Miteko 5

Ananiya ni Safira

1Mulopwana mmoha iitthaniwa Ananiya, vamoha ni amwaarawe Safira, yaathumihatho ematta. 2Owo aahalano mpatta wa musurukhu, ni mpatta mukina aakuxa ni aahiikaathi vanaawoni sa arummwa. Vano amwaariye yaasuwelatho sa mpatteene yoowo. 3Pedru aamukoha: “Ananiya, heeni Satana osareiyaawe mmurimanimwanyu weera mulokotthe Munepa Wootteela, mwiithokororelaka mpatta wa musurukhu mwaakhenlaanyu wa ematta? 4Eyo khayaahiyono yawinyu? Ni muthumihakaru yeeyo, musurukhutho waari wawinyu. Ewuupuwelingheni eheeni opaka etthuweene yeeyo? Nyuwo khamwaalokontthe atthu, mene Muluku. 5Iiwakaru yeeyo, Ananiya aamorela vathi ni aahookhwa. Woova otokotoko wahaamorela yaawo ootheene yiiwale yeeyo yaakhumelenle. 6Vano amiravo akina yaarowa, enawariha erutthwaawe, enakhumihera vaate ni yaavitha. 7Siviraka iwoora tthaaru, amwaariye yaavolowa, ehisuwelaka yeeyo yaakhumelenle. 8Pedru aamukoha: “Mukileele, mwaathumihale ematta ni mutteengweene yoola?” Owo aamwaakhula: “Aani, ti yoola.” 9Pedru aamweerela: “Heeni nyuwo mwaavaanelaanyu weerera Munepa wa Apwiya? Moone, inaawo sa yaawo yaavithale aiyinyu siri vamulako, ni awo animookuxanitho.” 10Ehuhuweene yeele emoharu owo aamorela vathi ni aahookhwa. Vano amiravo yaavolowa, ni ephwanyaka muttembo, yaakuxa ni yaavitha mukerekhere wa aiyawe. 11Woova otokotoko waasareya ekerexa yootheene ni wa yaawo ootheene yiiwale wuulummwa wa sookhumelela iye.

Arummwa anaalamiha atthu ancipale

12Arummwa yaapaka ineneero ni sootikhiniha sincipale variyari wa muloko wa atthu. Ootheene yaaroromenle, yannakhovelela othukumana muntthekoni wa Salomoni. 13Wa akina, khaawo eerenre wiitakansa ni yaawo, naamwi muloko wa atthu wootheene waahima sooreera sa yaawo. 14Asilopwana ni asithiyana Yaawo yaaroromela mwa Apwiya yannaandyeerereya, 15moota wooweera muloko waakuxa aretta mmuseweni ni waawiikaathi mmabeettini ni mmarepani weera aaviraka Pedru, mano erungwaawe yaakhuneele akina a yaale. 16Yaahoorwa atthu ancipale a isidade saattamenle oYerusaleemu, yaaruuhaka arettaaya ni yaawo yaahooxiwa ni minepa soonanara, ni ootheene yaalamihiwa.

Osoondiwa wa arummwa

17Vano mutokweenexa a asaserdoti* ni ootheene yaawo yaamuhoola, yaale yaari mpatta wa aSaduki*, yaasareya nrima. 18Yaahaavara arummwa ni yaahaawalela mukaliposo mwa ebooma. 19Ehuhutho ya ohiyu, ndyelo mmoha a Apwiya aahula masele a okaliposo ni aahaakhumihera vaate, 20aweerelaka: “Murowe, mwiixoonihere Mpaani mwa Muluku, ni mwathalihere muloko mutthenga wootheene wa okumi ola.” 21Oxaawaya, yaavolowa Mpaani mwa Muluku ntoko yaalamuleliwaaya, ni yaapacera oxuttiha muloko wa atthu. Aphiyakaru mutokweenexa a asaserdoti* ni yaawo yaamuhoola, awo yaahiitthana eSineedriyu*, eyo tiiyo muthukumano wootheene wa asitokweene a aYixrayeli, ni yaalamulela waarowela arummwa okaliposo. 22Wa soothesene, ephiyakaru mukaliposo, anamalipelela khayaaphwannyemo. Vano yaahokolowa ni yaathaliha: 23“Noophwanya okaliposo olipihiweene nnenesene ni anamalipelela ohoolo wa milako, mene nihulakaru, khaawowo mutthu.” 24Yiiwalaaya ethalihero yeeyo, mutokweene a anakhotto a Empa ya Muluku ni ahooleli a asaserdoti* yaatikhina, yuupuwelaka yaari eheeni yeele. 25Wa yeeyo, aaphiya mukina ni aaheera: “Asilopwana nyuwo mwaawalenlaanyu okaliposo ari Mpaani mwa Muluku, exuttihaka muloko wa atthu.” 26Arowaka weiwo ni asitokweene akina a anakhotto, mutokweene a anakhotto aahaakuxa arummwa aaronghaka oSineedriyuni*, mene khayaakuxera ikuru, niwoko yoova weera muloko wa atthu oniwaavonye maluku. 27Yaakuxaka arummwa, yaahaarongha oSineedriyuni* weera ekohakohiwe ni mutokweenexa a asaserdoti*, 28mwa yoowo aaweerenle: “Nohoolamulelani nnenesene weera muhixuttihe mwa Nsina nne. Wa soothesene, nyuwo moosariha oYerusaleemu ni nihusihonanyu, ni muntthuna onoothera ephome ya Mulopwana Owo.” 29Pedru ni arummwa akina yaamwaakhula: “Ontthuneya omwiiwelela toko Muluku, ohikhanle wa atthu. 30Muluku a makholowaahu aamuvenyereriha Yeesu, mwa Yoowo nyuwo mwaamwiivalaanyu, munthomeyaka vamuttandani. 31Muluku aamvuwiha, amwiikaathiki moonowaawe mulopwana ntoko Mutokweene ni Mvuluxa, weera aavahe aYixrayeli orukunxa murima ni elevelelo ya soottheka. 32Hiyo nri anamoona a itthusene seiya, nitho Munepa Wootteela Muluku aavanghaawe yaale ammwiiwelela.” 33Yiiwaka yeeyo, awo yaanyoonyiwa vancipale ni yaatthuna owiiva. 34Vano muFarisi* mmoha iitthaniwa Gamaliyeli, namawera a nlamulo* ni oottittimihiwa ni muloko wootheene, aaheemela muSineedriyuni* ni aavekela weera arummwa ekhumihiwe wa ehuhu vakhaani. 35Vano aaweerela: “aYixrayeli, muupuwele nnenesene yeeyo nyuwo muntthunaanyu waapakela atthu awo. 36Wa ehuhu ya khalayi vakhaani, aahoorwa Theuda eeraka weera ti mutokweene mukina, ni wookwanaka asilopwana macira maxexe yaathukumana vamoha ni yoowo. Owo aahiiviwa, ni ootheene yaamutthara yaamwareiya, ni sootheene saamala siiyoweene. 37Vahoolowawe, wa mahukuni a namalepela aahoorwa Yudasi muGalileiya, aahoolenle atthu akina weera ewane. Owo aahiiviwatho, ni ootheene yaamutthara yaamwareiya. 38Tivawo, mwaha wa atthu awo ari vaate, miyo kinimoolakani: Mwaahiye ni murettele asilopwana awo, ni mwaataphule. Waari weera otthunawaya ni mitekosaya siri sa omutthu, sinoomala, 39mene sakhumelela wa Muluku, nyuwo khamungwera owooceeliha, ni munookhala ngwoopihani owana ni Muluku.” 40Awo yaaviriyeliwa ni masu a Gamaliyeli. Yaawiitthana arummwa ni yaalamulela weera ewaaxuliwe. Vahoolowaya yaahaalamulela weera ehuulume mwa Nsina na Yeesu, ni yaahaahiya erowaka. 41Arummwa yaavenya oSineedriyuni*, ehakalanleene yaaphwanelihiwa oyevihiwa niwoko na Nsina na Yeesu. 42Mahuku ootheene Mpaani mwa Muluku ni empa ti empa, awo khayaahiya oxuttiha ni olaleiya weera Yeesu ti Kristu.

Currently Selected:

Miteko 5: VMK2021

Highlight

Copy