Miteko 7

Masu a Stefano muSineedriyuni*

1Mutokweenexa a asaserdoti* aamukoha: “Soowoothera iya ti sa ekhaikhai?” 2Mwa yeeyo owo aahaakhula: “Axunna ni asitiithi, mukiiwe: Muluku oovuwaxa aahiixoonihera wa atithihu Abrahaamu awo ereene nlelo oMesopotamiya, ehinaaye omaka oHara, ni aaweerela: 3‘Muhiye elapwaanyu ni emusaanyu, ni murowe wa elapo Miyo kineeraaka kiwoonihereni.’ 4Hiiho awo yaavenya elapo ya oKaldeiya ni yaamaka oHara. Vahoolo wa okhwa wa atithaya, Muluku aahaaruuha wa elapo ela mwa yeeyo nyuwo mummakaanyu vaanaano vaava. 5Khaavanghe yoohiyeriwa* hata vakhaani mweelaponi ela. Mulukutho aaroromeliha weera Abrahaamu, ni vahoolowawe ekhapiraawetho, eniiphwanye elapo ela, naamwi ehuhuweene yeele ahaakhanleno anamwane. 6Vano Muluku aamuleela moota ola: “Ekhapiraanyu eniikhale anamarwa mweelaponi mwa amalapo, ni eniikhalihiwe ipottha ni eniihooxiwe wa iyaakha miloko mixexe. 7Kinoottaruxa muloko mwa yoowo ikhapira iyo sineeraaya sirumeele ntoko ipottha, ni vahoolowaya awo eniivenye weiwo ni eniikilape mweelaponimu. 8Aamvaha Abrahaamu wiiraana wa wiineliwa. Hiiho aamuyara Isaaki, ni Abrahaamu aamwiinela eviraka mahuku mathannamararu a oyariwawawe. Vahoolowaya Isaaki aamuyara Yakobe ni Yakobe aahaayara asitokweene muloko neeli. 9Asitokweene awo emukhalelaka nrima Yoseefe, yaamuthumiha ntoko epottha ya wExipitu. Mulukutho aari ni yoowo, 10ni aamoopola wa soohooxasawe sootheene, amvahaka Yoseefe mahala ni miruku vamaithoni wa Farawu*, mwene a wExipitu. Hiiho owo aamukhaliha ntoko guvernadori a wExipitu ni a empaawe etokotoko yootheene ya mwene. 11Vahoolowaya yaakhumelela etala wExipitu wootheene ni oKanaani, eruuhaka ohaawa otokotoko, ni makholowaahu khayaaphwanya yooca. 12Iiwaka weera yaakhala etrigu wExipitu, Yakobe aahaarumiha makholowaahu wa mukwahaawe woopacera. 13Wa mukwaha wanaaveeli, Yoseefe aahaasuweliha weera owo aari munnaya, ni Farawu* aasuwelihiwatho emusaawe Yoseefe. 14Vahoolowaya, Yoseefe, aahaarumiha omuruuhela atithawe Yakobe ni amusaawe ootheene, woophiya atthu 75. 15Vano Yakobe aarowa wExipitu, weiwo okhwenlaawewo nitho vahoolowaya makholowaahu. 16Makhuvaaya yaahokoloxeriwa oSikhemi ni yaavithiwa mmahiyeni Abrahaamu aathumalaawe weiwo ni mutteengo mukina wa anamwane a Emoori oSikhemi. 17Ekhuveelaka ehuhu Muluku eeraawe akwanihere yoororomelihaawe wa Abrahaamu, aahaandyeerera vancipale, waatta wa mulokwaahu wExipitu. 18Vano, mwene mukina ahaasuwenle mwaha wa Yoseefe aapacera olamula wExipitu. 19Owo aavaanelela moota woolokottha mulokwaahu ni aahooxa makholowaahu, anyesererihaka waahiya anamwanaaya ooyariwa vaanaano weera ehikhale ni okumi. 20Ehuhuweene yeele aayariwa Moisesi, mwa yoowo aari ooreeraxa vamaithoni wa Muluku. Wa nyeeri miraru owo aahuwiwa vaate wa atithawe. 21Ahiiwakaru, mwaana muthiyana a Farawu* aamukuxa ni aamuhuwa ntoko mwanawe mwaneenaawe. 22Moisesi aaxuttihiwa ni miruku sootheene sa atthu a wExipitu, ni aari oowera mmasuni ni mmitekonimwawe. 23Akwanihaka iyaakha miloko mixexe, Moisesi aalakela orowa waaxekura axunneiye aYixrayeli. 24Amoonaka mmoha a yaawo ahasuliwaka ni ngwExipitu mukina, aamwaakiha oohasuliwa ni aamwiinlela ikuhu, amwiivaka ngwExipitu. 25Moisesi aahuupuwela weera axunneiye yeera yiiwexexe weera Muluku eera amvarelaka muteko weera aavuluxe, mene awo khayiiwexenxe. 26Oxaawaya, Moisesi aarowa wa aYixrayeli eeli yaawana, ni aaheerera owiiraaniha, eeraka: ‘Asilopwana, nyuwo muri axunna. Heeni mumvulalihanaanyu?’ 27Vano mulopwana aamuhasula mukhwaawe, aamukakha Moisesi ni aamweerela: ‘Taani ookhalihale muhooleli ni mphukaahu? 28Ontthuna okiive ntoko omwiivalaawo ngwExipitu osilo?’ 29Iiwaka yeeyo, Moisesi aatthawela oMidiya, weiwo aamakaawe, akhalaka ntoko namarwa, ni aakhalanawo anamwane asilopwana eeli. 30Siviraka iyaakha miloko mixexe, areene owo munikareni vakhiviru wa mwaako Sinayi, aahiixoonihera wa Moisesi ndyelo mmoha mmalumini a niphuwa nivarelaka. 31Oonaka yeeyo, aatikhinaxa. Vano, aattamelaka weera awehexexe, aahiiwa nsu na Apwiya neeraka: 32‘Miyo ti Muluku a makholowaanyu, Muluku a Abrahaamu, Isaaki ni Yakobe.’ Moisesi, athukumelaka ni woova, kheerera oweha. 33Apwiya yaamweerela: ‘Murule ikwakwaattasanyu, niwoko nipuro nna muraanyu ti nootteela. 34Kaahoona ohaawa wa mulokwaaka wExipitu. Kaahiiwa wiikhupanyerawaya ni kaakhuruwela weera kivuluxe. Ngwe vaanaano va, ni kinimoorumihani ohokoleela wExipitu.’ 35Ola ti Moiseseene yoowo aYixrayeli yaamukhoonttaaya ni masu ala: ‘Taani ookhalihale muhooleli ni mphuki?’ Owo aarumihiwa ni Muluku muneenaawe weera akhale muhooleli ni mvuluxaaya niwoko na ndyelo iixoonihenre wa yoowo muniphuwani. 36Owo aahaakhumiha weiwo, apakaka sootikhiniha ni ineneero wExipitu, mphareiyani yooxeera ni munikareni wa iyaakha miloko mixexe. 37Owo ti Moiseseene yoowo aaweerenle aYixrayeli: ‘Muluku anaamukhalihe variyari wa axunninyu mprofeeti ntoko miyo.’ 38Owo aakhala mmuthukumanoni munikareni vamoha ni ndyelo aamuulumenlaawe vamwaakoni oSinayi ni vamoha ni makholowaahu. Vano aakhenle masu makumi weera anileele hiyo. 39Makholowaahutho yaakhootta omwiiwelela. Ohiyanawaya, yaamukhootta, ni mmirimanimwaya yaahokoleela wExipitu. 40Awo yaamweerela Aharoni: ‘Munipakele miluku sineera sinihoole. Wa Moisesi owo aanikhumihale wExipitu, khanisuwenle emukhumelenle.’ 41Ehuhuweene yeele yaapaka muluku mukina ni ekhalelo ya emombe ekhaaneene. Yaaruuhela soovaha ni yaahakalalela yeeyo matataaya yaapankaaya. 42Mulukutho aasusa wa yaawo ni aahaaveleela olapela ithenyeeri sa wiirimu ntoko elempwalaaya mulivuruni ya maprofeeti: ‘aYixrayeli, apaale mwaaruuhela soovaha ni sooveleela wa Miyo wa iyaakha miloko mixexe munikareni? 43Hoye! Ohiyanawaya, mwaamutekela eheema Molokhi ni ethenyeeri ya muluku Refani, miluku mwaapankaanyu weera mulape. Tivawo, Miyo nkoothaamihereni mpaka mpatta mukina wa oBabiloniya.’ 44Munikareni makholowaahu yaarino etabernaakulu* ya onamoona, yaapakiwe ntoko ekhalelo Moisesi oonnaawe mwaha wa nlamulo Muluku aamvanghaawe. 45Yaavolowaaya elapo ya miloko Muluku oomonlaawe ohoolo wa aYixrayeli, makholowaahu yaakuxa etabernaakulu* emuttharaka muhooleli Yoxuwa. Etabernaakulu* ele yaakhala weiwo mpaka ehuhu ya Davide, 46mwa yoowo aaphwanya mahala vamaithoni wa Muluku, ni aamvekela Muluku weera amutthunihere oteka woomaka wa Muluku a Yakobe. 47Vaheera aari Salomoni aamupakenle empa. 48Wa soothesene, Musulusulu khammaka impa soopakiwa ni atthu. Ntoko ohimalaawe mprofeeti: 49‘Wiirimu ti ehicaaka, ni elapo nipuro na inaawosaka. Moota heeni wa empa nyuwo muneeraanyu mukipakele, aneera Apwiya, hoye hoye woowi nneeraaya nikhale nipuronaka noowiitthuuwa? 50Khanihiyono ntatanaka nipanke itthusene seiya sootheene?’ 51Muloko woohiiwelela, woohiineliwa mmirimanimwanyu ni mmaarunimwanyu! Nyuwo munoolikana ni makholowaanyu – mahuku ootheene munnakhootta Munepa Wootteela! 52Mprofeeti heeni makholowaanyu ahimusoondalaaya? Yaawiiva yaale yaahima sa orwa wa Oororomeleya, mwa Yoowo nyuwo vano mootatuxiwa anamavarihaawe ni anamwiivaawe. 53Nyuwo mwaakhenle nlamulo wa andyelo, mene khamuniiwelela.”

Ovonyiwa maluku wa Stefano

54Yiiwaka yeeyo, yaanyoonyiwa ni yaamukhuurihela maino Stefano. 55Stefanotho, oosareya Munepa Wootteela, aaweha osulu ni aahoona ovuwa wa Muluku, ni Yeesu eemenleene moono mulopwana wa Muluku, 56ni aaheera: “Moone, kinoona wiirimu woohuleya ni Mwaana a mutthu eemenleene moono mulopwana wa Muluku.” 57Vano awo yaattiyela maaru ni, ekhuwelaka ni nsu ntokotoko, ootheene yaamutuphela yoowo. 58Yaamupurulela okerekhere wa esidade, enapacera omvonya maluku. Anamoona yaahiya mikaandyosaya vamanaawoni a mmiravo iitthaniwa Sawuli. 59Emvonyaka maluku Stefano, owo aavekela eeraka: “Apwiya Yeesu, mwaakhele munepaaka.” 60Vano aakokhora ni aakhuwela: “Ohaalikeleiye mulattu wa yaawo mwaha wa yoottheka ela.” Ni ahimaka yeeyo, aahookhwa.

Currently Selected:

Miteko 7: VMK2021

Highlight

Copy