyuupa ni nyuura ni orowe otuphini weera wakiivele enama. 4Vano, ohoolowaya okaapeele yooca yeele yookisivaxa, ni okiruuhele weera miyo kiceeke ni weera kooreelihe kihinaaye okhwa.” 5Rebeka eera iiwaka Isaki uulumaawe ni mwanawe Esawu. Vano owo aarowa otuphini weera iive enama yoowaaruuhela atithawe.

Rebeka ni Yakobe animulokottha Isaki

6Vano Rebeka aamuleela mwanawe Yakobe eeraka: “Miyo koowiiwa atithawo yuulumaka ni amunnawaanyu Esawu, yeeraka: 7‘Okiruuhele enama ni okipakele yooca yeele yookisivaxa weera miyo kiceeke ni kooreelihe vamaithoni wa Yave, kihinaaye okhwa.’ 8Vanonto mwanaka, wiiwe nnenesene ni opake yeeyo kinoolamuleelaaka. 9Orowe vano omuhuwoni ni wakiruuhele weiwo ipuri piili sooreeraxa weera kiwaapeele atithawo yooca yoowaasivaxa. 10Okuxeke waavaheke atithawo weera yaceeke nitho yooreeliheke ehinaaye okhwa.” 11Yakobetho aaweerela amayawe: “Moone, amunnaka Esawu ti mulopwana a mapururu, mene miyo nkinono. 12Ankha yakaapapela atithaka? Vamaithoniwaya nkikhale namalokottha, ni hiiho nkiiruuhele mwaneenaaka nlapho ehikhanle mareeliho.” 13Amayawe yaamweerela: “Mwanaka, olamphwawawo okhale ni miyo. Wiiwelele paahi nsunaka: Orowe wakiruuhele.” 14Vano aarowa, anakuxa anaaruuhela amayawe. Rebeka aahaapeya yooca yoosivaxa, ntoko atihawe yaasivaxaaya. 15Vahoolowaya, Rebeka aakuxa soowara sooreeraxa saathokororiwe mpaani mwa Esawu, ntthaaranawe, anangwariha Yakobe, mwanawe mukhaani. 16Aangwariha ixapala sa ipuri nyoonosawe ni exiko yahaarino mapururu. 17Aamwinnyerera mwanawe Yakobe yooca yoosivaxa ni epaawu aapankaawe. 18Aarowa wa atithawe, aneera: Tiithi.” Ni awo yaamwaakhula: “Miyo mwanaka, weyo taani?” 19Vano Yakobe aaweerela atithawe: “Miyo ti Esawu, ntthaarananyu, koopaka ntoko mwaakileenlaanyu. Mvenyeke ni mukilaathiki. Mukhuureke enama kiivalaaka, weera mukireelihe.” 20Isaki aamukoha mwanawe: “Ophwannye hai enama woowaakuveya mwanaka?” Owo aawaakhula: “Yave Mulukwaanyu aakirumihela okumanano.” 21Vano Isaki aamweerela Yakobe: “Okaattamele mwanaka weera miyo kiwaapapele ni kisuwele waareene yooweene mwanaka Esawu.” 22Yakobe aawaattamela atithawe Isaki, enamwaapapela, enamweerela: “Nsu ti na Yakobe, vaheera nyoono ti sa Esawu.” 23Khayaamoonelenle niwoko nyoonosawe saari sa mapururu ntoko sa Esawu munneiye, enamureeliha. 24Isaki aamukohatho: “Weyo ti yooweene mwanaka Esawu?” Owo aawaakhula: “Ti yoomeene.” 25Isaki aamweerela: “Mwanaka, okiruuhele wiivalaawo weera kikhuure ni kooreelihe.” Owo aahaaronghela, enakhuura, anaaruuhelatho eviinyu, enawura. 26Vanonto Isaki aamweerela: “Nkawa mwanaka okibeeceke.” 27Aamwaattamela, anambeeca. Vano oonaka wunkhela wa soowara aamureeliha eeraka: “Ii! Wunkhela wa mwanaka ori ntoko wunkhela wa ntuphi Yave oreelihalaawe. 28Muluku oovahe nikame na wiirimu ni ohepha wooreera wa vatthayani, aani, waatta wa etrigu ni eviinyu. 29Soorumeele miloko, ni amalapo yookokhorele. Okhale pwiiya a axunneiyo ni anamwane a amayawo yookokhorele. Oolaphiwa ekhale yaawo eneera yoolaphe, ni ooreelihiwa yaawo eneera yooreelihe.”

Esawu inimuriheya nreeliho

30Isaki aamaliha omureeliha Yakobe. Vano Yakobe aavenyaawewo, aaphiya Esawu, munneiye, ahokolowaka wuulupatthani. 31Owotho aahaarehererela yooca yoosivaxa, anaaroihela atithawe, anaweerela: “Mvenye tiithi ni mukhuureke enama kiivalaaka weera mukireelihe.” 32Isaki aamukoha: “Weyo taani?” Owo aamwaakhula: “Ti yoomi – Esawu, ntthaarananyu.” 33Isaki aatuthuwa vancipale, aneera: “Vano taani yoole aakunxe enama, anakiruuhela? Miyo kookhuura weyo ohinaaye orwa ni koomureeliha. Vano, vekhaikhai owo ti ooreelihiwa.” 34Esawu iiwaka masu a atithawe, aakhuwelaxa ni aananariwa vancipale, anaadyoonttelela atithawe: “Mukireelihe miyotho tiithi.” 35Owo aamwaakhula: “Aahoorwa munneiyo ni onyeenga anaakhela mareeliho yeera ekhaleke awawo.” 36Owo aaheera: “Vekhaikai nsinanawe ti Yakobe ni ettiitthu! Aakilokottha imaara piili. Soophwanelasaka sa ontthaara ookaakha, vanonto ookuxa mareelihowaaka.” Ni aahaakoha atithawe: “Tiithi, khamukisungenre nreeliho hata nimoha?” 37Isaki aamwaakhula Esawu: “Koomvaha ikuru soowoolamula weyo nitho asinaangolwaawo moota wooweera nyuwosa munoothatuwa arumeiyaawe, ni koomuroromeliha etrigu ni eviinyu. Nkoopakele eheeni mwanaka?” 38Esawu aahaavekela: “Tiithi weeraka murino nreeliho nimoha paahi? Mukireelihe miyotho tiithi!” Ni ahimaka yeeyo Esawu aahiinla akhuwelaka vancipale. 39Isaki aamwaakhula: “Weyo onuukhale ottai wa etthaya ya ethaadyira, ottai wa nikame nimmora wiirimu. 40Weyo onuukhalele okumi ekatanaawo ni onuumurumeeleke munneiyo. Weyo waahivilelaxa onuupase onyooro wa okaporo.” 41Esawu aamunyoonyeriwa munneiye Yakobe mwaha wa mareelihoweene yaale atithawe yaamureelinghaaya. Vano Esawu aahiixeerela: “Annikhuveela mahuku a olalamikela okhwa wa atiithi ni vahoolowaya nkimwiive munnaka Yakobe.”

Yakobe ontthawa isara sa Esawu

42Emuthaliherakaru Rebeka yeeyo aahimalaawe Esawu, owo aarumiha wiitthaniwa Yakobe mwanawe mukhaani, anamweerela: “Esawu oniipepesa ni soowuupuwela atthunaka oowiiva. 43Vanonto mwanaka wiiwe nsunaka, otthawele woowaakuveya wa acimweenaaka Labani oHarani. 44Wakhale wuuwu mahuku makina mpaka oneeraaya omale onyoonyiwa wa munneiyo. 45Owo ahiya woonyoonyeriwa weyo ni attiwala yeeyo oopakenlaawo, miyo kinimoolamulela ohokoleela nno. Niwoko na heeni kineeraaka kaayeleele anamwane ooweeli nihuku nimoha?” 46Rebeka aarowa omuleela Isaki: “Kookhulumuwa ni khaankisivela asithiyana ala aHiti. Yakobe amuthela muthiyana a elapweene yeela, miyo kinookupaleela weera fataari kikhwe.”

Currently Selected:

Epacerero 27: VMK2021

Highlight

Copy