Miteko 8

Osoondiwa ni omwalamwala wa ekerexa

1Ni Sawulitho aahaakhulela wiiviwa wa Stefano. Vanihukuni nne waakhumelela osoondiwa otokotoko ni ekerexa ya oYerusaleemu. Ootheene ehikhanle arummwa yaamwaramwareya mweelaponi ya oYudeiya ni oSamariya. 2Atthu akina a murima wa omuluku yaamvitha Stefano ni yaamulalamikela vancipale. 3Vano Sawuli aapacera ophwata ekerexa. Arowaka empa ti empa, aahaatthuka alopwana ni athiyana ni aahaavonyera mukaliposo.

Filipe oSamariya

4Yaawo yaamwalamwanle, yannalaleiya masu a Muluku weiwo yaatthunaaya orowa. 5Aphiyaka Filipe esidade emoha, iwe aahaalaleera sa Kristu. 6Atthu ancipale emwiiwaka Filipe, ni yoonaka ineneero sootikhiniheya owo aapakaawe, awo yaahiiwa nnenesene yeeyo Filipe aahimaawe. 7Minepa soonanara saavenya wa atthu ancipale sikhuwelaka, ni ooheetta ni ootuthunya ancipale yaalamihiwa. 8Hiiho waakhala ohakalala otokotoko wa esidade ele.

Simeyoni namacitta

9Vano, aakhala mulopwana mmoha musidadeni mmwe iitthaniwa Simeyoni. Apakaka sa okhwiri wa ehuhu ekina, aatikhiniha muloko wootheene wa oSamariya. Owo iixeera oottittimiheyaxa, 10ni muloko wootheene, okhuma asikhaani mpaka asitokweene, yaahiiwa yeeriwaka: “Mulopwana ola ti ikuru sa Muluku, oosuweliwa ntoko ikuru sitokotoko.” 11Awo yaamutthara, niwoko owo ahaatikhiniha ni macittaawe wa ehuhu yincipale. 12Vanonto, aalaleeraka Filipe masu ooreeraxa a omwene wa Muluku ni a Nsina na Yeesu Kristu, awo yaamuroromela ni yaapatisiwa – alopwana nitho athiyana. 13Simeyoneene yoowo aaroromelatho ni aapatisiwa. Aamutthara Filipe woohimuhiyerera, awehaka ootikhinihiweene ineneero sitokotoko ni sootikhiniha saapakiwa. 14Yiiwaka arummwa a oYerusaleemu weera aSamariya yaahaakhulela masu a Muluku, yaamurumiha weiwo Pedru ni Yohaane. 15Awo ephiyaka, yaahaavekelela aSamariya a nroromelo weera yaakhele Munepa Wootteela, 16niwoko Munepa nlelo khawaamukhuruwenle naari mutthu mmoha a yaale. Awo yaapatisiwa mwa Nsina na Apwiya Yeesu paahi. 17Vano Pedru ni Yohaane yaawiikaathera matata, ni awo yaahaakhela Munepa Wootteela. 18Oonaka Simeyoni weera Munepa waavahiwa ni wiikaatheriwa matata a arummwa, aakhumiha musurukhu weera aavahe, 19ni aaweerela: “Mukivahetho ikuru iya weera mutthu kineeraaka kimwiikaathere matata, aakhele Munepa Wootteela.” 20Pedru aamwaakhula: “Muriheye vamoha ni musurukhwaanyu! Munuupuwela weera munoowera othuma yamahala ya Muluku ni musurukhu? 21Khamunono mpatta naari ikuru mmutekonimu, niwoko murimaanyu khooreenre ohoolo wa Muluku. 22Murukunxe murimaanyu wa yoonarara ela ni mwaavekele Apwiya. Apaale awo eniyooleveleleni wuupuwela wu mmurimanimwanyu, 23niwoko kinoona weera nyuwo moosareyaxa nrima ni ootthukiweene ni soottheka.” 24Vano Simeyoni aamwaakhula: “Mukivekelele miyo wa Apwiya weera ehikikhumelele naari etthu emoha ya seiyo munuulumaanyu.” 25Emalihaka okhalela onamoona ni olaleiya masu a Apwiya, Pedru ni Yohaane yaahokoleela oYerusaleemu, elaleiyaka masu ooreeraxa mmittettheni sincipale sa aSamariya.

Filipe ni muTiyopiya

26Ndyelo mmoha a Apwiya aamweerela Filipe: “Murowe ohitto wa ephiro yoothowa atthu enrowa oYerusaleemu mpaka oGaza.” 27Hiiho owo aavenya, ni eettaka mphironi, aamoona enoko* wEtiyopiya, mutokweene oottittimiheyaxa a Kandasi*, eyo tiiyo pwiyamwene a wEtiyopiya, namalamula a mihakhusawe sootheene. Mulopwana owo aarweenle oYerusaleemu weera alape, 28ni vano aahokoleela owaani, akilaathiyeene mukaaronimwawe asomaka elivuru ya mprofeeti Yesaya. 29Munepa waamweerela Filipe: “Mwaattamele ekaaro ele ni mweette ni yeeyo.” 30Vano Filipe aatthimakela ekaaro, aamwiiwa mulopwana asomaka elivuru ya mprofeeti Yesaya, ni aamukoha: “Nyuwo munimwiiwexexa yeeyo munsomaanyu?” 31Owo aamwaakhula: “Nkiiwexexe hai, ahikhanle mukina onkithalihera?” Hiiho aamwiitthana Filipe weera awele ni weera akilaathi mukerekheremwawe. 32Mulopwana owo aamweera osoma mpatta ola wa Yoolempwa*: “Aakuxiwa ntoko ekhondoolo enronghiwa vanipuroni na wiiviwa, ni ntoko eputtiputthi yoomaala vamaithoni wa namamettha, Owo khaahunle eyanowaawe. 33Mooyevihiwanimwawe aakhoottihiwa ekhaikhai. Taani ongwera wuuluma sa ekhapiraawe, niwoko okumaawe ovenxiwe mweelaponi.” 34Vano enoko* ole aamukoha Filipe: “Dyoontte, mukileele, mprofeeti onuuluma sa taani – onuuluma sa muneenaawe, naari sa mukina?” 35Filipe, apaceraka ni mpatta ole wa Yoolempwa*, aamulaleera masu ooreeraxa a Yeesu. 36Yeettaka mphironi, yaaphiya vanipuroni yaaraayawo maahi. Enoko* aamweerela: “Moone, va aakhala maahi. Enkooceeliha eheeni weera kipatisiwe?” 38Hiiho aalamulela weera yeemele ekaaro. Vano Filipe ni enoko* yaakhuruwela mmaahini ni Filipe aamupatisa. 39Ekhumaka mmaahini, Munepa wa Apwiya waamukuxa Filipe woowaakuveya, ni mulopwana ole khaamoonnetho. Wa soothesene, aapwaherera mukwahaawe asareiyeene ni ohakalala. 40Filipe aaphwanyiwa wAzoto, ni eetteettaka, aalaleiya masu ooreeraxa mmittettheni sootheene, mpaka ophiya oSesareya.

Currently Selected:

Miteko 8: VMK2021

Highlight

Copy