Miteko 4

Pedru ni Yohaane ohoolo wa eSineedriyu*

1Asaserdoti*, muhooleli a anakhotto a Empa ya Muluku ni aSaduki* yaamwaattamelaaya Pedru ni Yohaane, awo yeera yuulumaka ni muloko wa atthu. 2Awo yaanyoonyiwa vancipale niwoko arummwa yaaxuttiha muloko wa atthu ni yaalaleiya weera mwa Yeesu wookhala ovenyererihiwa wa akhwiiye. 3Yaamvara Pedru ni Yohaane ni, weenre wiilaka, yaahaawalela okaliposo mpaka oxaawaya. 4Ancipale a yaawo yiiwale mutthenga yaaroromela. Vano asilopwana oororomela ootheene yaari macira miloko mithanu. 5Oxaawaya ahooleli a aYuda, asitokweene ni anamawera a nlamulo* yaathukumana oYerusaleemu. 6Yaari iwe Hana, mutokweenexa a asaserdoti*, nitho Kayafasi, Yohaane, Alesandere ni ootheene akina yaari a emusi ya mutokweenexa a asaserdoti*. 7Aalamulelakaru eeli awo weemela, awo yaapacera waakohakoha eeli ale yeeraka: “Ni ikuru heeni, hoye hoye mwa nsina nawani nyuwo mumpakaanyu yeeyo?” 8Vano Pedru, asareiyeene Munepa Wootteela, aaweerela: “Ahooleli a aYuda ni asitokweene a muloko! 9Woonaka weera olelo hiyo nohiitthaniwa weera naakhule mwaha wa muteko wooreera woonihereiye wa oorakala, nikohakohiwaka mwaha wa moota owo olamihingwaawe, 10musuwele nnenesene yeeyo, asipwiiya ni muloko wootheene wa oYixrayeli: Mulopwana owo ori vawo oolamihiwa ohoolo wa asipwiiya niwoko na Nsina na Yeesu Kristu a oNasarete, mwa Yoowo nyuwo mwaamuthomeiyaanyu, mene Muluku omvenyereringhaawe mookhwaani. 11Yeesu Owo ti ‘nluku nyuwo anamateka mwaakhoonttaanyu, ni naathatungwe nluku nootthuneyaxa.’ 12Khoowowo ovuluxiwa mwa mukina. Khaniwowo nsina nikina nivahiwe wa atthu mwa nenno ontthuneya weera ninivuluxe.” 13Yoonaka olipa murima wa Pedru ni Yohaane, ni esuwelaka weera khayaahiyono atthu oolepiweene, mene oohixuttihiwa, yaatikhina, ni yaasuwela weera awo yaakhala vamoha ni Yeesu. 14Ni emoonaka iwe ni yaawo mulopwana oolamihiwa, khayaawenre ohima etthu yoowoothera. 15Hiiho yaahaalamulela okhumela vaate wa eSineedriyu*, ni awo yaapacera wiiwanana yaaworu, 16yeeraka: “Nneereke hai ni asilopwana awo? Ootheene ankhala oYerusaleemu ansuwela weera awo aapaka yootikhiniha yoowooneya, ni hiyo khaningwera okhootta. 17Wa soothesene, weera ohiweereiye wiiwanyeyaxa variyari wa muloko, ontthuneya weera niwooperere asilopwana awo weera ehaaleele akina mwa Nsina nna.” 18Vano, ewiitthanaka veeli, yaahaalamulela weera ehileele, naari ehixuttihe mwa Nsina na Yeesu. 19Pedrutho ni Yohaane yaawaakhula: “Muupuwele nnenesene asineenaanyu, asipwiiya, weera waari wooreera vamaithoni wa Muluku wiiwelela yeeyo nyuwo muntthunaanyu, ohikhanle omwiiwelela Muluku. 20Khaningwera ohiya wuuluma sa seiyo noonnaahu ni niiwalaahu.” 21Vahoolo wa soowoopopiha sikina, awo yaahaahiya erowaka. Khayaaphwannye moota woowaattaruxa, niwoko atthu ootheene yaamutthapela Muluku wa yeeyo yaakhumelenle. 22Vano, mulopwana aalamihiwe moota wootikhiniheya, aarino iyaakha soopwaha miloko mixexe.

Nivekelo na aKrisu oopacera

23Ataphuliwakaru, Pedru ni Yohaane yaahokoleela wa asikhwaaya ni yaahaathalihera sootheene ahooleli a asaserdoti* ni asitokweene yaaleenlaaya. 24Yiiwaka yeeyo, ootheene yaamvekela Muluku yeeraka: “Muluku onlamula soothesene, Nyuwo moopaka wiirimu, elapo ya vathi, ephareiya ni sootheene siri mwemmo! 25Nyuwo mwaahuuluma mwa Munepa Wootteela ni eyano ya murumeiyaanyu, atithihu Davide, mweeraka: ‘Heeni anyoonyiwaaya amalapo ni simvaanelaaya sa siiyo miloko sa atthu? 26Mamwene a elapo ya vathi animweemela, ni asitokweene anoothukumana weera yiittane ni Apwiya ni Kristwaaya.’ 27Mwa yeeyo, Herodi ni Ponto Pilatu yaathukumana vamoha ni amalapo ni muloko wa aYixrayeli musidadeni yeela, weera emvaanelele Yeesu, mwa Yoowo munttikitthenlaanyu. 28Awo yaapaka yeeyo Nyuwo mwaalakenlaanyu mwa ikurusanyu ni otthunawanyu khalayi weera ekhumelele. 29Vano, Apwiya, muupuwele soowoopopihasaya, ni mwaawerihe arumeiyaanyu weera elaleiye maswaanyu ni murima woolipa. 30Mookole ntatananyu weera mulamihe ni mupake ineneero ni sootikhiniha muNsinani na Murumeiyaanyu Ootteela, Yeesu.” 31Amalihaka ovekela, naathukumela nipuru nne yaathukumannaaya. Ootheene yaasareya ni Munepa Wootteela ni yaalaleiya masu a Muluku ni murima woolipa.

Oohusera ankawana sooreelasaya

32Ootheene a atthu ancipale yaaroromenle, yaakhala oowiiwananeene, ni yaarino muupuwelo mmoha ni murima mmoha. Khaawo aarino sooreelasawe mwaneenaawe yoowo paahi, mene yaakawana sootheene yaarinaaya. 33Arummwa yannapwaherera ni ikuru sitokotoko okhalela onamoona mwaha wa ovenyerera wa Apwiya Yeesu, ni mahala matokweene yaari ni yaawo ootheene. 34Khayaawowo atthu oohaawa variyariwaya, niwoko yaawo yaarino imatta, hoye hoye impa yaathumiha, yaaruuha musurukhu wa yoothumiha 35ni yaahiikaathi vanaawoni sa arummwa, enakawana ntoko yeeyo mutthu aahaawelaawe. 36Yoseefe, muLeevi aayariwe oKipro, yoowo arummwa, yaamvanghaaya nsinanawe Barnaba (eyo tiiyo mwaana a nipempeso), 37aathumiha ematta emoha aarinaawe, anaruuha musurukhu ni aahiikaathi vanaawoni sa arummwa.

Currently Selected:

Miteko 4: VMK2021

Highlight

Copy