Epacerero 20

Abrahaamu oGerari

1Vano Abrahaamu aavenya weiwe arowaka elapo ya oNegeba, anarowa omaka eriyari ya oKade ni oXuri. Vano, aakhala wa mahuku makina oGerari. 2Owo eera weera maariye Sara aari murokoriye. Vano Abimeleki, mwene a oGerari, aarumiha oroweliwa Sara, anamukuxa. 3Wa soothesene, Muluku aahoowa wa Abimeleki moolohani, anamweerela: “Weyo onimookhwa! Muthiyana omukuxalaawo ootheliwa.” 4Vano, Abimeleki nlelo eera ahinaaye okonano ni aaheera: “Yave munoophwata muloko woohikhalano nthowa? 5Khahiyono yoowo okeerenle: ‘Ola murokoraka’? Ni muthiyana munenaawe eenre: ‘Ala acimweene’? Yeeyo kipankaaka, kipanke ni murima wootteeleene ni matata ooreereene.” 6Vano Muluku aamwaakhula moolohani: “Aani Miyo koosuwela weera weyo opanke yeeyo ni murima wootteela. Miyo muneenaaka koowooceeliha weera ohikitthekele Miyo, tivawo kihootthunihenraaka omutava. 7Vano, omuhokoloxere mwaneene a muthiyana owo. Owo mprofeeti, onimoovekelela weera weyo ohikhwe. Mene waahimuhokoloxera, osuwele nnenesene weera weyo vamoha ni amusaawo onimookhwa.” 8Oxaawaya Abimeleki aahaalattula anamalakaawe ootheene ni aathaliherakaru yeeyo yaamukhumelenle, yaahoova vancipale. 9Vahoolowaya Abimeleki aamwiitthana Abrahaamu, anamweerela: “Onipankeni? Kootthekenle eheeni okiruuhelaka nthowa ntokotoko miyo vamoha ni omwenaaka? Yeeyo okipankaawo kheehiyono etthu yooreera omupaka mukhwaawo.” 10Vano Abimeleki aamukoha Abrahaamu: “Eweeringhe eheeni opakaka yeela?” 11Abrahaamu aamwaakhula: “Miyo kohiixeerela mwaneenaaka: ‘Vekhaikhai khaawo ammoova Muluku nipuro nna, ni eniikiive mwaha wa mwaaraka. 12Ohiya toko yeeyo, vekhaikhai owo murokoraka wa mpatta wa atithaka ohikhanle mpatta wa amaayi, anakhala mwaaraka. 13Vano Muluku aakivenxaawe vaate wa atithaka, miyo kaamweerela: Wiixoonihereke onnenaawo moota ha: mmapuroni moothemwene nneeraahu niroweke, weereke: ‘ala acimweene’.’“ 14Vano Abimeleki aakuxa ikhondoolo, ni imombe, ipottha ilopwana ni ithiyana, anamvaha Abrahaamu, anamuhokoloxera mwaariye Sara. 15Vano Abimeleki aamweerela: “Elapwaaka eri ohoolowawo – omakeke ontthunaawo.” 16Vanonto, aamweerela Sara: “Koomvaha murokoriyo ixekeli* macira muloko weera kiwoonihere awawo ootheene weera khoonono nthowa ni ahikhale aneera awoothere etthu.” 17Abrahaamu aamvekela Muluku ni Owo aamulamiha Abimeleki, amwaariye ni mpaka ipotthasawe ni hiiho yaaweratho oyara. 18Vano, ehinaaye, Yave aahaakhaliha asimwali eekupa asithiyana ootheene a vaate wa Abimeleki mwaha wa Sara, mwaara a Abrahaamu.

Currently Selected:

Epacerero 20: VMK2021

Highlight

Copy