Miteko 3

Pedru onimulamiha namavekela ooheetta

1Nihuku nimoha Pedru ni Yohaane yaarowa Empa ya Muluku ehuhu ya nivekelo, eyo tiiyo ehuhu ya oxekuwa. 2Vano, aakhala mutthu mmoha aarakanle eyareliwaawe, aaronghiwa vaavaale khula nihuku ni iikaathiwaka vamulako wa Empa ya Muluku wiitthaniwa Wooreeraxa, weera aavekele sooveka yaawo yaavolowamo. 3Oonaka weera Pedru ni Yohaane yeera evolowe, aahaavekela sooveka. 4Pedru ni Yohaane yaangwehexexa nnenesene, ni vano Pedru aamweerela: “Muniwehe hiyo.” 5Mulopwana ole aahaawehexexa nnenesene, awehereraka wa yaawo waakhela etthu. 6Pedru aamweerela: “Nkinono musurukhu, mene yeeyo kiraakano, kinimoovahani. Mwa Nsina na Yeesu Kristu oNasarete, mweette.” 7Amvarelaka ni ntata na moono mulopwana, aamukhavihera weemela, ni woowaakuveya inaawo ni itthottopwasawe saalipa. 8Vano aaheemela, anatupha, anapacera weetta. Vahoolowaya aavolowa ni yaawo Mpaani mwa Muluku, eettaka, atuphaka ni amuttottopelaka Muluku. 9Omoonaka muloko wootheene owo eettaka ni amuttottopelaka Muluku, 10waasuwela weera ti yoole mulopwana aakhovelela ovekela sooveka, akilaatheene vamulako wa Empa ya Muluku wiitthaniwa Wooreeraxa. Ootheene yaatikhinaxa vancipale wa yeeyo yaamukhumelenle.

Olaleiya wa Pedru Mpaani mwa Muluku

11Amvaraka namavekela Pedru ni Yohaane, muloko wootheene waatikhina ni waahaatthimakela yaawo mpaka nipuro niitthaniwa mulako wa Salomoni. 12Oonaka yeeyo, Pedru aaweerela: “aYixrayeli, heeni ela enootikhinihaayani? Heeni nyuwo munniwehexexaanyu hiyo ntoko hiyo niwenre omweettiha mulopwana ola ni ikurusahu asineenaahu, naari ni murimaahu wa omuluku? 13Muluku a Abrahaamu, Isaaki ni Yakobe, Muluku a makholowaahu, aamvuwiha murumeiyaawe Yeesu. Ti nyuwo mwaamvaherenre weera akhwe ni ti nyuwo mwaamukhoontte vamaithoni wa Pilatu, naamwi owo alakelaka omutaphula Yeesu. 14Nyuwo mwaamukhootta Ootteela ni Oororomeleya, ni mwaamvekela weera mutaphuleliwe namwiiva. 15Nyuwo mwaamwiiva Mwaneene a okumi, mene Muluku aamvenyereriha mookhwaani. Hiyo nri anamoona a yeeyo. 16Ti niwoko na nroromelo mwa Nsina na Yeesu, Owo omulamihalaawe mulopwana ola nyuwo mummoonaanyu ni munsuwenlaanyu. Nroromelo ninrwa wa Yoowo noomvaha ola mpuha wookwanela, ntoko ootheene mungweraanyu woona. 17Axunnaka, koosuwela weera nyuwo vamoha ni asitokweenaanyu mwaapanke yeeyo niwoko na ohisuwelawanyu. 18Waaritho hiiho Muluku okwanihenraawe yeeyo aahimalaawe khalayi ni iyano sa maprofeeti ootheene, yeeraka weera Kristwaawe eera ahaawe. 19Vano, murukunxe mirimasanyu ni muhokoleele wa Muluku weera sootthekasanyu sikhale soomalihiwa, 20weera ephiye ehuhu ya wiitthuuwa, nitho weera Owo amurumihe Yoowo mukhaliheriwaanyu Kristu, eyo tiiyo Yeesu. 21Ontthuneya weera Owo akhale wiirimu, mpaka ophiya ehuhu Muluku aneeraawe areherere itthu sootheene, ntoko aahimalaawe khalayi ni iyano sa maprofeeti ootteela. 22Vano Moisesi aaheera: ‘Apwiya Mulukwaanyu animookhaliherani variyariwanyu mprofeeti ntoko miyo. Mmwiiwe sootheene seiyo Owo aneeraawe ooleeleni. 23Yoowo aneera ahimwiiwe Mprofeeti Owo, anaavenxiwe variyari wa mulokwaawe.’ 24Mwa yeeyo maprofeeti ootheene okhuma Samuweli mpaka ohoolo, khula mutthu a yaawo, yaahima sa mahuku ala. 25Ni nyuwo muri anamwane a maprofeeti ni a wiiraana Muluku aapankaawe ni makholowaanyu. Owo aamweerela Abrahaamu: ‘Niwoko na ekhapiraanyu miloko sootheene sa elapo ya vathi nsireelihiwe.’ 26Muluku amvenyererihaleene murumeiyaawe, ohoorumihelani toko nyuwo weera ooreeliheni oorukunxakani nyuwo ootheene wa sootakhalasanyu.”

Currently Selected:

Miteko 3: VMK2021

Highlight

Copy