Epacerero 25

Abrahaamu onimuthela Ketura

1Vano Abrahaamu aamuthela muthiyana mukina iitthaniwa Ketura. 2Owo aamuyarela anamwane ala: Zimerani, Yokixani, Medani, Yixbaki ni Xuwa. 3Yokixani aamuyanre Xeba ni Dedani. Vano ekhapira ya Dedani yaari awAxuri, Aletuxi ni aLewumi. 4Anamwane a Midiyani yaari Efa, Eferi, Hanoki, Abida ni Eldaha. Ootheene ala yaari a ekhapira ya Ketura. 5Abrahaamu aamuhiyera Isaki sootheene aarinaawe. 6Vano wa anamwane akina a ikuxosawe sa okaporo yaakhala ni Abrahaamu, aahaavaha itthu sikina aarinaawe ni areene nlelo ni okumi, aahaarumihela mpatta wa ninkhuma nsuwa weera ehikhale vamoha ni mwanawe Isaki. 7Abrahaamu aakhala ni okumi iyaakha ncira ni miloko mithannamiili niithanu. 8Aakhwiiye uuluvanleene, ni misingu sitokweene, anavithiwa athukumanyihiwaka vamoha ni makholowaawe. 9Vano anamwanaawe Isaki ni Iximayeli yaamvitha munikhukuni na oMakipela waattamela oMamre, mmatta mwa Efroni, mwaana a Zowari, muHiti. 10Yaari ematta Abrahaamu aathummaawe ni aHiti. Ti weiwo Abrahaamu ovithiwaawe vamoha ni mwaariye Sara. 11Vahoolo wa okhwa wa Abrahaamu, Muluku aamureeliha mwanawe Isaki. Vano, Isaki aamanke vakhiviru wa oBeher-Lahi-Royi.

Anamwane a Iximayeli

12Okawanyeya wa ekhapira ya Iximayeli, mwaana a Abrahaamu aayareliwaawe ni epottha Hagari ngwExipitu Sara aamvanghaawe ti wu: 13Masina a anamwane a Iximayeli alempwale ettharihiwaka oyariwawaya ti ala: Nebayoti, ntthaara na Iximayeli, Kedari Adibeeli, Mibsami, 14Mixma, Duma, Masa, 15Hadadi, Tema, Yeturi, Nafixi ni Kedema. 16Yaari ti yaala anamwane muloko neeli a Iximayeli, yaathatungwe asitokweene a ipuumbasaya. Mittetthesaya ni mapuro yaamankaaya yaahaakhela masinaaya. 17Iximayeli aakhala ni okumi iyaakha ncira ni miloko miraru niithannapiili. Aahookhwa, anavithiwa athukumanyihiwaka vamoha ni makholowaawe. 18Vano anamwanaawe yaamwaramwareya variyari wa elapo wookela oHavila ni oXuri, vakhiviru ni mwiinano ni wExipitu, ohoolo wa mutthu arowaka wAxuri. Vano yaakhala oohiiwanana ni axunnaya ootheene.

Esawu ni Yakobe

19Ola ti mwaha wa emusi ya Isaki, mwaana a Abrahaamu. Abrahaamu aamuyanre Isaki. 20Vano Isaki aarino iyaakha miloko mixexe aathelanaawe ni Rebeka, mwaana muthiyana a Betuweli, ngwArami a oPadan-Arami, ni murokoriye Labani, ngwAramitho. 21Vano Isaki aamvekela Yave mwaha wa mwaariye, niwoko owo aari mwali eekupa. Yave aamwaakhula nivekelonawe ni Rebeka, mwaariye, aarupala. 22Asinamwane yaamukakhana mmirimanimwawe, tivawo eenraawe: “Heeni enkikhumelelaaya yeela?” Vano aarowa omukoha Yave. 23Yave aamweerela: “Miloko miili sa atthu siri mmirimanimwanyu. Miloko miili sa atthu sinookhuma murukulunimwanyu. Mmoha wa seiyo onuukhale woolipaxa, mene mutokweene anamurumeele mukhaani.” 24Vano ephiyaka ehuhu ya oyara waasuwanyeya weera mmirimanimwawe yaakhala maphapo. 25Mwaana aapacenre oyariwa aari ooxeera vancipale ni erutthu yootheene yoosareya mapururu, tivawo yamutthenghaaya Esawu. 26Vahoolowaya aayariwa munneiye ntatanawe nivanreene etthottopwa ya Esawu, mwa yoowo yaamutthenghaaya Yakobe. Vano ehuhu Rebeka aayaraawe, Isaki aarino iyaakha miloko mithannamosa. 27Asinamwane ale yaahunnuwa. Esawu aathatuwa namalupattha ooweraxa ni wannamusivela mutuphini. Vaheera Yakobe aari mutthu oomaala ni wannamusivela okilaathi paahi muheemani. 28Isaki aamukupaleelaxa Esawu, niwoko owo aatthunaxa enama, vaheera Rebeka aamukupaleelaxa Yakobe. 29Vanonto emaara emoha, Yakobe eera aapeyaka nrupantakanse, Esawu aahokolowaawe mutuphini avoliweene etala. 30Owo aamvekela: “Okimeele vakhaani nrupantakanse nooxeera nno vawo. Koovoliwa etala.” Tivawo iitthaniwaawetho Edomi. 31Vano Yakobe aamwaakhula: “Okithumihereke toko soophwanela sa ontthaara.” 32Esawu aaheera: “Kihanle vakhaani okhwa, yoopwattheya ti eheeni okhala ntthaara?” 33Wa soothesene, Yakobe aamunyeserera: “Olipele toko.” Hiiho ole aalipela amuthumiheraka munneiye soophwanela sa ontthaara. 34Vano Yakobe aamurumeela Esawu, amvahaka yooca ni nrupantakanse na irooro. Owo aahooca, anawura, aneemela, anarowa. Hiiho Esawu aaderera soophwanela sa ontthaara.

Currently Selected:

Epacerero 25: VMK2021

Highlight

Copy