Miteko 9

Orukunxa murima wa Sawuli

1Yeereiyaka yeeyo, Sawuli aatepaxa owoopopihera okhwa oohuseraaya Apwiya. Aarowa wa mutokweenexa a asaserdoti* 2amvekelaka ikaratta wa iSinagoga sa oDamasku, sineera weera aaphwanya weiwo alopwana, hoye hoye athiyana ari a Ephiro, awere waakuxa ootthukiweene, aaronghaka oYerusaleemu. 3Eettaka hiihaale, akhuveelaka oDamasku, vaanaanoru waahaara waara mukhwipimwawe okhumelelaka wiirimu. 4Owo aamorela vathi ni aahiiwa nsu naamweerela: “Sawuli, Sawuli, heeni nyuwo munkisoondaanyu?” 5Sawuli aakoha: “Nyuwo taani Apwiya?” Awo yaamwaakhula: “Miyo Yeesu, mwa Yoowo nyuwo munimusoondaanyu. 6Muvenye ni mwavolowe musidade, vano mukina anooleeleni yeeyo entthuneya weera mupakeke nyuwo.” 7Alopwana yeentte vamoha ni Sawuli yaaheemela ootikhineene, niwoko yaahiiwa nsu, mene khayaamoonne mutthu. 8Sawuli aavenya vathi, ni ahulaka maitho, khaawenre woona etthu. Hiiho yaamukuxa emvarelaka matata mpaka oDamasku. 9Wookwana mahuku mararu owo aari oohoona, ni khaaciiye, naari khaawunre. 10oDamasku aakhala oohusera mmoha iitthaniwa Ananiya. Apwiya yaamwiitthana mmooneloni, yeeraka: “Ananiya.” Owo aawaakhula: “Kiri va, Apwiya.” 11Apwiya yaamweerela: “Murowe owannyawe Yudasi, mmuseweni oniitthaniwa Woowookowa, ni mwakohakohe weiwo sa mulopwana mmoha a oTarso oniitthaniwa Sawuli. Owo onoovekela, 12ni mmooneloni aamoona mulopwana mmoha iitthaniwa Ananiya aphiyaka ni amwiiyaatheraka matata weera oonetho.” 13Ananiya aawaakhula: “Apwiya kohiiwa itthu sincipale sa mulopwana owo ni sa soonanara sootheene owo onaapakelaawe ootteelaanyu ari oYerusaleemu. 14Owo aaphiya va ni ikuru sa ahooleli a asaserdoti* weera aatthuke ootheene aniitthana Nsinananyu.” 15Apwiyatho yaamweerela Ananiya: “Muroweke, mulopwana owo ti exaavaaka yoothanliwa weera ekuxe Nsinanaka wa amalapo, mamwenaaya ni wa muloko wa aYixrayeli. 16Miyo nkimoonihere sootheene owo aneeraawe ahaawe niwoko na Nsinanaka.” 17Vano Ananiya aarowa, anavolowa mpaani, anamwiikaathera matata, anamweerela: “Munna Sawuli, Apwiya Yeesu yiixoonihenre wa nyuwo mphironi mwaarwaanyuwo, aakirumiha weera nyuwo moonetho ni musareye Munepa Wootteela.” 18Woowaakuveya itthu sinlikana ntoko makamba saamora mmaithoni mwa Sawuli ni owo aahoonatho. Aavenya, aapatisiwa, 19ni acaakaru, aalipa mmakhuvani. Sawuli aalekela mahuku makina ni oohusera a oDamasku.

Sawuli oDamasku ni oYerusaleemu

20Khuluwi aapacera olaleiya muSinagogani* weera Yeesu ti Mwaana a Muluku. 21Ootheene yaale yaamwiiwa, yaatikhina ni yaakoha: “Khahiyono owo mulopwana ole aasaasa waaphwata oYerusaleemu yaale aniitthana Nsina nna? Ni khaarweenletho va weera aaronghe ootthukiweene wa ahooleli a asaserdoti*?” 22Wa soothesene, Sawuli annatepa wiilipihera, ni annaavaanya aYuda yaakhala oDamasku, awooniheraka weera Yeesu ti Kristu. 23Eviraka mahuku mancipale, aYuda yaavaanela omwiiva Sawuli, 24mene owo aasuwelihiwa yoovaanelaaya. Ohiyu ni othana awo yaawehaweha milako sa esidade weera emwiive. 25Oohuseratho yaamukuxa ohiyu omoha ni yaamukuruxela mmuttaankani emvirihaka vanlakani na exiri. 26Aphiyaka oYerusaleemu, aaheerera wiithukumanyiha ni oohusera, mene ootheene yaamoova, ehiroromelaka weera aari oohusera a ekhaikhai. 27Vano Barnaba aamukuxa amuronghaka wa arummwa. Owo aahaathalihera moota owo aawoonnaawe Apwiya mphironi, mwa yaawo yaamuleela, ni moota owo aalaleiyaawe ni murima woolipa oDamasku mwa Nsina na Yeesu. 28Hiiho Sawuli aakhala ni yaawo, ni eetta oohooceelihiwa uulumaka ni murima woolipa mwa Nsina na Apwiya. 29Uulumano aGrego ni annavaanyihana ni yaawo, mene awo yaaheerera omwiiva. 30Asuwelaka yeeyo, axunna yaamukuxa mpaka oSesareya ni yaamurumiha oTarso. 31Ekerexa yaakhalano ehuhu ekina ya murettele oYudeiya, oGalileiya ni oSamariya wootheene. Eyo yaamwiipuhiha ni, elipihiweene ni Munepa Wootteela, yaandyeerereya atthu oororomela, yeettaka mowoovani Apwiya.

Aneya ni Dorka

32Eetteettaka ilapo sootheene, Pedru aarowa waaxekura ootteela yaakhala oLida. 33Iwe aamuphwanya mulopwana mmoha ooheetta, iitthaniwa Aneya, aakhala vabeettini wa iyaakha ithannatthaaru. 34Pedru aamweerela: “Aneya, Yeesu Kristu onimoolamihani. Muvenye ni mureherere ebeettaanyu.” Owo aavenya woowaakuveya. 35Ootheene yaakhala oLida ni elapo ya oSarona yaamoona, ni yaahaarukunxela mirimasaya Apwiya. 36Vano, aakhala oYope oohusera muthiyana mmoha iithaniwa Tabita (eyo tiiyo yootaphuleliwa Dorka), mwa yoowo aakhala ni nthiti opaka miteko sooreera ni ovaha soovaha. 37Wa mahuku ale owo aavoreiwa ni aahookhwa, ni erapihakaru erutthwaawe, yaahiikaathiwa mukwartuni mwa empa ya musulu. 38Esidade ya oLida yaari vakhiviru wa oYope, ni oohusera yiiwalaaya yeeriwaka weera Pedru aari oLida, yaamurumihela asilopwana eeli weera emweerele: “Muhipise orwa wa hiyo.” 39Pedru aahaahoolela ni aphiyakaru, aaronghiwa mukwartuni mwa empa ya musulu. Asinaamukhweli ootheene yaamurukureera, yiinlaka ni emooniheraka soowara ni ikuwo sikina Dorka aapankaawe nlelo areene vamoha ni yaawo. 40Pedru aalamula weera ootheene ekhume mukwartuni mmwe. Vano aakokhora ni aavekela. Vahoolowaya, arukunuwelaka wa muthiyana ookhwa, aamweerela: “Tabita, muvenye!” Owo aahula maitho, ni amoonaka Pedru, aakilaathi. 41Amvarelaka ntata, aamukhavihera weemela. Vano, awiitthanaka ootteela ni asinaamukhweli, aawoonihera muthiyana areene ni okumi. 42Eyo yaasuweliwa oYope wootheene ni ancipale yaaroromela mwa Apwiya. 43Pedru aakhala oYope ehuhu ekina, mpaani mwa naxapala iitthaniwa Simeyoni.

Currently Selected:

Miteko 9: VMK2021

Highlight

Copy