Miteko 6

Othanliwa wa adikoni* athanneeli

1Mahukweene yaale, waandyeerereyaka waatta wa oohusera, aYuda yuulumale vaGrego variyariwaya yaahaattaandawula yaale yuulumale vaHeberi, niwoko asinaamukhwelaaya yannattiwaliwa mwa sookhaviherana sa khula nihuku. 2Tivawo muloko neeli yaathukumanyinghaaya oohusera ootheene eweerelaka: “Kheehiyono etthu yooreera weera hiyo nihiye masu a Muluku weera nirumeele vameesani. 3Axunna, mwaathanle variyariwanyu asilopwana athanneeli a onamoona wooreera, oosareya ni Munepa ni a miruku. Hiyo ninrowa waakhalihera muteko ola, 4ni hiyo nniivaherera ni nthiti mmavekeloni ni mmutekoni wa masu.” 5Vano maswaaya yaahaasiveliha atthu ootheene, ni yaamuthanla Stefano, mulopwana oosareya nroromelo ni Munepa Wootteela, ni Filipe, Prokoro, Nikanori, Timoni, Parmena ni Nikolawu, oohusera mmoha a ediini ya aYuda arweelaka wAntiyokiya. 6Yaawoonihera asilopwana ale arummwa, mwa yaawo yaahaavekelela ni yaawiikaathera matata. 7Hiiho masu a Muluku yaamwareela. Wannasareya woowaakuveya waatta wa oohusera oYerusaleemu, nitho asaserdoti* ancipale yaahiiwelela nroromelo.

Ovariwa wa Stefano

8Stefano, mulopwana oosareya mahala ni ikuru sa Muluku, annapaka sootikhiniha sitokotoko ni ineneero variyari wa muloko. 9Wa soothesene, yaavenya akina a eSinagoga* yiitthaniwa ya Oneethi, eyo tiiyo aYuda a oKireene ni wAlesandriya, vamoha ni aYuda a oSilisiya ni wAsiya. Asilopwaneene yaawo yaapacera ovaanyihana ni Stefano, 10mene khayaawenre otapanyiha miruku ni Munepa mwa Yoowo owo uulumaawe. 11Vano yaahaasesera akina muxiirini weera ehime: “Noomwiiwa Stefano uulumaka masu oomuveiha Moisesi ni Muluku.” 12Ni yeeyo yaasesera muloko, asitokweene ni anamawera a nlamulo*. Emuvaraka Stefano, yaamukuxa emuronghaka oSineedriyuni*. 13Weiwo yaahiixoonihera anamoona oolokottha yeeraka: “Mulopwana ola khammaala wuulumela Nipuro Nootteela* nna ni nlamulo. 14Noomwiiwa eeraka weera Yeesu Owo oNasarete anaaphwate nipuro nna ni anaaceendye ikhovelelo Moisesi aanivanghaawe.” 15Engwehaka ole, ootheene yaakilaathiye muSineedriyuni* yaahoona weera ekhovaawe yaalikana ni ekhove ya ndyelo.

Currently Selected:

Miteko 6: VMK2021

Highlight

Copy