Epacerero 24
24
Othela wa Isaki
1Abrahaamu aahuuluvala vancipale, ni Yave aamureeliha mwa sootheene. 2Vanonto aamweerela murumeiyaawe mutokweene aawehaweha sootheene aarinaawe sa vaatevawe: “Wiikaathi ntatanawo vatakhwiniwaka 3ni omulipele Yave Muluku a wiirimu nitho a elapo ya vathi weera ohimwaasere muthiyana mwanaka variyari wa anamwane asithiyana a oKanaani, eriyari ya yaawo miyo kimankaaka. 4Vano ontthuneya weyo orowa elapwaaka weera waamuthanlelewo mwanaka Isaki muthiyana eriyari ya asinaangolowaaka.” 5Murumeiyi ole aamukoha: “Ankha muthiyana owo aahitthuna okitthara elapweene yeela? Kimuroiheke mwaninyu elapo yeeyo mukhumelenlaanyu?” 6Abrahaamu aamwaakhula: “Nnene! Ohimuhiye mwanaka ahokoleelaka weiwo. 7Yave Muluku a wiirimu, aakivenxale vaate wa atithaka ni elapwaaka kiyariwaaka ni aakiroromelinghe ni nlipelo weera aarwa ovaha elapo ela ekhapiraaka, anaamurumihe ndyelowaawe ohoolowawo, weera weiwo wamuruuhele muthiyana mwanaka. 8Vano muthiyana owo aahitthuna orwa wenno, weyo khoonono mulattu ni nlipelo, mene ohimuhokoloxere mwanaka wuuwu.” 9Murumeiyi aahiikaathi ntatanawe vatakhwini wa Abrahaamu, apwiyaawe, analipela weera anaakwanihere masu ale. 10Vanonto, murumeiyi ole aavenya ni ahaaci muloko a apwiyaawe, akuxakatho itthu sikina sooreeraxa sa apwiyaawe. Aavenya arowaka oMesopotamiya, mpatta wa esidade Nahori aamankaawe. 11Vano, wiilaka, aahaakokhoriha aahaaci muxerexere wa ehime ya ottuttuwani yaari okhwipi wa esidade ele. Yaari ehuhu emoharu yeeyo asithiyana a esidade ele yaakhovolenlaaya orika maahi ohimeni. 12Vano aavekela: “Yave, Muluku a apwiyaaka Abrahaamu, mukivahe nihuku nna etthu yooreeraxa, ni mukhale ni murima wooreera mwaakhalelaka apwiyaaka Abrahaamu. 13Ntoko munoonaanyu, kiri va mukhwipi wa ehime ela ni asimwali a muloko wa esidade ela anrwa orika maahi. 14Muntthunihere weera kamweerela mwaamwali: ‘Okivahe maahi’ ni owo aneera: ‘Ngwure ni kinimwaavaha akamelowaanyu maahi,’ vano, akhale yoowo munthanlenlaanyu murumeiyaanyu Isaki. Hiiho, nkisuwele weera mohaareerela murima apwiyaaka.” 15Owo ahinaaye omaliha ovekela, aakhumelela Rebeka iireiyeene mwaapu. Owo aari mwaana muthiyana a Betuweli, mwaana mulopwana a Milka, mwaara a Nahori, munneiye Abrahaamu. 16Mwaamwali ole aari ooreeraxa ni oowiikosoopa, hata mulopwana mmoha kaatonke okonano. Rebeka aakhuruwela vahimeni, anarika maahi, anarowa. 17Vano murumeiyi ole aarowa woowaakuveya omukumanano, anamweerela: “Dyoontte mukivahe maahi vakhaani a mmwaapunimwanyu.” 18Owo aaheera: “Ngwureke apwiyaaka,” ni woowaakuveya aarula mwaapu anamurumeela. 19Vano amvahakaru owura maahi, aamweerela: “Nkaavahetho maahi akamelowaanyu weera ewureke mpaka waakwana.” 20Woowaakuveya aahiittha maahi iitthelaka nipuro na owura, anatthimakela ohimeni weera ariketho maahi ookwana owuriha ikamelu* sootheene. 21Vanonto, murumeiyi a Abrahaamu aangwehexexa ole amaanleene, weera oone Yave aariki akwanihere otthuna wa apwiyaawe. 22Ikamelu* iye simalihakaru owura maahi, mulopwana ole aamvaha mwaamwali ecipini ya ebeka* emoha olemelawaya, anangwariha mmoononimwawe ipangiiri piili sa eyuuma yoorikaxa, ixekeli* muloko olemelawaya. 23Vanonto aamukoha: “Weyo mwaana awani? Dyoontte okileele naariweene nipuro vaate wa atithawo weera miyo ni asikhwaaka nakonewo.” 24Ole aamwaakhula: “Miyo ti mwaana a Betuweli, mwaana a Milka ni a Nahori. 25Vano owannyihu nookhala nipuro nookwana wa nyuwo okhalawo, nitho nookhalano malaxi ni yooca yincipale yookwana oca axinama.” 26Mulopwana ole aahuurama amulapaka Yave, eeraka: 27“Ooreelihiwa ti Yave, Muluku a apwiyaaka Abrahaamu, ohihiyerenre owoonihera apwiyaaka oreerawawe murima ni ororomeleyawawe. Wa mpattaaka, Yave aakeettiha akihoolaka mphironi mpaka vaate wa asinaangolowaaya apwiyaaka.” 28Vano, mwaamwali ole aatthimakela owannyawe, anaathalihera soothesene amusaaya amayawe. 29Rebeka aakhalano acimweenaawe yiitthaniwa Labani. Awo yaavenya woowaakuveya erowaka ohimeni weera yamusuwele mulopwana ole. 30Yoonakaru ecipini ni ipangiiri mmoononi mwa murokoraya, ni emwiiwakaru Rebeka athalihaka sootheene mulopwana ole aamuleenlaawe, aavenya, anamphwanya mulopwana ole eemenleene vahimeni mukerekhere wa akamelowaawe. 31Vano yaamweerela: “Ngweeke ooreelihiwa a Yave. Mukhalenle heeni okerekhere iwo? Kooreherera empa ni nipuro na ikamelu*.” 32Vanonto murumeiyi aarowa owaani ni Labani aalamulela okuruxiwa mirindi vakameluni. Aavaha malaxi ni yooca ikamelu* iye ni maahi wa mulopwana ole vamoha ni yaawo yaari ni yoowo weera erapihe inaawo. 33Vahoolowaya yaangwiihera yooca, mene murumeiyi aaheera: “Nkirwa kica kihinaaye wooleelani etthu kirinaaka.” Labani aamweerela: “Hayaka, muulumeke.” 34Vano owo aaheera: “Miyo ti murumeiyi a Abrahaamu. 35Yave aamureeliha vancipale ni owo aakhalano mihakhu sincipale. Oomvaha ikhondoolo, imombe, iyuuma soorikaxa, arumeiyi alopwana ni athiyana, ikamelu* ni abuuru. 36Sara, mwaara a apwiyaaka, ngwuuluvalanimwawe aahaayarela mwaana ori namahiyeriwa a soothesene Abrahaamu orinaawe. 37Vano apwiyaaka yaakilipeliha, yeeraka: ‘Weyo khoorwa omwaasera muthiyana mwanaka variyari wa asithiyana a oKanaani a elapweene yeela kimankaaka. 38Orowe wa emusi ya atithaka, wa nihimonaka noohaasaasiwa weera wamwaasere mwanaka muthiyana.’ 39Vanonto kaahaakoha apwiyaaka: ‘Ankha muthiyana owo aahitthuna okitthara’ 40Awo yaakaakhula: ‘Yave Yoowo kinimurumeelaaka anoorumihele ndyelowaawe, nitho anoowerihe weera weyo weette nnenesene ni mukwaahaawo, weeratho omuruuhele mwanaka, muthiyana a nihimonaka, aani a emusi ya atithaka. 41Vano, waaphiyaka wa asinaangolowaaka ni awo yakhootta omvaha mwanaka muthiyana, weyo onuukhale ootaphuweene ni nlipelo nna. Aani, vamwaheene yoola, weyo khootthukiwa ni nlipelo nna.’ 42Olelo kiphiyakaru ohimeni koovekela: ‘Yave, Muluku a apwiyaaka Abrahaamu, waari weera mukwaahaaka ti otthunawanyu, mwiiwe nivekelonaka nna: 43Va miyo kiri yeemelelo ohoolo wa ehime ela. Vano, arwa mwaamwali orika maahi ni miyo kamweerela: ‘Dyoontte okivahe maahi weera kiwure a mmwaapunimwawo,’ 44ni owo akaakhula: ‘Ngwureke, nitho kinimwaavaha maahi akamelowaanyu,’ vano, akhale yoowo Yave omuthanlalaawe weera akhale mwaara a mwanaya apwiyaaka.’ 45Vanonto kihinaaye omaliha ovekela mmurimanimwaka, aakhumelela Rebeka iireiyeene mwaapu. Aarowa vahimeni anarika maahi, ni miyo kinamweerela: ‘Dyoontte okivahe kiwure.’ 46Woowaakuveya aarula mwaapwaawe, aneera: ‘Ngwureke. Ni kinimwaavahatho maahi akamelowaanyu.’ Miyo koowura, ni owo aahaavahatho owura maahi akamelowaaka. 47Vahoolowaya kaamukoha: ‘Weyo, mwaana awani?’ Owo aakaakhula: ‘a Betuweli, mwaana a Nahori ni Milka.’ Vano kaangwariha ecipini ni ipangiiri mmoononimwawe. 48Kaahuurama kimulapaka Yave. Kaamutthapela Yave, Muluku a apwiyaaka Abrahaamu, aakihoonle mphironi ya ekhaikhai weera kamwaasere mwanaya musulwaaya munnaya apwiyaaka. 49Vano mwatthuna owoonihera ororomeleya ni oreera murima apwiyaaka, mukileele, ni mwaahitthuna mukileeletho, weera miyo kilakele etthu yoopaka.”
Othelana wa Isaki ni Rebeka
50Labani ni Betuweli yaamwaakhula: “Eyo engweela wa Yave. Kheewo nneeraahu nooleele yooweera aani naari hoye. 51Rebeka ti yoola. Omukuxeke ni ola akhale mwaara a mwaana a apwiyaawo ntoko Yave eenraawe.” 52Vano murumeiyi a Abrahaamu iiwakaru yeeyo yaahimalaaya, aahuuramela vathi ohoolo wa Yave. 53Murumeiyi ole aamvaha Rebeka itthu sa iyuuma soorikaxa ni soowara. Anaavahatho itthu soorikaxa acimweenaawe ni amayawe. 54Vahoolowaya owo ni asilopwana ale yaamuhoonle yaahooca, enawura ni iwe yaaviriha ohiyu wootheene. Oxaawaya murumeiyi a Abrahaamu aaheera: “Mukihiye kihokoleele wa apwiyaaka.” 55Acimweenaawe ni amayawe Rebekatho yaamwaakhula: “Omuhiye mwaamwali akhaletho ni hiyo wookwana mahuku muloko. Vahoolowaya apwaheke.” 56Mene aawaakhula: “Muhicerewihe ohokolowawaka, niwoko Yave oheettiha mukwahaaka nnenesene. Mukihiye kirowe weera kihokoleele wa apwiyaaka” 57Awo yaamwaakhula: “Nrowe nimwiitthane mwaamwali weera noone aneeraawe ahime.” 58Vano yaamwiitthana Rebeka, enamukoha: “Weyo wootthuna orowa ni mulopwana ola?” Owo aawaakhula: “Aani, kinoorowa.” 59Amusi yaaraxelana ni acimweenaawe Rebeka, murumeiyaawe, murumeiyi a Abrahaamu ni asilopwana yaamuhoonle. 60Yaamureeliha Rebeka emweerelaka: ”Wunnuwe murokorihu mpaka okhale maayi a atthu ancipalexa! Ekhapiraawo ewine isidade sa amwiittanaawo.” 61Vahoolowaya Rebeka ni arumeiyaawe yaahiireherera, enawela ikamelu*, enamutthara murumeiyi a Abrahaamu. Ni hiiho aamukuxa Rebeka, anapwahano. 62Vano, Isaki eera awaaka oBeher-Lahi-Royi, niwoko aamanke oNegeba. 63Oxekuwa omoha, aavenya akelaka omatta weera atthokelele. Attukhulaka maitho, aahoona ikamelu* saattamelaka. 64Rebekatho aattukhula maitho ni aamoona Isaki. Owo aakhuruwa wakameluni, 65anamukoha murumeiyi a Abrahaamu: “Mulopwana taani yoole ongweela omatta aniciceeraka?” Owo aamwaakhula: “Ti apwiyaaka.” Vano Rebeka aakhuneela ekhovaawe ni ekuwo. 66Vahoolowaya, murumeiyi aamuthalihera Isaki sootheene seereiye. 67Isaki aamuroiha Rebeka muheemani mwa amayawe Sara. Aamuthela ni aamusivela. Ni hiiho Isaki aapepeseya okhwa wa amayawe.
Currently Selected:
Epacerero 24: VMK2021
Highlight
Share
Copy
Want to have your highlights saved across all your devices? Sign up or sign in
Makhua Shirima Bible © Christelike Lektuurmaatskappy NPC, 2021.
