Epacerero 19

Ophwatiwa wa oSodoma ni oGomora

1Wiilaka, andyelo eeli ale yaaphiya oSodoma, ni Loti eera akilaantheene vamulako wa esidade. Awoonakaru, aaheemela, anarowa owaakhelela, anuuramela vathi. 2Vano aaheera: “Asipwiyaka, dyoontte, mukihoole vaate wa murumeiyaanyu weera mwarapihewo inaawosanyu, ni mmwavirihe ohiyu wootheene weiwo. Omaalo oxeexelo mwapwaherereke ni mukwaahaanyu.” Awo yaamwaakhula: “Hoye, hiyo nnivirihe ohiyu munseweni.” 3Loti aahaanyesereriha vancipale, ommaleloniwaya yaamuhoola, enavolowa mpaanimwawe. Loti aalamulela weera ereherereliwe yooca, ni yooxeriwe epaawu yoohikhala eferementu ni awo yaahooca. 4Vano nlelo yeera ehinaaye orowa okona, atthu ootheene a esidade ya oSodoma, okhuma asimiravo mpaka asitokweene, yaarukurera empa. 5Yaamwiitthana Loti enamweerela: “Ari woowi asilopwana awiiye ohiyuweene yoola vaatevawo va? Oniruuhele hiyo vaate va – nintthuna okonano yaawo.” 6Loti aakhuma mpaani, anawala nsele ottuli ottuli. 7Vano aaheera: “Hoye asinthamwenaaka, muhipake etthu yootakhala eyo. 8Moone ha, miyo kookhalano asinamwane eeli nlelo axaaruusi. Kinimooruuhelani weera mwaapake yeeyo nyuwo muntthunasaanyu. Muhaapake etthu asilopwana ala, niwoko aaphiya vaatevaka ni amphwanela waakihawaka.” 9Vano yaakhuwela: “Ovenye vamulako!” Eneera: “Mulopwana ola oophiya nno ntoko namarwa, vano ontthuna wiipaka mphuki! Nnimoopaka weyo wootepaxa waapwaha yaawo.” Yaamukakha Loti yeerelaka okakharula nsele. 10Vano aletto eeli ale yaamvara Loti, enampurulela mpaani, enawala mulako. 11Vahoolowaya atthu yaari vamulako yaakhalihiwa evaasi, okhuma asimiravo mpaka asitokweene, moota wooweera yaahooceela woona mulako. 12Asilopwana eeli ale yaamukoha Loti: “Nyuwo mookhalano mutthu mukina musidadenimu – ntoko asikamwene, anamwane asilopwana ni asithiyana, naari mmusi mukina? Mwaakhumihe mu, 13niwoko nihanle vakhaani ophwata nipuro nenenenna. Soowoothera sipakeleiye muloko ola sootepa waatta moota wooweera Yave onirumihenlaawe ophwata esidade.” 14Vano Loti aarowa wuuluma ni asikamwenaawe yeera yaatheleke anamwanaawe weera evenye woowaakuveya nipuro nne, niwoko Yave aahanle vakhaani ophwata esidade. Aletho yuupuwela weera ole oopa mwaha. 15Oxaaka, andyelo yaamunyeserera Loti, yeeraka: “Mwaakuveke, mwaakuxeke amwaarinyu, ni anamwaniinyu eeli weera muhikhwe Yave aattaruxaka esidade ela.” 16Vano owo nlelo ahovelaka, asilopwana yaamvara ni matata vamoha ni mwaariye nitho anamwanaawe asithiyana eeli, enaakhumiha mmwe yaanyesereraka, enawiikaathi okerekhere wa esidade, niwoko Yave aahaamorela ikharari. 17Yaavenxaka musidadeni, mmoha a yaale eeli aamweerela Loti: “Mutthawe weera muurele okumi! Muhiwehe ottuli, hata muheemele vamuhawalawani. Mutthaweleke onyaakoni mwaaheera hiiho munimookhwa.” 18Wa soothesene, Loti aaweerela: “Hoye, apwiyaaka! 19Murumeiyaanyu oovuluwa ni oreerawanyu murima niwoko Yave aareera murima wa miyo, uurelaka okumaaka. Nkingwera otthawela onyaakoni, niwoko nkiphwanyiwe ni nttaruxo nno kikhweeke. 20Vano, vakhiviru va, yookhala esidade emoha ekhaanene. Yookhuveelaxa, wookwana otthawelawo. Mukihiye kitthawelewo erimweeraru ereene ekhaanene, nkavuluwewo.” 21Owo aamwaakhula: “Paahi, kinoowaakhulelani nivekelo nno. Nkinrowa ophwata esidade mwa yeeyo nyuwo munghimaanyu. 22Mutthaweke mwaakuveke, niwoko nkingwera opaka etthu nyuwo muhinaaye opwahawo.” Tivawo esidade ele yiitthaniwaaya Zowari. 23Loti aphiyakaru oZowari, nsuwa naakhuma mweelaponi yootheene. 24Vano Yave muneenaawe aarupihela oSodoma ni oGomora enxofre ni mooro okhumelelaka wiirimu. 25Hiiho Owo aaphwata isidade piili iye ni mukhwipimwaya moothemwene, vamoha ni atthu oottheene yaamanke isidade iye, nitho sootheene saamenle mwemmwe. 26Vano amwaariye Loti yaaweha ottuli, enathatuwa pontto a maakha. 27Oxaawaya Abrahaamu aavenya, anahokoleela nipuro nenenenne aaraawewo ohoolo wa Yave. 28Awehaka oSodoma ni oGomora ni oreyareyani wootheene, aahoona mwiixi mwincipale otthuwakawo ntoko niikho ntokotoko. 29Muluku aphwatakaru isidade iye sa elapo ele, aamuupuwelela Abrahaamu, anamvenxa Loti mwa ophwata iwe waaphwante isidade piili iye Loti aamankaawe. 30Loti aavenya oZowari ni anamwanaawe eeli asithiyana, anarowa omaka onyaakoni, niwoko aamova opwaherera omaka oZowari. Owo vamoha ni anamwanaawe eeli yaakhala munikhukuni nimoha. 31Vano nihuku nimoha, mwaana mutokweene aamweerela mukhaani: “Atithihu ahuuluvala. Vano khanaattamanne ni atthu akina weera enithele ntoko akhovelenlaaya atthu ootheene a elapo ya vathi yootheene. 32Nrowe, naavahe eviinyu atithihu, naakonaneke weera enivahe ekhapira.” 33Ohiyuweene yoole yaahaavaha eviinyu atithaya ni mwaana muthiyana mutokweene aavolowa, anaakonano. Vano awo khayaasuwenle weera ole aakonawo naari aavenyaawe. 34Oxaawaya mwaana muthiyana mutokweene aamweerela mukhaani: “Osilo ohiyu kookonano atithaka. Nrowe naavahetho eviinyu, ni weyotho okonaneke, weera nipwahereriheke ekhapira ya atithihu.” 35Vano emaara ekinatho yaahaavaha eviinyu atithaya ohiyuweene yoole, ni mwaana muthiyana mukhaani aakonano, owo ahisuwelaka weera ookonano naari aavenyaawe. 36Hiiho anamwane eeli ale a Loti yaarupalihiwa ni atithaya. 37Mwaana muthiyana mutokweene aamuyara mwaana mulopwana, anamutteha nsinanawe Mowabe. Owo ti tiithi a aMowabe ari mpaka olelo. 38Mwaana muthiyana mukhaani aamuyara nave mwaana mulopwana, anamutteha nsinanawe Ben-Ami. Owo ti tiithi a awAmoni ari mpaka olelo.

Currently Selected:

Epacerero 19: VMK2021

Highlight

Copy