Epacerero 18

Muluku onimuroromeliha mwaana Abrahaamu.

1Yave aahiixoonihera wa Abrahaamu vakhiviru wa nyiri sa ikarivalyu* sa oMamre, akilaathiyeene vamulako wa eheemaawe, mwa ehuhu yoovihaxa ya othana. 2Abrahaamu aawoona asilopwana araru yeemenleene woorakamela vakhaani. Awoonakaru, aavenya vamulako wa eheemaawe, anaatthimakela weera aakumaneno, anuuramela vathi. 3Vano aaheera: “Asipwiyaka, mwakitthunela, muhivire wa murumeiyaanyu muheemenle. 4Kinooruma oroweliwa maahi vakhaani weera murapihe inaawo nitho weera mwiitthuuwe vakhaani vathi wa mwiri ola. 5Vano woonaka weera moophiya wa murumeiyaanyu, kinimooruuhelanitho yooca, weera mpwaherere weetta ni ikuru.” Awo yaamwaakhula: “Paahi, opakeke ntoko ohimalaawo.” 6Woowaakuveya Abrahaamu aavolowa muheemanimwawe anamweerela Sara: “Waakuveke – okuxe mipatta miraru sa ephepa ya etrigu yooreeraxa ni weetheye opake ipaawu.” 7Vahoolowaya aatthimakela omuhuwoni, anathanla emombe exaana yooneneva, anamvaha murumeiyaawe weera aakuvihe oreherera. 8Vano aaruuha emombe exaana yoorehereriweene, mukaka ni manteeka saarehereriwe, anaarumeela. Ecaaka, owo aaweemelela vathi wa mwiri. 9Vano yaamukoha: “Ari woowi amwaarinyu Sara?” Owo aawaakhula: “muheemani mmwe.” 10Mmoha a yaawo aaheera: “Mwaahiyu ehuhuweene yeela, kinimoohokoleelani. Vano Sara anaamuyare mwaana.” Sara eera iiwelelaka vamulako wa eheema, ottuli wa Abrahaamu. 11Abrahaamu ni Sara yaahuuluvala vancipale, ni wa Sara, saavira misingu sooweera ayare. 12Tivawo Sara iitheyaawe uupuwelaka: “Hiyo nuuluvanleene, weeraka kinookhalano yooreera eyo?” 13Vano Yave aamweerela Abrahaamu: “Heeni Sara oniitheyaawe eeraka: ‘Vekhaikhai kinoowera omuyara mwaana hiiha kuuluvanleene?’ 14Yookhala etthu yoohiwereya wa Yave? Mwaahiyu ehuhuweene yeela kinimoohokoleelani ni amwaarinyu anookhalano mwaana mulopwana.” 15Sara aahoova vancipale tivawo aarunnaawe eeraka ‘miyo nkitheiye.’ Vano owo aaheera: “Ohirune, weyo wootheya. 16Vano asilopwana ale yeemenlaaya weera epwaheke, yaaweha mpatta wa oSodoma, ni Abrahaamu aahaahoola weera eraxelane. 17Vano Yave aaheera: “Kinoomwiipithiha Abrahaamu yeeyo kihanlaaka vakhaani opaka? 18Abrahaamu anaakhale tiithi a muloko mutokotoko ni woolipaxa, ni mwaha wa yoowo miloko sootheene sa mweelaponi nsireelihiwe. 19Vano Miyo kimuthanlenle weera aweettihe anamwanaawe ootheene ni ikhapirasawe sootheene weera etthare ephiro ya Yave, epakaka yeeyo eri yoororomeleya ni yoowookowa. Hiiho Yave onoomukwaniherela Abrahaamu yeeyo aamuroromelinghaawe.” 20Vano Yave aamweerela: “Soowootheriwa sa oSodoma ni oGomora sootepa waattaxa ni yootthekaaya eri yoowoopiha, 21moota wooweera kinookhuruwelawo weera koone seiyo ampakaaya saalikanaka ni yeeyo kiiwalaaka.” 22Asilopwana ale yaarowa mpaka oSodoma, mene Abrahaamu aapwaherera okhala vamaithoni wa Yave. 23Abrahaamu aamwaattamela, amweerelaka; “Weeraka munrowa waaphwata atthu oohikhala ni nthowa vamoha ni yaawo ari ni nthowa?” 24Noone ha: “Yakhala atthu miloko mithanu oohikhalano nthowa esidadeene yeele, munrowa ophwata? Khamunrowa wuurela nipuro nno niwoko na waasivela atthu miloko mithanu yaale ari mwemmo? 25Khoongwereya wa Nyuwo opaka etthweene yeeyo omuthorihela okhwa mutthu oohikhalano nthowa vamoha ni mutthu orino nthowa. Mooteene yoowo khoongwereya wa Nyuwo waapakela moota mmoha atthu oohikhalano nthowa ni ookhalano nthowa. Nyuwo muri Mphuki a elapo ya vathi yootheene, ontthuneya othoriha nnene.” 26Yave aamwaakhula: “Miyo kaaphwanya miloko mithanu oohikhalano nthowa oSodoma, nkuurele esidade yootheene niwoko na waasivela yaawo.” 27Vano Abrahaamu aapwaherera wuuluma: “Koosuwela weera kootaphuwa woowuuluma ni Adonai, kiroohipwaharu etthaya ni ettuura. 28Ankha yahaleela athanu okwana miloko mithanu oohikhalano nthowa? Munophwata esidade niwoko na ohaleela athanu?” Owo aaheera: “Kaaphwanya atthu miloko mixexe naathanu oohikhalano nthowa, nkinrowa ophwata.” 29Abrahaamu aanyesera: “Ankha mwaaphwanya atthu miloko mixexe paahi?” Owo aamwaakhula: “Mwaha woowaasivela atthu miloko mixexe, nkinrowa ophwata.” 30Vano Abrahaamu aapwaherera: “Adonai, muhinyoonyiwe, mene mukitthunihere wuulumatho. Ankha mwaaphwanya atthu miloko miraru paahi?” Owo aamwaakhula: “Kaaphwanya atthu miloko miraru, nkinrowa ophwata.” 31Abrahaamu aapwaherera: “Vano hapo kootaphuwa woowuuluma ni Yave, kinookoha: Ankha mwaaphwanya atthu miloko miili paahi?” Yave aamwaakhula: “Niwoko na waasivela atthu miloko miili, nkinrowa ophwata.” 32Vano Abrahaamu aaheera: “Muhinyoonyiwe, Adonai, mene mukitthunihere wuuluma emaara emoha paahi. Ankha mwaaphwanya paahi muloko?” Owo amwaakhula: “Niwoko na waasivela atthu muloko, nkinrowa ophwata.” 33Amalihaka Yave wuuluma ni Abrahaamu, aapwaha ni Abrahaamu aahokoleela oheemaniwawe.

Currently Selected:

Epacerero 18: VMK2021

Highlight

Copy