Epacerero 26

Isaki ni Abimeleki

1Vano yaakhala etala mweelaponi ele ntoko yaakhumelenlaaya mweehuhuni ya Abrahaamu. Tivawo Isaki aarongwaawe oGerari weiwo Abimeleki aaraawe mwene a aFilisti. 2Yave aahiixoonihera wa Isaki anamweerela: “Muhirowe wExipitu, mene murowe elapo yeeyo Miyo kineeraaka koothoonyereni. 3Mpwaherereke okhala elapweene yeela mahuku vakhaani. Miyo nkikhale ni nyuwo, nitho nkooreeliheni. Nkoovaheeni, nyuwo vamoha ni ekhapiraanyu yootheene elapo yootheene ela ni nkikwanihere nlipelo kaapakenlaaka atithinyu, Abrahaamu. 4Vano nkaandyeerere ekhapiraanyu ntoko ithenyeeri sa wiirimu, nitho nkivahe ilapo sootheene iya. Mwaha wa ekhapiraanyu miloko sootheene sa elapo ya vathi nsireelihiwe, 5niwoko Abrahaamu aahiiwelela, anakwanihera kaamurumalaaka sootheene, malamulo ootheene, ikano sootheene ni soolamulasaka sootheene. 6Vanonto Isaki aamaka oGerari. 7Atthu a elapo ele yaamukohakohaaya mwaha wa mwaariye, owo eera weera aari murokoriye, oovaka weera, eera mwaariye, yaammwiiva weera emuthele Rebeka eenre areeraxaka. 8Isaki areene ehuhu yincipale oGerari, nihuku nimoha Abimeleki, mwene a aFilisti areene vaxanelani, aamoona Isaki apakaka orottolo ni mwaariye Rebeka. 9Vanonto Abimeleki aamwiitthana Isaki, anamweerela: “Vekhaikhai ola mwaariyo, heeni okeerenlaawo weera ola murokoraka?” Isaki aamweerela: “Kuupuwela weera nkiiviwe niwoko na yoowo.” 10Abimeleki aaheera: “Eheeni yeela onipankaawo? Mukina a muloko ola aangwera okonano mwaariyo, ni weyotho waankhala ni nthowa wa yoonanareene yeeyo.” 11Vano Abimeleki aalamulela mulokwaawe wootheene: “Akhalaru mutthu aaneera amutave mulopwana ola naari mwaariye, vekhaikhai anaakhwe.” 12Isaki, mweelapweene yeele, aahaala mmatta ni aahepha eyaakheene yeele miringosene ncira sa seiyo aanlaawe, niwoko Yave aamureeliha. 13Vanonto, owo aathadyireya ni weera waandyeerereyaka, mpakatho anakhala thadyirixa. 14Aakhalano mihuwo sincipale ni arumeiyi ancipale, moota wooweera aFilisti yannamukhalela nrima. 15Awosa yaahuuheela ihime esarihaka etthaya. Saari ihimesene seiye saathimpwe ni arumeiyi a Abrahaamu, atithawe Isaki, mweehuhuni ya Abrahaamu. 16Vanonto Abimeleki aamweerela Isaki: “Othaame elapwaahu, niwoko weyo woothatuwa oolipaxa oniphwaha hiyo.” 17Tivawo Isaki aathaammaawewo, anamaka vareyareyani na oGerari ni iwe aahiitekiha. 18Isaki aahuuhulatho ihime saathimpwe mweehuhuni ya atithawe Abrahaamu, mwa seiyo aFilisti yuuheelenlaaya vahoolo wa okhwa wa Abrahaamu. Aahokoloxera masina wa khula ehime nsinanaya naarinaaya mweehuhuni ya Abrahaamu. 19Vano arumeiyi a Isaki ethipaka ehime vareyareyani, yaamuttemula naattuuttu a maahi. 20Akukhuli a oGerari yaapacera onyakulihana ni akukhuli a Isaki, yeeraka: “Maahi ala ti awihu.” Tivawo Isaki aattenghaawe ehime ele Eseki, niwoko waakhumelela onyakulihana mwaha wa ehimeene yeele. 21Yaathipatho ehime ekina, onakhumelelatho onyakulihana mwaha wa yeeyo, tivawo aattenghaawe Sitina. 22Isaki aathaama iwe, anathipa ehime ekina ni khayaanyakulihanne mwaha wa yeeyo, tivawo aattenghaawe Rehoboti, eeraka: “Vano Yave oonunnuwihera nipuro weera naandyeereraneke mulaponi.” 23Vahoolowaya Isaki aarowa oBerxeba. 24Ohiyuweene yoole Yave aahiixoonihera wa yoole, anamweerela: “Miyo ti Muluku a atithinyu Abrahaamu. Muhoove, niwoko Miyo kiri ni nyuwo. Nkooreeliheni, ni nkaandyeerere ekhapiraanyu niwoko na omusivela murumeiyaaka Abrahaamu.” 25Vano aahaatekawo altaari*, aniitthana Nsina na Yave, anakunga eheemaawe ni arumeiyi a Isaki yaathipawo ehime. 26Nihuku nimoha, Abimeleki aavenya oGerari, vamoha ni namalakaawe Ahuza, nitho ni Fikoli, mutokweene a anakhottwaawe, weera uulume ni Isaki. 27Isaki aamukoha: “Nyuwo muhikitthunaka, mpaka mookoomola elapwaanyu, vano heeni mungwaanyu wuuluma ni miyo?” 28Awosa yaamwaakhula: “Hiyo nohoona weera Yave ori ni nyuwo ni nohuupuwela weera fataari wiiraana ni nyuwo. Nintthuna weera okhale wiiraana variyariwahu. 29Onuukhale ha: Weera muhinipakele etthu yoonanara, ntoko hiyo nihoopakenlaahuni, mene noopakelani yooreera paahi, ni naahoohiyani murowaka mmuretteleni. Noosuwela weera Yave ohooreelihani.” 30Isaki aahaarehererela efesta, enaca, enawura. 31Vanonto oyaaka ni oxa yaalipela mukina ni mukhwaawe. Vahoolowaya yaalaxerana, enapwaha mmuretteleni. 32Nihuku nenenenne yaahoorwa arumeiyi a Isaki, ni yaamuthalihera mwaha wa ehime yaathimpaaya emweerelaka: “Noottemula maahi!” 33Isaki aatteha ehime ele Xiba. Tivawo mpaka olelo esidade ele eneeriwaaya Berxeba. 34Esawu areeneno iyaakha miloko mixexe, aamuthela Yudite, mwaana muthiyana a muHiti Beeri, ni Basemati mwaana muthiyana a muHiti Eloni. 35Asithiyana ale yaamutannyera itthu soopwexiha muru Isaki ni Rebeka.

Currently Selected:

Epacerero 26: VMK2021

Highlight

Copy