Miteko 2

Orwa wa Munepa Wootteela nihuku na Pentekoste*

1Niphiyaka nihuku na Pentekoste*, ootheene yaathukumana vanipuroni nimoha. 2Wootutuxereya waarweela wiirimu oruma ntoko wa ettheku, ni waasareya empa yootheene ale yaakilaathiyaaya. 3Yaahoona itthu soolikana ntoko malumi a mooro, ekawanyeyaka ni nlumi ti nlumi naammorela mmurumwawe mutthu ti mutthu a yaawo. 4Ootheene yaasareya ni Munepa Wootteela ni yaapacera wuuluma muulumo makina ntoko Munepa waavanghaaya wuuluma. 5Vano, yaakhalawo oYerusaleemu aYuda, atthu emoovaka Muluku, erweelaka wa miloko sootheene sa elapo ya vathi. 6Yiiwaka oruma iwe, yaathukumanawo atthu ancipale ni yaatikhina niwoko khula mutthu aahiiwa uulumaka nuulumonaweru mwaneenaawe. 7Etutuxiweene ni etikhinihiweene, yaakohana: “Moone, khaahiyono aGalileiya ootheene ala anuuluma? 8Vano, ongwereya hai khula mutthu a hiyo oniiwa yaawo yuulumaka nuulumonahu niyariwaahuno? 9Hiyo aParti, aMedi, awElamiti ni yaale ankhala oMesopotamiya, oYudeiya, oKapadosiya, oPonto ni wAsiya, 10oFrisiya, oPanfiliya, wExipitu ni mipatta sa oLibiya, waattamela oKireene, aletto erweelaka wa oRooma, 11aYuda nitho yaale antthara ediinaaya, aKreti ni awaRabiya. Hiyo ningwiiwa elaleiyaka miteko sitokotoko sa Muluku ni nuulumonahu asineenaahu!” 12Etutuxiweene ni etikhinihiweene, ootheene yaakohana mukina ni mukhwaawe: “Entaphulela eheeni ela?” 13Wa soothesene, akina a yaawo yaahaatheiya, yeeraka: “Awo aawuraxa eviinyu.”

Olaleiya wa Pedru

14Vano Pedru aaheemela vamoha ni muloko nimmoha, ni aaweerela atthu ancipale, akhuwelaka: “Atthu a oYudeiya ni ootheene ankhala oYerusaleemu, mukihiye koothalihereni yeeyo! Mwiiwe nnenesene! 15Asilopwana ala khaahapaliwe ntoko nyuwo munuupuwelaanyu. Nlelo ela ehuhu yooxeexelo! 16Ohiyanawaya, ela ti yeeyo yaahimmwale ni mprofeeti Yoweli: 17‘Mahuku ookisera, Muluku eenre, nkihelele Munepaaka miloko sootheene. Anamwanaaya asilopwana ni asithiyana eniithalihe otthuna wa Muluku; amiravo eniyoone nyoonelo ni asitokweene eniilohe sooloha. 18Mahukweene yaawo nkaahelele Munepaaka arumeiyaaka asilopwana ni asithiyana, ni awo eniithalihe otthuna wa Muluku. 19Nkoonihere sootikhiniha wiirimu ni ineneero vathi va, ephome, mooro ni mahutte a mwiixi. 20Nsuwa nnithatuwe epiphi, ni mweeri onuuthatuwe ephome nihinaaye ophiya nihuku ntokweene ni noovuwaxa na Apwiya. 21Ni khula mutthu aniitthane Nsina na Apwiya, anaavuluxiwe.’ 22aYixrayeli, mwiiwe masu ala: Muluku aamwaakhulela Yeesu a oNasarete vamaithoniwanyu niwoko na sootikhiniha, ikuru ni ineneero Muluku aapakaawe variyariwanyu mwaha wa Yeesu, ntoko nyuwo munsuwenlaanyu. 23Muluku aalakela ni aalamulela khalayi weera Mulopwana Owo muvahereriwaanyu nyuwo ni ekhavihero ya atthu ootakhala. Vano mwaamwiiva, munkhomelaka vamuttandani. 24Vaheera Muluku oomuvenyereriha mookhwaani, amutaphulaka wa ovoreiya wa okhwa, niwoko khawaawereya weera okhwa omvare. 25Davide eenre mwaha wa Yoowo: ‘Miyo kingwoona mahuku ootheene Apwiya ohoolowaka. Awo ari moonowaaka mulopwana, tivawo miyo kihinttikinyiwaaka. 26Tivawo murimaaka woohakalala ni nluminaka nootthapa; erutthwaakatho eniikhale ni oweherera, 27niwoko nyuwo khamukihiya kirowaka oHadesi*, hata khamutthunihera weera Ootteelaanyu untte. 28Nyuwo mookisuweliha iphiro sa okumi ni mmwikisarihe ni ohakalala vamaithoniwanyu.’ 29Axunnaka, kinoowera wooleelani ni ekhaikhai weera mutokweene Davide aahookhwa, ni aavithiwa ni nihiyenawe nri variyariwahu mpaka nihuku na olelo. 30Vano owo aari mprofeeti ni aasuwela weera Muluku aamuroromeliha ni nlipelo weera eera aamwiikaathi mmoha a ekhapiraawe vahiceniwawe. 31Asuwelaka yeeyo ehinaaye okhumelela, owo aahuuluma sa ovenyerera wa Kristu, Yoowo ohihiiwe munihiyeni ni erutthwaawe kheehaangwe ni wunnta. 32Muluku oomuvenyereriha Yeesu Owo, ni hiyo ootheene nri anamoona a etthweene yeeyo. 33Avuwihiweene moono mulopwana wa Muluku, Owo aahaakhela wa Atiithi Munepa Wootteela woororomelihiwa, ni ooyeeha Yoowo ntoko nyuwo vano munoonaanyu ni muniiwaanyu. 34Vano, Davide khaawenle wiirimu, mene owo mwaneenaawe aahima: ‘Apwiya yaaweerenle Apwiyaaka: Mukilaathiki moonowaaka mulopwana 35mpaka miyo kineeraaka kiwiikaathi amwiittanaanyu vathi wa inaawosanyu.’ 36Tivawo aYixrayeli ootheene esuwele nnenesene yeeyo: Yeesu Owo nyuwo mwaamuthomeiyaanyu, Muluku oompaka Apwiya ni Kristu.” 37Yiiwakaru yeeyo, awo yaahoopopiheya ni yaamukoha Pedru ni arummwa akina: “Axunna, nneereke hayi?” 38Pedru aawaakhula: “Murukunxeke mirimasanyu, ni mutthu ti mutthi a nyuwo apatisiweke mwa Nsina na Yeesu Kristu wa elevelelo ya sootthekasanyu, ni mmwaakhele mahala a Munepa Wootteela. 39Vano, yoororomelihiwa ela ti yawinyu, ya anamwanaanyu ni ya ootheene ari ottaiwene, ya ootheene yaawo Apwiya Mulukwaahu eneeraaya ewiitthane.” 40Ni masu mancipale makina owo aawooperera ni aahaanyeserera awo: “Mwiivuluxe wa ekhapira ela yootakhala.” 41Yaawo yaakhulenle mutthengaawe, yaapatisiwa, ni nihuku nne yaahaandyeerereya wookwanaka atthu macira miloko miraru.

Wiiwanana wa aKristu

42Awo yaakhala ni nthiti mwaha wa nihusiho na arummwa, wiiwanana, omeyanya wa epaawu ni mmavekeloni. 43Ootheene yaasareya ni woova ni sootikhiniha, ni ineneero sincipale saapakiwa ni arummwa. 44Ootheene yaawo yaaroromela yanniiwanana, ni yaarino sootheene vamoha. 45Ethumihaka imatta ni itthusaya, awo yaakawana mutthu ti mutthu ntoko aahaawelaawe. 46Mahuku ootheene yannapwaherera othukumana Mpaani mwa Muluku. Yannakawana sooca mmawannyaya ni yannaca vamoha ni ohakalala ni murima wootheene, 47emuttottopelaka Muluku ni yaakhuleliwaka ni muloko wa atthu wootheene. Ni nihuku ti nihuku Apwiya yannawaandyeerera yaawo Muluku aavuluxaawe.

Currently Selected:

Miteko 2: VMK2021

Highlight

Copy