Epacerero 28

1Isaki aarumiha wiitthaniwa Yakobe, anamureeliha, anamuleela: “Ohimuthele muKanaani. 2Oroweke oPadan Aram, owannyawe Betuweli, apwiyaawo, ni wamuthanlewo mwaarawo variyari wa anamwane asithiyana a atatawo Labani. 3Muluku a ikuru sootheene ooreelihe ni oovahe ekhapira yoowaatta, moota wooweera mwa weyo siphattuwe miloko sincipale. 4Ekhale ni weyo ni ekhapiraawo mareeliho aareelihiwaaweno Abrahaamu, weera weyo olamule elapo yeela onkhalaawo ntoko namarwa, aani elapweene yeela Muluku aamvanghaawe Abrahaamu.” 5Isaki aamulaxera Yakobe anarowa oPadan Aram, vaate wa Labani aari mwaana a Betuweli ngwArami, acimweenaawe Rebeka, amayawe Yakobe ni Esawu.

Esawu onimuthela mwaana muthiyana a Iximayeli

6Esawu aahiiwa weera Isaki aamureeliha Yakobe ni aamurumiha orowa oPadan Aram weera amuthele muthiyana a wuuwu, nitho weera amureelihaka, aamulamulela eeraka: “Ohimuthele muKanaani.” 7Aasuwelatho weera Yakobe aawiiwelela atithawe ni amayawe, anarowa oPadan Aram. 8Vano Esawu aasuwela weera Isaki khaatthuna anamwane asithiyana a oKanaani. 9Esawu aarowa wa Iximayeli ni, waahiya toko axaariye akina, aamuthelatho Mahalati, munneiye Nebayothi ni mwaana a Iximayeli, mwaana a Abrahaamu.

Wooneya wa makweelelo a Yakobe

10Yakobe aavenya oBerxeba arowaka oHarani. 11Aaphiya vanipuroni nimoha ni wiilaka, aaheemela weera akone. Aakuxa nluku nimoha na nipuro nenenenne, anaphiteera waamuruwawe, anakona. 12Vano moolohani aahoona makweelelo yeemexiweene vathi, ni osulu wa makweelelo waatava erimu. Vanonto andyelo a Muluku yeera ekhuruwaka, akina ewelaka vamakweeleloweene yaale. 13Yave aari mukhwipimwaya, aneera: “Miyo ti Yave, Muluku a Abrahaamu apwiyaanyu ni Muluku a atithinyu Isaki. Elapweene yeela mukonnaanyu kinikoovaheeni, vamoha ni ekhapiraanyu yootheene. 14Ekhapiraanyu eniikhale ntoko ntthupi na etthaya ni eniimake okhuma ninkhuma nsuwa mpaka ninkela nsuwa, nitho oottuttuwani mpaka ohitto wa elapo, ni mwa miloko sootheene sa mulaponi nsireelihiwe niwoko na nyuwo ni ekhapiraanyu. 15Vano Miyo kiri ni nyuwo, ni nkookosoopeni mpaka weiwo muneeraanyu murowe, ni nkoohokoloxereni elapweene yeela, niwoko nkirwa koohiyaani mpaka eneeraaya epakeye yeeyo koororomelinghaakani.” 16Yakobe avenyakaru, aaheera: “Woohihovela, Yave ori nipuro nenenenna ni miyo nkaasuwenle.” 17Vano oovaka aapwaherera: “Nipuro heeni noowoopiha ntoko nna! Nna khanihiyono nipuro nikina ehikhanle Empa ya Muluku. Ola ti mulako wa wiirimu.” 18Waaxiiye oxeexelo Yakobe aakuxa nluku aaphiteenraawe waamuru, aaheemexa ntoko nrimbu, anamiinela makhura vasuluwaya. 19Aatteha nipuro nenenenne Beteli yaari mweeraru esidade ele khalayeene yiitthaniwa Luzi. 20Vano Yakobe aalipela muneenaawe eeraka: “Muluku akhala ni miyo, akikosoopa ni mukwaheene yoola kimpakaaka, akivaha epaawu weera kice ni soowara weera kiwareke 21ni akihokoloxera oocekendeyeene vaate wa atithaka, vano Yave anaakhale Mulukwaaka. 22Nluku nna keemenxaaka olelo ntoko nrimbu nnikhale Empa ya Muluku, ni sootheene muneeraanyu mukivahe, miyo kinimoovahanitho yanaamuloko.”

Currently Selected:

Epacerero 28: VMK2021

Highlight

Copy